Usif Yesus naleko' atoni amenat nateef nok neno snasat
(Nai Mateos 12:9-14; Nai Lukas 6:6-11)
3
Lalit Nai Yesus anfani anteni' anbi ume onen. Anbi naa, In niit atonij mese, le' in animan aon abjaan anmaat.
Nai Markus 3:1-19
2 Anbi nane msa', anmu'i tuaf abjaan le' namin lalan piut-piut, he nasaan Nai Yesus. Es on nane, sin namata, he nahinen nak, In naleko' atoni amenat nok neno snasat, ai' kaha.
3 Lalit Nai Yesus no'en atonij le' in animan aon abjaan anmate nane mnak, “Ba'e! Uum he amhake moi matan ii.”
4 Lalit In antoti sin ok-oke' mnak, “Kalu tatuin hit atolan lasi palsait, nabe'i kah, hit atmo'e saa' nateef nok neno snasat? He taleko' ai' tale'un? He taleko' atoni amenat, ai' he tlolo tisan?” Mes sin ka natae fa saa'-saa'.
5 Es on naan Nai Yesus In nekan ansuus anmaat, natuin sin natenab amnanu he npaloli sin halat annesi na'ko he npaloli atonij niim amates naan. Lalit In natoo' ma In na'piin In matan noi sin. Lalit In nak atonij nane mnak, “Ba'e! Amnona' ho nimam nane neem!” Es on naan atonij naan annona' in animan. Nok askeken ate, in animan naleko naan. 6 Lalit atoni na'ko nonot apalsait Farisi sin anpoin ma annaon nasaitan ume onen naa. Ma sin annao na'eku nok atoni na'ko nonot politik Herodes, he sin nabguan namin lalan he namate Nai Yesus.
Usif Yesus naleko' too mfaun anbi nefog Galilea in ninen
7-8 Tabug mese, Nai Yesus nok In asimo anoni' sin annaon he nasnasan akle'og anbi nefog Galilea in ninen. Mes, natuin too mfaun sin anneen saa' le' In anmo'e nalali sin, es on nane, toog na'ko kuan-kuan neman he natuin Ee. Sin neman na'ko propinsi Galilea, Yudea, ma Idumea. Abjaan anteni' neman na'ko koot Yerusalem, Sidon, ma Tirus. Abjaan anteni' neman na'ko noel Yarden in panin et neno-saet. Sin ala sin namin lalan he na'eku nokan. 9 Nai Yesus anlelu In asimo anoni' sin he nami abelo' mese noi Ne, natuin amneemt een naan, sin namfaun. In nlomi he naguab anbi abelo' in tunan, henati' In mamnita' ma sin nneen In hanan.
10 Neno ahunut In naleko' niit amenat namfau. Es on naan tabug ii, ale' amenat abjaan sin anmabe'un he anpoe' naan Ee.a 11 Tabug tuaf een le' nitug ansaen sin niit Ee, sin ntilot on anbi Nai Yesus In matan. Ma sin anhunun am nak, “Ho le' iij, namneo Uisnenog In Anah!”
12 Mes In antaal sin namneo-namneo am nak, “Naik mitoon noi atonij abjaan saa'-saa' le' anmatoom nok Kau!”
Usif Yesus anbeti' In asimo anoni' tuaf bo'es am nuug
(Nai Mateos 10:1-4; Nai Lukas 6:12-16)
13 Lalit Nai Yesus ansae anbi 'nu'af mese. In no'en naan atonij fauk he natuin Ee. Es on naan sin neem natuin Ee. 14 Lalit In anlulu naan alahaa atonij bo'es am nuug. In nak sin am nak, “Au 'lulu ki he hi mituin Kau piut-piut. Au he 'leek ki he mnao mitoon Uisnenog In Tu'in Alekot noi mansian ala sin. 15 Ma Au of a'fee ki kuasat he mli'u nitu le'uf sin na'ko mansian een.”
16-19 Asimo anoni' tuaf bo'es am nuug sin naan, es le':
nai Simon (le' Nai Yesus anteek nak, nai Petrus),
nai Yakobus, nok in olif,
nai Yohanis, (sin nua sin, nai Sebedius in aanh een. Nai Yesus anteek nanesa' sin nua sin nak, ‘Boanerges’, le' neki hit aguab nak ‘'alotos na'punu'’.)b
nai Anderias,
nai Felipus,
nai Bertolomeos,
nai Mateos,
nai Tomas,
nai Yakobus (nai Alfius in aan monel),
nai Tadius,
nai Simon (atonij na'ko nonot politik Selot),c
ma nai Yudas Iskariot (le' of he nasosa' Nai Yesus).
Kulu agama sin nasaan Usif Yesus nak, nitu le'uf een sin anakaf anaet es le' anfee Ne kuasat
(Nai Mateos 12:22-32; Nai Lukas 11:14-23, 12:10)
20 Lalit Nai Yesus nok In asimo anoni' sin ansanun nfanin na'kon anu'af naan. Ma sin antaman anbi umel. Too mfaun een neem nauban anteni tal Nai Yesus sin ka napenin fa meinuan he anbukaen.
Nai Markus 3:20-35
21 Nail on nane, tuaf naguab een am nak, “Mail miit Nai Yesus. In nniken nani In tuan, ma ka mapaloli' fa.” In nonot een sin anneen aguab naan, es on naan sin neman he nok Ne nfaan.
22 Tabug naan, kulu agama fauk na'ko koot Yerusalem, neman ma natonan abiten le' nane mnak, “Hi naik mituin Nai Yesus. Natuin nitu le'uf een sin anakaf anaet le' anteek ee nak Balsebul, antaam nalaal jen et In aon, ma nfee Ne kuasat he In anli'u nitu le'uf sin.”d
23 Tabug Nai Yesus anneen on nane, In no'en nabguab sin am nak, “Lasij naan, ka masimo' leko fa. Natuin lalan mee, nitu le'uf een sin anakaf anaet nabe'i anli'u nafani in tuan? 24 Kalu anbi pah mese, in toog anmatoen ma anmabanan piut, natuin lalan mee henati' pah naan nabe'i anhake nabala? 25 Ma anbi umel mese in nanan, kalu sin es nok es anmanaun, natuin lalan mee henati' sin nabe'i anhake nabaaln aa? 26 On nane msa', kalu nitu le'uf een sin anmamusun es nok es, lo sin of anbatis ok. Kalu anjali on nane, sin namle'un nmaten.
27 Kalu atonij mese he neem nabaak ai' nasiik bale' anbi atoni abe'it mese in umel, in lo he anfutu nahelan atoni abe'it naan nahunu fe'. Lalit na' in napeni meinuan he naiti atonij naan in bale' sin.e
28 Es on naan Au utoon 'ani ki: Uisnenog nabalab ma naloitan he annose nani ale' mansian een sin saant een. Ma kalu sekog naguab nale'uf tuaf mese, Uisnenog fe' nabalab he ansako sanat naa. 29 Mes kalu sekom-sekog naguab nale'uf Uisnenog In Asmana Knino', Uisnenog ka nsako fa in sanat naan, tal antee nabal-baal!”f
30 Nai Yesus naguab on naan, natuin sin naguab nale'un Ee mnak, “Tuaf le' ii, anitu sae!”
Tuaf le' natuin Uisnenog In alomin, sin le' naan es le' anjalin Usif Yesus In nonot amneot een
(Nai Mateos 12:46-50; Nai Lukas 8:19-21)
31 Lalit Nai Yesus In inaf nok In olif een sin neman noi umel naan, he na'eku nokan. Sin nhaken anbin mone' ma anleek tuaf he no'en Nai Yesus. 32 Tabug naan, Nai Yesus antoko ma naguab nok too mfaun anbi umel in nanan. Lalit tuaf le anleke naan antaam ma natonan Nai Yesus am nak, “Aam! Ho ina' nok Ho oli een etan mone'. Sin he na'eku nok Ko.”
33 Mes Nai Yesus natae neki haan totis am nak, “Au ina' ma Au oli-tata amneot, es le' sekog?”