3 Te ngaa Yesus dhaa, aku Nèngu na, “Miu se, dhèu dhu padhai lii leo tao leo! Miu d'èlu-mèu lab'a paredha Ama Lamatua, sèna ka madhutu ad'a tatao nèti bèi-baki miu di. 4 Te Ama Lamatua paredha, peka na, ‘Pakab'ua ina-ama miu.’ Aa peka hari, na, ‘Ladhe ca dhèu padhèd'a aapa ina do ama na, hud'i huku pamadhe ne.’^a 5-6 Ama Lamatua aj'a sèmi èèna ka, te ngaa miu aj'a leo. Miu peka na, ‘Ca dhèu parluu boe pake mèdha-panyau na, sèna ka soru-bara ina-ama na, masi ka rèngu ètu d'ara j'aj'èra, ladhe na pamoa le neo hia mèdha ne asa Lamatua’ Te ngaa dènge aj'a sèmi èèna, miu core eele le paredha Ama Lamatua, ho gati dènge atora unu miu. 7 Nèti èèna ka, deo na Ja'a dhu peka le, miu se, dhèu dhu padhai lii leo tao leo! Èèna na, nuka sèmi Yesaya, dhèu nèti lii padhai Ama Lamatua, dhu suri tèke, peka na,

10 Èle èèna ka, Yesus paroa dhèu leo ètu èèna, ka Na aj'a si, peka na, “Pasa dhilu pabe'a-be'a, sèna ka miu bisa me'a mèu! 11 Ngaa dhu maso asa d'ara hèb'a, pakaj'alu boe dhèu. Te ngaa dhu mai nèti d'ara hèb'a, èèna ka dhu pakaj'alu dhèu.”

12 Èle ka, ana madhutu Na mai karèi Ne, aku rèngu na, “Ama me'a, do? Dhèu Parisi se d'ara pèd'a ropa tadèngi lii padhai Ama.”

13 Te ngaa Yesus dhaa, peka na, “Ama Ku ètu sorga, èèna na core eele dhèu dhu aj'a madhutu boe dad'èi Na. Èèna nuka sèmi dhèu ko'o eele j'u'u dhu na d'èi boe. 14 De baku pusi-pahae dènge dhèu Parisi sèi! Te rèngu ca ropa dènge dhèu bèdhu dhu pakako dhèu bèdhu. Èèna na ra manahu palere-lere asa d'ara ro'a lasi.”^c

15 Ka Petrus lii, peka na, “Ama, lole ku dènge ji'i la, sasoa nèti lii pakasame deo na!”

16 Yesus b'ala, aku Nèngu na, “Miu me'a mèka kahèi? 17 Sasoa na sèmi ne'e: ngaa dhu èdhi ta'a, maso asa d'ara hèb'a, la'e taruu asa kabake, èle èèna kalua hari la'e asa d'ara kakus. 18 Te, ngaa dhu mai nèti d'ara hèb'a, èèna ka dhu pakaj'alu dhèu, toke Ama Lamatua madenge dènge ne, aa d'èi boe pa'èci dènge ne.^d 19 Te j'ara-j'ara karehe, ae ka dhu mai nèti d'ara dhèu! Nuka sèmi: ngangee dhu bhelu, pamadhe dhèu, bersina, tao j'ara makae dènge dhèu dhu dhèu èmu nèngu boe, mana'u, sakasii kapod'e-kabèli, dènge pakarehe kolongara dhèu. 20 J'ara-j'ara se'e ka dhu pakaj'alu dhèu. Te ngaa ladhe dhèu dhoka ra'a j'amo boe ai madhutu ad'a, èèna sala boe ngaa-ngaa.”

21 Èle èèna ka, Yesus tèke eele era ne'e, kako la'e asa kota Tirus dènge kota Sidon. 22 Ètu nèi, abhu ina ca dhèu dhu j'aj'aj'i na nèti rai ne'e. Nèngu dhèu Yahudi boe. Ropa na tadèngi nare Yesus mai le asa ne'e, hèia la'e manèngi, peka na, “Ana-èpu dhèu aae Daud! Sue ku ja'a la! Te ana bhèni ja'a, lèke nidhu tao. Kasia ku ji'i la! Te na j'èra d'ai seli.”

23 Te ngaa Yesus mau-mau, aa dhaa boe ngaa-ngaa ciki sa. Hèia ana madhutu Na mai peka dènge Ne, “Ama, ina ne pa'oo-parodha loe boe. Be'a risi Ama babège eele ne nèti ne'e!”

24 Hèia Yesus dhaa, peka na, “Ama Lamatua pua Ja'a mai, ho soru-bara dhèu èdhi dhèu Yahudi, lula rèngu kako sala j'ara, nuka sèmi kahib'i-kalèbho dhu re'a heka j'ara. Te Na pua boe Ja'a sèna ka soru-bara dhèu leo.”

25 Te ngaa ina ne mai padètu-dètu asa Yesus. Ka na patitu kètu urutuu dènge lii manèngi, “Ama! Sue ku ja'a la!”

26 Te ngaa Yesus core lii padhai Na, aku Nèngu na, “Pantas boe tare nganga'a nèti ana-ana, ka hia mi busa.” [Dènge lii dhu pacele, sasoa na, Yesus hud'i soru-bara uuru ku dhèu Yahudi Nèngu unu Na, heka bisa ladhe-leru dhèu leo kèna.]

27 Te ngaa ina ne b'ala, aku nèngu na, “Tare'a Ama! Te ngaa busa dhu mate mema ètu ro'a mei. Rèngu ra'a kahèi nganga'a dhu bèbhe eele nèti d'ara pega ana sèra.” [Sasoa na, ropa ana-ana ra'a, busa kahèi abhu ra'a. Masi ka Yesus soru-bara dhèu unu Na, te ngaa Nèngu hud'i ladhe-leru dhèu Yahudi boe kahèi.]

28 Ropa tadèngi nare, ka Yesus peka na, “Ira ii! Ina parcaya Ja'a tare'a-re'a! De lèpa ka, lula ngaa dhu ina manèngi èèna, j'aj'i le!” Èle èèna ka, na lèpa, ka na ladhe nèdhi ana na dhu èle le nèti papèd'a na.

29 Èle ka, Yesus dènge ana-ana madhutu Na tèke eele era ne'e, hèia ra kako madhutu re sebhe dano Galilea. Ka ra ca'e asa ledhe cue, hèia Yesus madhèdi ho aj'a-nori si. 30 Èle èèna ka, dhèu ae-ae mai asa Yesus. Ra rèti dènge dhèu haga roe cabèka, dhèu bèdhu, dhèu karuku, dhèu lii aad'o, dènge dhèu-dhèu dhu pèd'a leo kahèi. Ra pamadhèdi dhèu pèd'a se padètu-dètu dènge haga Yesus. Ka Na puri-pa'èle si. 31 Ropa ladhe rèdhi, hèia dhèu ae se malaa. Ra papeka na, “Ira ii! Malaa titu kèna, nga! Dhèu haga roe cabèka, bisa kako èra hari. Dhèu bèdhu, bisa rèdhi. Dhèu karuku, bisa kako. Aa dhèu lii aad'o, bisa padhai lii! Se'e se, tatu tatao Ama Lamatua. Aa Lamatua èèna ka, dhu uru-uru sèra bèi-baki èdhi pahaha iisi mi Nèngu.”

32 Lalu eele pèri-pèri lod'o, hèia Yesus paroa ana madhutu Na, ka Na peka, aku Nèngu na, “Ja'a rasa kasia dènge dhèu ae-ae se. Abhu dhu mai nèti era kaj'èu, ra pakaboko ètu ne'e tèlu lod'o kèna, toke gee ra èle aa'i le. Be'a risi baku hia si lèpa dènge kabake manganga. Mage dhoka ra bèbha ètu talora j'ara.”

33 Te ngaa ana madhutu Yesus dhaa, aku rèngu na, “Ama! Era ne'e kaj'èu nèti rae. Tatu, èdhi bisa boe panga'a tare dhèu ae-ae sèmi se'e.”

34 Te ngaa Yesus karèi si, aku Nèngu na, “Roti miu pèri bua?”

Ra dhaa, aku rèngu na, “Dhoka pidhu di, dènge i'a pèri ngi'u di!”

35 Ka Yesus pua dhèu se'e madhèdi ètu rai. 36 Hèia nare roti pidhu bua dènge i'a sèra, ka Na manèngi makasi mi Ama Lamatua. Ka Na pamae roti se, hèia Na j'ole asa ana madhutu Na, sèna ka ra papala mi dhèu aa'i-aa'i sèra. 37 Hèia aa'i-aa'i ra'a toke bècu. Ka ra kaboko rare nganga'a dhu ata, pènu pidhu soe hahake. 38 Dhèu aa'i-aa'i dhu ra'a se, dhèu mone ele boe d'ai èpa riho dhèu sa. Dhae ige mèka bhèni dènge ana iiki sèra. 39 Èle ka, Yesus pua dhèu ae-ae sèra lèpa. Hèia Na ca'e asa dedha koha, ho lasi asa rai Magadan.^e