Atahori nda nau rena neu Lamatualain sa
3
Mia basa banda fo LAMATUALAIN tao sia raefafo' ia, mengge a nahine pepeko-leleko' lena' basa e. Lao esa, hambu mengge esa natane ina' a nae, “Teb'e, do? Lamatualain 'ai nggi nae, ‘'Afi' mia hau boa' naa ra mana sia osi ia, to?’” 2-3 Ina' a nataa nae, “Hoko'! Hai bole mia! Te 'aka' a hau huu' esa sia osi a talad'an, na, Lamatualain 'ai hai fo 'afi' mia. Ana nae, hai 'afi' mia, ma 'afi' nggama boan, te hoko', na, hai mate.”
4 Te mengge a nataa nae, “Wee! Naa, nda teb'e sa! Hei nda mate sa. 5 Mema' Lamatualain 'ai ta'o naa, huu Ana bub'ulu' mete ma ama mia hau a boan, na, ama mihine dala' bee malole' ma bee de'ulaka', 'ona' Eni boe.”
6 Boe ma, ina' a nita hau a meulaun seli, noo boan 'ona' malad'an seli. De ana du'a nae, “Mete ma 'ua boa' ia, tantu au dad'i mahine'.” Boe ma, ana seu boa' naa, de naa. Ma nendi fee saon, de saon o naa boe. 7 Ara raa basa dei de, ru'a se rahine rae sira ma'ahola'. Naa de ara nato hau roo fo bab'ata ma'ahola na ra.
8 Bob'on ma, ara rena LAMATUALAIN lao-lao' sia osi a. De ara reu keke sia hau huu' ra, naa fo LAMATUALAIN nda nita se sa. 9 Te LAMATUALAIN no'e tou' a nae, “Adam! Ho sia bee?”
10 Tou' a nataa nae, “Au rena Lamatualain haram sia ia. Te au mae, huu au ma'ahola'. Naa de, au keke.”
11 Boe ma Lamatualain nae, “See nafad'e 'oi ho ma'ahola'? Ta'o bee? Tantu mua hau boa' fo Au 'ai' a, to?”
12 Ana nataa nae, “Ina' fo Lamatualain fee dad'i nonoo ngga, ana mana fee au hau boa' a, de 'ua!”
13 Boe ma LAMATUALAIN 'ola' noo ina' a nae, “Saa de ho tao ta'o naa?”
Boe ma ina' a nataa nae, “Mengge a mana 'e'ed'ik nala au! Naa de, au 'ua boa' naa ena ma.”
Lamatualain sumba-ndoon se
14 Boe ma, LAMATUALAIN sumba-ndoon mengge a nae,
“Huu tataom ia, de Au hukun nggo. Mia basa banda ra, 'aka' a mesa' nggo hambu sumba-ndoon ta'o ia. Mia 'oras ia losa mate, nod'o mendi 'a tendam, ma mua sia 'a rae a. 15 Au tao nggo moo ina' ia, esa musu esa mikindoo 'a. Ma ru'a nggi tititi-nonosi ma ra o, 'ona' naa boe. Dei fo, tititi-nonosi ma ra 'ero atahori ra ei tingga na ra. Te ina' a tititi-nonosin esa, dei fo tutu nalutu langga ma.”
16 Boe ma Lamatualain nafad'e ina' a nae,
“Dei fo Au fee nggo boe susa lele' muiru, ma bonggi noo doid'oso mala seli. Mae 'ona' naa o, te ho fe'e hii-nau moo sao ma. Ma ana mana nauli nggo.”
17 Boe ma Lamatualain nafad'e tou' a nae,
“Ho nda tungga Au parenda ngga sa, te tungga 'a saom hihiin, de mua hau boa' fo Au 'ai' a. Naa de ho hambu huku-d'oki' boe. Ma Au o huku-d'oki rae a boe. Mia 'oras ia losa mate, ho musi tao ues mita' mamatem 'a'ali rae, fo fe'e hambu mua ena. Ue-tao 'ona' naa, fo fe'e musod'a ena. 18 'Ona' mae ho sela mata'-mata' o, 'aka' a duri-nggaut a mori. 19 De ho musi tao ues mita' mamatem, fo rae a fe'e fee nggo nanaat ena. Ma mbusam musi nandali losa ho mate. Au tao nggo mia rae, de mete ma mate nggo, na, dad'i bali' rae.”
20 Boe ma, Adam nanara saon nae, ‘Hawa’ (sosoan ‘mana masod'a’), huu basa atahori masod'a' ra inan, eni.a
21 Boe ma LAMATUALAIN tao buas mia banda rou', de fee se selu-ao.
Lamatualain 'oi hendi Adam noo Hawa
22 Boe ma LAMATUALAIN 'ola' nae, “Ia naa, atahori rahine dala' bee malole' ma bee de'ulaka' ena, 'ona' Hita boe. 'Afi' losa ara o raa boa' mia hau huu' mana fee se rasod'a rakandoo.” 23 Basa de, Ana 'oi hendi' se mia osi Eden. Ara risi' mamana' laen, de tao osi-lutu fo rasod'a mia rae a buna-b'oa na. 24 Lamatualain 'oi hendi se ma, Ana denu ate malid'a na ra mia sorga,b fo reu ranea osi a seri' rulu. Ara to'u tafa' mana mbila 'ona' ai, de lalaes neu-nema. Lamatualain denu se 'ena dala' mana rala neu, huu Ana nda nau atahori ra reu seu hau boa' mana fee se rasod'a rakandoo a sa.