Usif Yesus In Tu'in Alekot
natuin
nai Lukas in lulat
Nansaa' am es nai Lukas anluul tu'in le' iij?
1
1-3 Aam Teofilusa le' matola'.Tabe.
Tuaf amfaun sin ansobal he nluul niit tu'in anmatoom nok lasin le' anjalin anbin hit sonak ma hit atnanak. Sin anluul lasin naan, anpaken tu'in le' anputal on naba-baal aah na'ko kai noi kai anmulai na'ko tabug unu', le' hai mihine mani sin na'ko Usif Yesus in tuaf een le' anpaumaak Ee, ma na'ko tuaf abjaan amsa' le' nitan neki sin maatk een kuuk. Ale' tu'in sin naan, namneo-namneo natuin ahaa Uisnenog In lasi manpaa' unu' naan.
Es on naan au palekas ulali sin antee tal namtiis, anmulai na'ko lasij naan in uun aba'an. Lalit au ufeek he 'luul ulek-leko' sin utuin sin a'naok een. Nok lalan naan, ho mube'i muhine namneo-namneo saa'-saa' le' anjalin nalalin. 4 Ma ho mube'i mpalsai mmak, saa' le' tuaf-tuaf sin natu'in sin naan, ka lasi moel fa. Lasin naan, namneo-namneo anjalin!
Uisnenog In ahake sonaf neno tunan, natoon nani lasij anmatoom nok nai Yohanis Aslanit
5 Tu'in le' iij in uun aba'an on ii: tabug kesel Herodes annaa' aplenat anbi propinsi Yudea, anmu'i naan atonij mese, kanan nai Sakarias. In le' naan, anaak lasi palsait Yahudi tuaf mese. Ma in amsa' tuaf mese na'ko pukan nai Abia in anaak palsait sin. Nai Sakarias in feel, es le' bi Elisabet. Bi Elisabet naan na'ko sufa'-ka'uf anaak palsait sin amsa', natuin baba nai Musa in tataf nai Harun in sufan-ka'un.b 6 Sin nua sin anmonin natuin ahaa Uisnenog In aplenat ma atolan sin ok-oke'. Atoni antola sin amsa'. 7 Ma sin nua sin namnasin nalalin, mes ka nmu'in fa anah, natuin bi Elisabet naan, anmoub.
8 Tabug mese, nai Sakarias nok in pukan Abia sin napenin tabug-maenuan he ntaman anmepun anbin Ume Onen Uuf anbin koot Yerusalem. 9 Natuin sin halat, anaak palsait sin anhelan suul ana', he nahinen nak, sekog es le' anmu'i paaf he ntaam noi Ume Onen Uuf naan in Ke'an Aknino' nneis-neis. Anbi naan, tuaf atamas naan lo he notu hau foo meni' anbi Uisnenog In human ma In matan. Nenog naan, nai Sakarias es le' anheel naan suul ana' naan. 10 Lalit in antaam noi Ke'an naan. Tabug in notu hau foo meni' anbi Ke'an naan, too mfaun sin an'onen een anbi kintal naan. 11 Nok askeken ate, Uisnenog In ahake mese neem na'ko sonaf neno tunan ma nhake nbi balel le' notu hau foo meni' naan in aon abjaan ane'ug.
12 Nail niit on nane, nai Sakarias namtau nmaat, tal antee in ka nahine fa he nmo'e saa'. 13 Mes ahake sonaf neno tunan naan naguab am nak, “Sakarias! naik mumtau! Fun Uisnenog anneen nalali ho onen totis. Es on naan ho feel le of nahoni li'aan mone mese noi ko. Ho lo he mukanab, nai Yohanis. 14 Too mfaun sin of anmalinan nabgua nok ki, natuin hi mihoon. Li'ana' le' naan, of anhaliin ho nekam naan. 15 Uisnenog In Asmana Knino' ankuaas naan ee, anmulai na'ko tabug in anbi in inaf apun. In lo he nanunin ale' kanan amninu mafug. Tabug in nanae neem, Uisnenog anpakel anjali atoni naek.c 16 In of anfuli' toog Israelas amfaun he anbelok anfanin natuin sin Usif, es le' Uisnenog. 17 In mo'et ma taos namnees on le' baba nai Elia, Uisnenog In mafefa knino' unu' naan. In neem nahunun hit Usi'. In anmo'e amaihonit een neek een he nneek sin aanh een. Ma tuaf-tuaf le' ankoti Uisnenog, in noebani sin amsa', he sin noebanin anfani neman, ma natuin Uisnenog In alomin. Nok lalan naan, in nabalab sin neek een he nsimo Usi' In amneman.”d
18 Mes nai Sakarias antoti ahake naan am nak, “Kaa! Naan of anjali on mee? Au 'ok au feel mimnasi milaal je! Au 'mo'e on mee, he au ube'i uhine 'ak lasin naan of anjalin?”
19 Lalit ahake naan natael am nak, “On ii! Au le' iij, nai Gabrial, Uisnenog In tuaf alelu. In nekin On anlelu kau he 'uum utoon ko tu'in alekot le' ii.e 20 Mes ho ka mpalsai fa au aguab een le' ii. Es on naan taka' le' ho mtotij na, on ii! Ho maam of ka nmaloe leko fa kalu ho mlomi he muguab. Es on naan ho ka mube'i muguab fa saa'-saa', anmulai le' tabug iij, tal antee hi mihoni' li'ana' naan. Ho mail kuum. Saa' le' au uguab le' iij of anjali, nateef nok in tabug.”
21 Too mfaun sin le' an'onen een etan mone', namkakan, natuin nai Sakarias ka npoi fa fe'. 22 Tabug in anpoi neem, in ka naguab nahine fa saa'-saa'. Lalit in anpake in animan he ansenin sin. Ma sin nahinen nak, Uisnenog naklila' nalali lasi sanmakat mese anbi Ke'an Aknino' anneis-neis naan.
23 Sin tabug-maenuan naan oke een, es on naan nai Sakarias anbelok anfani noi in umel. 24-25 Ka aloog fa te, bi Elisabet na'apu'. Es on naan in ka npa-poi niit fa na'ko sin umel tal antee funan niim. In naguab am nak, “Pules-bo'is noi Uisnenog! Koijoo! Uisnenog naklila' In nekan alekot noi kau. Kalu au upeni anah, tuaf abjaan sin ka namae kau fa lee.”
ahake Uisnenog neem na'ko sonaf neno tunan ma na'eku nok bi Maria
26 Tabug bi Elisabet in aput naan funan nee, Uisnenog anleek In ahake na'ko sonaf neno tunan annao noi kuan mese et propinsi Galilea. Kuan naan, kanan, Nasaret. Ahake naan, kanan nai Gabrial. 27 Anbi kuan Nasaret anmu'i li' feto ao-'temef mese, kanan bi Maria. Bi Maria anmanaa' nok atonij mese, kanan nai Yusuf. Nai Yusuf le' naan, Kesel nai Daut in sufan-ka'un. Es on naan, nai Gabrial annao ma na'eku nok bi noon Maria.f 28 In naklila' in tuan noi bi bifee munif naan am nak, “Tabe! Uisnenog anpili ma anbeti naan ko, he nmo'e naan kuun lasi alekot mese noi ko. Uisnenog nok ko, Maria.”
29 Anneen on nane, bi Maria namkaak, natuin ahake naan in aguaban. In ka nahinel fa in oten saa'. 30 Es on naan ahake naan anluut anteni mnak,
“Maria! naik mumtau.
Fun Uisnenog In salit, naklila' In nekan alekot noi ko.
31 Ka loog fa te, ho of mu'apu',
lalit ho of muhoni maan li'aan mone mese.
Ho lo he mukanab Ee, Nai Yesus.g
32 In of anjali Atoni anaet.
Uisnenog of anteek Ee mnak, ‘In le' naan, Au Aanh ee kuuk.’
Es le', Anah na'ko Uisnenog le' A'laat Le'uf.
Uisnenog of nanaeb Ee he nnaa' aplenat,
nahuum on le' In babaf kesel nai Daut.
33 In of es le' annaa' aplenat piut-piut noi toog Israelas sin.h
Ma In aplenat naan nabal-baal.”i
34 Mes bi Maria antoti nai Gabrial am nak, “Au ka 'taa-tuup 'iit fa fe' 'ok atonij! Es on naan au he u'apu' on mee?”
35 Lalit nai Gabrial natael am nak, “On ii! Uisnenog In Asmana Knino' of neem noi ko. Ma Uisnenog A'laat Le'uf In kuasan naan of naan naan ko. Nok lalan naan, Li'ana' le' of ho muhoni maan Ee naan, aknino' namneo-namneo, natuin In le' naan, Uisnenog In Anah.
36 naik amsanmaak! Ho nonot es, kanan bi Elisabet, na'apu' nalaal je amsa'. Fun kaah, in namnasi nalaal je. Es on naan tuaf abjaan sin nak, in ka nabe'i nahoni fa. Mes tabug iij, in na'apu' funan nee leh. 37 Anbi Uisnenog, saa'-saa' nabe'i anjali!”j
38 Lalit bi Maria natael am nak, “Lekog. Au le' iij Uisnenog in atel kau. Maut he ale' saa'-saa' naan najalib on natuin ho guabam naan. Au uloitan au tuak ee, he utuin ahaa Uisnenog in lomin.”
Lalit ahake sonaf neno tunan naan, nasaitan bi Maria.
Bi Maria annao nmakiso bi Elisabet
39-40 Ankono nenog fauk ate, bi Maria naen labah na'ko Nasaret noi nai Sakarias in kuan et anu'af sin propinsi Yudea. Antee nae, in antaam noi nai Sakarias in umel. Ma in naseon ma antabe bi Elisabet.
41 Tabug bi Elisabet anneen bi Maria in haan tabe naan, li'ana' le' anbi bi Elisabet in apun, natiik. Ma Uisnenog In Asmana Knino' neem ma ntaam noi bi Elisabet in tuan. 42 Lalit in naguab naheel-heel am nak, “Maria! Mansian sin of naiti nalatan ho kanam naan, annesi na'ko ale' kanan bifeel pah-pinan iij! Sin of naiti nalatan Li'ana' le' anbi ho apum! 43 Au tuak ee msa' nanaeb on, natuin au Usi' In inaf neem nateef nok kau. 44 Ho fe' museon, li'ana' le' au u'apus ee iij, natiik, natuin in anmaliin. 45 Uisnenog naklila' nalali In nekan alekot noi ko, natuin ho mpalsai mmak, In nlomi he nmo'e natuin In lasi manpaa'.”
Bi Maria anpules ma nbo'is Uisnenog
46 Bi Maria anmulai naguab am nak,
“Na'ko au nekak nanan iij,
au 'tuna' ulatan Uisnenog!
47 Au nekak anmaliin,
natuin Uisnenog ansoi nafetin naan kau!
48 In nail ma ntae nalek-leko' nalali kau,
In aan lelu' ma aan leka' le' ka ma'upa' fa ii.
Anmulai tabug iij, ale' mansian sin of naguab een ma anteek kau,
bifeel le' agua leko le'uf kau,k
49 natuin Uisnenog anmo'e lasi sanmakat huma'-huma' noi kau.
In amsa', Akuaas Le'uf ma Knino' Le'uf.
50 Uisnenog naklila' ma natoon lasi kasian noi ale' too mfaun le' antola ma nabees noi Ne,
na'ko batan noi batan.
51 In anpake In kuasan,
he ntaisibub tuaf-tuaf le' nanaeb sin tuak een.
52 In namofu tuaf-tuaf le' anna'an kuasat,
natuin sin nanaeb ok ma anpaas ok.
Mes In nanaeb tuaf-tuaf le' neek pala' ma neek baun.l
53 In anhao ma nfati amnahas sin tal antee namsenan,
mes In anli'u napoitan atoni amu'it sin,
he sin anpoin naon, ka nhuku nekin fa saa'-saa'.
54 In anbaban In too Israelas sin,
ma naklila' In lasi kasian noli sin piut-piut.
55 Nahunut, In nahakeb lasi manpaa' nok hit babaf sin,
es le', baba nai Abraham ma in sufan-ka'un sin ok-oke'.
Tabug iij, lasi manpaa' naan mafutu' ma anhake nabal-baal.”m
56 Naguab nalali on nane, bi Maria natgua nok bi Elisabet funan tenu fe'. Lalit na' in anfani noi kuan Nasaret.
Bi Elisabet nahonis nai Yohanis
57 Antee in tabug on nane, bi Elisabet nahoni naan li'aan mone mese. 58 Lasij naan naneenb on ma nabenob on noi in nonot ma kuan naan in nanan, nak Uisnenog naklila' nalali In nekan alekot noi bi Elisabet, es on nane In anfee ne li'ana'. Es on naan sin al-alasin anmalinan amsa'.
59 Li'ana' naan anmoni naan nenog fanu te, sin naheli' natuin atolan halat atoni Yahudis. Sin he nakanab li'ana' naan, nai Sakarias, on le' in amaf kanan.n 60 Mes in inaf ka nlomi fa matani nak, “Ka on fa naan! In kanan, lo he nai Yohanis!”
61 Mes sin natael am nak, “Nansaa' am es ho mpili kanaf Yohanis? Ka tiit tani fa tuaf mese na'ko hi nonot le' anpake kanaf naan!” 62 Es on naan sin nsenin nai Sakarias he nahine in lomin, he nakanab li'ana' naan nak sekog.
63 Nai Sakarias ansenin sin he ntoti hau bena' he nluul. Lalit sin annona' ee hau bena'. Ma in anluul am nak, “In kanan nai Yohanis!” Es on naan too mfaun sin ansanmakan ok-oke'.
64 Nok askeken, nai Sakarias in maan amates naan anmaloe'. Ma in ansii ma nbo'is nanaeb Uisnenog. 65 Tuaf-tuaf le' natguan anbin balel naan, ansanmakan ma namtaun amsa'. Es on naan lasij naan naneenb on ma nabenob on na'ko tuaf noi tuaf, tal antee abiten propinsi Yudea le' natguan etan anu'af sin nahinen ok-oke'. 66 Ale' aneen lasij naan nateenb een nak, “Naan namneo ge, Uisnenog In kuasan nok li'ana' naan. In of nanae neem ate, in taos-mo'et on le' mee, oo?”
Nai Sakarias anpules ma nbo'is Uisnenog
67 Lalit Uisnenog In Asmana Knino' neem ma ntaam anbi nai Sakarias in tuan. Ma in naguab am nak,
68 “Pules-bo'is noi Uisnenog, toog Israelas sin Usif!
Natuin In ankoen On neem he nsoi naan In tuaf een,
maut he sin naik on le' atel.
69 Uisnenog naiti ma nanaeb Tuaf mese, le' In kuasan matani',
he nsoi nafetin kit.
In le' naan, kesel nai Daut in sufan-ka'un.
70 Uisnenog anpaa' nani lasij ii na'ko faijan unun,
anpake In mafefa knino' sin le' nakii' noi Ne.
71 Tabug iij, In he nsoi nafetin kit,
na'ko hit musun sin,
ma na'ko tuaf-tuaf le' sin nekak een namenan noi kit.
72-73 In naklila' In nekan alekot noi hit babaf sin,
natuin In namnau piut-piut noi In lasi manpaa' nok sin,
le' In anfutu ma nahakeb nok baba nai Abraham.
74 In ansoi nafetin nalali kit na'ko hit musun sin,
he hit tabe'i taluli' ma tabees toi Ne,
ma naik tamtau tteni.
75 In ansoi nafetin kit,
he hit tabe'i tmoni knino' ma mne'o piut-piut atbi In human ma In matan.
76 Yohanis! Ho le' iij, au aan honi' aah, ko.
Tuaf of nahine ko nak, ho le' iij, Uisnenog A'laat Le'uf In mafefa knino'.
Ho of amnao ma mutoon moi too mfaun sin,
he sin nakoo' aniimk een he nsimo Usi' In amneman.o
77 Ho of amnao muklila' ma mutoon lalan moi Uisnenog Inin,
he sin nahinen nak, sin napenin sako sanat ma 'honis,
natuin Uisnenog annose ma npolin nani sin sanat ma penu sin.
78-79 Natuin Uisnenog nekan n'oe teen noi kit,
es on naan In nfee kit tabug meinuan fe'ug,
nahuum on le' neno fe'uf le' neki miu-sine' ma piin fe'ug.
Hit le' abiten mesi'okan in nanan ok-oke,
ma hit le' amtaus lasi nitu-'maten kit,
natuin hit ka tomahalan nekaf fa fe' tok Uisnenog,
of hit tapeni miu-sine' he nnao naat kit toi laal mamut ma ao mina.”p
80 Nai Sakarias anbo'is nalali Uisnenog. Es on naan nai Yohanis anmulai nanae piut. Uisnenog In Asmana Knino' anhatanij piut. In nanae neem on nane, in annao natgua nbi bale luman naloo na'ko kuan, tal antee tabug in anmulai naiti in mepug noi toog Israelas sin.