2 Es on nane, too mfaun sin neman na'ko mee-mee. Sin nauban naan Nai Yesus tal antee umel naan nahenu nok toog. Ma umel naan in nesug ma'eka' nok toog amsa'. Anbi nane, Nai Yesus natonan sin Uisnenog In A'an ma Plenat.

3 Tabug In naguab fe' anmu'i atonij haa anloi neki atoni ao a'olet mese, he nekij noi Nai Yesus. 4 Mes, natuin too mfaun naan, sin ka nabe'i neki fa atonij naan antee Nai Yesus In matan. Es on naan sin ansaen noi umel in tunan, ma sin anpukai umel naan in tefin, namnees anbi Nai Yesus In anakan. Tabug sin anpukai nalali umel naan in tefin na', sin nasanut ao a'olet naan nok nani in anahek.^a 5 Tabug Nai Yesus niit sin anmo'en on nane, In nahiin nak, sin npalsain namneo-namneo noi Ne. Es on naan In nak noi atoni ao a'olet naan am nak, “Ba'e! Ho sanat sin masako' nalaal je.”

6 Anbi naan, kulu agama lasi palsait Yahudi tuaf fauk nok antokon. Tabug sin anneen Nai Yesus In aguaban naan, sin annaben ka nlomij fa. 7 Lalit sin naguab een es nok es am nak, “Ka ka ka. Atonij ii, lo In balani he naguab on le' nael, oo! Aal Uisnenog es le' nabe'i ansako atoni sin sanat. Mes atonij ii In naguab naik kuun, on le' In es Uisnenog. In na'akan Uisnenog es le' nae!”

8 Mes Nai Yesus nahine nalali sin neek een. Lalit In nak sin am nak, “Hi naika mitenab on le' naa. 9-10 Meel es anmanaaf annesi? Kalu Au 'ak 'noi atoni ao a'olet le' iij m'ak, ‘Ho sanat sin masako' nalaal je,’ hi ka mihine fa noi he anjali, ai' kaha? Mes kalu Au 'ak ‘Amfeen nai! Maiti ho 'nahek ma amfani nai!’ Kalu in anfeen tabug naan, of na' hi miit ma mihine mmak, Au es le' Mansian Namneo-Namneo. Fun Au 'mu'i' kuasat ma hak he 'sako sanat.”

Lalit Nai Yesus nak noi atoni ao a'olet nane mnak, 11 “Amneen, oo! Tabug iij, ho muleek goen! Es on naan amfeen nai, maiti ho 'nahek ma amfani nai.”

12 Anneen on naan, ao a'olet naan anfeen nani. In nnunu ma naiti in anahek lalit anpoi ma annao. Ale' too mfaun een le' niit neki sin maatk een, ansanmakan, es on naan naguab een am nak, “Oin ee! Hit fe' tiit lasij le' ii! Uisnenog lo apinat-aklahat!”

13 Lalit Nai Yesus annao nfani ntein noi nefog Galilea in ninen. Too mfaun sin neman ma na'eku nokan, ma In nanoni' sin anmatoom nok Uisnenog In A'an ma Plenat.

14 Anbi balel naan, anmu'i tuaf mese, kanan nai Lewi, nai Alfius in aan monel. In mepug es le' he ankoni noni-ponij he nfee noi anaa' aplenat pah Roma. Tabug Nai Yesus annao anpe'o nane, In niit nai Lewi. Ma In nak ee mnak, “Ba'e! Uum he mutuin Kau nai!”

Anneen on nane, nai Lewi anfeen ma natuin nanij.

15 Lalit Nai Yesus sin antokon ma anbukaen anbi nai Lewi in umel, nabgua nok nai Lewi in amnono akoni noni-ponij sin. Anbi nane msa', anmu'i tuaf abjaan le' atoni Yahudis nasi'ug sin atoni amo'e amle'ut, anbukaen nabguan. Too mfaun sin le' antokon ma anbukaen anbi naan, anlomin he nneen Nai Yesus In aguaban.

16 Tabug naan, kulu agama tuaf fauk na'ko amnono palsait Farisi, sin niit Nai Yesus antoko ma anbukae nok akoni noni-ponij sin, ma ale' amo'e amle'ut sin. Es on naan sin antoti In asimo anoni' sin am nak, “Nansaa' es hi Kulug naah ma ninu nabgua nok akoni noni-ponij sin ma amo'e amle'ut sin?”

17 Mes Nai Yesus anneen sin haan totis naan, lalit In natae sin am nak, “Atoni amenat nami amalo' menas, mes atoni ao-mina' ka nami fa amalo' menas. Au 'uum he 'paloli atoni le' namle'u. Mes Au ka 'uum fa he 'paloli atoni le' annaben in tuan ee namneo.”

18 Tabug mese, tuaf na'ko amnono palsait Farisi, sin nanaah ok. Sin niit nai Yohanis in asimo anoni' sin nanaah ok amsa'. Mes sin ka niit fa Nai Yesus in asimo anoni' sin nanaah ok on le' sin. Es on nane, tuaf abjaan na'ko sin, neman ma na'eku nok Nai Yesus, he antoti mnak, “Aam! Hai minaah om. Nai Yohanis in asimo anoni' sin nanaah ok amsa'. Mes nansaa' am es Ho asimo anoni' sin ka nanaah ok fa?”

19 Nai Yesus natae sin am nak, “Hi mihine milaal je, kalu anmu'i fesek matsaos, tamu sin ka nanaah ok fa, mes sin anbukaen tal namsenan. Kalu nai monel fe' anbi nane fe', sin of anbukaen nabguan. 20 Mes anbi tabug mese, kalu tuaf nabaak neki nai monel naan, in amnono sin neek een ansusan, na' sin nanaah ok.”

21 Lalit Nai Yesus naleta' aguab mapolin mese, am nak, “Ka tiit fa tuaf mese he ntapas tais fe'ug noi soo balu mnaa'. Fun kalu atfase soo balug naan, tais fe'ug naan of an'uuk gon ma npisu anteni' soo balu mnaa' naan. 22 On nane msa', ka tiit fa tuaf, le' antisi' tua miin fe'ug noi asaap molof. Natuin asapa' naan of nabola' ma tua mina' naan of nat'oop anpoi oke'. Es on naan tua miin fe'ug, lo he ttisij noi asaap fe'ug.”^b [Nok aguab naan, Nai Yesus nanoni' sin am nak, In lasi-noni' fe'ug, naik amselog nok atoni Farisis sin lasi-noni' amnaa'.]

23 Tabug mese, nateef nok atoni Yahudis sin neno onen, Nai Yesus sin annaon ansoopiu lelel sin ninek een. Ma In asimo anoni' sin anhonu ane-gandum he sin nahan.^c 24 Atoni Farisis niit sin anmo'en on naan sin nak noi Nai Yesus am nak, “Nansaa' am es Ho asimo anoni' sin antanhai hit atolan lasi palsait? Sin anhonu ane-gandum nateef nok neno snasat! Ka nabe'i fa he hi mmo'e on le' naan!”

25-26 In natael am nak, “On meel? Hi ka mimnau fa tu'in na'ko baba nai Daut? Tabug naan, nai Abiatar anjali anaak palsait Yahudi sin anakaf anaet. Nai Daut nok in tuaf een sin taik een naloot tal namnahan nmaten. Es on naan sin antaman anbi Uisnenog In Tenda Onen, ma naiti utunu' le' anaak palsait een natulu' ma nana'at nalali sin noi Uisnenog, ma sin anbukaen. Natuin in amneot, aal anaak palsait sin es le' nabe'i anbukae sin, mes tuaf ateta' na'ko naan ka nabe'i fa. Lalit nai Daut sin anbukae utuun' een naan, mes ka tiit fa es, le' nakain sin.”^d

27 Lalit Nai Yesus naguab noi sin anteni mnak, “Nati' naikam mnikan, Uisnenog napala' neno snasat he nfee alekot le' he mbaab mansian ala kit. Mes In ka nmo'e fa mansian ala he natuin neno snasat in atolan sin. 28 Au le' iij, Mansian Namneo-Namneo. Au 'mu'i hak he 'leek mansian he nabe'i anmepu saa'-saa' anbi neno snasat. Ma Au 'mu'i hak amsa' he 'taal mansian he naikan nmepu saa'-saa' anbi neno snasat.”