Yesus dale no Nikodemus
3
Noo ema na'in ida naran Nikodemus. Nia, ema Yahudi siakaan ulun boot ida nosi partee Farisi. 2 Baa kalan ida, nia mai nasoru Yesus nodi katak na'ak, “Ita Boot! Ami hatene Na'i Maromak mak solok Ita Boot atu mai nanorin ami. Tadak blaar mak Ita Boot nase'i, foo lia kakaer baa ami na'ak, Na'i Maromak mak foo beran baa Ita Boot. Tan, kalo lahoos nunia, tadak blaar nia sia la bele dadi.” 3 Rona nola Nikodemus dale nunia, Yesus nataa na'ak, “Tebes. Na'i Maromak mak foo beran baa Ha'u. Mais rona, tan Ha'ukaan dalen ne'e, tebes no loos: kalo ema nakara dadi Na'i Maromak eman, musti noo mak nahoris nikar nia.”
4 Rona nola nunia, Nikodemus benar. Nia nusu na'ak, “Mais nunabee bele nahoris nikar ema? Ema la bele tama nikar baa inan notak, hotu inan nahoris nikar nia. La bele.”
5 Yesus nataa na'ak, “Tebes! Mais rona, tan Ha'ukaan dalen ne'e, tebes no loos: kalo Na'i Maromak la nodi Kmalar no wee atu foo moris foun baa ema, ema la bele dadi baa Niakaan ema. 6 Ema raiklaran nahoris ema raiklaran. Mais Maromak Kmalar mak foo moris foun baa ema. 7 Keta blaar, kalo Ha'u katak ka'ak, ‘Musti noo mak nahoris nikar ema.’ 8 Hanoin kokon anin. Ita la bele haruka anin, tan anin nuu tuir niakaan hakara. Ita bele rona niakaan iis, mais ita la hatene anin mai nosi nabee, atu baa nabee. Ema moos simu moris foun nosi Maromak Kmalar nunia.”
9 Rona nola nunia, Nikodemus nusu na'ak, “Nunabee, to'o bele dadi nunia?”
10 Yesus nataa na'ak, “Ama ne'e, ema manorik boot bodik ita ema Isra'el tomak. Tan saa ama la natene lia ne'e sia? 11 Rona, tan Ha'ukaan dalen ne'e, tebes no loos: Ha'u ko Ha'ukaan ema sia hatene lia ne'e sia, tan ami haree du'uk ti'an. Ami katak baa emi ti'an, mais emi la simu. 12 Kalo Ha'u katak kosi lia mak dadi iha raiklaran, emi la fiar. Saa tenik, kalo katak kosi saa mak dadi iha lale'an. Emi nanis hetak la fiar! 13 Emi la hatene saa mak dadi iha lale'an baa, tan la noo ema ida kois mak bele sa'e baa lale'an. Mais Ha'u katene, tan Ha'u ne'e, Ema Raiklaran Isin mak tuun mai nosi lale'an.
14 Uluk aan, oras itakaan bei uluk sia sei iha fatin fuik, Bei Musa nase'i samea ida nosi besi riti, hotu nisa baa ai leten. Hodi nunia, ema moras mak naree samea nia, bele netan isin di'ak. Nunia moos Ha'u, Ema Raiklaran Isin ne'e. Ema atu nisa Ha'u baa ai leten,a 15 nebee ema mak fiar baa Ha'u, netan moris nima-nimak.
16 Na'i Maromak nadomi ema raiklaran, to'o Nia solok Oan Mane mesak mai raiklaran ne'e. Hodi nunia, ema hotu-hotu mak fiar baa Oan, la kona kastikar mak sasa fa'e sia nosi Na'i Maromak ona, mais sia netan moris nima-nimak no Nia. 17 Tebes. Na'i Maromak solok Oan baa raiklaran ne'e, lahoos atu taa ukun baa ema maksalan, mais atu sori ema maksalan nosi kastikar. 18 Na'i Maromak la taa ukun baa ema mak fiar baa Oan. Mais Nia taa ukun baa ema mak la fiar, tan sia la fiar baa Oan Mane mesak ne'e.
19 Lia nune'e: Na'i Maromak solok kroman mai ti'an atu naksinak iha raiklaran ne'e. Mais ema la no'uk moris iha kroman nia. Sia nakara fila baa moris iha makukun, tan sia beer nalo aat. Etuk, Na'i Maromak atu kastikar sia. 20 Ema hotu-hotu mak moris nalo aat, hirus kroman nia. Sia la nakara kroman nia naksinak baa sia, nebee kroman la loke loren siakaan hahalok aat. 21 Mais ema mak moris tuir hanorin loos, sia mai baa kroman nia. Hotu kroman nia naksinak nalore siakaan hahalok mak sia nalo, tuir Na'i Maromak beer.”
Yohanis dale tenik nosi Yesus
22 Nunia hotu, Yesus no Niakaan maktuir sia sai nosi kota Yerusalem, mais sia nein heik iha rai Yudea. Iha nia, sia sarani ema. 23-24 Baa oras nia, Na'i Herodes sei la natama dauk Yohanis baa bui. Oras nia, Yohanis moos sarani ema iha leo Ainon, kre'is baa leo Salim, tan iha nia no wee wa'in. Ema mai hei-hein baa Yohanis iha nia, sia nusu nebee Yohanis sarani sia.b
25 Baa oras nia, ema Yahudi na'in ida nalo lia no Yohanis niakaan maktuir sia, nosi siakaan adat Yahudi na'ak, ema musti namoos uluk isin, foin bele namulak. 26 Tan baa nia, maktuir sia mai nusu Yohanis na'ak, “Ama Manorik! Hanoin kokon Ema ohin nia mak buka ama iha mota Yordan nebaa, mak ama na'ak Kristus? Oras ne'e, Ema nia sarani ema iha nebaa! Keta to'o ema la mai baa ita tenik, tan hotu-hotu baa Nia bele!”
27 Mais Yohanis nataa na'ak, “Nune'e! Ema la bele nalo sa-saa kalo Na'i Maromak la loke dalan bodik nia. 28 Emi du'uk rona ti'an ha'u katak malorek ka'ak, ‘Ha'u ne'e, lahoos Kristus. Mais Na'i Maromak solok uluk ha'u atu kloke dalan bodik Kristus. Nunia dei!’c
29 Hola hatetek hosi dahur uma kain foun. Ita mai tuir dahur, tan ita hakara haree sasudin mane nola feto. Lahoos haree niakaan matas hariik. Mais matas nia, musti nakara rona sasudin mane dalen. Nune'e! Yesus, hanesan sasudin. Ha'u, mak Niakaan matas hariik. Oras ne'e, ha'u neon di'ak, kalo ema nanono baa Nia. 30 Nia mak ema musti nakneter kaliuk, lahoos ha'u.”
Yesus nia, mak tuun mai nosi lale'an
31 Hotu, Yohanis dale natutan na'ak, “Tebes. Yesus nia boot kaliuk, tan Nia tuun mai nosi Na'i Maromak iha lale'an. Ema mak mai nosi raiklaran, nia ema raiklaran dei. Nia moos dale loos lia raiklaran. Mais Yesus seluk, tan Nia mai nosi lale'an. 32 Nia dale lia mak Nia naree no rona ti'an iha lale'an. Masik nunia moos, ema la no'uk simu. 33 Mais kalo ema simu Nia, sia natebes na'ak, Na'i Maromak Manfatin, tebes no loos. 34 Na'i Maromak solok Nia mai atu katak Niakaan mamenon. Na'i Maromak moos fakar Niakaan Kmalar baa Nia. 35 Ama Maromak nadomi tebe-tebes Oan nia to'o latan hotu-hotu baa Nia.d 36 Ema mak fiar baa Oan nia, simu moris nima-nimak. Mais ema mak la nanono baa Nia, la simu moris nia, tan Na'i Maromak nahibu sia nima-nimak.”