Bib'i lombo mana mopo' a
15
Lele' naa, atahori mana 'ed'a bea ma atahori nda papake' laen ra sa, 'aka' rema risi' Yesus fo rae rena E. Te atahori Yahud'i ra rae fee se atahori nda malole' sa. 2 Atahori Farisi roo meser agama Yahud'i ra rita ta'o naa ma unggu-remu rae, “Cih! Atahori ia na'ab'ue noo atahori nda papake' ra sa. Lena' fai Ana 'endo' naa noo se boe!”a3 Yesus rena ta'o naa ma, Ana dui fee se nekendandaa' nae, 4 “Mete ma mia hei ia, hambu atahori sa na'ena bib'i lombo natun esa. Boe ma mopo hendi esa. 'Oras ia atahori naa musi tao saa? Ne'o ana lao hela bib'i lombo kasio nulu sio' ra reu lenu' sa, ma neu sangga losa ana nita bali' bib'i lombo mana mopo' a. 5 Lele' ana nita bali' bib'i lombo naa, ma ana nasaa nendi bali' e noo nemeho'ot. 6 Losa ume, ma ana no'e nala nonoo na ra, de nafad'e se nae, ‘Wae! Hei 'ima mimiho'o moo au dei! Huu au 'ita bali' bib'i lombo mana mopo' ngga ena.’ 7 Naa, sia sorga o 'ona' naa boe. mete ma hambu atahori mana tao sala' sa doa' ena, fo bali' nisi' Lamatualain, na, basa mana sia sorga ra ramaho'o. Ara romaho'o lena' huu atahori esa mana bali nisi' Lamatua', mia atahori kasio nulu sio' fo mana rasod'a noo ndoo-tetu', ma nda lao' sala dala' sa.”
Doi fula mana mopo' a
8 Boe ma Yesus dui nekendandaa' esa fai nae, “Hambu mama esa na'ena doi fula' sanahulu.b Te mopo hendi esa. 'Oras ia, ana nae tao saa o? Ne'o ana neu nambila' lambu fo delo sia bee-b'ee, ma ngganggai ume a losa mamana makab'ia' ra, fo sangga doi' naa noo malolole. 9 Lele' ana nita bali' doi' naa ma, ana neu no'e atahori ume titia na ra, de nafad'e nae, ‘Woi! 'Ima fo mimiho'o moo au dei! Huu au 'ita bali' doi mana mopo ngga ena!’ 10 Sia sorga o 'ona' naa boe. Mete ma hambu atahori mana tao sala' sa doa', de bali' nisi' Lamatualain, na, basa ded'enu' sia sorga ramaho'o seli boe.”
Ana mana mopo' a
11 Yesus tute 'o'olan nendi' nekendandaa' laen esa fai nae, “Hambu ama' sa noo anan tou' rua. 12 Lao esa, ana murin nafad'e aman nae, ‘Ama', e! Banggi fee au hata-heto' ra leo!’ Boe ma aman bab'anggi hata-heto' ra fee neu ru'a se. 13 Nda doo' sa ma, ana muri' a seo hendi 'ena na ra. De ana mboti bua-b'a'u na ra, boe ma lao nisi' nusa doo-d'oo'. Sia naa, ana ngganggari doi na ra noo nesod'at sosoa ao'. 14 Lele' doi na ra basa ma, ndoe-la'as manaseli' dai nusa' naa, de ana o nasod'a to'a-taa nala seli. 15 Boe ma neu sangga ues. Atahori sa sia nusa' naa simbo e de denu e hani fafi na ra. 16 Huu ana' naa nda nab'e'i ndondoen sa ena, de ana nae naa fafi ra nanaan. Huu nda hambu atahori esa fee ne nanaat sa boe.
17 Doo-d'oo ma ana du'a neu-nema nae, ‘Sia ama ngga umen, basa atahori mana tao-ues ra hambu raa losa ra'ab'eta. Te au sia ia ae' a mate ndoes ena. 18 Malole lena', au bali' isi' ama ngga. Fo 'ufad'e 'ae, “Ama'! Au tao sala monae' ena neu Lamatualain ma ama' boe. 19 Au nda 'undandaa dad'i ama' anan sa ena. Sad'i ama' simbo au dad'i ate sia ama' umen o, naa malole boe!’”
20 Ana du'a nala ta'o naa ma, fela de bali' nisi' aman ume na. Fe'e sia doo-d'oo' te tou lasi' a nita e, ma tud'a kasian mbali e. Ana 'onda mia umen de nela-nela' neu soru anan mana bali' a. De ana holu ma 'id'u e.
21 Boe ma ana' a 'ola' noo aman nae, ‘Ama'! Au tao sala monae' neu Lamatualain ma ama'. Au nda 'undandaa dad'i anam sa ena.’
22 Te aman parenda tute' atahori mana tao ues na ra nae, ‘Woi! Lai-lai, e! Mii ha'i mendi bad'u meulau' seli a, fo fee ne pake. 'Olu ndeli neu lima 'u'un, ma sapatu neu ei na ra. 23 Mii lea mala sapi mbaruna' naa fo tati, te hita tae feta-d'ote teu esa. 24 Huu ana ngga ia 'ona' mana mate' ena, te ia naa ana nasod'a bali' ena. Ana mopo, te ia naa au hambu bali' e ena.’ 'ola' basa ta'o naa ma, ara feta-d'ote boe.
25 Lele' naa, ana ulu' a nese ume, huu ana neu tao ues sia osi rala. Lele' ana bali' ma, fe'e sia doo-d'oo' te ana rena atahori ra'amina' lii-lii' ma lendo-foti. 26 Boe ma ana no'e nala mana tao ues esa, de natane nae, ‘Woi! Tao rarame' saa ia?’
27 Atahori mana tao ues a nataa nae, ‘Malangga 'od'im nema ena. Dad'i ama', denu tati sapi fo tao fefeta monae', huu anan bali' noo sod'a'.’
28 Rena ta'o naa, ma ana ulu' a namanasa. Ana nda nau ume rala neu sa ena. Boe ma aman nema de kokoe e ume rala neu.
29 Te ana namue nae, ‘Ama'! Du'a sob'a dei! Doon basa ia au tao ues 'ita' mamate ngga 'ona' ate fee ama'. Au nda 'ulena-langga neu ama' hihii-nanaun sa. 'Ona' naa o, ama' nda fe'e fee mita au hie ana' esa fo tao fefetas 'umuho'o 'oo nonoo ngga ra sa boe. 30 Tao-tao te ama' ana mana ngganggari hata-heto' a, neu na'amina' noo ina' ra de nab'asa' ama' doi na. Ana bali' nema ma, ama' tati sapi malolen seli de tao fefeta monae' fee ne.’