Tu'in Ahun-hunut
Anmulai na'ko Uisnenog anmo'e neno-tunan ma pah-pinan
(Kejadian)
Uisnenog anmo'e neno-tunan ma pah-pinan nok in nesan
1
Nahun-hunut, Uisnenog anmo'e neno-tunan ma pah-pinan.2 Tabug naan, pah-pinan ka mamo'et ma mahuma' fa fe', ma ale' saa'-saa' anbasikasanan. Aal anmu'ij haa, oel. Ma mesi'okan an'amu naan ee. Uisnenog In Asmanan nabla-lae anbi oel ee tunan.a
3 Lalit Uisnenog naguab am nak, “Lo he nmu'i miu-sine'.” Naguab nalali on nane, miu-sine' ee anjaal. 4 Nail miu-sine' ee te, In anmaliin, natuin saa' le' In anmo'el naan lo naleek. Lalit In anbatis miu-sine' ee na'ko mesi'okan, he es-es anmu'i kuun in tabug. 5 In nakanab miu-sine' nak, ‘manas’, ma mesi'okan nak, ‘faij’. Nenog naan, neno mese' namsoup gue.
6-7 Lalit Uisnenog naguab anteni' mnak, “Lo he anmu'i bale luman he anbatis oel. Es nane, anmu'i oel anbi fafon, ma anmu'i oel anbi apinan.” Naguab nalali on nane, oel naan anbatis ok anjali balel nuug, fafon ma apinan. 8 Lalit In nakanab balel luman abit fafon nak, ‘nenog’. Nenog naan, neno nuug aa namsoup gue.
9 Lalit Uisnenog naguab anteni' mnak, “Oel abit apinan naan lo he nabguab ok anbi balel mese, mautu he nmu'i bale meto'.” Naguab nalali on nane, bale meto' anpoi neem. 10 Lalit In nakanab bale meto' naan, ‘naijaa meto'’, ma In anteek oel le' nabguab on naan, ‘tasij’. Nail ale' nane, In anmaliin, natuin saa' le' In anmo'el naan, lo naleek. 11 Lalit Uisnenog naguab anteni' mnak, “Naijaa meto' iij lo he namonib haug huma'-huma'. Lo he anmu'i hau manoo', hau masufa', ma hau mafguaf. Mautu he haug mese-mese, napoitan finij natuin in neon.” Naguab nalali on nane, ale' hau nuug naan anjalin. 12 Anbi naijaa meto' naan, hau nuug napoitan finij natuin sin neok een mese-mese. Nail on nane, In anmaliin, natuin saa' le' In anmo'el naan, lo naleek. 13 Nenog naan, neno tenu' namsoup gue.
14-15 Lalit Uisnenog naguab anteni' mnak, “Anbi fafon ne, lo he anmu'i bale miu-sine' huma'-huma' he ntana' pah-pinan. Lo he nmu'i bale atana' anbi tabug manas, ma nmu'i bale atana' anbi tabug faij. Bale een naan anjalin ataka' he tso'i tahiin nenog, toon, ma tabug.” Naguab nalali on nane, bale miu-sine' nenog atnanan sin anbolan. 16 In anmo'e bale miu-sine' huma' nuug le' anaek. Es nanae' anneis, antana' anbi tabug manas; es anselo nabau antana' anbi tabug faij. In anmo'e akfuun-akfuun amsa'. 17 In nakfilit bale een naan anbi nenog he ntana' pah-pinan. 18 Lalit sin antana' anbi tabug manas, ma tabug faij. Nok lalan naan, sin anbatis miu-sine' na'ko mesi'okan. Nail niit sin on nane, In anmaliin, natuin saa' le' In anmo'el naan, lo lekog. 19 Nenog naan, neno haa' namsoup gue.
20 Lalit Uisnenog naguab anteni' mnak, “Lo he anmu'i kauna' huma'-huma' le' anmonin anbin oel. Ma lo he nmu'i kolog huma'-huma' le' naplelen anbin nenog atnanan.” 21 Lalit In anmo'e ika' huma'-huma' ma kauna' abjaan le' anmonin anbi oel. In anmo'e kolog huma'-huma' amsa' le' naplelen anbi nenog atnanan. Nail saa' le' In anmo'el sin on nane, In anmaliin, natuin saa' le' In anmo'el naan, lo lekog. 22 Lalit In naguab anfee tetus noi ale' kanan kaun' een nane mnak, “Ika' sin lo he mloulg om he mihenu oel anbin balel-balel. Ma kolon on nane msa'.” 23 Nenog naan, neno nima' namsoup gue.
24-25 Lalit Uisnenog naguab anteni' mnak, “Lo he anmu'i mu'it huma'-huma' le' anmonin anbin naijaa meto'. Sin es le' mu'i aem, mu'i fuij, ma anonok, mese-mese nok nani in neon.” Naguab nalali on nane, mu'it een naan anjalin. Nail on nane, In anmaliin, natuin saa' le' In anmo'el naan, lo lekog.
26 Lalit Uisnenog naguab anteni' mnak, “Iim he Hitb atmo'e mansian tatuin Hit humak ma Hit masak, Hit mo'et ma Hit taos. Mautu he sin es anpafa' ma npainote ika' een anbin tasij, ale' kolog anbi nenog atnanan, ale' mu'i aem, ma mu'it abjaan le' anmonin anbin pah-pinan.”c
27 Ma In anmo'e mansian namnees nok In human ma In masan, In mo'et ma In taos. In anmo'e sin, atonij ma bifeel. 28 Ma In naguab anfeen sin tetus am nak, “Hi lo he mihoni' ma mloulg om he mihenu pah-pinan, mpafa' ma mpainootl ee msa'. Au 'fee ki plenat he m'ulus ika' sin, kolog sin, ma ale' kanan mu'it een anbin naijaa meto'. 29 Amneen milek-leko'! Au 'fee ki amnahat huma'-huma' anbi pah-pinan. Es le': hau manoo', hau masufa', ma haug mafgua'. 30 Au 'fee haun le' naan he anjalin amnahat noi mu'it sin amsa'. Anmu'i amnahat noi mu'i aem, mu'i fuij, anonok, ma kolo sin amsa'.” Naguab nalali on nane, ale' kanan amnahat namtiis. 31 Nail niit sin on nane, In anmaliin, natuin saa' le' In anmo'el naan, lo leko le'uf. Nenog naan, neno nee' namsoup gue.