Ampaant om he naik mituin atoni Farisis sin 'mo'et amoel
(Nai Mateos 10:26-27)
12
Tabug naan, anmu'i toog nifun fauk, neman he anneen Nai Yesus. Sin annaon ntaisibun ok ma nauban naan Ee. Es on naan In naguab nahunu noi In asimo anoni' sin am nak, “Ampaant om he naik mituin atoni Farisis sin 'mo'et amoel. Fun sin bijaas naguab een, naik, ma anmo'en, naik.a 2 Sin anmo'e namoen on nane, lekog, mes sin 'mo'et amoel naan of mamnita'. Fun saa'-saa' le' tabug iij nakolo ok, of mamnita een.b 3 Saa' le' hi miguab ee nbi makolo' tabug iij, of manena' knino'-knino'. Saa' le' hi mimutu sin anbin ke'an, of tuaf abjaan sin naguab nahel-helan sin anbin too mfaun een sin humak ma sin maatk een.”Mansian in upan anbi Uisnenog In human ma In matan
(Nai Mateos 10:28-31)
4 Nai Yesus naguab anteni mnak, “Aok-abjaan ala ki! naik mimtau, kalu anmu'i tuaf he nlolo ki. Natuin sin nabe'i anlolo hi aom een naan, mes ka nabe'i namate fa hi smanam een naan. 5 Au he utoon ki m'ak, hi lo he mimtausan sekog. Hi lo he mimtausan Uisnenog. Natuin In es le' nabe'i anlolo ki, lalit anpolin nataam ki noi ai maputu' ma malala' abal-balat. Es on naan In le' iij, es le' lo hi he mimtausan moi Ne namneo-namneo.
6 Hi mitenab miit, kolo anel in upan fauk, hah? Mana' nima te, loit sen nuug, ai'? Maski on nane msa', mes Uisnenog ka nniken nani fa mese amsa'. 7 On nane msa', Uisnenog nail ki. In nahine namnuut hi anakam funum een, fauk. Es on naan hi naik mimtau, natuin Uisnenog antao upaf noi ki, annesi nako kolo anel een ok-oke'.”
Naik ammae he mmanaku' Usif Yesus
(Nai Mateos 10:32-33, 12:32, 10:19-20)
8 Lalit Nai Yesus naguab anteni noi In asimo anoni' sin am nak, “Amtaha hi lukem een lek-leek! Kalu anmu'i tuaf balani he nmanaku' Au Tuak ee anbi tuaf abjaan een sin huumk een anbi pah-pinan iij, Au of amanakug anbi Uisnenog In ahaket een et sonaf neno tunan am 'ak, in le' naan Au Inij. 9 Mes kalu anmu'i tuaf naguab anbi mansian sin am nak, in ka nahine Kau fa, Au of uguab a'bi Uisnenog In ahaket een et sonaf neno tunan am 'ak, Au ka uhine le fa msa'.
10 Au le' iij, Mansian Namneo-Namneo. Kalu anmu'i tuaf naguab nale'uf Au kanak alekot, Uisnenog nabalab he nniken nani in sanat naan. Mes kalu In naguab nale'uf Uisnenog In Asmana Knino' In kanan alekot, Uisnenog ka nniken nani fa sanat naan.c
11 Of kalu anmu'i tuaf anheel neki ki mnao moi ume feek lasi palsait, ai' amnao moi anaa' aplenat, natuin hi mpalsai Kau, hi naik mimtau mak hi mimneob om on mee. 12 Fun tabug naan, Uisnenog In Asmana Knino' of natoon aguab noi ki namnees nok haan totis he hi mitae sin.”d
Atoni amu'it le' an'olel
13 Lalit tuaf mese na'ko too mfaun sin naan antoti Nai Yesus am nak, “Aam Kulug! Amlelu maan au tata' he anbati kai hai pusaak sin fe'!”
14 Mes Nai Yesus natael ee mnak, “Kaa! Sekog es naiti Kau 'jali afeek lasij 'oi hi lasi human on le' naan?”
15 Lalit Nai Yesus naguab noi too mfaun sin am nak, “Hi mpaant om he naik amsinimaak! Fun a'mui'f ka nfee fa lasi taimamut.”
16 Lalit In natu'in neki aguab mapolin am nak, “Anmu'i atoni amu'it es, in lelel nahenu nok sekit ma mnonut anha-hoen. 17 Tal antee in selel sin nahenun, ma in ka nahine nteni fa he nabelak noi mee. 18 Lalit in nafeek am nak, ‘Au he 'mo'e kuuk, on ii! Au 'pukai 'ani ume maselel amnaa' iij, lalit au 'mo'e teni ume maselel anaek annesi, lalit usaeb 'ani au sekit ma mnonut sin ok-oke' ma au 'mu'ik abjaan sin anbin nane msa'. 19 Kalu anjali nalali on nane, au of uguab 'oi au tuak ee m'ak, “Hoi! selel naheen gue! Amnahat nanokab on toon noi toon. Es on naan meku ma minu nai namin-miin, amtoko ma mbeko ha haem een naan nai!’” 20 Mes Uisnenog natonan ee mnak, ‘Hoi! A'olet! Faij iij, ho mmaat. Lalit sekog es anpaal kuun selel naan in nesan ok-oke'?’
21 Es on naan, on ii! Mansian sin nabe'i nami he anmu'i 'maus na-naek anbi pah-pinan iij noi in tuan ee kuun, mes anbi Uisnenog In tenab, tuaf le' naan anma'mu'i nmaat, natuin in ka nmoni leko fa nok Uisnenog.”
Ampalsai noi Uisnenog kuun
(Nai Mateos 6:25-34)
22 Lalit Nai Yesus nanoni' anteni noi In asimo anoni' sin am nak, “Hi naik amtaisibu noi hi 'monim sin nenog-nenog, mak he meku saa', ai' he mpake saa'. 23 Natuin hit amonik iij, annesi na'ko saa' le' hit tahan, ma saa' le' hit tpakel. 24 Mail miit kolo-kaa' metan! Sin ka nsenan fa, ka nsekin ma nonun fa, ka nmu'in fa selel he nabelak sin sekit ma mnonut, mes Uisnenog anpaloli sin. Kalu on nane, In nabe'i npaloli ki msa'. Natuin In nso'i ki annesi na'ko kolon naan. 25 Kalu hi mtae hi huum een anbin nino, lalit mtaisibu huma'-huma', in nabe'i anluut hi 'monim sin, aa, oo? Kahaf! 26 Es on naan kalu mtaisibu nok lasi aan es ma ka neki fa nesaf saa'-saa', nansaa' am es amtaisibu nok lasi naek? Sin nesan een saa'?
27 Amnao mail miit fuabona' et nasij. Ka nmepu fa lelel, ka ntenu. Mes kesel nai Soleman in pakel sin le' ma'upa' alim-liimt een amsa', es ka on fa fubona' fuij naan.e 28 Fun Uisnenog anpaloli ma'ug le' ka ma'so'it fa. Le' aal anmoni nenog iij, ma anmiu te, anmaat, lalit notug ma anputu nmaat. Kalu on nane, In nabe'i npaloli ki msa' le' maso'it annesi na'ko ma'ug. Es on naan nansaa' am es hi ka mi'pesi' fa hi 'monim een namneo-namneo noi Ne? 29 On nane msa' hi naik amtaisibu anmatoom lasi mnahat ma mninut. Fun Uisnenog of an'ulus sin. 30 Atoni le' ka na'pesi' fa in tuan noi Uisnenog, sin anhaen nmaten noi le' he naloitan lasin naan ok-oke'. Mes hi naik on le' naan, natulin hi Ama' abit sonaf neno tunan nahine nani saa'-saa' le' hi mpaluu sin. 31 Kalu hi minaob Uisnenog In mepug fe', na' In naloitan ki ale' lasin naan noi ki.”
Mubelak amaus sonaf neno tunan
(Nai Mateos 6:19-21)
32 Lalit Nai Yesus anluut anteni am nak, “Hi on le' abibi-kase pukan ana mese, le' an'olen nmaten. Mes naik mimtau! Natuin hi Ama' et sonaf neno tunan naan, Usi Naek. Saa' le' Inij, In anmaliin he anfee le noi In anah le' In neek sin. 33 Es on naan amnao nai he misosa' mani hi bale' een, lalit ambati loit een noi ama'mu'it sin. Nok lalan naan hi mibelak amaus et sonaf neno tunan anbi bale taimamut abal-balat. Abakat, ka nabe'i nabaak ee fa. Naem ma ikij ka neku gue fa. 34 Mimnau milek-leko'! Hi mu'im een anbin meel ate, hi neekm een etan naan.”
Ameput le' nabalab on he antuthae faij-manas
35-36 Nai Yesus naguab anteni mnak, “Hi mibalab he mtuthae Kau, faij-manas. Nahuum on le' atel, le' anbee' ma anpao in kesel ee anfani neem na'ko fesek matsaos. Kalu in kesel ee no'en anbi eno' ee te, in lo he nasoin labah.f 37 Kalu kesel ee neem napeni in ameput sin anpa-paon on nane, sin uak een naleek. Fun sin kesel ee nekin on naklila' in nekan alekot noi sin. In anpake bale atel, lalit in antuthae ameput sin naan nok amnahat amin-minat. 38 Ameput een naan an'ua lekon namneo-namneo, natuin sin antuthae sin kesel ee nok alekot. Maski sin kesel ee neem tabug meel am meel aah, fai atnanas, ai' nesi-noi anmiu, sin naloitn een piut.
39 Mitenab milek-leko'! Kalu anmu'i ume tuaf le' nahine nani noi abakat he antaam tabug meel, in ka nfee fa meinuan he abakat naan anpukai in umel. 40 Es on naan hi lo he milotn om namneo-namneo, natuin ka tiit fa tuaf mese nahine namneo-namneo, leka', Mansian Namneo-Namneo, he nkoen On anfani neem.”g
Ameput le' nakii' ma atel le' anbeo
(Nai Mateos 24:45-51)
41 Lalit nai Petrus antoti Nai Yesus am nak, “Aam Kulug! Ho aguab mapolin lelon na antoom noi kai mmese oo, ai' antoom too mfaun sin ok-oke'?”
42-44 Es on naan Nai Yesus natael am nak, “Aguab mapolin lelon na antoom nani too mfaun sin ok-oke' le' anmepun on le' anaak ulusan le' an'ulus nahine ma nakii' noi in kesel. Fun in kesel ee naitij he anjali abati mnahat noi ameput sin. Kalu in nmakoe anbi mepug nane, maski in kesel ee neem tabug meel am meel aah, mes in lo he nmo'e alekot namneo. Lalit in an'ua-leko, natuin in kesel ee of naitij anjali a'ulus noi amaus sin ok-oke'.
45 Mes namle'u kalu atel naan anmulai natenab am nak, ‘Eeh! Anaef ee of aloog fe', na' neem.’ Lalit in anmulai antepo ma anbaan atel abjaan, es le' bifeel ma atonij. Lalit in antoko ma naah ma ninu ma nmalin-maliin tal antee anmafu nmaat. 46 Mes tabug mese, tabug atel naan ka natenab naan fa saa'-saa', nok askeken, sin kesel naan anfani neem. Tabug sin kesel naan nahine lasin nane, in ntepog, lalit anli'ug he napeni kuun in paan een es mone', nok tuaf-tuaf abjaan le' ka naki'an fa natuin sin kesel ee in alomin.
47 Fun atel le' nahine nani in kesel ee in lomin, mes ka npaloitan fa, ai' ka nlomi fa he anmo'e on le' naan, of napeni hukum mafena'. 48 Mes atel le' anmepu nsaan, natuin in ka nahine fa in kesel ee in alomin, in of napeni hukum manafa. Fun atoni le' ansimo namfau, in paluut een amsa' namfau. Atoni le' ansimo mepu naek, in suu-tais ee msa' anaek.”
Usif Yesus In anoni' een nabe'i anmo'e tuaf anmalaban een
(Nai Mateos 10:34-36)
49 Nai Yesus anluut anteni In aguban ee mnak, “Au 'uum he beti Au nuug na'kon tuaf abjaan anbi pah-pinan ii. Naan on le' tuaf anpake aij, he notu mapasu'. Au 'lomi he aij naan anpiin anbi meel am meel. 50 Mes Au lo he asutai mane'at le' mafena' nahunu fe'. Au of upeni mane'at namneo-namneo tal antee in tabug ee oke'.h 51 Hi mitenab am mak, Au 'uum he 'eki ki lasi halan ma taimamut anbi pah-pinan iij? Kahaf! Au 'uum he 'mo'e mansian sin anmatoen, ma nasaan ok, natuin Au noni' een. 52 Anmulai tabug iij, olif-tataf, bae-feto, bae-mone sin of anbatis ok. Anbi umel mese in nanan, tuaf teen, anlaban tuaf nuug, ma tuaf nuug, anlaban tuaf teen.
53 Ama' anlaban anah;
anah anlaban amaf.
Inaf anlaban anah;
anah anlaban inaf.
Baif anlaban aan upuf;
upuf anlaban baif.”i
Mihine milek-leko' neno amsuput in a'taka' een
(Nai Mateos 16:2-3)
54 Es on naan Nai Yesus naguab nok too mfaun sin am nak, “Kalu hi mail nopel na'teem anbi pesit neno-tees, hi mak ‘a'taka' iij, ulan he nmouf gue.’ Namneo on le' naan. 55 Kalu anin na'ko pesit haa'-nua neem, hi mak, ‘A'taka' iij, nak manas maputu' matani'.’ Namneo on le' naan. 56 Hoi! Hi mansian aputa-kliun ki, hi miguab, naik, ma mmo'e te, naik! Hi mihine mani pah-pinan iij nok nani nenog atnanan sin alomik een. Mes nansaa' am es hi ka mihine fa Uisnenog In alomin Ee anbi tabug iij?”
Ammahalan nekaf mok hi musun
(Nai Mateos 5:25-26)
57-58 Nai Yesus naguab anteni am nak, “Kalu hi mmaklasi, nansaa' am es hi ka mibe'i mifeek kiim fa, meel es le' namneo! Leko nnesi am'ulus halan nahuun! Naik-naika hi mtee milali afeek lasij, in nafeek ki he mtaam moi ume buij. 59 Fun kalu on nane, hi ka mibe'i mpoi maan fa, kalu hi ka mbaen milali fa hi tusa' le' afeek lasij nafeek ee noi ki naan.”