Lii pakasame lula-nèti dhèu dhu sab'a oka anggor
20
Èle èèna, ka Yesus aj'a peka na, “Paredha Ama Lamatua èci èèna ka dènge lii pakasame ne: abhu ca dhèu lamatua oka anggor, dhu kèd'i mad'ae aae d'ara hake èna sa. Na la'e tenge dhèu sèna ka sab'a ètu d'ara oka na. 2 Na abhu dhèu sab'a, hèia rare lii èci, ho sab'e d'ara ca lod'o, bab'ae na, ca doi iia.a Dhèu se d'èi kahèi, ka lamatua oka ne pua lasi sab'a. 3 Pe d'ara hake ceo sa, la'e asa d'ara pasa. Ètu era nèi, nèngu paraga dènge dhèu pèri-pèri dhu madhèdi iia d'ara. 4 Hèia na lii dènge ra, ‘Miu se neo sab'a ètu d'ara oka ja'a, do? Pe ja'a b'ae miu madhutu kab'ua dhu lèke.’ Ropa tadèngi rare, ro'o kahèi, hèia lasi dènge ka sab'a. 5 D'ai lod'o titu mera sa, dènge hake tèlu lod'o nihia, lamatua oka ne la'e tenge hari dhèu sab'a. 6 D'ara hake lèmi lod'o nihia sa, la'e hari. Na laladhe, na, abhu dhèu dhu titu iia d'ara era. Ka na lii dènge ra, aku nèngu na, ‘Nga tao ka karèi nèti mad'ae toke sange ne'e ne, miu se titu iia d'ara, sab'a boe ngaa-ngaa?’7 Ka dhèu se dhaa, peka na, ‘Ama, ee! Abhu boe ca dhèu sa dhu hia ji'i sasab'a.’
Ka lamatua oka ne peka, ‘Ladhe sèmi èèna, lami sab'a asa d'ara oka ja'a!’
8 Toke d'ai èle jam sab'a, hèia lamatua oka ne pua madho na, peka na, ‘Paroa dhèu sab'a se, sèna ka b'ae rui sasab'a ra èci-èci. Mulai nèti dhèu sab'a limuri tèka, toke dhèu sab'a uuru.’b
9 Ka madho ne paroa uuru dhèu dhu sab'a hake lèmi nihia. Na b'ae si ca dhèu, ca doi iia. 10 Èle ka, na paroa dhèu sab'a dhu leo sèra, toke dhèu dhu sab'a mulai nèti hake èna mad'ae deo na. Dhèu se, pangee na, ele boe rèngu abhu risi nèti dhèu dhu sab'a hake lèmi nihia. Re'a boe na, rèngu abhu kahèi ca dhèu, ca doi iia. 11 Ropa ra sèmi rare, hèia ra ka'ugu dènge lamatua oka èèna, aku rèngu na, 12 ‘Ira, iii! Bisa boe sèmi ne'e, ama! Rèngu dhu mai limuri tèka, dhoka sab'a ca jam di. Te ngaa ji'i dhu karèi mad'ae aae ka, sab'a toke èi kabhèsu hae! Te ngaa tasamia ka ama b'ae ji'i èci èèna ka dènge rèngu se?’
13 Hèia lamatua oka ne dhaa, na, ‘Angalai! Ja'a tipu boe èu. Lula èu mesa mu mo'o kahèi sab'a ètu d'ara ca lod'o dhu bab'ae na ca doi iia. Tare'a si? De ja'a b'ae madhutu sèmi lii pama'ète èdhi dua ti, si? 14 De be'a risi more doi j'aj'èra èu ho lèpa ka. Ladhe ja'a neo b'ae mi dhèu dhu sab'a limuri tèka nèti èu, èci èèna ka dènge ja'a neo b'ae èu, èèna na madhutu dad'èi ja'a. 15 Lula doi-dhari ja'a, ja'a bisa pake madhutu dad'èi d'ara ja'a. Tasamia ka, angalai nasa lula babe'a d'ara ja'a?’
16 Sèmi èèna kahèi, lod'o Ama Lamatua j'aj'i Dhèu Aae mi dhèu aa'i-aa'i. Na pala-bagi hia dhèu-dhèu unu Na, madhutu dad'èi d'ara Na. De dhèu dhu mai limuri tèka, èèna na abhu pala sama sèmi dhèu dhu mai uuru. Aa dhèu dhu mai uuru, pe na abhu pala nuka sèmi dhèu dhu mai limuri tèka.”c
Lamatua Yesus peka mema j'ara mamadhe Na d'ai ka tèlu hari kèna
17 Èle ka, Yesus si mulai lasi asa Yerusalem. Ètu talora j'ara Na paroa ana madhutu Na, sèna ka rèngu mesa ra di. Ka Na lii hari, peka na, 18 “Mi nanene paie! Ne'e ne, èdhi lati asa Yerusalem. Te ngaa ètu nèi dhèu pahie Ja'a, Dhèu Rai-haha Tare'a-re'a ne, asa kètu agama Yahudi dènge mese agama sèra. Èle èèna, ra huku pamadhe Ja'a. 19 Hèia ra soro Ja'a asa dhèu leo rai kara dhu tadhe boe Ama Lamatua. Ka ra padhai lii pamakae Ja'a, aa ra hake paru isi Ja'a. Èle èèna, heka ra paku pamadhe Ja'a ètu aj'u palolo-palèbha. Ja'a tare'a-re'a madhe, te ngaa asa camèd'a èèna, Ja'a mamuri hari.”
Ina Yakobis dènge Yohanis manèngi sèna ka ded'e ana-ana na j'aj'i dhèu kapai
20 Hèia dhèu èmu Sabadeus palere-lere dènge ana na, Yohanis dènge Yakobis, lasi paraga dènge Yesus. Ka na patitu kètu urutuu ho neo pamako Yesus.
21 Ka Yesus karèi ne, “Mama neo ngaa?”
Hèia na dhaa, “Sèmi ne'e, Ama! Lod'o Ama mèd'u paredha, ja'a manèngi sèna ka Ama ded'e ana ja'a dhèu dua se rèd'u paredha sama-sama dènge Ama. Ja'a manèngi ho Ama hia ca dhèu madhèdi re baboa g'ana, aa ca dhèu re baboa kariu Ama.”
22 Ropa tadèngi lii manèngi ne, hèia Yesus peka Yakobis dènge Yohanis, na, “Miu se, me'a boe ngaa dhu miu manèngi. Te bèli-camèd'a Ja'a abhu j'aj'èra ae-ae. De tasamia? Miu pangee na, miu bisa pasae kahèi j'aj'èra se, sama-sama dènge Ja'a, do?”
Dua ra dhaa dhu dènge boe pake ngangee, aku rèngu na, “Oo, bisa, Ama!”
23 Ka Yesus lii dènge ra, “Mema, èèna na miu pasae j'aj'èra kahèi sèmi Ja'a. Te ngaa bèli-camèd'a cee ka dhu madhèdi ètu baboa g'ana do kariu Ja'a, Ja'a dènge boe hak ho pama'ète. Èèna hak Ama Lamatua. Na pama'ète nare le, cee-cee ka dhu madhèdi ètu era sèra.”
24 Ropa ana madhutu dhèu canguru sèra tadèngi lii manèngi dua ra, hèia ra nasa. 25 Te ngaa Yesus paroa nare si aa'i-aa'i ra, hèia Na peka, “Sèmi ne'e! Miu dhu me'a le, si? Dhèu aae-dhèu kapai dhu rèd'u paredha, ènyi kabarai ra toke ra bisa boe kalau sa kahèi. Aa dhèu kapai kabarai ètu rai-haha ne, dhu tadhe boe Ama Lamatua, hia paredha risi eele, toke kabarai ra abhu boe d'oa kètu ciki sa. 26 Te ngaa baku miu tao sèmi èèna! De nèti miu se cee ka dhu neo j'aj'i dhèu aae-dhèu kapai, nèngu hud'i j'aj'i ku nuka sèmi ènu, sèna ka lalau dhèu leo.d 27 Aa cee dhu neo j'aj'i kètu, nèngu hud'i tao iisi na nuka sèmi ènu.e 28 Nanene! Ja'a sèmi èèna kahèi. Ja'a, Dhèu Rai-haha Tare'a-re'a ne, mai sèna ka ladhe-leru dhèu. Ja'a mai boe, sèna ka dhèu lalau-lalo'o Ja'a. Te mamai Ja'a ne, sèna ka soro ngi'u Ja'a kateme iisi, ho sui dhèu ae nèti sasala-sasigo ra.”
Lamatua Yesus puri-pa'èle dhèu bèdhu
29 Ka Yesus si kako taruu. Ropa rèngu kalua nèti kota Jeriko, dhèu ae dhu madhutu rèngu. 30 Ètu èèna, abhu dhèu bèdhu dhèu dua dhu madhèdi ètu sebhe j'ara. Ropa dua ra tadèngi na, Dhèu dhu kako re èèna, nuka Yesus nèti Nasaret, hèia ra parodha, peka na, “Ama! Ana-èpu Daud! Ji'i se dhu tatae Ama, karèi nèbhu ka! Sue ku ji'i la!”
31 Ropa dhèu tadèngi ra parodha sèmi èèna, ka ra kai si, aku rèngu na, “Hee! Miu dua mi baku maruru!”
Te ngaa dua ra asa hino, peka na, “Ama! Ana-èpu Daud! Sue ku ji'i la!”
32 Ropa Yesus tadèngi lii paroa ne, hèia Na titu, ka karèi si, peka na, “Miu se neo sèna ka Ja'a tao ngaa hia miu?”
33 Ka dua ra dhaa, na, “Ama! Hia la ji'i se bisa ngèdhi!”
34 Tadèngi lii dhaa dua ra, hèia Yesus rasa kasia. Ka Na g'ag'e musi madha ra, hèia dua ra rèdhi dènge ka. Èle ka, dua ra lasi dènge madhutu Yesus.