4 Mete ma toronoom esa tao sala' lao hitu sia fai' sa rala, boe ma ana doa', ma nema lao hitu fo no'e ambon, na, ho musi lilii' hendi salan lao hitu.”

5 Fai' sa, Yesus ana ded'enu na ra^b rema randaa roo E de ro'e rae, “Ama Meser! Hai nemehere ma ra nda mahere' sa. De tulun tao nehere hai nemehere ma ra dei.”

6 Boe ma Yesus nataa nae, “Mete ma hei mimihere neu Lamatualain koasan, mae anak o, hei parenda hau huu ine' ia mae, ‘Nenelea' fo lali tasi muu!’ Dei fo hau huu ine' naa o tungga hei parendam neu' ena boe.”

7 Basa ma Yesus 'ola' fai nae, “Ha'i conto. Hambu ate mana tatati rae sia osi, ma nanea bib'i lombo sia moo' a. Basa ues ra ma, ate a bali' ume neu. Ne'o malanggan nda 'ola' noo e nae, ‘'Uma fo ru'a nggita taa ta'ab'ue leo!’ 8 Hoko'! Tungga matetun, malangga a denu e nae, ‘Muu lole-lau mei a fee au dei. Basa' fo, muu mua-minu sia dea'.’ 9 Mete ma ate a tao tungga malanggan hihii-nanaun, ne'o hei mae malangga no'e makasi mbali e, do? Hoko'! 10 Hei 'ona' naa boe. Mete ma hei ue-tao basa saa fo Lamatualain parenda' a ena, na, hei 'ola' mae, ‘Hai atahori ded'enu' a, hai nda mindaa simboo saa-saa sa boe. Hai nda sangga kokoa' sa. Hai milalao' a hai ue-tatao ma ra.’”

11 Lele' Yesus se lao risi' Yerusalem, ara losa profinsi Galilea noo profinsi Samaria rae toor na. 12 Lele' ara rae risi' kambo' esa sia naa, hambu atahori kusta sanahulu rema rae randaa roo Yesus. Ara rambarii' mia' a doo-d'oo'. 13 Boe ma nggasi randaa rae, “Yesus! Lamatua'! Kasian hai dei!”

14 Lele' Yesus nita se, ma, Ana denu nae, “Mii mitud'u ao ma ra reu malangga agama dei, fo ara paresa' rae, Hei kusta ma hai ena, do fe'e hoko'.” Rena ta'o naa ma, ara lao. Te sia dala talad'an, 'aib'oi' ma, basa se hai reu' ena.^c

15 Ara lao rakandoo noo nemehoot. Te hambu esa bali' nisi' Yesus. Ana nggasi nae, “Koa-kio Lamatualain! Huu au hai ena!” 16 Boe ma ana sende' lulu-langgan de no'e makasi nae' mbali Yesus. (Tao-tao te eni nda atahori Yahud'i sa. Eni atahori Samaria mana rad'ed'ea rakandoo 'a roo atahori Yahud'i ra.)

17 Boe ma Yesus natane atahori mana tungga E nae, “Ta'o bee, e? Faa' ra Au 'u'uhahai' atahori kusta sanahulu, to? Atahori sio sia bee? 18 Ta'o bee de 'aka' atahori fea' ia bali' nema fo no'e makasi neu Lamatualain, ma so'u koa-kio' neu E?”

19 Boe ma Ana nafad'e atahori naa nae, “Ho malole ena huu mumuhere teb'e-teb'e' neu Au. De fela fo bali' moo masoi-masod'a'.”

20-21 Fai' sa, atahori Farisi hira rema ratane Yesus rae, “Ama Meser! Mufad'e dei! Fai hira' fo Lamatualain nalalao parendan?”

Ma Yesus nataa nae, “Ta'o ia! 'Afi' du'a mae Lamatualain nalalao parendan nendi' tanda mata'-mata' sia raefafo' ia fo atahori bisa rita noo mata na ra. Atahori nda hambu bukti fo rae, ‘Mete ia dei! Huu Lamatualain nalalao parendan sia ia!’, do ‘Hambu sia naa!’ Hoko'! Te Ana nalalao parendan sia talad'a ma ra sia atahori ra rala na ra.”

22 Basa ma Yesus nafad'e ana ded'enu na ra nae, “Nda doo sa te Au, Atahori Matetu' ia, nda 'u'ub'ue 'oo hei sa ena. Dei fo sia fai sususa' ra, hei hii mae doo bee fo mita Au bali' 'uma. Te Au nda fe'e 'uma sa. 23 Mete ma atahori rema rafad'e nggi rae, ‘Kristus sia ia!’ do, ‘Kristus sia naa!’ na, ama 'afi' mi'ib'eb'engge' ao ma ra fo sangga mii-'ima, huu 'o'ola na ra, peko-leleko'. 24 Te mete ma Atahori Matetu' a bali' nema, tatandan manggarelo' ena, 'ona' ndelas naronda fo tao lalai dad'i manggarelo' mia suu' seri nisi' suu' seri neu. 25 Te huu Ana musi lemba-d'oi doid'oso' mata'-mata' dei. Ma atahori lele' ia, nda nau rena ma nda nau simbo E sa. 26 Te dei fo lele' Ana nae bali' nema, atahori ra rasod'a roo 'a de'ulaka' 'ona' biasa, 'ona' Noh lele na.^d 27 Lele' naa, ara raa-rinu, tao feta-d'ote kakab'i', losa fai' lele' Noh maso' nisi' 'ofan rala. Te atahori naa ra o nda nau rena sa boe. Basa ma, 'aib'oi' neu' ena te, oe monae' nandali nema de tao nalutu basa se.^e

28 Naa o 'ona' atahori mana rasod'a de'ulaka' sia Lot lele na. Lele' naa, ara raa-rinu, raseo-rahasa', tao osi-lutu, rafefela ume, ma rasod'a de'ulaka' 'ona' biasa. 29 Te atahori ra nda nau rena sa. Basa ma, fefetu' naa, lele' Lot nela hela kota Sod'om, 'aib'oi' ma 'ud'a ai-b'aleran 'onda nema mia lalai de lalangge hendi basa se.^f

30 Dad'i hei musi besa-b'esa, e! 'Afi' losa lele' Atahori Matetu' a nae bali' nema, te atahori ra rasod'a biasa-biasa' a. Huu 'aib'oi' ma Ana losa boe. 31 Fai' naa, atahori mana sia ume nembeleon, na, sud'i ume rala mii fo lole-lau fai. Atahori mana tao ues sia osi, 'afi' bali' ume mii ha'i sud'i 'a saa ma ra fai.^g 32 Misined'a saa mana dad'i neu Lot saon mia lele ulu' a. Ana mate, huu nasaned'a sud'i 'a saa na ra sia ume.^h

33 Atahori nda mana nau tungga Au sa huu sue 'a aon, dei fo masod'an parsuma 'a. Te atahori mana nau tungga Au losa ana fee masod'an huu sue Au, dei fo ana hambu masoi-masod'a', ma nasod'a nakandoo noo Lamatualain.ⁱ 34 Au 'ufad'e mema! Lele' Atahori Matetu' a bali' nema, mete ma hambu atahori rua sunggu' sia mamana' sa, 'aib'oi' ma Lamatualain so'u nendi esa, ma lao hela esa. 35 Mete ma hambu ina' rua mbau are ra'ab'ue, dei fo Lamatualain so'u nendi esa, te lao hela esa. 36 [Mete ma hambu atahori rua tao ues ra'ab'ue sia osi, dei fo Lamatualain so'u nendi esa, ma lao hela esa.]”^j

37 Yesus ana ded'enu na ra rena rala ta'o naa, ma ratane E rae, “Ama Meser! Dei fo basa naa ra dad'i sia bee?”

Ma Yesus nggari ded'eat nae, “Ta'o ia. Mete ma hei mita mbui kaa' ra ratambele ra'ab'ue risi' bee, hei bub'ulu naa dad'i tanda 'oi, ara raa mana mburu' sia mamana' naa ena.” [Naa sosoa ma'afunin nae, dei fo lele' Kristus bali' nema, tatanda na ra manggarelo' ena, mete ma atahori baca rahine.]