2 Lia nia nune'e: “Noo ema makotu lia ida iha kota ida. Nia la fiar baa Na'i Maromak. Nia la titu ema ida no. 3 Iha kota nia moos, noo feto faluk ida. Nia mai hei-hein baa makotu lia nia nodi nusu na'ak, ‘Ama makotu lia! Makotu ha'ukaan lia malo loos!’

4 Uluk fohon makotu lia nia la titu feto faluk nia. Mais feto nia mai hei-hein to'o makotu lia la no'uk rona ona, nodi naneo na'ak, ‘Uras Na'i Maromak dei, ha'u la ktitu ti'an, saa tenik baa ema raiklaran. 5 Mais tan feto ne'e nalo ha'ukaan ulun kalanuk, di'ak liu kakotu niakaan lia kalo loos. Kalo lale, nia mai hei-hein nakole ha'u nohuun.’”

6 Hotu Yesus katak tenik baa maktuir sia na'ak, “Emi hanoin kokon baa makotu lia ne'e lian. Masik nia la loos, kleu-leur nia tulun feto faluk nia. 7 Kalo ema mak la loos nakara tulun ema nunia, Na'i Maromak nanis nakara tulun Niakaan eman mak namulak loron-kalan nusu tulun baa Nia. Mais Nia la nalo nu'u makotu lia nia, 8 tan Nia babilan kedas. Ha'u kusu nune'e: kalo Ha'u, Ema Raiklaran Isin ne'e, mai kikar ti'an, takseer Ha'u ksei bele kasoru ema makfiar iha raiklaran ne'e ka, lale?”

9 Yesus dale tenik lia hatetek ida, nosi lia ema mak nahaas aan nodi titu naraik ema seluk. Nia dale na'ak, 10 “Noo mane na'in rua baa namulak iha uma hamulak. Ida nosi partee Farisi, ida tenik maksisi bea. [Ema Yahudi sia nafoli ema Farisi na'ak, ema moos. Mais nafoli maksisi bea na'ak, ema lisan aat.] 11 To'o uma hamulak baa, ema Farisi nariik namulak nodi foti aan du'uk na'ak, ‘Ha'u kamulak sera dodan baa Na'i Maromak, tan ha'u ema di'ak. Ha'u la aat nu'u ema seluk sia. Ha'u la kana'o. Ha'u la krotus. Ha'u la kakur biti-kluni. Ha'u moos la aat nu'u maksisi bea ne'e. 12 Ha'u madinas kalirin aan domiku ida, dala rua. Ha'u moos foo fa'ek ida nosi fafa'ek sanulu mak ha'u ketan.’ Ema Farisi nia namulak nunia.

13 Mais ema maksisi bea nia nariik dook iha kotuk baa. Nia la naksakar aan foti oin atu titu baa lale'an. Nia namulak sudur ulun nodi neon dodok na'ak, ‘Aaa, Na'i Maromak. Madomi ha'u ema sala ne'e! Foo pardua baa ha'u lai!’”

14 Dale notu, Yesus nusu na'ak, “Baa oras mane rua nia fila uma, see mak di'a-di'ak nikar no Na'i Maromak? Ema Farisi ka, ema maksisi bea? Nanis Na'i Maromak simu di'a-di'ak maksisi bea mak naraik aan. Mais la rona ema Farisi nia. Tan Na'i Maromak naraik ema mak loko aan, mais foti sa'e ema mak naraik aan.”^a

15 Baa dala ida, ema naka'u nodi lawarik oan sia mai baa Yesus, nebee Nia rai liman nodi foo matak-malirin baa sia. Naree nunia, Yesus Niakaan maktuir sia de'an ema nia sia. 16-17 Mais Yesus simu oa nia sia mai baa Nia. Nia de'an maktuir sia na'ak, “Habusik lawarik oan sia mai baa Ha'u. Keta saseni sia! Rona, tan Ha'ukaan dalen ne'e, tebes no loos! Ema mak nakara dadi baa Na'i Maromak eman, musti nakri'it aan baa Na'i Maromak, hanesan lawarik oan nakri'it aan baa inan-aman.”

18 Baa dala ida, na'ilulik Yahudi ida mai nusu baa Yesus na'ak, “Ama Boot mak kneter basuk! Ama tulun manorin Ha'u nebee ha'u kbele katene oin nunabee, ha'u kbele tama lale'an atu moris nima-nimak ko Na'i Maromak.”

19 Yesus nataa na'ak, “Tan saa o masee Ha'u, ‘mak kneter basuk’? Kmesak ida dei mak kneter basuk. Nia mak Maromak. 20 O matene nanis ukun-badu hori uluk na'ak:

21 Ema nia nataa na'ak, “Tebes, Ama! Ha'u ktuir ukun-badu nia sia ti'an, nahuu hori ksei ki'ik.”

22 Rona nola nunia, Yesus na'ak, “Di'ak! Mais lia nia sei la to'o dauk. O musti baa fa'an okaan sasoin sia hotu-hotu. Hotu, fa'e osan baa ema mukit sia. Halo nunia lai, foin mai tuir Ha'u. Nosi ikus, Na'i Maromak selu sasoin iha lale'an baa o.”

23 Rona nola nunia, ema nia neon susar, tan soi to'o. 24 Hotu, nia fila nodi neon dodok.

Naree nunia, Yesus katak baa Niakaan maktuir sia na'ak, “Maksoin susar basuk tama lale'an. 25 Hanesa no lia seluk mak na'ak, kuda unta la bele tama lalu'an tuir daun kuak. Nunia moos ema mak naloon loos baa sasoin dei, la naloon baa Na'i Maromak. Nia la bele tama lale'an.”

26 Hotu, ema sia mak rona Yesus dale nunia, nusu na'ak, “Kalo susar tebes maksoin tama lale'an, ema oin nunabee mak bele netan moris?”

27 Yesus nataa na'ak, “Noo lia wa'in mak ema raiklaran la bele nalo. Mais Na'i Maromak bele nalo lia hotu-hotu.”

28 Hotu Petrus natutan na'ak, “Ama! Ami la'o hela ti'an amikaan sasoin sia hotu-hotu atu tuir Ama. Mais ami atu hetan saa?”

29 Yesus nataa na'ak, “Petrus! Rona di'a-di'ak, tan Ha'ukaan dalen ne'e, tebes no loos! ! Ema mak la'o nela niakaan uma, niakaan feen, niakaan maun-biin-alin, niakaan inan-aman, lale niakaan oan sia, tan nia nala'ok Na'i Maromak serwisu, 30 nanis nia simu nikar wa'in liu iha raiklaran ne'e. Nosi ikus, oras raiklaran falu fila, nia moos simu moris nima-nimak no Na'i Maromak.”

31 Nunia hotu, Yesus nodi Niakaan maktuir na'in sanulu resin rua la'o liu baa, nebee Nia dale mesan baa sia na'ak, “Oras ne'e ita atu baa kota Yerusalem. To'o nebaa, lia hotu-hotu mak Maromak mako'an sia nakerek kedan nosi lia Ema Raiklaran Isin atu dadi, tuir saa mak sia nakerek nela. 32 Ema atu latan Ha'u baa ema maktabar sia mak la fiar baa Maromak. Hotu sia naleuk Ha'u, nahaat Ha'u oi-oik, soe kaban baa Ha'u, 33 ta'e Ha'u, hotu no'o Ha'u. Mais baa wainrua, Ha'u kmoris kikar.”

34 Rona nola Yesus dale nunia, maktuir sia benar, tan sia sei la bele kohi dauk lia fuan nia isin.

35 Baa oras Yesus no Niakaan maktuir sia atu tama baa kota Yeriko, sia nasoru nola ema delek ida mak tuur nodi nadidu iha dalan tehen. 36 Rona ema lear la'o tuir nia, delek nia nusu na'ak, “Hei! See ne'e sia?”

37 Ema katak baa delek nia na'ak, “Yesus, ema Nasaret, la'o tuir ne'e.”

38 Rona nola lia nia, delek nia nahii maka'as na'ak, “Yesus! Na'i Daud husar-binan! Madomi ha'u lai!”^c

39 Nia nahii nunia, mais ema mak la'o iha Yesus oin nakahik nebee nia no-nook. Mais nia hetak nahii tu'an na'ak, “Hei! Na'i Daud husar-binan! Madomi ha'u lai!”

40 Rona nola delek nia nahii, Yesus moos nariik. Nia naruka ema nala'ok nodi delek nia mai. To'o Yesus oin, Yesus nusu baa delek nia na'ak, 41 “O makara kalo saa baa o?”

Delek nia nataa na'ak, “Ama Boot! Ha'u kakara nebee ha'u kbele karee.”

42 Yesus nataa na'ak, “Di'ak. Tan o fiar ma'ak, Ha'u kbele kadi'ak kola o, oras ne'e moos, okaan matan moon ona.” 43 Yesus dale nunia, delek nia matan moon kedas. Hotu, nia tuir Yesus nodi tonu-naboot Na'i Maromak. Ema hotu-hotu mak naree, sia moos tonu-naboot Na'i Maromak.