Atahori tao sira atoran na ra fo nggati Lamatualain parendan
15
Lao esa, hambu atahori Farisi roo meser agama nononggo' esa rema mia Yerusalem fo randaa roo Yesus. 2 Atahori Farisi ra to'u rahere' sira 'ad'at Yahud'i na. Lele' ara rena rae, Yesus ana mana tungga na ra raa na nda safe lima na ra tungga 'ad'at hihii-nanaun sa, ma ramanasa. Boe ma ara rema de fee sala' neu Yesus rae, “Ta'o bee de ana mana tungga ma ra raa, te nda safe lima na ra sa? Naa nalena-langga mbali bei-ba'i ta ra 'ad'at na!”3 Te Yesus nataa nae, “Mema' hei atahori mana 'ola' laen ma tao laen! Ama mihine milena-langga neu Lamatualain parendan, fo tungga 'a bei-ba'i ma ra 'ad'at na. 4 Huu Lamatualain parenda ena nae, ‘Fee had'a-hormat neu ina-ama ma ra,’ ma parenda fai nae, ‘Mete ma atahori sa rarai-oole inan noo aman, na, musi hukun misa e.”a 5-6 Lamatualain nanori ta'o naa, te hei minori laen fai. Ama mae, ‘Atahori esa nda parluu tulu-fali ina-aman nendi' sud'i 'a saa na ra, 'ita' mae ara doid'oso rala seli o, mete ma ana helu-fuli basa nae fee sud'i 'a saa naa ra neu Lamatualain ena. Te noo hei nenorim ta'o naa, hei nggari hendi Lamatualain parendan, de nggati noo hei parendam. 7 Naa de, Au 'ae hei ia ra, atahori mana 'ola' laen, te tao laen! Naa nandaa noo Lamatualain mana 'ola-'olan Yesaya sura' mema' so'al hei mia lele ulu' a! Huu Lamatualain denu e sura' nae,
8 ‘Hambu atahori koa-b'o'u Au,
sia 'a bafan, te nda noo ralan sa.
9 Mae ara tao ta'o naa o, parsuma 'a.
Ara nda tungga Au sa.
Ara nda ranori Lamatualain nenorin sa, te ranori atahori nenori na.’”b
Dala de'ulaka' lao' mia atahori ralan
10 Basa naa ma, Yesus no'e atahori laen sia naa de nanori se nae, “Pasa ndiki ma ra malolole, fo bisa mihine! 11 Saa mana maso' nisi' atahori bafan rala neu, naa nda tao nanggenggeo atahori sa. Te saa mana kalua mia atahori bafan, naa mana tao nanggenggeo atahori.”
12 Basa ma, Yesus ana mana tungga na ra rema rafad'e E rae, “Ama' bub'ulu', do? Atahori Farisi ra rala na ra mera rena Ama' 'o'ola na.”
13 Te Yesus nataa nae, “Dei fo Ama ngga sia sorga nore hendi atahori nda mana nanori tungga Eni hihii-nanaun sa. Naa 'ona' atahori nore hendi saa mana mori' fo ana nda hii' ra sa. 14 Dad'i 'afi' taoafi' neu atahori Farisi naa ra! Te ara, 'ona' atahori poke' mana natud'u dala' fee atahori poke'. Dei fo ara tud'a ndola' rala reu 'ona esa'.”c
15 Basa ma Petrus 'ola' nae, “Ama', tulun mufad'e hai nekendandaa' naa sosoan dei!”
16 Yesus nataa nae, “Naa! Hei nda fe'e mihine sa? 17 Sosoan ta'o ia: saa fo ata taa, maso' sia bafa ta ra, nakandoo tei ta ra rala, basa fo bali' dea neu nisi' mamana mbia dea'. 18 Te saa mana kalua mia bafa', naa mana tao nanggenggeo atahori, losa Lamatualain o melumud'u e, ma nda nau simbo e sa boe.d 19 Huu Dala de'ulaka' nae' lao' mia atahori ralan! 'Ona' a: dud'u'a de'ulaka', risa atahori, hohongge, nda fe'e sao sa te tao sala', ramana'o, sakasii peko-leleko', ma 'ola' ra'amuti-ra'amu atahori nara na. 20 Basa naa ra, mana tao atahori ra ranggenggeo. Te mete ma atahori raa-rinu nda pake safe lima na ra tungga 'ad'at hihii-nanaun sa, na, naa nda dad'i so'al sa.”
Lamatua' Yesus tulu-fali ina' esa, nda atahori Yahud'i sa
21 Basa ma Yesus lao hela mamana' naa, de neu nisi' mamana' mana deka noo kota Tirus ma kota Sid'on. 22 Sia naa hambu ina' sa lao' mia mamana' naa. Eni nda atahori Yahud'i sa. Lele' ana rena Yesus sia naa, ana nema no'e noo teb'e-teb'e' nae, “Mane Daud tititi-nonosin, e! Sue au dei! Te nitu tao au ana feto ngga. Awee, kasian, e! Ana doid'oso ena.”
23 Te Yesus nee-nee 'a, nda nataa nae saa sa boe. Boe ma Ana mana tungga na ra rema rafad'e rae, “Ama', ina' ia 'aka' nameli tao tasib'u 'a. Malole lena' Ama' mbuu hendi e mia ia leo!”
24 Boe ma Yesus nataa nae, “Lamatualain denu Au 'uma fo tulu-fali hita atahori Yahud'i na ra, huu ara lao sala ena, 'ona' bib'i lombo mana tara-koo' ena. Ana nda denu Au 'uu tulu-fali atahori fea' ra sa.”
25 Te ina' naa nema deka-d'eka noo Yesus. De, ana sende' lulu-langgan ma no'e nae, “Papa, e! Tulun au dei.”
26 Te Yesus nggari ded'eat nae, “Nda nandaa sa ha'i nanaat mia anak ara fo nggari fee busa ra.” [Noo masud ma'afuni' nae, Yesus musi tulu-fali na'ahulu' atahori Yahud'i na ra, dei fo tulu-fali atahori fea' ra.]
27 Te ina' naa nataa nae, “Teb'e, Ama', e! Te busa ra rahani sia mei a filengga na. Ara o raa saa mana tud'a' mia anak ara pinggan boe.” [Noo masud na nae, Lele' anak ara raa, busa o hambu naa boe. 'Ona' mae Yesus tulu-fali atahori na ra o, Eni musi mete-se'u atahori fea' ra boe.]
28 Yesus rena na'o naa, ma nafad'e nae, “Awii! Mama mumuhere teb'e neu Au, o! Dad'i mama bali' leo, te saa fo mo'e' naa, dad'i ena!” Basa ma ana bali', te mema' anan hai ena.
Lamatua' Yesus tao nahai' atahori hetar
29 Basa naa ma, Yesus noo ana mana tungga na ra lao hela mamana' naa, boe ma lao tungga-tungga 'a dano Galilea suu na. Basa ma ara hene risi' lete' sa, de Yesus 'endo' nanori se. 30 Boe ma atahori hetar rema risi' E. Ara rendi atahori doka', atahori poke', atahori mamalu'u', atahori nda mana bale nala' sa, ma atahori mamahed'i' laen ra boe. Ara ra'e'endo atahori mamahed'i' ra deka Yesus ei na. Boe ma Ana na'ahahai' se. 31 Lele' atahori hetar rita ta'o naa, ma ara heran. Ara 'ola' rae, “Wee! Manaseli', o! Atahori doka' o bisa lao' noo malole. Atahori poke' o, rita bali'. Atahori mamalu'u' o, lao' boe. Ma atahori nda mana bale nala' sa o, bisa bale boe! Ia tantu Lamatualain mana tao. Eni ia, bei-ba'i ta ra be'utee neu E eni' a lele ulu' a.”
Lamatua' Yesus nahao atahori rifon haa
32 Basa fai hira boe ma, Yesus no'e nala ana mana tungga na ra de nae, “Au kasian neu atahori ia ra ena. Ruma mia doo-d'oo' rema, boe ma ra'ab'ue fai telu ena, losa nanaa na ra basa ena. Malole lena' ara 'afi' bali' roo tei rou'. 'Afi' losa ara masaloe sia dala' talad'a na.”
33 Ma Yesus ana mana tungga na ra rataa rae, “Ama'! Ia mamana rou' na'ad'od'oo' noo kambo'. De hita nda bisa tahao tala atahori desi basa ia ra sa.”
34 Ma Yesus natane se nae, “Hei roti ma ra, ba'u bee?”
Ara rataa rae, “Hitu 'a! Noo 'u'u mbei!”
35 Basa ma Yesus denu basa atahori ra 'endo' reu rae a. 36 Boe ma Ana ha'i nala roti bue kahitu' noo 'u'u ra, de no'e makasi mbali Lamatualain. Ana bib'ib'i se, de Ana fee neu ana mana tungga na ra, fo reu banggi fee neu basa atahori naa ra. 37 De basa se raa losa ra'ab'eta. Basa de, rad'uru rala nanaa lena' ra, sofe boa hitu. 38 Basa atahori mana raa' ra, mbei ma hambu tou' rifon haa. Nda fe'e reken ina' ra roo anad'iki' ra sa. 39 Basa naa dei de, Yesus denu atahori naa ra bali'. Boe ma Ana sae 'ofa' de lao risi' mamana Magadan.e