Usif Yesus naleta' anmatoom nok finij anbi naijaan huma'-huma'
(Nai Mateos 13:1-9; Nai Lukas 8:4-8)
4
Tabug mese, Nai Yesus annao anfani ntein anbi nefog Galilea. Ma too mfaun sin neman ma nauban naan Ee. Anmu'i abelo' mese anhake anbi naa. Lalit In ansae ma antoko anbi abelo' naan in tunan, ma nanoni' sin. Too mfaun sin le' anbi nefog naan in ninen, anneen In aguaban.a
Nai Markus 4:1-20
3 “Hi mneen milek-leko'! Anmu'i naan akiku' finij tuaf mese annao ma ankiku' finij anbi in lelel. 4 Tabug in ankiku', finij abjaan anmofu anbi lalan. Es on nane, kolo sin neman ma anleo ma ansiu nani finij naan. 5 Ma finij abjaan anmofu anbi naijaan mafatu' le' in naijaan ee anmaniih. Finij naan natolo labah. Mes natuin naijaan naan anmaniih, 6 es on nane, tabug manas ansae, fini atolos sin naan an'uuk-nene ma anmaten, natuin sin abaa'k een ka ntaam fa antee naijaan in nanan.
7 Finij abjaan anteni' anmofun anbi huu katila'. Lalit huu katila' naan anneo niis finij naan, tal antee ka nabe'i fa napuun. 8 Ma finij abjaan anmofun anbi naijaan ma'afa'. Finij naan natolo, ma nanaen tal napuun. Finij abjaan nafgua anloul gon bo' teen, abjaan bo' nee, ma abjaan natun mese.
9 Es on naan sekog anneen ma anheke naan leta' iij in oten, maut he in nateenb ee annao piut.”
Nansaa' am es Usif Yesus anfee lasi-noni' anpake leta'?
(Nai Mateos 13:10-17; Nai Lukas 8:9-10)
10 Lalit tabug Nai Yesus anmes-mese, In asimo anoni' sin tuaf bo'es am nuug, nok atonij abjaan antein le' anneen niit In leta' naan, neman he na'eku nokan. Sin antoti henati' In natoon noi sin leta' naan in oten. 11 Nai Yesus natae sin am nak, “Natuin hi mlomi he mihine Uisnenog In Aplenat namneo-namneo, es on nane, Au utoon ki leta' naan in oten. Mes noi tuaf abjaan, Au unoni' sin 'eki leta'. 12 Atonij abjaan sin paap mese on le' saa' le' Uisnenog In mafefa knino' anluul nani mnak,
‘Sin niit nalalin, mes ka nlomin fa he nahinen.
Sin nneen nalalin, mes sin ka nlomin fa he ansimo.
Maut he sin naik anpalsain noi Uisnenog,
henati' Uisnenog naik anpaluu he anfeen sin sako sanat antein.”’b
Usif Yesus natoon aleta' anmatoom nok finij naan in oten
(Nai Mateos 13:18-23; Nai Lukas 8:11-15)
13 Lalit Nai Yesus natoon leta' nane mnak, “Kalu hi ka mheke fa leta' iij in oten, nok lalan meel, he hi mibe'i amheke leta' abjaan sin otek een? 14 Es on naan leta' iij in oten on ii: akiku' finij naan, es le' tuaf le' ansaksii ma natoon Uisnenog In A'an ma Plenat. 15 Finij le' anmofun anbi lalan, tal antee kolo sin anleo ma ansiu nani sin naan, es le' tuaf-tuaf le' anneen Uisnenog In A'an ma Plenat. Mes ka loog fa, nitu le'uf een sin anakaf anaet neem ma nasiik naan A'an ma Plenat naan na'ko sin neek een. 16 Finij le' anmofun anbi naijaan mafatu', es le' tuaf-tuaf le' anneen ma ansimo A'an ma Plenat naan nok neek malinat. 17 Mes A'an ma Plenat naan ka nabaa' fa. Es on nane, in ka ntahan fa aloog anbi sin neek een. Ma tabug atonij abjaan nasusab natuin sin ansimo A'an ma Plenat naan, sin anpolin nani A'an ma Plenat le' naan. 18 Finij le' anmofun anbi huu katila' in atnanan, es le' tuaf een le' anneen nalali A'an ma Plenat naan. 19 Mes sin ntaisibun naek nok lasi huma'-huma', he sin nhaliin sin tuak een. Es on nane, taisibug huma'-huma' naan, es le' ansi'u napoitan A'an ma Plenat naan na'ko sin neek een, tal antee A'an ma Plenat naan ka nafgua fa saa'-saa'. 20 Ma finij le' anmofun noi naijaan ma'afa', es le' sin le' anneen ma ansimo A'an ma Plenat naan, lalit natuin Uisnenog In alomin. Lalit sin anmo'e 'mo'et alekot sin, on le' finij le' nafgua. Mo'et abjaan nafgua anloul gon bo' teen, abjaan bo' nee, ma abjaan natun mese.”
Naik amtobe pakug meki aba'
21 Nai Yesus naguab piut na'ko abelo' in tunan. In nfee leta' mese anteni' mnak, “On mee! Naat hi miit, ai' kaha, kalu atonij notu paku ana', lalit antobel neki aba'? Ai' nateke anbi hala in nupun. Ka tiit fa fe', ai'? Kalu nateke anbi naan, in ka npinaf len. Atonij mes lo he nateke' paku anbi bale alatas he npiin.c
Nai Markus 4:21-41
22 Natuin lalan naan, lasij le' nahunu makolo', of mamnita'. Ma saa' le' tabug iij ka mahine' fa, of mahine'.d 23 Sekog es le' anneen ma anheke naan leta' iij in oten, maut he nateenb ee annao piut.
24 Mitenab milek-leko'! Kalu hi mnilai atoni in amo'en, atonij abjaan of annilai ki on nane msa'. Uisnenog of annilai ki annesi na'ko nane msa'.e
25 Kalu sekog he nami Uisnenog In lomin namneo-namneo, in hinen of ansaat gon piut. Mes tuaf le' ka nlomi natuin fa Uisnenog In lomin, in olen of ansaat gon piut amsa'.”
Leta' anmatoom nok finij le' anmoni kuun
26 Lalit Nai Yesus naguab anteni mnak, “Uisnenog In Aplenat iij anmeinua anteni on le' finij le' nasaan on anbi atoni in lelel. 27 Maski atonij naan anfani noi in umel, ma faij-manas in antuup ma anfeen, in nniken nani finij naa. Mes finin le' naan natolon ma nanaen piut. 28 Finij le naan sin nmonin kuuk anbi naijaan, anmulai nanaen, nasufan, ma napunen. 29 Kalu anel namnatu te, in atguan aal in neem he noun guah. Uisnenog In Aplenat ii on nane msa'. Ale' saa'-saa' iij, Uisnenog es le' anmepu sin.”f
Leta' anmatoom nok finij afgua aan-ana'
(Nai Mateos 13:31-32, 34; Nai Lukas 13:18-19)
30 Lalit Nai Yesus naguab anteni mnak, “Au 'fee 'teni' ki leta' mese on ii. Uisnenog Inin, un-unu' sin fauk aah, mes na'ko nenog noi nenog, sin anmasaat ok piut ma namfau le'uf een. 31 Naan namnees on le' finij afgua aan-ana' anbi po'an. 32 Kalu hit atseen finij afgua aan-ana' naan, in nanae' anjali haug anae le'uf anbi po'an naan. Tal antee kolon neman ma namin mafo' anbi naan, ma nakunan.”
33 Nai Yesus nanoni' sin anpake cara on le' naan, namnees nok sin hinek een. 34 In bijaas anpake leta' kalu In nanoni' tuaf abjaan sin. Mes kalu In nok In asimo anoni' sin, In natoon ale' leta' naan sin otek een.
Usif Yesus nasnasab ani naek
(Nai Mateos 8:23-27; Nai Lukas 8:22-25)
35 Manas anmaab len, mes Nai Yesus anbi abelo' in tunan fe'. Ma In nlelu In asimo anoni' sin am nak, “Iim ala kit atlaak toi nefog panin.”
36 Lalit sin ansaen abelo' nabguan nok Nai Yesus. Ma sin annao nasaitan too mfaun sin anbi naa. Mes abjaan ansaen anbin abelo ateta'. 37-38 Tabug naan Nai Yesus antao In anakan anbi akanunu' ma antuup anfiin anbi abelo' in kotin. Sin annaon ka loog fa te, ani naek neem. Ma okin anpesan sin, ma oel ee antaam anbi Nai Yesus sin abelo', tal antee aal akle'og naheen. Es on naan asimo anoni' sin namtau nmaten. Ma sin neem anpoo' nafeen Ee mnak, “Aam! Amfeen fe'! Hit he tleem atmaat leh! Mes Ho ka mfaloli kit fa!”
39 Anneen on nane, Nai Yesus anfeen ma antaal anin am nak, “Musnaas nai!” Lalit In naplenat okin nane mnak, “Am'elah nai!” Tabug naan, anin ma okin naan an'elah naan. 40 Lalit Nai Yesus nakain In asimo anoni' sin am nak, “Nansaa' am es hi mimtau miseke' on naa? Hi ka mmu'i fa lasi fnekat noi Kau, ka?”
41 Sin ala sin namtaun ma ansanmakan. Ma sin naguab een am nak, “In le' iij, sekog? Tal antee anin ma okin sin natuin In aplenat!”