Atahori mamahere' ra 'afi' rendi toronoo atahori mamahere' laen ra risi' mamana nggero-furi' a
6
Mete ma atahori sarani' esa nad'ed'ea noo atahori sarani' laen, ta'o bee de ama misi' mamana nggero-furi' sia mana ma'etu' ded'eat nda mana nahine Lamatualain sa? Ta'o bee de 'ona' naa? Malole lena' mimbirii' mii atahori mamahere' ra mata na ra, fo ara rauli hei ded'ea ma! 2 Dad'i' a ama nda bub'ulu' mae, atahori mamahere' ra dei fo ra'etu' ded'eat fee basa atahori sia raefafo' ia sa. Dad'i ta'o bee de, hei nda bisa miuli mala dala anad'iki ana' ra sa? 3 Matetun, dei fo hita mana ta'etu' ded'eat fee Lamatualain ate na ra mia sorga. De tantu hei musi miuli ded'eat tungga-tungga fai. 4 Lelenan fai, mete ma hei atahori mamahere' hambu mid'ed'ea so'al anad'iki ana' ra, 'ona bee de hei pake mana ma'etu' ded'eat fo atahori sarani' nda fee had'a-hormat neu se sa?5 Naa, au 'ae 'ola' dala' esa fo mana musi tao nggi mae. Ta'o bee? 'Ona' sia talad'a ma ra, nda hambu atahori mahine' esa sa boe fo nauli nala dala anad'iki ana' ia ra, 'ona' ded'eat mana sou sia toronoo ta ra. 6 Te atahori mamahere' esa, lea nendi toronoon atahori mamahere' nisi' mana ma'etu' ded'eat mata na! Tao-tao te mana ma'etu' ded'eat naa nda atahori mana namahere Lamatualain sa!
7 Hambu nda matetu' sa, to? Hei kala ena, mete ma hei esa mendi esa misi' mamana nggero-furi' a. Malole lena', mete ma toronoom tao sala' mbali nggo, na, hela neu. Boe ma mete ma toronoom atahori mamahere' namana'o nala saa ma, malole lena' hela e ha'i nala fo ana soa e leo! 8 Te hei atahori mamahere' esa tao sala' mbali toronoo na. Ma esa namana'o nala mia esa. Tao-tao te basa hei atahori mamahere' ra!
9 Hei 'ona' nda mihine dala' ia ra sa! Tao-tao te, atahori nda mana hii tao ndoo-tetu' a sa, tantu nda bisa dad'i Lamatualain bob'onggin sa. 'Afi' minggolo' ao ma ra fo nenepepeko-leleko', fo tao sala'! Atahori mana hohongge, mana songgo, mana tao leli roo atahori fo nda sao, tou' sunggu' noo tou', 10 atahori na'o ra, mana bare' ra, mana ninu mafu' ra, mana na'amuti atahori naran, mana pepeko-leleko' fo ha'i atahori sud'i 'a saa na ra, huu basa atahori mata' naa ra nda bisa maso' dad'i Lamatualain atahorin sa!
11 Tao-tao te, lele ulu' a hei ruma mema' 'ona' naa boe! Te Lamatualain 'ose hendi sala-kilu ma ra de nameu nggi ena. Boe ma Ana soi dala' de malolole bali' moo Eni ena. Ana tao basa naa ra, huu ama nenepa'a' moo hita Malanggan Yesus Kristus ena, ma hei o nenepa'a' moo Lamatualain Dula-d'alen ena boe.
Mete ma munea malolole ao ma, na, naa natud'u had'a-hormat neu Lamatualain
12 Au 'u'ena hak fo tao basa-b'asa' e. Te basa saa fo au 'ae tao' ra, ne'o nda fe'e malole' soa' neu au sa. Boe ma, mae au 'u'ena hak tao basa-b'asa' e, te au nda nau fo dala nda malole' ra rauli ma koasa rala au sa.a 13 Conto 'ona', atahori ra rae, “Nanaat parluu tei' a, ma tei' a parluu nanaat.” Ma misined'a, te dei fo Lamatualain tao nalutu ru'a se.
Conto laen fai, ata 'afi' pake ao ta ra, fo hohongge. Te ata pake ao ta ra fo tao ues fee hita Malanggan. Ma hita aon naa, hita Malanggan 'ena na. 14 Lele' hita Malanggan Yesus mate, Lamatualain mana tao E nasod'a bali'. Dad'i dei fo lele' hita mate, na, Ana o na'ena koasa fo tao nasod'a bali' nggita boe.
15 Hei aom dad'i Kristus 'enan, 'ona' hei dad'i bab'anggi' mia Kristus aon boe. Ne'o hei bub'ulu' dala' naa ena! De mete ma au pake bab'anggi' mia Kristus aon, fo 'uu 'u'ub'ue 'oo ina mana hohongge' ra aon, na, naa ta'o bee? 'Afi'! Huu naa nda nandaa sa! 16 Tantu ama bub'ulu' ena, mete ma atahori tao leli fo sunggu' ra'ab'ue roo ina mana hohongge' 'ona' naa ra, na, sira ru'a se nenepa'a' dad'i reu esa ena. Huu nenesura' sia Susura Meumare' a 'oi, “Ru'a se nenepa'a' dad'i esa ena.”b 17 Te atahori fo masod'an rala' esa noo hita Malanggan, dad'i esa noo E, 'ona' ru'a se nenepa'a' roo dula-d'ale' esa.
18 Mete ma ho hambu kaka'e' fo hohongge, na, mela mu'ud'od'oo'! Atahori tao sala' mata'-mata' mana ralutu ao na ra, ma ralutu atahori laen boe. Te atahori mana 'aka' hohongge, tao nalutu ao na. 19 Aom naa 'ona' Lamatualain Dula-d'ale Meumaren ume hule-o'e na. Dula-d'alen nasod'a sia rala ma ra, huu Lamatualain mesa' ne mana fee nggi Dula-d'ale na. Naeni de hei nda mi'ena hak neu ao ma ra sa ena, fo dad'i malangga neu ao ma ra. Te ta'o bee de hei misod'a 'ona' nda mihine dala' ia ra sa?c 20 Kristus soi-tefa nala nggi nendi' felin seli. De hei musi misod'a fee had'a-hormat neu ao ma ra, fo mitud'u mae, hei o fee had'a-hormat mbali Lamatualain boe.