Besa-besa mo hata sosoko' ara!
10
Toranoo susue kara! Emi boso' mafarene heni fai a ulu na ita bei-ba'i nara tutuin, tepo' fo rai mamana lino-nees. Manetualain natudu fee basa si eno', pake oa' fo la'o nai sira matan. Boe ma Ana tada bati tasi oe' a, ela napipipi-nalala'o noo si kalua resi' naa, de ara losa tasi seri' no soda'.a 2 Oa' ria ma tasi' a, dadi dedea nasasama' esa. Huu fo ita bei-ba'i nara ramahere ba'i Musa napipipi-nalala'o si, de ara tuka oa' ria, ma sama-sama ro ni maso' leo tasi dale' reu. Ria sama leo' ita fo ri' tamahere Kristus, boe ma sarani ela natudu nae, ita dadi Ria lahendan, ma tamanene Ni. 3 Ita bei-ba'i nara basa si raa nanaa-nininu' fo ri' Manetualain Dula-dale Na sadia fee si.b 4 Ma basa si rinu oe fo ri' Manetualain Dula-dale Na sadia fee si. Ara rinu a, nana kalua neme batu bau-ina' fo Manetualain Dula-dale Na natudu fee si. Sira leo bea' reu boe, batu ria nai naa. Batu ria nana ri', Kristus.c 5 Tehuu Manetualain ta nahii' lahenda makadoto' sira nonoi-tataon. Tepo' fo ara la'o rule-feo mamana lino-nees maloa-manaru a, mate dodou-ina' rai naa. De ara ratoi sira lahenda nara rai mamana' dodou'.d6 Basa sira dadi ela ratudu conto, fo ita boso' tao sala' sama leo' sira.e 7 Boso' soko-taku sama leo' sira ruma. Nai Manetualain Susura Makamoi Na mana dui' nae, “Lahenda Israel ara ratuu' raa-rinu rame-rame ma mulai do'o-tabe nai patung sapi ana' a matan.”f 8 Ita boso' hohoke'. Tepo' ria ara hohoke leo' naa, de noi fai' esa' a dalen mate lahenda rifun dua hulu telu.g 9 Ita boso' tao sala rupa', fo soba taneni Kristus huku ita do, ta'a. Huu fo lahenda Israel ruma soba Manetualain leo' naa, de Ana fee meke manuu raso' dodou' aa ramate si.h 10 Ita boe boso' tamuu-tadau. Huu fo sira ruma ramuu-radau raroo, de Manetualain nadenu Ria eila'o-limalopen esa neme nusatetu-ikutema' a mai naisa si.i
11 Hihii-nanau' ria la'e lahenda Israel ara, fo dadi conto soa-neu' ita. Ara dui' basa sira, ela ita bisa tanori ma boso' tao tuka sira sala na. Huu fo dae-bafo' a nonoe na nanenea' so.
12 Mafarerene'! Besa' ia o afi mae, o bisa manenete maroo. Tehuu o muste besa-besa ela o boso' tuda. 13 Fai bea ma o tao sala', lahenda feke' boe rameda rita sosoba leo naa'. O bisa mamahere Manetualain, nana huu Ana tao natetu hata fo Ana dedean. Ana ta nataa' o hapu sosoba lena neme o nabe'i ma. Fai bea ma o hapu sosoba' leo naa', sona Ana fee o eno kalua. Ria boe tao na o manenete, ela o boso' tuda.
14 De toranoo susue kara! Kalu lahenda nau raseti emi do'o-tabe neu' sosoko-tataku' ara, sona malai kalua meme naa' mai! Boso' mababako' bali!
15 Au dedea soa-neu' emi manuu dudu'a-aafi tande'. Emi muste dodoo-tatai ao mara ela bubulu' matetu' hata fo au dedea a. 16 Afi masudi hihii-nanau' ia: kalu ita tabua fo taa-tinu nai Ramatua' a mei Na, boe ma hai ta galaas a fo hule makasi neu' Ana, ma ita tinu neme galaas ria mai, ria sosoa na nae, ita tabua-taesa to Kristus. Tepo' fo Ana mate, natiti-nanosi' daa Na, ria sama leo' ita boe mate. Kalu ita tetebi roti fo taa, ria boe sosoa na nae ita tabua-taesa to Kristus. De tepo' fo Ana mate, ria sama leo' ita boe mate.j 17 Ita basa hapu babati' neme roti balo' esa. De basa-basan fo ri' hapu babati' neme roti esa mai, sama leo' ita dadi teu' ao-ina' esa, leo mae ita lahenda dodou'. 18 Dodoo-tatai masudi fai a ulu na lahenda nusa Israel ara. Tepo' fo ara hala banda nai mei tutunu-hohotu' lain, fo do'o-tabe neu' Manetualain, malaka agama fo hala a, ri' naa paa' ria. Ria sosoa na nae, sira rabua-raesa ro Manetualain, ma sira boe rabua-raesa ro lahenda fo ri' neni banda tutunu-hohotu' ria.k
19-20 Au maksud ka leo bea'? Lahenda fo ta nalela' Manetualain nau fee neneni-fefee' neu' sira hata sosokon, ria sosoa-raraa' ta'a, hete? Huu fo hata sosoko' ria', nana patung mates! Au maksud ka leo ia': tepo' fo ara hala banda dadi tutunu-hohotu' soa-neu' sira hata sosokon, ara soko-taku neu' dula-dale tadalu' ara. Tehuu sira ta do'o-tabe neu' Manetualain. De au ta nau emi mabua-maesa mo dula-dale tadalu' leo naa' ara.l 21 Emi mabua-maesa mo Ramatua' a, ma minu neme galaas fo nai Ramatua' a mei Na, sona emi ta bole epo-seo' no dula-dale tadalu' ara, ma minu neme sira galaas na, tepo' fo lahenda soko-taku neu' asa. Huu fo ria sosoa na nae, emi mabua-maesa mo dula-dale tadalu' ara. Leo' naa boe, kalu emi mia nai Ramatua' a mei Na, sona emi ta bole mia mo si nai sira mei na. Huu fo ria sosoa na nae, emi mabua-maesa mo dula-dale tadalu' ara! Pakanaa' emin! 22 Emi afi leo bea'? Nau tao ma ita Ramatua na namanasa', do? Masalae' a ria! Emi afi mae bara'ai mara lena Ni, do?m
Tao basa-basan fo madedema Manetualain nade Na
23 Bate emi mae, “Au bole tao sudi ubea' a. Huu fo ria nana au haak ka.” Tebe. Tehuu mafarerene', te ta basa hihii-nanau' ara malole a soa-neu' o. Ma ta basa hihii-nanau' ara, bisa tulu-fali fo tao natea-namepe o dale ma.n 24 Boso' saka noi oonto' soa-neu' o ao-ina heheli ma. Malole lena', saka oonto' soa-neu' lahenda feke' boe.
25 De au afada leo' ia: kalu asa paa' nai pasar, sona mia neu. Boso' matane bali, “Paa sosoko' ia, do?” Do afi mae, “Au bole ua paa' ia do, ta'a?” 26 Huu fo nai Manetualain Susura Makamoi Na mana dui' nae, “Dae-bafo' a no oe-isin nana, ita Ramatua na nuu-enan.”o
27 Kalu lahenda fo ri' bei ta namahere Manetualain a nae, “Mai teu taa-tinu nai uma!” Kalu emi nau meu, sona meu, ma mia basa-basan fo ri' ara fee emi. Boso' matane mae, “Au bole ua hata ia do, ta'a?” 28 (Tehuu kalu lahenda mai ralaisi' rae, “Boso' mua ia, huu fo paa' sosoko' ia,” malole lena' o boso' mua. O muste tao dale' neu' lahenda ria dedea-nafadan. 29 Au dale ka leo ia', afi matalolole, tuka lahenda ria dudu'a-aafin, bole mua do, ta'a. Boso' afi noi malole a soa-neu' o ao-ina heheli ma.)
Tehuu au bole tao tuka au hihii ka. Kalu lahenda feke' afi nae ana tao hihii-nanau' esa ta malole a, ubea' taon de au boe ta bisa tao tuka au hihii ka, sekonaa te hata tadalu' ria soa noi neu' lahenda ria? 30 Kalu au hule makasi neu' Manetualain, boe ma au ua, ubea' taon de lahenda sale au?
31 De emi nau mia, minu, do tao sudi ubea', sona tao basa-basan ela emi matudu Manetualain nade malole Na. 32 Boso' tao masususa' lahenda Yahudi, lahenda ta Yahudi, do Manetualain lahenda kamahere nara. 33 Tao sama leo' au ia. Huu fo au soba-soba tao amaho'o sira basa nai basa hihii-nanau' a. Au ta tao malole soa noi au. Tehuu au tao malole soa-neu' sira basa, ela ara hapu popo'i-tatata'.