2
Noo dala' naa, Lamatualain na'ad'ad'ad'i' lalai noo raefafo', noo basa isi-oe na.2 Ana tao basa naa ra ma, mbila' neu ma, nandaa noo fai kahitun, Ana hahae ao na. 3 Noo ta'o naa, Ana tao fai kahitun dad'i fai monae' mia basa fai ra. Ana na'etu' ta'o naa, huu tao basa ue-tataon ena, de fai kahitun ma, Ana hahae ao na. 4a Lamatualain na'ad'ad'ad'i' lalai noo raefafo' a dud'uin, ba'u 'a naa ena.
Lamatualain na'ad'ad'ad'i' tou' noo ina'
4b Lele' LAMATUALAIN fe'e mulai na'ad'ad'ad'i' lalai noo raefafo' a, 5-6 nda fe'e hambu huu-huu' saa sa boe, huu Ana nda fe'e na'onda' 'ud'an sa. Lele' naa, fe'e 'aka' a lume' a namasu mia rae fo na'ad'oe raefafo'. Ma nda fe'e hambu atahori tao osi sa. 7 Boe ma LAMATUALAIN ha'i nala rae mbei, de tao dad'i atahori. Basa ma Ana fuu ani-hahae' nisi' mbana ndolan, ma atahori naa nasod'a tute 'a.
8 Boe ma, LAMATUALAIN tao osi esa sia rae Eden, sia seri' rulu. De Ana fee atahori naa leo sia osi naa. 9 Ana tao hau huu malole' mata'-mata' mori sia osi a, ma hau huu' fo atahori bisa raa noo malad'a'. Ma Ana o tao hau huu' mata' rua mori sia osi a talad'an boe. Mete ma atahori raa hau esa boan, na, ara hambu rasod'a rakandoo. Te mete ma ara raa hau esa ka boan, na, ara bisa rahine dala' bee malole' ma bee de'ulaka'.
10 Hambu loe esa nandali dea neu mia osi a. Loe naa, masarangga' haa. 11 Rangga' kaesan, naran Pison. Rangga' naa nandali rereo' rae Hawila. Sia naa, hambu lilo nae'. 12 Lilo naa ra meu'. Sia naa o hambu hau raa ma'ameni', ma fatu makandendelak. 13 Rangga' karuan, naran Gihon. Rangga' naa nandali rereo' rae Kus.a 14 Rangga' katelun, naran Tigris. Rangga' ia, dad'i tad'a' sia rae Asyurb seri' rulu. Ma rangga kahaan, naran Efrat.
15 LAMATUALAIN fee atahori naa leo sia Eden, fo tao mata' malolole neu osi a. 16 Ma Ana parenda atahori naa nae, “Ho sud'i 'a mua hau boa' saa sia basa hau huu' mana sia osi ia. 17 Te 'aka' naa, 'afi' mua hau boa' mia hau huu' mana fee nggo muhine dala' bee malole' ma bee de'ulaka'. Mete ma mua, na, mate nggo.”
18 Boe ma, LAMATUALAIN 'ola' fai nae, “Nda malole' sa atahori ia nasod'a mesa' ne. De Au 'ae tao fee ne, nonoon esa ndaa noo e.”
19-20 Lele' naa, LAMATUALAIN 'ao nala rae mbei, de tao banda ma mbui' mata'-mata'. Basa ma Ana nendi se risi' atahori naa fo nanara se. Boe ma, atahori naa nanara se, esa-esa' noo nara na. Te ana nda fe'e hambu nonoon esa sa boe nandaa noo e.
21 Boe ma LAMATUALAIN tao atahori naa sunggu' nasambeta. Lele' ana sunggu' ma, Lamatualain ha'i nala rui ai-usun esa. Basa de, Ana mbalu bali' bisu a. 22 Ana tao rui' naa dad'i ina', de fee neu atahori naa. 23 Atahori a nita ina' naa ma, nae,
“Naa! Ia dei! Ia fo nandaa noo au!
Ruin o, 'ona' rui ngga boe.
Ma ao-sisin o, 'ona' ao-sisi ngga boe.
Huu eni dad'i mia tou', naa de au bab'ae e ‘ina'’.”c
24 Huu naa, tou' musi lao hela ina-ama na ra,
fo neu nasod'a rala' esa noo saon,
te ru'a se nenepa'a' reu esa ena.
25 Lele' naa, ru'a se ma'ahola', te ara nda med'a mamaet sa.