Yesus natadu aan baa maktuir na'in hitu
21
Loron hira siku ti'an, Yesus natadu aan tenik iha debu Tiberias tehen. Lia nia lala'ok, nune'e: 2 Baa oras nia, Yesus Niakaan maktuir na'in hitu namutuk. Sia nia mak:Simon Petrus,
Tomas, mak sia temi ‘Oa Karuak’,
Natanel, nosi leo Kana iha rai Galilea,
Sebadeus oan na'in rua, mak Yohanis no Yakobus,
no maktuir na'in rua tenik.
3 Hotu, Simon Petrus katak baa niakaan mamaluk sia na'ak, “Ha'u atu kbaa tiha na'an tasi.”
Sia nataa na'ak, “He'e! Ami moos tuir.” Sia moos sa'e bero, baa tiha na'an tasi. Mais, baa kalan nia tomak sia la tiha nola saa ida.a
4 Baa awan seisawan, Yesus nariik iha debu tehen. Mais sia la natene Nia. 5 Nia bolu nodi nusu sia na'ak, “Mau sia! Emi hetan ka lale?”
Sia nataa na'ak, “Mamuk liu Mau!”
6 Hotu Yesus naruka sia na'ak, “Soe kokon daitiha nia baa bero sorin. Emi atu hetan.”
Rona nola nunia, sia nalo tuir kedas. Sia moos netan na'an tasi wa'in basuk, to'o la bele dada sa'e daitiha baa bero laran.b
7 Baa oras nia, ha'u moos iha nia. Ha'u ne'e, Yohanis, maktuir mak Yesus dadobe. Ha'u moos katak baa Petrus ka'ak, “Adeei! Ema ne'e, itakaan Ulun!”
Rona ha'u kdale nunia, Simon Petrus tau nikar farun, hotu soe aan baa debu laran, atu nani baa tehen. 8 Roo nia takseer dook ro'a atus ida nosi debu tehen. Hotu, Simon Petrus niakaan mamaluk sia fofer nikar bero baa debu tehen. Sia moos dada nodi daitiha mak nakonu na'an tasi nia.
9 To'o baa, sia naree ha'i lutan no'i laka iha nia. Iha ha'i leten noo na'an tasi. Iha nia moos noo tubi. 10 Hotu Yesus katak baa sia na'ak, “Hodi mai na'an tasi lolon hira mak emi foin hetan nia, nebee tunu atu hodi haa.”
11 Rona nola nunia, Simon Petrus sa'e nikar baa bero atu dada sa'e daitiha nia baa debu tehen. Daitiha nia nakonu no na'an tasi boot. Sura hotu, kona atus ida lima nulu resin tolu. Masik na'an tasi wa'in nunia moos, daitiha nia la naklees.
12 Hotu, Yesus bolu na'ak, “Mai ita haa lai!”
La noo ida mak bele nusu na'ak, “Mau ne'e, see?”, tan sia natene tebes ti'an, Nia ne'e, siakaan Ulun. 13 Hotu, Yesus nola tubi no na'an tasi, foo baa sia.
14 Oras nia, dala tolu ti'an Yesus natadu aan baa Niakaan maktuir sia, baa oras Nia moris nikar nosi mate.
Yesus dale no Petrus
15 Sia naa notu ti'an, Yesus nusu baa Simon Petrus na'ak, “Hei Simon, Yohanis oan. Nunabee? O madomi Ha'u liu nosi belu ne'e sia ka?”
Petrus nataa na'ak, “Tebes, Ama Boot! Ama Boot natene du'uk, ha'u kadomi Ama Boot.”
Hotu, Yesus naruka nia na'ak, “Kalo nunia, maliku modi mahaan Ha'ukaan bibi malae oan sia.”
16 Nunia hotu, Yesus nusu tenik na'ak, “Simon, Yohanis oan. Nunabee? O madomi Ha'u ka lale?”
Nia nataa na'ak, “Tebes, Ama Boot! Ama Boot natene du'uk, ha'u kadomi Ama Boot.”
Hotu, Yesus naruka tenik na'ak, “Kalo nunia, maliku modi mahaan Ha'ukaan bibi malae sia.”
17 Hotu, Yesus nusu tenik na'ak, “Simon, Yohanis oan. Nunabee? O ne'e, Ha'ukaan belun ka?”
Rona nola nunia, Petrus neon susar kedas, tan Yesus nusu isin tolu ti'an na'ak, “O madomi Ha'u ka lale?” Hotu, nia nataa na'ak, “Ama Boot natene lia hotu-hotu. Dadi, Ama Boot natene du'uk ha'ak, ha'u ne'e, Ama belun.”
Hotu, Yesus naruka tenik na'ak, “Kalo nunia, maliku modi mahaan Ha'ukaan bibi malae sia. 18 O kohi ti'an Ha'ukaan dalen ne'e ka, sei? Rona, tan Ha'ukaan dalen ne'e tebes no loos. Uluk, baa oras o sei nurak, loron-loron o tau tais modi meti bolas du'uk, hotu la'o baa nabee dei, tuir okaan hakara. Mais, nosi ikus, kalo o katuas ti'an, o atu lolo liman baa ema. Hotu, sia kesi o, dada nodi o baa fatin ida mak o la mo'uk baa.” 19 (Hodi nunia, Yesus katak kedan nosi dalan oin nunabee Petrus atu mate. Tan nosi ikus, Petrus niakaan dalan mamaten, atu nodi natudu Na'i Maromak Niakaan kabaas.)c
Nunia hotu, Yesus katak baa Petrus na'ak, “Mai tuir Ha'u, dadi baa Ha'ukaan ema ona!”
Maktuir mak Yesus dadobe
20 Nunia hotu, Petrus mana fila baa kotuk, naree ha'u ko'i tuir sia. (Ha'u ne'e, maktuir mak Yesus dadobe. Ha'u mak tuur iha Yesus sorin baa oras ami tuur haa dahur Paska. Ha'u moos mak kusu baa Nia ka'ak, “Ama Boot! See mak atu fa'an Ama?”)d 21 Baa oras Petrus naree nola ha'u, nia moos nusu baa Yesus na'ak, “Ama Boot! Ama dale ti'an hosi ha'ukaan tuur-hariik. Mais, ema ne'e, nunabee?”
22 Hotu, Yesus katak baa Petrus na'ak, “Lia nia lahoos okaan serwisu. Kalo kakara nebee nia nein da-dau to'o Ha'u kmai kikar, o atu malo saa? Mais o du'uk, tuir Ha'u.”
23 Tan Yesus dale nunia, Niakaan maktuir rumak sia nahuu dale baa malu na'ak, “Yohanis ne'e, la mate.” Mais tuir loos, Yesus la dale nunia. Nia dale na'ak, “Lia nia lahoos okaan serwisu. Kalo kakara nebee nia nein da-dau to'o Ha'u kmai kikar, o atu malo saa?”
Yohanis taka niakaan hakerek
24 Maktuir mak Yesus dale nia, ne'e mak ha'u, Yohanis. Ha'u mak kakerek lia ne'e sia hotu-hotu bodik emi. Hotu-hotu mak kakerek ne'e, ha'u karee kodi matan du'uk. Hodi nunia, ita bele hatene ha'ak, lia saa mak ha'u katak ne'e, tebes no loos.
25 Sei noo lia wa'in seluk mak Yesus nalo. Kalo hakerek hola lia hotu-hotu nahuu nosi Yesus nala'o Niakaan serwisu to'o mohu, ha'u kanoin, raiklaran ida tomak moos la bele loi nola.
Nunia dei,
Yohanis