Bifeen le' natuin Usif Yesus
8
Ka loog fa nteni te, Nai Yesus ma In asimo anoni' sin, tuaf bo'es am nuug, annaon nfuun am nateef noin koot-koot ma kuan-kuan anbin pah naan. In annao natoon Uisnenog In aplenat. Naan anjali tu'in alekot ma beno alekot noi sin. 2 Anbi pukan anaot een naan, anmu'i bifeel fauk nokan amsa'. Bifeen le' iij, nameen nitan menas huma'-huma', ma abjaan annitu sae nitan. Mes Nai Yesus naleko nalali sin ok-oke'. Tuaf es, es le' bi Maria na'ko kuan Makdala. Nahunut, Nai Yesus anli'u napoitan nitu le'uf hiit na'ko bi Maria le' ii. 3 Tuaf es, es le' bi Susana, lalit bi Yohana. Bi Yohana le' iij, nai Kusa in feel. Nai Kusa naan, anaak ulusan anbi kesel Herodes in sonaf. Ma anmu'i nteni bifeel namfau le' annaon nabguan nok Nai Yesus sin. Bifeen le' iij, anpake kuuk sin loit he natae baen noi Nai Yesus tabug In anbi lalan atnanan.aAguab mapolin anmatoom nok aseen finij anbi naijaan huma'-huma'
(Nai Mateos 13:1-9; Nai Markus 4:1-9)
4 Tabug mese, too mfaun sin neman na'kon kuan-kuan he nami Nai Yesus. Tabug too mfaun sin nabgua nalalin ate, Nai Yesus natu'in sin anpake aguab mapolin mese am nak, 5 “Anmui' naan atoni ameput lelel mese, anseen finij anbi in lelel. Finij abjaan anmofun anbin lalan. Tabug atoni annaon anpe'o lalan naan, sin antali finin naan. Lalit kolon neman ma anleo ma ansiu nani sin. 6 Finij abjaan anmofun anbin naijaan mafatug. Finij naan anmulai natolon, mes an'uknenen, natuin ka napenin fa oel. 7 Finij abjaan anmofun anbin bale katila'. Mes tabug finin naan anmulai natolon, hau katila' sin anhapi namate sin. 8 Mes finij abjaan anteni anmofun anbin naijaan ma'afa'. Finin iij natolon, sin nmonin tal antee nanaen ma nasufan, lalit nafguan. Finin le' iij, nafguan ha'el natun mese.”
Natu'in nalali on nane, Nai Yesus natu'ab aguab mapolin naan. In nak, “Hi maluke een ki, es on naan mitenab milek-leko'!”
Usif Yesus natoon nak, nansaa' am es In nanoni' anpake aguab mapolin
(Nai Mateos 13:10-17; Nai Markus 4:10-12)
9 Lalit Nai Yesus In asimo anoni' sin antoti aguab mapolin naan in oten.
10 In natael sin am nak, “On ii! Natuin hi mituin namneo-namneo noi Uisnenog In lomin, es on nane, Au he utoon ki maat-maat, he hi mihine nok lalan mee Uisnenog he naplenat Inin. Mes tuaf abjaan sin ka nfaloli fa Uisnenog In lomin. Es on naan Au unoni' sin 'eki aguab mapolin. Fun Uisnenog In mafefa knino' anluul nani anmatoom nok atoni sin am nak,
‘Sin niit nalalin,
mes ka nlomin fa he nahinen.
Sin nneen nalalin,
mes ka nlomin fa he ansimog.’”b
Usif Yesus natoon aguab mapolin anmatoom finij naan in oten
(Nai Mateos 13:18-23; Nai Markus 4:13-20)
11 Es on naan Nai Yesus natoon aguab mapolin naan in oten am nak, “Finin naan, es le' Uisnenog In A'an ma Plenat. 12 Finij le' anmofun anbin lalan, es le' tuaf-tuaf le' annenan Uisnenog In A'an ma Plenat, mes anaak nitu naek ee neem ma nasiik neki A'an ma Plenat naan na'ko sin neek een. Nok lalan naan, sin ka npalsain fa noi Uisnenog, ma sin ka napenin fa sako sanat ma 'honis. 13 Finij le' anmofun anbin naijaan mafatug, es le' tuaf-tuaf le' anneen Uisnenog In A'an ma Plenat nok neek malinat. Mes ka nabaa' fa. Sin anmulai npalsain, mes kalu napenin susal, anmofu laabh aah. 14 Finij le' anmofun anbin naijaa katila' naan, es le' tuaf-tuaf le' annenan ma ansimo Uisnenog In A'an ma Plenat. Mes ka loog fa te, sin anniken nani A'an ma Plenat naan, natuin sin ntaisibun nok sin ulusan huma'-huma' ma sin amu'ik een huma'-huma', ma sin amonik le' he nmalin-maliin aah. Es on naan sin neek palsait naan, ka manesa' fa saa'-saa'. 15 Mes finij le' anmofun anbin naijaan ma'afa' naan, es le' tuaf-tuaf le' neek amneot ma alekot. Tabug sin nneen Uisnenog In A'an ma Plenat on nane, sin nahiik ma napaan nani sin anbin sin neek een. Nok lalan naan, sin anpalsain piut, ma anmo'en lasi alekot namfau.”
Aguab mapolin anmatoom nok antobe pakug anpake ana'i naijaan
16 Lalit Nai Yesus naguab anteni am nak, “Ka nuug fa he totu paku ana', lalit taiti ana'i naijaan ma attobel. Ma ka tiit tani fa tuaf he nateke pakug anbi hala ee nupun. Natuin kalu nmo'e on nane, of napenin miu-sine' on mee ntein? Paku le' mapake', es le' ttoutu talalij, tateke anbi bale alatas, he in pinan antana' tuaf-tuaf le' antaman noi umel.c 17 Ale' saa'-saa' le' makolo' tabug iij, of mamnita'. Ma ale' kanan lasij le' ka mahine fa tabug iij, of mahine een.d
18 Es on naan hi lo he mitenab milek-leko' lasin le' ii. Tuaf le' he nami namneo-namneo Uisnenog In lomin, in mahinen ma manoen of ansaatg on piut. Mes tuaf le' ka nlomi natuin fa Uisnenog In lomin, in olen ansaat gon piut.”e
Usif Yesus In nonot amneot een
19 Tabug mese, Nai Yesus naguab nok too mfaun sin. On iij ee te, In inaf ma In olif sin neman he na'eku nokan. Mes sin ka nabe'i npaumak-maak Ee fa, natuin toog sin namfau le'uf.
(Nai Mateos 12:46-50; Nai Markus 3:31-35)
20 Es on naan anmu'i tuaf annao natonan Nai Yesus am nak, “Aam! Ho ina' ma sin Ho oli' sin etan mone'. Sin he nateef nok Ko.”
21 Es on naan In natael am nak. Mes on ii. Au ina' ma Au aok-abjaan sin namneo-namneo, es le' tuaf-tuaf le' anneen ma natniin Uisnenog In A'an ma Plenat, lalit anmo'e natuin sin.”
Usif Yesus nasnasab ani naek
(Nai Mateos 8:23-27; Nai Markus 4:35-41)
22 Tabug mese, Nai Yesus naguab noi In asimo anoni' sin am nak, “Iim he tsae abelo he tlaak toi nefog panin.” Es on naan sin ansaen noi abelo mese, ma anmulai nnaon. 23 Tabug sin annaon on nane, Nai Yesus antuup. Ka loog fa te, ani naek ee neem. Okin anpesan antaman noi abelo nanan. Sin he napenin amle'ut eeh.
24 Nail on nane, asimo anoni' sin anpoo' nafenab Nai Yesus am nak, “Usi'! Usi'! Amfeen fe'! Hit he tleem atmaat leh!”
Es on naan Nai Yesus anfeen. Lalit in nakain anin ma okin nane mnak, “Musnaas nai!” Es on naan okin ma anin nasnaas nanin tabug naan.
25 Lalit In naguab noi In asimo anoni' sin am nak, “Nansaa' am es hi ka mpalsai fa fe' moi Kau?”
Sin namtaun ma ansanmakan. Es on naan sin anmatotin am nak, “Hoi! Nai Yesus iij, sekog? Anmo'e on meel am es na' anin natniin Ee? ma okin nnatniin Ee?”
Usif Yesus anli'u nitu le'uf na'ko aneek-maunut
(Nai Mateos 8:28-34; Nai Markus 5:1-20)
26 Ka loog fa te, sin anteen Garasa anbi nefog Galilea in panin.f 27-29 Anbi balel naan, anmu'i atonij mese le' nitu le'uf sin ansaen alaloog een. In ka nmu'i fa umel. Es on naan in natgua anbij haa nitu nate een. nenog-nenog, in annao nuu-mneem ma n'ao moons aah. Nitu le'uf sin naplenat piut-piut. Tuaf abjaan sin anfutug tenij-tenij anpake konelit ma niti besij, mes in an'ipu nafeek sin. Lalit nitun ee naseke he naen noi bale luman naloog na'ko kuan.
Tabug Nai Yesus sin ansanun na'kon abelo, aneek-maunut naan neem an'anij haa. Lalit aneek-maunut naan ankua' ma ansukub in tuan noi Nai Yesus In haen. Es on naan Nai Yesus naplenat am nak, “Hoi nitug! Ampoi mu'ko atonij ii!”
Es on naan aneek-maunut naan ankua' am nak, “Hoi, naik museni kau! Natuin au uhine 'ak Ho le' iij, Nai Yesus, Uisnenog A'laat Le'uf In Anah! Ho naik amhamu'i kau!”
30 Nai Yesus antotij ee mnak, “Ho kanam sekog?”
Es on naan nitug naan natael am nak, “Legion, natuin hai mimfau, on le' solalus nifun-nifun.” In naguab on naan, natuin anmu'i nitug namfau antaman ma natguan et naa.
31 Nitun naan antoti Nai Yesus piut he naleko te, naik anlelu sin he annaon noi Abola Ha'mu'it, es le' balel le' anpakel he an'eek kuasat maufinut sin.
32 Mes anpaumak-maak balel naan, anmu'i naan fafij pukan anaek mese an'oban een anbin anu'af ee ninen. Es on naan nitun naan antotin Nai Yesus am nak, “Amlelu kai he hai mtaam moi fafin nae!” Ma Nai Yesus anlomi natuin sin. 33 Lalit nitun naan anpoin annaon nasaitan atonij naan, ma antaman noin fafin naan. Fafin naan ok-oke' anjalin fafi aneek-maunut, lalit sin naenan nsikasaan ok ma natlolo nsanun na'ko nu'af naan, ma anmofun ntaman na'kon ainu'at noin nefog nanan. Es on naan sin nleem nmaten ok-oke'.
34 Nail niit on nane, ahao fafin naan naenan noin kuan-kuan anbin naan, ma natonan abiten balel naan ok-oke'. 35 Anneen nalalin sin aguab een on nane, too mfaun sin neman noi balel naan. Sin he nitan kuuk saa' le' anjali nbi naan. Anteen nane, sin niit atoni aneek-maunut naan antoko n'elah anpaumaak Nai Yesus In haen een. In anpake nalaal je, ma in maunun namneku nalaal je. Nail on nane, sin ala sin namtaun. 36 Lalit tuaf een le' lelon niit lasij naan, natoon noi amneemat een nane mnak, anmoe' on meel em es na' aneek-maunut naan, naleek. 37 Es on naan abiten Garasa sin ala sin le' natguan anbin balel naan, antoti Nai Yesus he annao nasaitan sin, natuin sin ala sin namtaun nmaten.
Es on naan Nai Yesus sin ansaen nfanin noi abelo, he annaon nfanin noin nefog Galilea in panin.
38 Mes aneek-maunut le' naleko nalaal je lelon, antoti nakteni noi Nai Yesus am nak, “Aam! Lekog ate au utuin Ko!”
Mes Nai Yesus natael am nak, 39 “On ii! Leko nnesi ho mfani moi ho nonot sin, ma mutonan sin Uisnenog In alekon, le' anmo'e nalali je noi ko.”
Lalit atonij naan annao nfuun ma nateef koot, anmulai natoon noi sekom-sekog haa anmatoom nok Nai Yesus le' naleko' ee naan.
Usif Yesus namonib nafani' nai Yairus in aan feto, ma naleko' bifee ameen funan le'ka nasnaas fa
(Nai Mateos 9:18-26; Nai Markus 5:21-43)
40 Lalit Nai Yesus sin ansaen abelo ma anfanin noin nefog Galilea in panin. Tabug sin ansanun na'kon abelo naan, too mfaun sin anpao nanij. Sin neman nauban naan he nsenug. 41-42 Anbi naan, anmu'i atonij mese, kanan nai Yairus. In le' naan, anaak ume onen anbi koot naan. In aan feto mese, anmoni naan toon bo'es am nuug een. Tabug iij, li'aan feto naan nameen mafena', ma he anmaat leh. Tabug nai Yairus niit Nai Yesus In amneman naan, in annao nsenug ma nlituu nbi In matan. In anhone Nai Yesus he annao noi in umel, he anbaban naan in aan feto.
Nai Yesus natael ee mnak, “Lekog.” Es on naan sin annaon noi nai Yairus in umel. Mes too mfaun sin ka ntahan naan fa sin tuak een he nokan. Es on naan sin annaon nauban naan.
43 Anmui' naan bifeel mese annao nok anbi naan. In menas napeni funan anloli babaun-babaun ka natfeek niit fa oni' toon bo'es am nuug een. In nalali in loit ma in amu'in sin ok-oke' tabug in npaloli in tuan, le' he nbaen mantalij sin. Mes ka tiit tani fa mantalij mese le' naleko' ee. Menas naan anfoe piut.g 44 Es on naan in neem anpaumak-maak Nai Yesus anbi In kotin. Lalit in anpoe naan kuun Nai Yesus In soo balug tukan. Anpoe nalali on nane, in naa' alolit naan, nasnaas naan.
45 Nok askeken ate, Nai Yesus nasnaas ma anhake. In antoti mnak, “Sekog es le' anpoe Kau?”
Mes ka tiit fa tuaf mese le' anmanaku' msa'. Lalit nai Petrus nak, “Usi' msa', Ho es! Ho ka miit fa noi toog namfau sin iij anmatiit een! Sin es le' anmatiit een na'kon kotin.”
46 Mes Nai Yesus nak noi ne mnak, “Kahaf! Lelon Au 'naben ate, anmu'i kuasat anpoi na'ko Kau. Es on naan Au uhine 'ak tuaf es anpoe Kau.”
47 Tabug bifeel naan annaben nahine noi in ka nabe'i nakolo' fa te, in anmulai namtau nmaat. In na'ta'ij ma nlituu anbi Nai Yesus In matan. Lalit in natu'in sin in lasij, anmulai na'ko in uun-a'ba'an. In natoon am nak, tabug in anpoe Nai Yesus on nane, in naleko naan.
48 Lalit Nai Yesus naguab noi ne mnak, “Feto'! Ho muleek, natuin ho mpalsai Kau. Amfani nai nok tainine' na taimamu!”
49 Tabug Nai Yesus naguab fe' nok bifeel nane, tuaf mese na'ko nai Yairus in umel neem natoon am nak, “koijoo, aam! Ho anah asnasan natfeek een! Es on naan naik muhaeb nai Aam Kulug.”
50 Mes tabug Nai Yesus anneen a'guaban nane, In nak noi nai Yairus am nak, “Ba'e. Am'elah kuum! naik mubati nekam! Ampalsai noi Uisnenog. In es le' naleko' ho anah, maut he in nmoin.”
51-53 Tabug sin anteen nai Yairus in umel, toog ee nahenu nanin. Sin ankaen nme'me'ul een. Nai Yesus nakain sin am nak, “Hi misnasab hi kaet een nai! Li'ana' iij ka nmatef. In antuup kuun aah!”
Mes too mfaun sin anmanis, natuin sin nitan neki sin matak fuak een nak, li'ana' naan asnasan natfeek. Lalit Nai Yesus antoti li'ana' naan in inaf-amaf, nai Petrus, nai Yohanis, ma nai Yakobus, he sin antaman nabguan nok Ne. Tuaf abjaan sin In anlelu sin he npaon anbin mone'.
54 Lalit sin antaman, Nai Yesus annaa' li'ana' naan in animan, ma no'en ee mnak, “Nona! Amfeen nai!” 55 Nok askeken ate, li'ana' naan anmoni nfaan, ma in anfeen nani. Lalit Nai Yesus anlelu li'ana' naan in inaf ee mnak, “Amfee ne he naah!” 56 Li'aan feto naan in inaf-amaf ansanmakan nmaten. Mes Nai Yesus namnauba' sin, he naik natoon lasij naan noi tuaf abjaan sin.