Misod'a noo susue-lalai' ma meumare'
5
Hei ia ra, Lamatualain ana susue na. Huu naa, hei musi misod'a tungga hihii-nanau na. 2 Ma musi misod'a esa sue-lai esa 'ona' Kristus sue nggi boe. Huu Ana fee aon fo mate nggati hita ena. Noo ta'o naa, Ana dad'i tutunu-hohotu ma'ameni', fo tao namaho'o Lamatualain.a3 Hei ia ra o, Lamatualain atahori meumare na boe. De 'afi' misod'a manggenggeo'! 'Afi' du'a 'a manggenggeo'! 'Afi' hohongge! 'Afi hii 'a matelena'! 4 'Afi' 'ola' ded'ea mamaet! Ma 'afi' 'ola' leli! Huu Lamatua' atahorin nda nandaa 'ola' ta'o naa sa. Malole lena' ama 'ola 'a malole', ma mo'e makasi neu Lamatualain. 5 Misined'a malolole! Huu Lamatualain nda simbo atahori mana rasod'a manggenggeo' ma atahori mana hohongge' sa. Ara nda bisa maso' dad'i Kristus atahorin, ma Lamatualain nda bisa dad'i sira manen sa. Lamatualain o nda simbo atahori mana hii 'a matelena', huu ara seti hendi E ma so'u rananaru dala' laen ra.
Musi misod'a sia manggarelo' a
6 'Afi' nenenenggonggoa' mia atahori mana peko-leleko' rae, “Hae misod'a noo meumare'!” Te Lamatualain namanasa atahori nda mana rasod'a tungga hihii-nanaun sa. 7 Naa de, ama 'afi' mi'ib'ue moo atahori mata' naa ra. 8 Dalahulun, hei 'ona' atahori mana rasod'a sia ma'ahatu' a, huu hei nda fe'e mihine Lamatualain sa. Te ia naa, Ana na'onda' manggarelon fo tao nggi dad'i Eni ana na ra. Dad'i hei musi misod'a sia manggarelon naa. 9 Te atahori mana nasod'a nakandoo sia manggarelo', ana tao dala malole', nasod'a ndoo-tetu', ma ana 'ola' matetu'. 10 Sangga dala' fo tao nemeho'o Lamatualain ralan, huu Eni hita Lamatua na, mana na'ena hak parenda nggita. 11 'Afi' mi'ib'ue moo atahori mana rasod'a sia ma'ahatu' a. Te tatao na ra, nda na'ena ngguna saa sa boe. De hei musi 'ena-'ai se, ma mitud'u sala na ra. 12 Te saa fo ara tao ra'afuni' naa, manggenggeon seli, losa hita tae 'ola-'ola' o, ata mae. 13 Au fee conto ta'o ia: mete ma atahori tao manggarelo' neu sud'i 'a saa sia ma'ahatu' a, ne'o atahori rita sud'i 'a saa naa ra noo relo-relo'. 14 'Ona' naa boe, mete ma hita tao manggarelo' neu dala de'ulaka' fo atahori tao' a, ana bisa nahine nae, saa fo eni tao' naa de'ulaka'. Hambu sosod'at esa 'oi,
“Woi! Hei mana sunggu' ra, e, fela leo!
Hei mana mate' ra, e, misod'a bali' leo!
Huu Kristus nae fee manggarelo' neu nggi.”
Misod'a rala' esa moo Lamatualain Dula-d'alen
15 Huu naa, mete ma'ab'eb'esa masod'a ma ra, fo ama 'afi' 'ona' atahori nggoa'. Malole lena' pake dud'u'a malole' mia Lamatualain. 16 'Ale' ia, atahori hetar tao 'a dala-d'ala de'ulaka' rakandoo 'a. Dad'i mete ma ka'e mala fo tao dala-d'ala malole', na, tao leo. 'Afi' doo-d'oo fai!b 17 Du'a malolole fo mihine hita Lamatuan hihii-nanaun, fo 'afi' nenenenggongoa'.
18 'Afi' mafu, te hoko' na, nininu' naa nauli nggi, fo tao 'a dala de'ulaka' ra. Te soi rala ma ra fo hela Lamatualain Dula-d'ale Meumaren mana nauli nggi. 19 Noo ta'o naa, dei fo hei 'ola-'ola' esa moo esa mendi' ded'ea-'o'ola' mia Lamatualain Susura Meumaren, ma mia sosod'a kokoa-kikio' neu E, ma mia sosod'at fo hei hambu mia Dula-d'ale Meumare na. Ma mete ma koa-kio, na, 'afi' sia 'a bafa ma ra. Te koa-kio Lamatualain noo matetu'. 20 Huu Yesus Kristus dad'i hita Lamatuan, ma Ama' Lamatualain tao dala' nae' fee neu nggita ena. Naa de to'e makasi takandoo 'a neu E.c
Basa atahori mamahere' ra musi , esa musi rena esa
21 Basa hei, esa musi rena esa. Noo ta'o naa, hei mitud'u had'a-hormat noo nemetaus neu Yesus Kristus.
Conto 'ona': masao' ra
22 Sao ina' ra, e! Hei musi rena sao tou ma ra, 'ona' hei rena Lamatuam, Yesus Kristus. 23 Te saom naa, dad'i ho malanggam. Ma Kristus o dad'i Malangga soa' neu atahori na ra. Huu Eni mana soi dala' fo rasod'a.d 24 Dad'i Kristus atahori na ra musi rena E. 'Ona' naa boe, sao ina' ra musi rena sao tou na ra sia basa dala' ra.
25 'Ona' naa boe sao tou' re! Hei musi sue sao ma ra, 'ona' Kristus sue atahori na ra, losa Ana fee aon, fo mate nggati se.e 26 Ana tao ta'o naa, fo ara dad'i meumare' sia Lamatualain matan, huu ara tungga Ded'ea-'o'olan, ma nenesarani' ena. 27 Yesus Kristus atahori na ra o, 'ona' ina nenelemba-d'od'e' mana nenepapake-nggao basa' ena, meulaun seli, huu tou' a nae nema nala e ena. 'Ona' naa boe, Kristus nae nema nala atahori na ra. Dad'i ara musi rasod'a noo malole' ma ndoo-meu', losa nda hambu sala' mbei sa boe.
28 'Ona' naa boe, sao tou' re! Hei musi sue sao ma ra, 'ona' hei sue ao ma ra boe. Te mete ma sao tou' sue saon, sosoan nae, eni sue aon boe. 29 Nda hambu atahori namanasa aon sa. Te ana mete-se'u ma na'ab'oi e noo malolole, 'ona' Kristus mete-se'u malolole atahori na ra, 30 huu hita ia ra, 'ona' Eni aon boe. 31 Sia Lamatualain Susura Meumaren nenesura' 'oi, “Huu naa, tou' musi lao hela ina-ama na ra, fo neu leo na'ab'ue rala' esa noo saon, huu ru'a se dad'i esa ena.”f 32 Lamatualain Ded'ea-'o'olan manaseli' so'al masao' ra susuen naa, ma'ahulun fe'e ma'afuni'. Te ia naa hita bub'ulu' tae, Ded'ea-'o'ola' naa o natud'u Kristus susuen neu atahorin na ra boe. 33 Dad'i sao tou' musi sue saon 'ona' eni sue ao heheli na. Ma sao ina' musi fee had'a-hormat neu sao tou na.