3 Ropa tadèngi sèmi èèna, ka Yesus lolo dènge ra lii pakasame èci, aku Nèngu na, 4 “Ladhe nèti miu abhu ca dhèu dhu unu kahib'i-kalèbho cangasu ngi'u. Ka ci'u ele. Na tao tasamia? Tatu na tèke eele dhu ceo nguru ceo se ètu era dhu be'a, aa la'e tenge dhu ele deo na, toke rage ne. 5 Ropa nèdhi hari kahib'i-kalèbho ne, ka na pasae nèti, dènge karej'e-karae. 6 D'ai èmu, ka na paroa angalai na aa'i-aa'i, hèia na peka dènge si, ‘Mai, sèna ka karej'e dènge ja'a! Te kahib'i-kalèbho ja'a dhu ele èèna, kèdhi hari le.’ 7 Ètu sorga, sèmi èèna kahèi. Ladhe ca dhèu dhu tao sala, hèia ele-ho'a, ka na lèpa hari asa Lamatua, ana kabarai sorga aa'i-aa'i ra karej'e-karae. Rèngu karej'e risi lula ca dhèu dhu lèpa hari asa Lamatua, nèti ceo nguru ceo dhèu dhu mamuri mola, dhu sala boe j'ara.”

8 Ka Yesus lolo hari lii pakasame dhu leo èci, peka na, “Abhu ca dhèu ina, dhu doi iia na canguru bua.^b Ne'a na, dhu ele ca doi. Ka na tao tasamia? Tatu la'e suru labhu ho d'elo palème era, aa saku èmu ne d'ai ro'a kakilu, sèna ka tenge doi cue dhu ele ne. 9 Ropa nèdhi hari doi ne, na paroa dènge dhèu dhu ètu baboa èmu na sèra, hèia na peka, aku nèngu na, ‘Miu mai, ho karej'e sama-sama dènge ja'a. Te doi ja'a cue dhu ele deo na, kèdhi hari le!’ 10 Ètu sorga sèmi èèna kahèi. Ladhe abhu ca dhèu dhu tao sala, ka na ele-ho'a, ho lèpa hari asa Ama Lamatua, tatu ana pajuu ètu sorga aa'i-aa'i ra karej'e-karae.”

11 Hèia Yesus tuhu hari lii padhai Na dènge lii pakasame kahèi, peka na, “Ama ca dhèu dènge ana mone na dhèu dua. 12 Ca lod'o, ana limuri peka dènge ama na, aku nèngu na, ‘Ama! Hia ka pala ja'a nèti pusaka sèra, deo ne'e ne kahèi!’ Hèia ama na bagi hia dua ra pusaka na, sèna ka èci-èci dènge pala ra. 13 Nèbhu boe ka ana limuri ne pahie unu na. Hèia na lalau mèdha na, ka la'e asa rae kaj'èu. Ètu era nèi, ana limuri ne pasaku aa'i-aa'i doi-dhari na, ho pakarej'e iisi. 14 Ropa doi na èle aa'i mèu-mèu, rai ne dhu lèke manganga bia, ka mamuri ana ne j'èra d'ai seli. 15 Ka la'e tenge sasab'a. Hèia ca dhèu nèti kabarai èèna hia na panga'a hahi. 16 Lula ana ne manganga d'ai seli, ka neo na'a nganga'a hahi se. Te abhu boe ca dhèu sa hia ne na'a.

17 Nèbhu-nèbhu, ka na pangee la'e-mai, aku nèngu na, ‘Anga ee! Ja'a ètu ne'e, oe madhe manganga kèna. Te ngaa ètu d'ara èmu ama ku, dhèu sab'a ra'a toke bècu. 18 De be'a risi ja'a lèpa hari asa ama ku, ho peka dènge ne, “Ama! Ja'a tao le sala dhu kapai titu kèna, mi Lamatua dènge ama. 19 Ja'a nia boe j'aj'i ana ama ku. Hud'i laa ama sèmi more ja'a ne j'aj'i mi kuli ètu d'ara èmu ama, ngaa-ngaa tao boe!”’

20 Ropa pangee nare sèmi èèna, hèia na kèd'i dènge ka, lèpa la'e asa èmu ama na. Nèti kaj'èu era, ama na ladhe nèdhi le nèngu, ka ama na rasa kasia. Ka na puru nèti èmu, rai la'e soru nare ana dhu lèpa hari ne. Hèia na liku nare, ka uu ne.

21 Èle èèna ka, ana ne peka dènge ama na, aku nèngu na, ‘Ama! Ja'a ne tao le sala dhu kapai mi dedha Lamatua dènge ama ku. Ja'a nia heka j'aj'i hari ana ama.’

22 Te ngaa ama na paredha dènge ka dhèu-dhèu sab'a na, peka na, ‘Karohe! Lami mere kodho madhera dhu be'a risi, ho papake ne. Mere kadheli, ho pasaluu mi kacui-aai na. Aa papake salapa mi haga na. 23 Lami ère mere sapi kab'oi èèna ho pare, te èdhi neo ta'a-tinu rame-rame. 24 Lula ana ja'a ne, nuka sèmi dhu madhe le, te ngaa na mamuri hari. Nèngu dhu ele le, te ngaa ja'a abhu hari ne.’ Na padhai lii èle sèmi èèna, ka mulai ra'a-rinu aa'i-aa'i ra.

25 Lod'o èèna, ana uuru dhu aad'o ètu èmu, te na sab'a ètu d'ara oka. Ropa na lèpa, nèti kaj'èu era, na tadèngi le dhèu karihu musiik dènge roge-ledho. 26 Ka na paroa nare dhèu sab'a ca dhèu, hèia na karèi, aku nèngu na, “Ee! Tao rarame ngaa ètu ne'e?”

27 Hèia dhèu sab'a ne dhaa, peka na, ‘Ari mu lèpa hari le. De ama mu pua pare sapi, sèna ka tao pesta kapai, te ana na lèpa hari dènge sod'a.’

28 Ropa tadèngi nare, hèia ana uuru ne pasaree. Na no'o boe maso asa d'ara èmu. Ka ama na la'e rarange ne.

29 Te ngaa na ka'ugu, peka na, ‘Ama! Pangee ku laa! Nèbhu nare sange ne'e, ja'a sab'a toke èi kabhèsu hae, nuka sèmi kuli sa, hia mi ama. Ja'a ne ke'a boe sisu dad'èi ama. Masi ka sèmi èèna, abhu mèka ama hia ana kahib'i ci'u, sèna ka ja'a pakarej'e dènge mone aanga-angalai ja'a. 30 Te ngaa ropa ana ama dhu bhera-lelu doi-dhari ama, ho la'e karihu dènge bhèni karehe, lèpa hari mai, ka ama pare sapi kab'oi na, tao pesta aae hia ne.’

31 Te ngaa ama na b'ala, aku nèngu na, ‘Ana pasue, ee! Nanene paie-iie. Nèbhu nare sange ne'e, èu ne bera-bera dènge ja'a. Aa'i-aa'i dhu unu ja'a, sèra sa unu èu kahèi. 32 Te ngaa limuri ne, èdhi hud'i karej'e dènge karae ku, lula ari mu ca dhèu ne. Uru èèna, nuka sèmi dhu madhe le, te ngaa limuri ne mamuri hari. Nèngu dhu ele le, te ngaa abhu hari.”’