La noo dalan seluk nalo ita di'ak malu ho Ama, hela mesan Yesus dei
14
Hotu, Yesus dale tu'an tenik na'ak, “Keta hanoin wa'in. Emi fiar baa Na'i Maromak ti'an, dadi emi moos musti fiar baa Ha'u. 2 Iha Ha'ukaan Ama uman, noo ke'an wa'in. Kalo lahoos nunia, Ha'u nanis katak kedan baa emi. Oras ne'e, Ha'u atu kbaa kadi'a fatin bodik emi iha nebaa. 3 Kadi'a kola ti'an, foin Ha'u kmai kola emi, nebee ita bele-bele hein fatik ida. 4 Emi hatene ti'an dalan baa fatin mak Ha'u atu kbaa nia.”5 Rona nola nunia, Tomas nusu na'ak, “Ama Boot! Ami la hatene Ama Boot atu baa nabee. Nunabee ami bele hatene dalan baa nebaa?”
6 Yesus katak na'ak, “Ha'u ne'e, dalan baa Na'i Maromak. Ha'u ne'e, mak kaer hanorin loos. Ha'u ne'e, mak foo moris loos baa ema. La noo dalan seluk mak nodi ema baa Ama, Ha'u kmesan dei. 7 Kalo emi hatene tebe-tebes Ha'u, ne'e na'ak, emi moos hatene ti'an Ha'ukaan Ama. Dadi, nahuu baa oras ne'e, emi hatene Nia ti'an, no haree Nia ti'an.”
8 Rona nola nunia, Filipus nusu na'ak, “Ama Boot! Tulun matudu Ama Boot Aman baa ami lai! Haree loos dei moos, to'o ti'an.”
9 Yesus katak baa nia na'ak, “Filipus. Ha'u kamutuk ko emi kleur ti'an. Tan saa emi sei la hatene tebe-tebes Ha'u? Ema mak naree Ha'u ti'an, nia moos naree Ha'ukaan Ama ti'an. Tan saa o sei musu tenik Ha'u katudu Ha'ukaan Ama baa o? 10 Ha'u katak ti'an ka'ak, Ha'u ktalin aan ko Ha'ukaan Ama, Nia moos talin aan no Ha'u. O fiar lia nia ka, lale? Saa mak Ha'u kdale ne'e, la nahabut baa Ha'u du'uk, mais nahabut baa Ha'ukaan Ama, tan Nia nodi Ha'u atu nala'ok Niakaan serwisu. 11 Fiar baa Ha'u dei, oras Ha'u ka'ak, Ha'u ktalin aan ko Ha'ukaan Ama, Nia moos talin aan no Ha'u. Masik emi la hakara simu Ha'ukaan lia fuan ne'e, fiar baa dei, tan emi haree ti'an hotu-hotu mak Ha'u kase'i. 12 Rona mai, tan Ha'ukaan dalen ne'e, tebes no loos. Ema mak fiar baa Ha'u, bele nalo lia hotu-hotu mak Ha'u kalo. Nia moos bele nalo maka'as liu tan tenik, tan Ha'u atu kbaa Ha'ukaan Ama. 13 Tan emi talin aan ho Ha'u, emi bele hodi Ha'ukaan naran. Emi hamulak husu saa hodi Ha'ukaan naran,a Ha'u kalo bodik emi. Hodi nunia, Ha'u katudu Ha'ukaan Aman kabaas. 14 Tebes. Emi hamulak husu saa hodi Ha'ukaan naran, Ha'u kalo bodik emi.”
Yesus nameno atu solok Kmalar Lulik mai
15 Hotu, Yesus dale tenik na'ak, “Kalo emi hadomi Ha'u, emi halo tuir Ha'ukaan ukun sia. 16-17 Ha'u kusu baa Ha'ukaan Ama, kalo Ha'u la kamutuk tenik ko emi, Nia foo Malikuk ida baa emi. Malikuk nia, mak Niakaan Kmalar Lulik. Malikuk nia atu nanorin hanorin loos baa emi. Ema balu iha raiklaran ne'e, la bele simu Nia, tan sia la natene Nia no la titu Nia. Mais emi hatene Nia, tan Nia talin aan no emi. Nia moos atu namutuk no emi nohuun.
18 Ha'u la kla'o kela emi ahan nu'u oa kiak. Tan Ha'u atu kmai kikar baa emi. 19 La kleur falik, ema seluk iha raiklaran ne'e la naree Ha'u ona. Mais emi haree Ha'u. Emi atu moris, tan Ha'u kmoris kikar. 20 Hodi nunia, emi bele hatene ha'ak, Ha'u ktalin aan ko Ha'ukaan Ama; emi talin aan ho Ha'u; Ha'u moos talin aan ko emi.
21 Ema mak simu Ha'ukaan ukun sia, hotu nalo tuir, nia nadomi Ha'u. Ha'ukaan Ama moos nadomi nia. Ha'u moos kadomi nia, no atu katadu aan baa nia.”
22 Iha nia, noo ema ida naran Yudas (mais lahoos Yudas Iskariot). Rona nola Yesus dale nia, Yudas ne'e nusu na'ak, “Ama Boot nakara natadu aan baa ami. Mais tan saa Ama la no'uk natadu aan baa ema seluk sia iha raiklaran ne'e?”
23 Yesus nataa na'ak, “Nune'e. Ha'u katadu aan baa ema mak nadomi Ha'u no nalo tuir Ha'ukaan hanorin. Ha'ukaan Ama moos nadomi ema nia. Hotu, Ami atu mai moris neon ida ho nia. 24 Mais ema mak la nalo tuir Ha'ukaan hanorin, nia la nadomi Ha'u. Hanorin mak emi rona ne'e, la mai nosi Ha'u du'uk, mais nosi Ha'ukaan Ama mak solok Ha'u.
25 Ha'u katak kedan lia ne'e sia baa emi, tan oras ne'e, Ha'u ksei kamutuk ko emi. 26 Mais la kleur ona, Ha'ukaan Ama atu solok Malikuk ida mai. Nia, mak Niakaan Kmalar Lulik. Kmalar Lulik nia atu seluk Ha'u iha raiklaran ne'e. Nia atu nanorin lia hotu-hotu baa emi, nodi foo natene lia hotu-hotu mak Ha'u katak ti'an baa emi.
27 Kalo Ha'u kbaa ti'an, Ha'u kfoo baa emi moris manek no dame. Moris oin nunia la mai nosi raiklaran, mais mai nosi Ha'u du'uk. Dadi, keta haneo wa'in no hata'uk. 28 Emi rona ti'an Ha'u kdale ka'ak, ‘Ha'u atu kla'o kela emi, mais atu mai kikar.’ Kalo emi hadomi Ha'u, emi musti neon di'ak bele-bele ho Ha'u, tan Ha'u kfila baa Ha'ukaan Ama. Nia maka'as liu Ha'u. 29 Ha'u katak kedan ti'an lia ne'e sia baa emi, nebee kalo lia ne'e sia naksain, emi bele fiar baa Ha'u. 30 La kleur falik, Ha'u la kdale tenik ko emi ona, tan diabu ulun mai ti'an. Nia kaer ukun iha raiklaran ne'e, mais la kaer ukun baa Ha'u. 31 Masik nia mai moos, Ha'u kala'o luku Ha'ukaan Ama ukun. Tan lia nia natudu baa ema iha raiklaran ne'e na'ak, Ha'u kadomi Ha'ukaan Ama liu resik.
Nunia dei. Mai ita baa ona!”