3 Au o 'unori basa nggi dala-d'ala pantiin seli, fo dalahulun atahori parnaa ranori neu au boe. Naeni: Kristus, fo Lamatualain haitua nema' a, mate de fee masoi-masod'a' neu nggita mia sala-kilu ta ra ena, nandaa teb'e 'ona' Lamatualain Susura Meumaren sura' eni' a lele ulu' a.^a 4 Boe ma ara ra'oi E. Basa de, fini-esan ma, Lamatualain tao nasod'a bali' E, nandaa teb'e 'ona' Lamatualain Susura Meumaren sura' mema' eni' a lele ulu' a.^b 5 Basa ma, Kristus natud'u aon neu Petrus.^c Ana o natud'u aon neu ana mana tungga kasanahulu rua na ra boe.^d 6 Lao esa ma, Ana natud'u aon neu atahori mamahere' natun lima lena'. Basa se rita E! Mia sira e, hambu hetar fe'e masod'a' ra. 'Aka' ruma' a mate ena. 7 Basa ma, Ana natud'u aon neu 'a'a Yakob'is boe. Boe ma natud'u aon neu basa ded'enu na ra.

8 Naa! Au mana 'ita e 'u'ub'ui oe-oe'. Huu au 'ona' ana muri' neneb'onggi ne'eb'uit.^e 9 Lamatua' ded'enun laen ra, basa se pantiin lena' au. Mete ma tungga matetun, au nda 'undandaa dad'i ded'enun sa. Huu fe'esa'an, au mana tao 'u'usususa' ma poko-paru Lamatua' atahori na ra sia bee-b'ee.^f 10 Te Lamatualain natud'u rala malolen neu au. Boe ma Ana mana tao au dad'i 'ona' ia. Lele' Ana tao dala malole' soa' neu au, Ana nda ngganggari fai noo hie-hie' a sa. Ma'ab'uin ma, au mana ue-tao lena' basa se! Tao-tao te au nda mana tao ues naa sa, te Lamatualain rala malolen mana ue-tao sia masod'a ngga.

11 Dad'i nda pantiin sa au mana 'unori, do ded'enu' laen ra mana ranori. Huu basa hai minori dala' 'ona esa'. Hai dui-b'engga atahori so'al Lamatualain Hara-lii Malolen nekendoo' a. Huu naa, hei mimihere neu Hara-lii Malole' mana 'ona esa' naa.

12 Hai biasa minori mae, Kristus, fo Lamatualain haitua nema' naa, nasod'a bali' mia mamaten ena. Dad'i ta'o bee de hei ruma mae, “Atahori mana mate' ra, nda rasod'a bali' sa”? Netehuun saa? 13 Huu mete ma atahori mana mate' ra nda rasod'a bali' sa, eni sosoan nae, Kristus o nda nasod'a bali' sa boe! 14 Ma mete ma Kristus nda nasod'a bali' sa, basa-b'asa saa fo hai biasa minori neu atahori ra, nda na'ena ngguna sa. Ma nemehere ma ra neu E, parsuma 'a! 15-16 Mete ma teb'e atahori mates ra nda rasod'a bali' sa, na, hai o dad'i mana sakasii 'ombo-koson so'al Lamatualain. Huu hai biasa minori mae, “Lamatualain mana tao nasod'a bali' Kristus!” Mema' hai dui-b'engga ta'o naa. Te mete ma atahori mana mate' ra nda rasod'a bali' sa, eni sosoan nae, Lamatualain nda parnaa tao nasod'a bali' Kristus sa. 17 Dud'u'a sob'a dala' ia dei: mete ma Kristus nda nasod'a bali' sa, hei nemehere ma ra neu Lamatualain parsuma 'a! Huu hei fe'e lemba-d'oi sala-kilu ma ra! 18 Nda 'aka' naa sa, te basa atahori mana mate' ra, fo dalahulun nenepa'a' roo Kristus, mete ma Kristus nda parnaa nasod'a bali' sa, na, ara o mate ma saranggaa hendi mia Lamatualain boe. 19 Hita tamahena neu Kristus tae, dei fo Ana nau tao malole' fee nggita. Te mete ma hita tamahenan ta'o 'a naa, dad'i sia 'a raefafo' ia, naa parsuma 'a! Boe ma hita dad'i atahori mana kasian seli mia basa e!

20 Tao-tao te nda ta'o naa sa, to? Te matetun, naeni: Kristus, fo Lamatualain haitua nema' naa, nasod'a bali' mia mamate na! Te nda 'aka' mesa' ne sa, huu dei fo atahori mamahere' mana mate' ra o, rasod'a bali' boe. Kristus 'ona boa ulu' e, mana natud'u 'oi, atahori mana mate' ra, dei fo rasod'a bali' tungga E. 21 Lele ulu' a, 'aka' atahori esa' a, naeni Adam, mana nalena-langga Lamatualain parenda na. Naa de eni huku-d'okin naeni, mamates. Basa atahori simbo huku-d'oki' naa boe. Te lele' ia, hambu atahori esa fai, naeni Kristus, mana nasod'a tungga Lamatualain parenda na. Dad'i, huu Eni malolen, atahori mana mate' ra bisa rasod'a bali'. 22 Basa atahori mana ralena-langga neu Lamatualain parendan, hambu huku-d'oki mamates, 'ona' Adam boe. 'Ona' naa boe, basa atahori mana nenepa'a' roo Kristus, dei fo Lamatualain tao nasod'a bali' se.

23 Te esa-esa' noo eni fai na. Kristus dad'i atahori ma'ahulu' mana nasod'a bali', 'ona' boa ulu' faa' ra. Ma lele' Ana bali' raefafo' ia nema, na, dei fo atahori na ra rasod'a bali' boe. 24 Dei fo raefafo' fe'e sambu-lalo ena na. Lele' naa, Kristus dad'i Mane' mana tao nalutu basa koasa, basa parenda', ma basa nenori' mana musu noo Lamatualain. Eni o dad'i Mane' mana fee bali' hak parendan neu Lamatualain, Eni Ama na.

25 Huu Eni musi to'u parenda' nakandoo losa Lamatualain tao nasenggi' basa mana lab'an Kristus, fo ara be'utee mbali E.^g 26 Hambu dala' esa fai mana namusu' noo hita atahori. Naeni, hita musi mate. Te neu mate'en, Lamatualain nau nasenggi' mamates a koasa na. Ana tao basa ta'o naa, ma nda hambu atahori mate sa ena. 27 Sia Lamatualain Susura Meumaren nenesura' 'oi, “Lamatualain tao basa mana nenenesenggi' ra be'utee mbali Atahori fo Ana helu-fuli nae haitua nema' a.” Naa! Lele' nenesura' 'oi, “mana nenenesenggi' ra basa se be'utee neu Eni Atahorin”, naa meu' ena 'oi, Lamatualain nda maso' sia naa sa. Huu Lamatualain mesa' ne mana so'u E dad'i Lamatua' soa' neu basa e.^h 28 Mete ma basa e rena teb'e-teb'e' neu Lamatualain Anan, na, Ana' naa o fee bali' basa' e neu Aman, mana so'u E dad'i basa e Lamatua na. Basa boe ma, Lamatualain to'u parenda' nakandoo sia basa dala' ra soa' neu basa atahori.

29 Hambu atahori rae sarani fo nggati atahori mana mate' nda fe'e sarani sa. Te mete ma atahori mates ra nda rasod'a bali' sa, na, saa de rae sarani soa' neu atahori mana mate' ra?ⁱ 30 Boe ma ta'o bee de hita nau ha'i sosoe' mate takandoo, mete ma atahori mana mate' ra nda rasod'a bali' sa? 31 Huu au 'ae' a mate tungga-tungga fai! Te toronoo susue ngga ra, e! Au sumba, 'ita' mae au mate o nda saa-saa sa boe. Au boti' 'ala mata ngga, huu ama nenepa'a' mikindoo moo hita Lamatuan Yesus Kristus, fo Lamatualain haitua nema' a. 32 Fai' naa, lele' au fe'e sia kota Efesus, au 'aka' 'ukaru 'oo atahori mana 'ona' banda fui de'ulaka' ra. Te mete ma au 'aka' lab'an fo tungga 'a hihii ngga, nda fee neu Lamatualain sa, naa parsuma 'a. Nda na'ena ngguna sa! Te mete ma teb'e atahori mana mate' ra nda rasod'a bali' sa, malole lena' hita tungga-tungga 'a atahori 'o'olan rae,

33 Ama 'afi' nenepepeko-leleko' fo tungga dud'u'a ta'o naa! Huu hambu ded'ea-'o'ola' 'oi,

34 'Afi' tao de'ulaka' fai! Muloe' leo! Tao mata' neu masod'a ma! Tao' a ndoo-tetu' a! Matetun, hei musi mimed'a mamaet, huu sia talad'a ma ra, fe'e hambu atahori nda mana nahine Lamatualain sa.

35 Ruma ratane rae, “Mete ma atahori mana mate' ra rasod'a bali', na, dalan ta'o bee? Boe ma ao na ra dad'i ta'o bee?”

36 Nggoa' ra, e! Huu mete ma sela fini, naa fini a musi nambalutu sia rae rala, dei fo ana nanumbu fo mori. 37 Boe ma fini fo hita sela' a, matan nda 'ona' sud'i 'a saa mana nanumbu ma naroo sa. Eni fini meto', 'ona' are-gandum do, are do, fini laen. 38 Esa-esa' noo matan, tungga Lamatualain hihii-nanau na. Huu Eni mana na'etu' basa sela-nggari' ra esa-esa' noo mata-ao na.

39 Banda ma atahori o 'ona' naa boe. Esa-esa' noo mata-aon, tungga Lamatualain hihii-nanau na. Atahori aon, tungga atahori mata-aon boe. Banda ra aon, esa-esa' noo mata-ao na. Mbui' noo mata-ao na. 'U'u noo mata-ao na. Laen ra fai roo mata-ao na ra.

40 Hambu sud'i 'a saa sia lalai a, ma hambu sud'i 'a saa sia raefafo'. Mana sia lalai a noo eni manaseli na. Te manaselin, laen noo mana sia raefafo' a. Mana sia raefafo' noo eni manaselin boe. Te manaselin, laen noo mana sia lalai a. 41 Mete ma sia lalai a, relo manaselin laen; fulan manaselin laen; boe ma nduu' ra manaselin laen-laen. Esa-esa' noo mata-ao na. Esa-esa' noo manaseli na. Dad'i basa se ra'ena manaseli', to?

42 Naa! Mete ma atahori mana mate' ra rasod'a bali', naa 'ona' fini a faa' ra. Huu mete ma ne'oi atahori mana mate' a ena, eni ao-sisin noe hendi e, to? Te mete ma nasod'a bali', na, ana nda 'ona' dalahulun sa ena. Huu mete ma nasod'a bali', na, ana nda bisa mate sa ena. 43 Lele' ata ta'oi atahori mates a, hita med'a na ao-sisin naa manggenggeo'. Te mete ma atahori naa nasod'a bali' ena, na, ana hambu Kristus mandete-masa'an! Huu ana dad'i meumare' ena! Atahori mana mate' a nda bisa tao saa sa boe, lele' atahori ra'oi e. Te lele' nasod'a bali', eni ma'ad'eren seli! 44 Mete ma atahori fe'e masod'a', na, ana nahine 'aka' du'a ma med'a' a, to? Te lele' ana mate, fo nasod'a bali', na, Lamatualain Dula-d'alen fee ne masod'a ndoo-tetu' a. Boe ma ana nda 'ona' dalahulun sa ena.

45 Atahori kaesan mana 'ona' hita boe, naeni Adam. Tungga Lamatualain Susura Meumaren, nenesura' 'oi, “Ana dad'i atahori masod'a', mana du'a ma med'a nahine.” Te atahori fo mata-aon 'ona' Adam mana sia ata' lena' naa, naeni Kristus. Eni Dula-d'alen mana tao atahori nasod'a noo matetu'.^k 46 Kaesan, naeni atahori mana nahine' a du'a ma med'a, ma ana bisa mate. Te mana nasod'a bali' a, naeni atahori mana hambu masod'a ndoo-tetu' mia Lamatualain Dula-d'ale na. 47 Atahori kaesan mana sia raefafo' a, tao e mia rae. Te karuan, naeni Kristus, mana nema mia lalai. 48 Hita mana tasod'a sia raefafo', mata-ao ta ra 'ona' atahori kaesan, fo Lamatualain tao mia rae. Te atahori mana nenepa'a' noo Lamatualain sia sorga, mata-aon 'ona' Kristus mana nema mia sorga. 49 Lele' ia hita mata-aon 'ona' Adam fo Lamatualain tao mia rae. Te doo-d'oo na hita nggati mata feu', 'ona' Kristus mana nema mia sorga.

50 Toronoo susue ngga ra, e! Au 'ae 'ufad'e nggi ta'o ia: hita mana dad'i atahori mata-ao' kaesan, hita aon tao mia raa' noo rui'. Noo ta'o naa, hita nda bisa simbo hata-heto' fo dad'i Lamatualain anan sia sorga sa. Nda bisa sa! Huu atahori mata 'ona' naa, dei fo ao na ra rambulutu hendi se, de ara nda bisa simbo dala' fo ra'atataa' rakandoo sa.

51 Dad'i rena malolole! Te au 'ae 'ufad'e nggi rasia sa. Dei fo hambu atahori mamahere' ruma nda mate sa. Ma dei fo basa hita nenenggati' noo mata feu'. 52 Lele' ma'oa nalii ma'ab'ui' a, basa ia ra 'aib'oi' ma dad'i neu' ena. Lai-lai lena' mia hate-mata'. Huu lele' ma'oa nalii, lele' naa boe o mana mate' ra rasod'a bali' boe. Mete ma rasod'a bali' ena, ara nda mate selu' sa, ma nda rambulutu selu' sa boe. Hita mana fe'e masod'a' ra o 'ona' naa boe. Basa nggita dad'i mata feu'.^l 53-54 Hita ao-sisin lele' ia bisa nambalutu, te nae ob'a e dad'i mata feu' nda bisa nambalutu sa ena. Boe ma hita lele' ia mana bisa mate, te nae ob'a' e dad'i mata feu' nda bisa mate sa ena! Naa tao tungga saa fo nenesura' mema' sia Susura Meumare' a 'oi,

56 Saa de mamates nendi doid'oso' soa' neu hita atahori? Naa huu hita tao sala'. Naeni ena! Saa de sala-kilu ta ra ra'ena koasa 'ona' naa? Naa huu Lamatualain Hohoro-lalanen natud'u nae, hita sala-kilun nalena-langga neu Eni parenda na. Naeni ena! 57 Te 'ale' ia, basa' e dad'i laen ena! Ma basa nggita to'e makasi nae-nae mbali Lamatualain. Huu Eni mana tao nggita tasenggi' basa dala de'ulaka' ra, tungga hita Lamatuan Yesus Kristus tatao na. Ma Kristus mana nasenggi' teb'e!

58 Dad'i toronoo ngga ra, e! Mi'itataa' mihere'! 'Afi' minggongga! Hei ue-tatao ma ra soa' neu Lamatualain musi boe malole ma namanae. Huu hei bub'ulu' ena mae, hei tao ues mita' mamate ma ra soa' neu hita Lamatuan, nda parsuma 'a sa.