Yesus moris nikar!
20
Wainrua, kona baa loron domiku. Seisawan nurak, Maria nosi leo Magdala baa Yesus raten. To'o nebaa, nia naree fatuk boot mak ema nodi taka rate, nakduir ti'an. 2 Naree nunia, Maria nalai baa katak Simon Petrus no ha'u, Yohanis. Nia katak na'ak, “Ema nana'o nola itakaan Ulun nosi rate ti'an! La hatene sia rai iha nabee!” 3 Rona hola nunia, ami rua halai baa rate. 4 Ami halai bele-bele, mais ha'u mak to'o uluk. 5 To'o baa, ha'u la ktama baa rate laran, mais kateke kosi luan dei. Ha'u la karee Yesus maten, karee loos tais mamar mak sia nodi falun Yesus maten.
6 Petrus to'o mai, nia tama liu baa rate laran. Nia moos naree tais mamar nia. 7 Lesu mak sia nodi taka Yesus ulun moos, nakhi'as ti'an iha fatik seluk. 8 Hotu, ha'u moos tama tuir baa. Karee hotu-hotu nunia, ha'u moos fiar baa Yesus dalen uluk mak na'ak, Nia atu moris nikar nosi mate. 9 Uluk, ami sei la hatene malorek dauk saa mak hakerek kedan ti'an iha Hakerek Moon na'ak, Kristus musti moris nikar nosi mate. 10 Haree hotu nunia, ami rua moos fila.
Yesus natadu aan baa Maria nosi Magdala
11 Oras nia, Maria sei iha rate. Nia tanis nodi nateke baa rate laran. 12 Nia naree Maromak Niakaan makbukar lale'an na'in rua, tau tais mutin no'i tuur iha fatik mak hori hirak ema rai Yesus maten baa. Ida tuur baa ulun fatik, ida tenik tuur baa ain fatik. 13 Hotu, sia nusu Maria na'ak, “Tan saa o tanis?”
Maria nataa na'ak, “Ema foti nodi ti'an ha'ukaan Ulun maten. La katene sia rai iha nabee.” 14 Dale notu nunia, Maria fila baa kotuk, naree ema ida nariik iha nia. Nia la natene na'ak, Ema nia, mak Yesus.
15 Hotu Yesus nusu Maria na'ak, “O tanis baa saa? O buka see?”
Maria na'ak falik ema nia, makdaka to'os iha nia. Hotu, nia namaus na'ak, “Ama. Kalo Ama mak foti nola maten nia, hotu baa rai iha nabee, katak ha'u lai. Nebee ha'u kodi baa kakoi di'a-di'ak iha fatin seluk. Ama, tulun ha'u lai!”
16 Maria dale nunia, Yesus moos bolu nia nodi temi na'ak, “Maria.”
Rona nola nunia, Maria fila baa Yesus, hotu katak nodi lia Aram na'ak, “Raboni!” (Lia isin na'ak, “Ha'ukaan manorik!”)
17 Hotu Yesus katak baa nia na'ak, “Keta koko Ha'u lai, tan Ha'u ksei la sa'e dauk baa Ha'ukaan Ama iha lale'an. Baa katak baa Ha'ukaan mamaluk sia ma'ak, ‘Ha'u atu ksa'e baa Ha'ukaan Ama. Nia moos, emikaan Ama. Nia, mak Ha'ukaan Maromak. Nia moos, emikaan Maromak.’”
18 Hotu, Maria baa katak Yesus Niakaan maktuir sia na'ak, “Ha'u kasoru kola ti'an itakaan Ulun Yesus!” Maria moos nasara Yesus mamenon baa sia.
Yesus natadu aan baa maktuir sia
19 Loron domiku nia loro monu, Yesus Niakaan maktuir sia naklibur aan. Sia taka natoos uma odamatan sia, tan nata'uk Yahudi ulun sia. Mais teki-tekis, Yesus nariik iha siakaan klaran, nodi nasee na'ak, “Kmanek no dame!” 20 Hotu, Yesus natudu kanek fitar iha liman no sorin baa sia. Naree siakaan Ulun nunia, maktuir sia neon boot lo-loos. 21 Hotu, Yesus nasee tenik na'ak, “Kmanek no dame. Ha'ukaan Ama solok Ha'u nunabee, Ha'u moos solok emi nunia.” 22 Dale notu nunia, Yesus nare'is aan baa sia, hotu nuu nawan baa sia ida-idak, nodi katak na'ak, “Ha'u kfoo Maromak Kmalar Lulik baa emi. Simu hola Nia. 23 Kalo emi halu'a lakon ema salan, sala nia nanis lakon. Mais kalo emi la ho'uk halu'a lakon ema salan, sala nia nafati.”a
Yesus no Tomas
24 Ema ida nosi Yesus Niakaan maktuir na'in sanulu resin rua nia, naran Tomas. Ema moos temi nia na'ak, ‘Oa Karuak’. Oras Yesus mai natadu aan baa maktuir sia, Tomas la iha nia. 25 Baa oras niakaan mamaluk sia katak na'ak, “Ami hasoru itakaan Ulun ti'an,” Tomas nataa na'ak, “Ha'u kmusti karee kanek fitar besi baku fatik, no ha'u koko baa kanek iha Yesus liman no sorin, foin ha'u kfiar ka'ak, Nia moris nikar ti'an.”
26 Miku ida siku ti'an, Yesus Niakaan maktuir sia namutuk bele-bele no Tomas iha uma ida laran. Masik odamatan sia taka natoos moos, Yesus mai nariik iha siakaan klaran. Nia nasee sia na'ak, “Kmanek no dame!” 27 Hotu Nia katak na'ak, “Tomas! Lolo liman mai, koko kanek iha Ha'ukaan liman ne'e, no kanek iha Ha'ukaan sorin ne'e. Keta makerat, mais fiar ona ma'ak, Ha'u kmoris kikar ti'an!”
28 Rona nola nunia, Tomas nataa na'ak, “Aikee, Ama! Ha'u kfiar tebes ti'an! Ama ne'e, Ha'ukaan Ulun. Ama moos Ha'ukaan Maromak!”
29 Hotu, Yesus katak na'ak, “Tomas! O fiar tan o maree Ha'u modi matan du'uk. Mais sotir liu tenik bodik ema mak fiar, masik sia la naree Ha'u nodi matan du'uk.”
Hakerek ne'e isin
30 Yesus nase'i tadak blaar wa'in seluk mak maktuir sia naree nodi matan du'uk. Mais Ha'u la kakerek iha ne'e. 31 Lia mak kakerek iha ne'e, kakerek nebee emi bele fiar ha'ak,
Yesus nia, Kristus mak Na'i Maromak nameno kedan ti'an atu solok mai.
Yesus moos, Na'i Maromak Oan.
Kalo emi fiar baa Nia, emi hetan moris to'o nima-nimak, tan emi dadi Niakaan ema ti'an.