“Nanoni' kit he t'onen”
(Nai Mateos 6:9-13, 7:7-11)
11
Tabug mese, Nai Yesus annao an'onen. An'onen nalalit, In asimo a'noni es neem ma ntoti mnak, “Usi'! Nai Yohanis Aslanit nanoni' nalali in asimo anoni' sin he an'onen een nahinen. Hai mtoti Ko, he munoni' kai he m'onen mihiin!”2 Lalit Nai Yesus nak, “Lekog! Am'onen ampake onen on le' iij:
Aam. Ho kanam naan naknino' teeb.
Maut he mansian sin ok-oke', nanaeb ma ntuna' na'latan Ho kanam naan!
Maut he Ho mjali Usif noi mansian sin ok-oke'!
3 Ambaban kai nok lasi bukaet, le' nanokab noi kai nenog-nenog.
4 Hai mtoti Ko, Aam, amniken mani hai sanat sin ok-oke',
on le' hai mniken mani tuaf abjaan sin saant een amsa', le' sin anmo'e sin noi kai.
Ampafa' ma mpanat kai he hai naika mmo'e amle'ut.”
5-6 Lalit Nai Yesus nanoni' anteni sin anmatoom nok lasi onen. In anpake aguab mapolin am nak, “Kalu faij natnaan, anmu'i ho amnono mese neem na'ko aloog, ma antuup antahan anbi ho umel. Mes ho ka mmu'i fa saa'-saa' he amfee ne he anbukae. Lalit ho mnao moi ho amnono mese anteni in umel. Ho mhake mbi mone', ma mtoti je mmak, ‘Ba'e! Amfee mtahan maan kau utunu' afgua' tenu fe'! Au 'mu'i tamu et umel. Mes hai ka ta-tiit fa saa' es he mtuthael. Es on naan ambaban maan kau! Utunu' afgua' teen guah. Au of ufani' ko sin!’
7 Oni nati ho ba'e of natae ko mnak, ‘Koijoo, ma ho msa'! Au 'tuup a'fiin jen, ho uum he mpoo' kau! nesun au 'kuus u'lali sin. Li'aan een antupan nalalin. Neu, naik mu'too', ba'e! Tabug mese antein!’
8 Maski on nane msa', mes mimnau milek-leko'. Maski tuaf naan ka nfeen fa he anfee ko, natuin ho le' naan in baef, mes kalu ho mtotij piut-piut, in of anfeen ma anfee ko.
9 On nane msa' lasi onen.
Amtoti piut-piut noi Uisnenog;
In of anfee ma annona'.
Mami piut-piut;
In of nalulu' lalan.
Amhaman piut-piut;
In of nasoin nesug.
10 Fun sekom-sekog le' antotin piut-piut noi Uisnenog, of ansimon. Amnamit piut-piut, of napenin. Ahaman piut-piut, In of nasoin nesug. 11 Hi mitenab miit! Hi miit amaihonit meel, le' kalu in anah antoti ika', anfee ne kauna'? 12 Ai', li'aan ee antoti manu-teko', anfee ee kalitij? Ka nuug he on nane fa, ai'? 13 Mansian lo maufinu. Mes hi Ama' abit sonaf neno tunan naan, In naleko le'uf. Es on naan kalu mansian amaufinut sin on le' hi, amlomi he mfee bale alekot noi hi anah sin, saa' anteni Ama' Uisnenog! In ka nfee naan haa ki fa saa'-saa' le' hi mpaluu sin, mes annesi na'ko naan, In anfee In Asmana Knino' noi tuaf-tuaf le' antoti Je.”
Usif Yesus ka npake fa kuasat na'ko nitu le'uf een sin anakaf
(Nai Mateos 12:22-30; Nai Markus 3:20-27)
14 Tabug mese, Nai Yesus anli'u napoitan nitu le'uf na'ko atoni amumut es. Es on naan atoni amumut naan naguab anfaan. Atoni sin ansanmakan. 15 Mes abjaan naguab een am nak, “Namneo, In nabe'i anli'u nitug! Natuin In napeni kuasat na'ko nitun sin anakaf, es le' Balsebul.”a
16 Tuaf abjaan he nsobal Nai Yesus. Lalit sin antoti Je he In anmo'e naan lasi sanmakat mese antein, he naklila' sin am nak, In kuasat naan namneo-namneo na'ko Uisnenog.b
17 Mes Nai Yesus nahine nani sin lole amle'ut naan. Es on naan In naguab am nak, “Kalu anbi pah mese, in toog anmamusun piut, pah naan of akpete'-kpete'. On nane msa' anbi umel mese in nanan, abiten umel naan kalu anmatoen piut-piut, umel naan, lo anle'u nfiin! 18 Es on naan kalu nitu le'uf sin anmamusun ma anmali'un es nok es, sin anakaf ka nabe'i naplenat sin fa alaloog antein! Es on naan ka ntaam fa lolef, kalu hi mak, Au pake nitu le'uf een sin kuasat he li'u upoitan nitu le'uf! 19 Mimnau he! Hi nuug amsa' anli'u nahine nitug. Sin anpake kuasat na'kon nitun sin, ka? Kahaf! Es on naan hi naik miguab alafgua-lafug mak, Au pake nitun sin kuasat he li'u nitug. Hi nuug een of nafekan am nak saa' le' hi misuub sin moi Kau naan, ansanan. 20 Mes kalu namneo-namneo Au li'u nitug pake kuasat na'ko Uisnenog, naan nakliil on nak Uisnenog In aplenat et hi maatm een naan. Mes, on le' hi ka mihine maan fa fe'.
21 Kalu tuaf abe'it mese annaa' suni'-kenat anbi in animan a'liij ma a'ne'ug ma anpao in umel, in bale' een of ka namnekun fa. 22 Mes of anmu'i tuaf abe'it mese antein nabe'i nnesi, neem ma anbaan nisan, lalit nabaak neki tuaf naan in suni'-kenat sin. Lalit annau neki nani tuaf naan in amu'in een ok-oke', ma anbati sin noi inin. Alaloog le' iij, tuaf abe'it ahunut naan in anpalsai namneo-namneo in suni'-kenat sin. Mes tabug iij, in ka nabe'i nafneek sin fa lee antein.c
23 Mimnau milek-leko'! Sekog le' ka mnono' mese fa nok Kau, in le' naan, Au musug. Ma sekog le' ka nmababan nok Kau fa anbi Au mepug, in le' naan anmo'e haa taisibug.”d
Nitu le'uf anfani noi in ume mnasi'
(Nai Mateos 12:43-45)
24 Nai Yesus anluut anteni In aguaban am nak, “Kalu hit atli'u nitug anpoi na'ko tuaf mese, in naen noi bale luman he nasnaas. Natuin in ka napeni fa balel le' namnees nok in lomin, es on naan in natenab nak, ‘Eeh! Au ka upeni fa balel on le' iij, leko nnesi au 'fani 'oi au balak nenog naan.’ 25 Lalit in anbelok anfani neem, ma niit balel naan, ansapu naknino' len, ma naloitan nalalij len. 26 Es on naan nitug naan annao no'en in amnono hiit, le' maufinu nneis. Lalit sin annaon natguan anbin atoni naan, ma sin anbana ntool. Es on naan tabug iij, tuaf naan in amonin, anle'u nnesi ntein.”
Tuaf le' agua-alekot anneis-neis
27 Tabug nai Yesus naguab fe' nok too mfaun sin naan, anmu'i bifeel mese anbi naan ankua' am nak, “Koijoo! Ho ina' agua-alekot, natuin in nahonis naan Ko, ma nasusu naan Ko!”
28 Nai Yesus natael am nak, “Namneo, oin! Mes tuaf le' agua-alekot annesi na, es le' tuaf le' antaha' in luken ma anneen Uisnenog In A'an ma Plenat, ma anmo'e natuin sin!”
Sin antotin he Usif Yesus naklila' a'taka' fe'!
(Nai Mateos 12:38-42)
29 Tabug too mfaun sin nauban naan Nai Yesus on nane, In anmulai naguab am nak, “Mansian tabug iij, aal nahinen anmo'en haa lasi amaufinut. Sin antoti piut-piut Kau he 'mo'e lasi sanmakat noi sin, he sin nahinen nak Au le' iij, namneo-namneo Uisnenog Inij. Fun kaah, nahunut Uisnenog anfeen sin lasi sanmakat anpake In mafefa knino', nai Yunus. Nane noo gah. 30 Nahunut, nai Yunus natoon noi abiten koot Niniwe nak, sin lo he na'pisan fe'. Es on naan saa' le' anjali noi nai Yunus unun naan, anjali 'taka' noi sin am nak, Uisnenog es anleek ee. On nane msa' anmatoom nok Kau, Mansian Namneo-Namneo. Au 'uum he utoon ki m'ak, hi lo he mite'un ma mipiis fe'. Ma saa' le' anjali nbi Kau, naan of anjali taka' noi tuaf-tuaf tabug iij am nak, tebes Uisnenog es le' anleek Kau.e
31 Of anbi neno amsupot on nane, kalu Uisnenog anhake njali afeek lasij, of fenaij na'ko haa'-nua, anmoni nfani ma anhake njali saksiij. In of anlulu ki ok-oke' le' amonit tabug iij am nak, ‘Hi ala ki a'olet een!’ Nahunut fenaij naan neem na'ko alaloog he niit kuun kesel nai Soleman in mahinen. Fun kaah, tabug iij anmu'i Tuaf mese et hi sonam ma hi tnaanm een, le' matani' annesi na'ko kesel nai Soleman. Mes hi ka mfaloli maan Ee fa ba-baun amsa'!f 32 Ma in ka nmese fa! Abiten Niniwe amsa' of anfenan ma anlulu hi amonit tabug iij am nak, ‘Hi ala ki a'olet een!’ Sin naguab een on naan, natuin nenog naan, tabug nai Yunus annao natoon noi sin Uisnenog In lomin, sin napiis nanin. Fun kaah, tabug iij Tuaf ma'tani annesi na'ko nai Yunus anmoni nok ki et hi sonam ma hi tnaanm een, mes hi ka mipiis fa ba-baun amsa'!”g
Neek meu'-sine'
(Nai Mateos 5:15, 6:22-23)
33 Nai Yesus anluut anteni In aguaban am nak, “Atoni notu paku ana', lalit nateke anbi bale alatas, he in ntana' ke'an noi abiten naan ok-oke'. Ka tiit fa es he notu pakug, lalit naiti aba', ma ntobe pakug naan!h Naan ka mapake' fa!i 34 Hi maatm een naan on le' pakug. In antana' namiu hi neekm een. Kalu hi maatm een anmesi'okan, hi mail meki neek maufinu. Mes kalu hi maatm een anmiu-sine', hi mail meki neek aknino' alekot. 35 Ampanat he me'ug anbi hi neekm een naan, anmiu-sine namneo-namneo on le' manas. Miu-sine' anbi hi neekm een naan, naik on le' funan, le' aal anfee haa mafof. 36 Kalu hi neekm een anmiu-sine', tal antee ka tiit fa abool ana amesi'okan es, hi 'monim een of miu-sine' on nane msa', on le' paku naek le' antana' hi 'monim.”
Usif Yesus nakain atoni Yahudis sin anaak lasi palsait een
(Nai Mateos 23:1-36; Nai Markus 12:38-40)
37 Nai Yesus naguab nalali on nane, anmu'i naan atonij mese na'ko amnono palsait Farisi, anhone Le he anbukaen noi in umel. Anteen nae, Nai Yesus antaam ma antook. Lalit sin anbukaen anbin me'i mnahat. 38 Mes ume tuaf ee ansanmaak, natuin Nai Yesus anbukae, mes ka nafanu fa In a'niimn een, natuin atolan atoni Farisis sin.
39 Lalit Nai Yesus natoon ee mnak, “Hi atoni Farisis, lo matani'! Hi lo mnaa' mihel-helan hi atolan lasi palsait! Hi mimnau noi le' he mfase miknino' 'pika'-'soko' ma aklaas een sin kotik een tal nalim-liman, mes hi ka mimnau fa he miknino' hi nekam oemeetn een le' maufinu, ma mmolofalem een naan! 40 Hoi a'olet! naik amniken. Uisnenog es le' anmo'e aof-kotif. In es le' anmo'e aof-nanaf amsa'. 41 Leko nnesi, hi mfee moi atoni kasian sin saa'-saa' le' hi mmu'i, he hi mibe'i aknino' ambi Uisnenog In human ma In matan.
42 Hi atoni Farisis ala ki! Hi of mipeni amleut! Anmatoom nok lasi batis bo' es noi Uisnenog, hi mso'i sin ok-oke', abaut-anaet. Tal antee hi senat fukal aan'-ana' on le' sipa' ma uut aijaog amsa', hi mso'i sin! Mes hi ka mfaloli maan fa lasi matani' sin. lasij anmatoom nok manekat moi Uisnenog, ma lasij anmatoom nok @adil, hi mniken mani sin eeh! Namneo, hit lo he tfee Uisnenog in paan, mes naik atniken tani ale' lasij le' pentiing anneis.j
43 Hi of mipeni amleut! Natuin hi mlomi he m'etu balel ma mtoko maat ambi ume onen sin, ma mlomi he tuaf abjaan sin antola ki kalu hi mibgua mbi too mfaun een sin humak ma sin maatk een.
44 Hi of mipeni amleut! Natuin hi on le' fatu natef le' amnelat. Tuaf annao anbi naan, sin ka nahinen fa, natuin ka tiit fa fatu natef et naan, mes opu balaf naan in nanan, foo punun le'uf. Fun kaah, tatuin hit halat, tuaf le' anhali nbi fatu natef, naan anhainisi in tuan, es on naan in ka nabe'i fa he antaam noi ume onen. Hi atoni Farisis on le' fatu natef! Hi mmoo'l om on le' atoni knino' namneo-namneo. Mes hi nekam nanam een naan, nahenu nok tenab mesi'okan.”
45 Anmu'i ahine lasi hukum Yahudi mese anbi naan, an'ote Nai Yesus In aguaban naan am nak, “Aam Kulug! Ho aguab een lelon na antoom kai msa'!”
46 Lalit Nai Yesus natael ee mnak, “Namneo! Hi ahine lasi hukum Yahudi, mautu he hi mipeni amleut amsa'! Hi ka mbaban fa tuaf he napeni manafa, mes hi miloulu' susal nok hi atolan palsait le' hi mmo'e sin naan, he mha'feen toog. Lalit hi misaeb atolan huma'-huma' le' naan noi toog. Mes hi tuaf mese amsa' ka mbaban fa meki kalulu mese amsa'.
47 Hi of mipeni amleut! Hi mtaisibu he mihakeb fatu tugu moi Uisnenog In mafefa knino unu' sin, he mtola sin. Fun kaah, hi babaf sin es anlolo niis mafefa' sin naan! 48 Hi taos mese mok hi babaf sin. Sin antita napoitan Uisnenog In mafefa' een, ma nlolo namate sin. Lalit hi mihakeb fatu tugu moi mafefa' sin naan, he anjali taka' am nak, hi mlomi mituin hi babaf sin. 49 Nok lalan naan, Uisnenog le' nahine nani sin ok-oke', naguab niit am nak, ‘Au of aleek Au mafefa knino' ma au haef abjaan sin noi toog Israelas sin. Lalit sin anhamu'i abjaan, ma anlolo niis abjaan.’
50-51 Tuaf le' anmoni tabug iij, lo he nasae taes na'ko tuaf-tuaf le' namate Uisnenog In mafefa' sin. Naan anso'i sin na'ko tabug Uisnenog anmo'e pah-pinan iij, anmulai na'ko nai Habel in amaten, tal antee amuni le'uf, es le' nai Sakarias. In le' naan es le' anlolo ge nbi me'i fuat ma Ke'an Aknino' sin atnanak anbi Ume Onen Uuf. Hi msutai maan kiim sin hukum nane msa'!k
52 Hi ahine lasi hukum Yahudi ala ki! Hi of mipeni amleut! Natuin hi mnaa' aletu' le' nabe'i mletu nesug, he atoni nahine nalek-leko' Uisnenog In lomin. Mes hi ka mtaam mok kiim fa. Hi maufinu anneis-neis je, hi m'eka' atoni in lalan, he sin naika ntaman noin naan!”
53-54 Tabug Nai Yesus naguab nalali on nane, kulu agama sin ma atoni Farisis sin anmaheek nisan. Anmulai tabug naan, sin antotin lasij huma'-huma' he nakleo namofu Nai Yesus. Sin n'atol lalan he namin lasi huma'-huma' nok Ne.