3-4 Mes Nai Yesus natae sin am nak, “He tak on meel ee, oo? Hi ka mimnau fa baba nai Daut in tu'in ee oo? Baba nai Daut nok inin ne, sin taik een na'loton natuin sin namnahan nmaten. Es on naan sin antaman noin Uisnenog In Tenda Onen ma naitin utunu' le' anaak palsait een sin nana'at nalali sin noi Uisnenog, ma sin nahan. Fun, aal anaak palsait sin es le' nabe'in he naah utunu een naan. Tuaf abjaan sin ka nabe'i fa. Lalit baba nai Daut sin nahan, mes ka tiit tani fa tuaf mese he nasaan sin. Hi on le' ka mtae mihine fa Uisnenog In Sula Knino'!^b

5 Amtaha hi lukem een he mneen milek-leko'! Au le' iij, Mansian Namneo-namneo. Au 'mu'i hak he ufeek 'ak, atoni nabe'i he anmo'e saa'-saa' anbi nenog snasat.”

6 Tabug mese, nateef nok neno snasat, Nai Yesus annao nanoni' anbi ume onen. Anbi naan, anmu'i atonij mese, in animan aon abjaan anmaat. 7 Anbi naan amsa', anmu'i kulu agama tuaf fauk ma atoni na'kon amnono palsait Farisi le' namin lalan he nakleo namofu Nai Yesus. Lalit sin nnuu' Nai Yesus, kal-kalu In naleko' atoni naan, nateef nok neno snasat. Nok lalan naan, sin nabe'i nasuub Ee maat-maat. 8 Mes Nai Yesus nahine namneo-namneo noi sin salit naan. Es on nane, In no'en atonij nane mnak, “Ba'e! Uum amhake moi le' iij fe'!” Es on naan in annao ma nhake nbi naan. 9 Lalit Nai Yesus antoti abiten le' nane mnak, “Au he 'toti aan ki fe'. Tatuin hit atolan lasi palsait, sa'an es le' hit he atmo'el nateef nok neno snasat ta'ko mepug? Tmoe' leko, oo? Ai', tmo'e maufinut? Tsoi tafetin tuaf, oo? Ai', tale'un in amonin?” 10 Lalit Nai Yesus nail natef-tefan sin, ma In naguab noi atonij nane mnak, “Amnona' ho 'nimam nane neem!” Lalit in nnona in animan naan, ma naleko nani.

11 Nail on nane, tuaf-tuaf le' anmusun Nai Yesus neku nisik een. Lalit sin anmulai ansali lasi maufinut nak, “Hit lo he t'etu teni laal poit abjaan, he na' tabe'i tamouf Goe!”

12 Ka loog fa nteni, Nai Yesus ansae noi nu'af mese ma an'onen. In an'onen anbi naan faij mese a'temel. 13 Anmiu nok-nok ana on naan, In no'en naan In asimo anoni' sin. Lalit na'ko sin le' naan, in anbeti naan tuaf bo'es am nuug he anjalin In tuaf een. Tuaf een le' In anbeti sin naan, es le':

17 Tabug ansanu neman na'ko nu'af naan, Nai Yesus nok In asimo anoni' sin anhaken anbin amnefu'. Too mfaun sin nabgua nanin anbin naan. Sin neman na'kon propinsi Yudea, koot Yerusalem, ma koot nuug et tasij ninen, es le' Tirus ma Sidon. 18 Sin neman he nnenan kuuk na'ko Nai Yesus, ma tuaf abjaan he antotin he In naleko' amenat. Es on naan In naleko' sin. In naleko' anitu-saet sin, ma anli'u napoitan nitu le'uf sin na'kon tuaf een naan. 19 Sekom-sekog le' anlomi he nle'o ai' anpoe Nai Yesus ba-baun aah, anmu'i kuasat anpoi na'ko Ne, ma naleko' sin.

20 Lalit Nai Yesus nail anfani noi In asimo anoni' sin ma nanoni' sin am nak,

Es on naan kalu anmu'i tuaf nasusab ki on naan, naik misusab hi neekm een naan, mes amhaliin hi neekm een naan! Ma amloksimo nok ma mmaliin nok! naika msanmaak, natuin atoni le' nasusab ki tabug iij, sin babaf sin es le' nasusab Uisnenog In mafefa knino' sin un-unu'.

27 Lalit Nai Yesus anluut anteni In aguaban am nak, “Amtaha hi lukem een he mneen milek-leko'! Ho lo he mneek ho musun, ma mmo'e 'mo'et alekot noi tuaf-tuaf le' nekan nameen noi ko. 28 Am'onen moi Uisnenog he In nmo'e alekot noi tuaf-tuaf le' ansukat ko. Ma mtoti Je he In anmo'e 'mo'et alekot noi tuaf-tuaf le' anma-mo'e ko ge. 29 Kalu anmu'i tuaf anpaas ho tantanam es, amfeen ee he npaas ho tantanam abjaan naan. Kalu antetak naan ho soo balu mainikin, amnona' ho soo balug ee msa'. 30 Kalu anmu'i tuaf antoti ho bale' es, amnona' ee haa. Ma kalu anmu'i tuaf naiti neki ho bale' es, mautu he in anpaal kuun ee. naika msimo mufani'! 31 Ho lo he mmo'e noi tuaf abjaan sin, namnees on le' ho mlomi he sin anmo'e saa' noi ko.^f

32 Ho mlomi he mneek ho nonot sin kuum. Naan lekog. Mes in alekot anneis-nesij, saa'? Fun amo'e maufinu sin amsa' anneek sin tuaf sin kuuk! 33 Kalu ho ala mmo'e alekot noi tuaf-tuaf amo'e alekot noi ko, in alekot anneis-nesij, es le' meel? Fun amo'e maufinu sin anbalas 'mo'et alekot on nane msa'. 34 Kalu ho mutusab loit noi tuaf-tuaf le' nabe'i nbaen nafani' ko ho loit een naan, in alekot anneis-nesij, saa'? Fun amo'e maufinu sin natusab een loit noi tuaf abjaan, lamun nmiu ma nsina' ansimo nafani' sin ate, nanookb ok.

35 Mes le' naleko nneis-nesij, on ii: amneek ho musu sin! Ma mmo'e 'mo'et alekot noi sin. Sin anpaluu saa', mutusab sin. naik mutenab mak, sin of nabe'i anfee nafani' ko sin, ai' kaha. Nok lalan naan, Uisnenog of anseun bani noi ko. Ma ho mjali Uisnenog A'laat Le'uf In anah. Natuin ho mmoni on le' ho Ama' le' anlomi he anmo'e alekot noi tuaf-tuaf amo'e maufinut. In anmo'e 'mo'et alekot amsa' noi tuaf-tuaf le' ka ntoti nahine fa makasi. 36 Es on naan ho lo he muklila' lasi kasian noi tuaf abjaan, nahuum on le' ho Ama' abit sonaf neno tunan naklila' In lasi kasian noi ko.”

37 Nai Yesus nanoni' piut am nak, “Naik munesab tuaf, he tuaf naik nanesa' ko msa'. Naik muklitik tuaf, fun tuaf of naklitik nafani' noi ko msa'. Amniken mani tuaf een sin saant een, he sin anniken nani ho sanat sin amsa'. 38 Kalu ho mfee noi tuaf saa' le' sin anpaluug, ho of amsimo mufani' sin. Fun of Uisnenog naloitan he ho msimo mufani' sin anha-hoen. Naan nahuum on le' tuaf an'oop afgoel noi blee-ukur, lalit anisi' ma annenel. Lalit an'oop anteni tal antee nahenu ma nat'oop. Le' ho msimo sin naan, nahuum on le' naan. Kalu ho mfee ba-baun, ho msimo mufani' sin ba-babaun amsa'. Mes kalu ho mfee na-naek, ho msimo mufani' sin anho-hoen.”

39 Nai Yesus nanoni' anpake aguab mapolin amsa'. In natu'in am nak, “Afolot, ka nuug he naklila' fa lalan noi tuaf afolot abjaan. Fun sin nua sin of natlolon ntaman noi a'bola'!^g 40 Ana skool, ka nuug he nnesi fa in kulug! Mes kalu in natuin nalek-leko' in kulug in anoni' een, in nabe'i namnees nok in kulug.^h

41 Ho mlomi he mutaka' tuaf-tuaf abjaan sin sanat aan'-ana'. Mes ho sanat le' anaek-anaek ee, ho mak, ka mamnita' fa. Naan on le' ho mtae miit afu skuku aan es anbi es in matan. Fun, hau tbaat anaek mese an'eek ho matan, mes ho ka mnaben fa! 42 Anmo'e on mee' m'es ho mube'i he muguab am mak, ‘Ba'e, uum he au 'fuu upoitan afu skuku' na'ko ho maatm ee fe'.’ Fun, ho tuam ee kuum ka miit fa saa'-saa', natuin hau tukaf anaek mese antobe naan ho maatm een naan! Hoi! Lo ho namneo-namneo atoni aputa-kliun ko! Koijoo! Maiti mpolin hau tbaat naan na'ko ho maatm een fe'. Na' ho mail naknino', lalit na' amfuu afu skuku ana' naan na'ko ho ba'e in matan.”

43 Nai Yesus naguab anteni lasi mapolin mese am nak, “Ka nuug fa he hau sena alekot nafgua fua amle'ut. Ma ka nuug fa he hau fgua alekot ee, anpoi na'ko haug amle'ut. 44 Atoni nabe'i nataka', kalu hau sena es naleko, ai' kahaf, es le' na'ko hau senat naan in afguan. Sekom-sekog haa nahinen nak, ka nuug fa he atoni nsiu koij ai' hau fgua anggur, na'ko katila'.^{i j} 45 On nane msa', atoni neek aknino' nabe'i anmo'e 'mo'et alekot. Mes atoni neek mesi'okan, anmo'e 'mo'et maufinut. Fun na'ko atoni in aguaban, in naklila' in tuan namneo.”^k

46 Lalit Nai Yesus anluut anteni mnak, “Hi mmo'en Kau te, mak ‘Usi'’. Mes nansaa' am es hi ka mlomi fa he mituin Au aguab een? 47 Atoni le' neem ma natniin Kau, lalit anmo'e natuin Au 'guaban, in le' naan nahuum on le' 48 tuaf le' he nafena' umel alekot matani' es. In anhani umel balan antaam antee naijaa amanut ai' mafatug, nasnasab. Lalit in anlape fanderen anmulai na'ko naijaa amanuut ai' mafatug naan, he na' in nafena' umel. Kalu noe sako ee ansae, umel naan nabetu aah, natuin in fatu fanderen naan matani'. 49 Mes atoni le' anneen nok neek ao-biaf noi Au 'guaban, tuaf le' naan nahuum on le' he nafenab umel labah. In ka anlape fa fanderen, mes na'pesib umel naan anbi naijaa nesaf anpaumaak noel ee ninen. Es on naan tabug noe sako ee neem, ansaen ma nalemab, lalit anloi neki umel naan!”