2 Mais kalo makbalin, nia tama tuir nanokar, tan nia mak naliku bibi malae. 3 Ema mak daka nanokar natene makbalin, hotu loke nanokar bodik nia. Bibi malae sia moos natene makbalin lian. Oras nia bolu naran ida-idak, sia tuir nia baa luan. 4 Nia la'o uluk, foin sia lolok tuir, tan natene niakaan lian. 5 Kalo ema mak lahoos siakaan makbalin, bibi malae sia la lolok tuir, mais nalai sasin, tan la natene ema nia lian.”

6 Yesus dale lia hatetek ne'e bodik ema nia sia, mais sia la kohi lia isin.

7 Hotu Yesus dale tenik na'ak, “Rona, tan Ha'ukaan dalen ne'e, tebes no loos. Ha'u ne'e, nanokar iha bibi malae lalutuk. 8 Ema hotu-hotu mak mai uluk Ha'u, sia hanesan na'ok. Ha'ukaan bibi malae la rona baa sia. 9 Tebes. Ha'u ne'e, mak nanokar. Ema mak tama tuir Ha'u, netan moris. Sia dadi hanesan bibi malae mak tama-sai atu buka haa-hemun.^a 10 Na'ok sia mai atu nana'o, atu no'o, no nadodok mohu ema siakaan moris. Mais Ha'u kmai atu foo moris kabaas.

11 Ha'u, makbalin di'ak mak daka di'a-di'ak Ha'ukaan bibi malae sia. Ha'u kodi liman rua latan Ha'ukaan moris to'o mate, nebee Ha'ukaan bibi malae sia bele netan moris. 12 Kalo ema seluk mak daka bibi malae sia, oras nia naree asu fuik ida mai, nia nalai nela. Hotu asu fuik nia kohi nola ida, rumak sia nalai karin. Ema mak daka oin nunia, lahoos bibi malae na'in. 13 Nia serwisu nakara nola osan dei, lahoos nadomi bibi malae sia.

14 Tebes! Ha'u, makbalin di'ak mak daka di'a-di'ak Ha'ukaan bibi malae sia. Ha'u katene sia. Sia moos natene Ha'u. 15 Nunia moos, Ha'ukaan Ama iha lale'an natene Ha'u. Ha'u moos katene Nia. Ha'u kodi liman rua latan Ha'ukaan moris to'o mate, nebee Ha'ukaan bibi malae sia bele netan moris.^b 16 Ha'u moos koo bibi malae seluk sia mak sei la tama dauk baa lalutuk. Ha'u kmusti baa libur kola sia. Kalo sia rona nola Ha'ukaan lian, sia natene kedan. Hodi nunia, Ha'ukaan bibi malae sia dadi baa natar ida, makbalin ida.

17 Ha'ukaan Ama iha lale'an dadobe Ha'u, tan Ha'u kodi liman rua latan Ha'ukaan moris to'o mate, nebee Ha'u kbele moris kikar. 18 La noo ema ida mak naseten Ha'u klatan Ha'ukaan moris to'o mate, mais Ha'u na'in kakara. Ha'u koo beran latan Ha'ukaan moris. Ha'u moos koo beran atu kola kikar. Ha'u ksimu kola ukun nia kosi Ha'ukaan Ama iha lale'an.”

19 Rona nola Yesus dale nunia, ema Yahudi sia toe malu tenik. 20 Ema wa'in nosi sia na'ak, “Hoi! Ema ne'e bula ti'an! Arumak diabu tekar! Tan saa emi hanono baa Nia?”

21 Mais ema balu na'ak, “Ne'e lahoos ema bulak mak dale. Hanorin mak kabaas nunia, la isin ida dauk sai nosi diabu ibun! Diabu moos la nalo ema matan delek to'o moon.”

22 Baa oras nia, ema Yahudi sia nadahur loron boot ida atu nodi nanoin oras siakaan bei uluk sia namanas nikar Uma Hamulak Huun. Loron boot nia, kona baa rai udan.^c 23 Oras nia, Yesus la'o iha Uma Hamulak Huun lalawar, to'o fatin ida naran ‘Fatin Na'i Soleman’. 24 Naree Yesus mai, Yahudi ulun sia kabuun nola Nia, hotu sia katak na'ak, “Hoi! O mabenar ami to'o wainhira? Kalo O ne'e tebe-tebes Kristus, ma'ak malorek.”

25 Yesus nataa na'ak, “Ha'u katak ti'an, mais emi la ho'uk fiar. Tadak blaar mak Ha'u kase'i hotu-hotu, kase'i kodi Ha'ukaan Ama beran. Lia nia nalore na'ak, Ha'u ne'e see. 26 Mais emi sei la fiar, tan emi lahoos Ha'ukaan bibi malae. 27 Ha'ukaan bibi malae malolok sia, natene Ha'ukaan lian. Ha'u moos katene sia. Sia moos tuir Ha'u. 28 Ha'u kfoo moris nima-nimak baa sia. Ne'e na'ak, sia la naksasa kedas nosi Na'i Maromak. La noo ema ida kois mak bele nadau nola sia nosi Ha'u. 29 Ha'ukaan Ama iha lale'an mak latan sia baa Ha'u. Nia mak boot kaliuk. La noo ema ida kois mak bele nadau nola sia nosi Nia. 30 Ha'u ne'e ko Ha'ukaan Ama, Ami mesak ida.”

31 Rona nola nunia, Yahudi ulun sia foti tenik fatuk atu tuda no'o Yesus. 32 Mais Yesus katak baa sia na'ak, “Ha'u katudu ti'an lia kabaas wa'in nosi Ha'ukaan Ama. Emi hodi lia makonak ida nabee atu tuda ho'o Ha'u?”

33 Sia nataa na'ak, “Ami atu tuda O, lahoos tan matudu lia kabaas. Mais tan O dale mahaat Na'i Maromak. O ema raiklaran, mais O mola aan nu'u Na'i Maromak!”^d

34 Hotu Yesus nataa na'ak, “Iha Hakerek Moon, Na'i Maromak du'uk katak kedan nosi emikaan bei uluk sia na'ak ‘Emi ne'e, nu'u maromak, tan emi dadi oan baa Nia Mak Aas Kaliuk’.^e 35 Ita hatene nanis la noo lia fuan ida mak bele ho'as lakon hosi Hakerek Moon laran. Dadi, kalo Na'i Maromak du'uk filak ema nu'u ‘maromak’, 36 tan saa emi laran moras kalo Ha'u katak ka'ak, Ha'u ne'e, Na'i Maromak Oan? Ne'e, la tama kakutak, tan Nia mak natudu Ha'u, hotu solok Ha'u kmai iha raiklaran ne'e. 37 Nune'e. Kalo Ha'u la kala'o Niakaan serwisu, lalika fiar baa Ha'u. 38 Mais kalo Ha'u kala'o tebes, emi nokbiit fiar, tan haree ti'an tadak blaar mak kase'i. Hodi nunia, emi hatene ha'ak, Ha'u talin aan ko Ha'ukaan Ama. Nia moos talin aan no Ha'u.”

39 Rona nola nunia, sia buka kohi Nia tenik, mais Nia sasin luku.

40 Hotu Yesus baa nikar mota Yordan balu baa, iha fatin mak uluk Yohanis sarani ema. Hotu, Nia nein heik iha nia.^f 41 Ema wa'in mai buka Nia, nodi dale na'ak, “Yohanis la nalo tadak blaar ida kois. Mais lia hotu-hotu mak nia dale nosi Yesus ne'e, loos!” 42 Ema wa'in moos fiar baa Nia iha fatin nia.