Au dui' susura' ia fee basa lahenda kamahere' fo biasa rabua rai kota Korintus, ma rai propensi Akaya.^a 2 Au hule-haradoi neu' Manetualain, ita Aman, ma Yesus Kristus, ita Ramatua na. Au hule fo Ara ratudu Sira dale malolen neu' emi, ela emi bisa masoda no tetu-tema', mole-dame, ma tesatei-tamadale'.

3 Ami mahii' basa lahenda ra io-oa Manetualain nade Na. Huu fo Ria nana, ita Ramatuan Yesus Kristus Aman. Basa dale kasian a raoka-rasamu reme' Ria mai, ma Ria ri' natetea ita dale na. 4 Kalu ita hapu susa-lela, sona Ria o'oe-nanasi ita. Huu ria naa, ita bisa o'oe-nanasi lahenda feke' fo ri' hapu susa-lela. Ita bisa tatetea sira dale nara, sama leo' Manetualain natetea ita dale nara boe. 5 Kristus hapu susa-lela dodou' nana huu ita. Huu no Kristus doidoso Na, de kalu ita hapu susa-lela, sona Ria Aman boe-boe natetea ita dale na. 6 Kalu ami nai ia hapu susa-lela, sona Manetualain natetea ami dale mara. Ma kalu ami hapu susa-lela, boe ma manenete no dale loa', sona emi boe muste bubulu' Manetualain pake eno' ria ela natetea emi dale mara, ma po'i-tata na emi meme tadalu' a mai. Kalu emi hapu susa-lela sama leo' ami, sona Manetualain natetea emi dale mara, ela emi bisa manenete no dale loa'. 7 Huu ria naa, ami mamahere mae, emi bisa manenete ma ta keke-boi'. Huu fo ami bubulu' mae, kalu emi hapu susa-lela sama leo' ami, sona Manetualain natetea emi dale mara, sama leo' Ana natetea ami dale mara boe.

8 Toranoo kara! Ami nau, emi bubulu' matetu' la'e-neu' susa-lela fo parnaa ami hapun nai propensi Asia. Ami mameda maan bera' a, lena neme ami bisa lepan. Losa' ami makate ma mopon, nana huu ami dodoo maan nonoo' nae ami mate.^b 9 Ami mameda maan bera' a, sama leo' lahenda esa besa' ko namanene mana ee dedea' a naetu' huhuku mamates soa-neu' ana. Tehuu basa sira dadi, ela ami mamahere Manetualain, ma ta mamahere ami ao-ina mara. Huu fo Manetualain ri' nanuu kuasa, de fee lahenda mana mate' ara rasoda selu'. 10 Fai fo ami kura bai' mate a, Ria ri' po'i-tata na ami meme tadalu' a mai so. Neu' ko Ana nau po'i-tata na ami meme tadalu' a mai boe. Ami mamahena mahere mae, neu' ko Ana po'i-tata na ami la'o naroo meme hihii-nanau' tadalu' ara mai. 11 Kalu emi hule-haradoi maroo fee ami, ria boe tutulu-fafali' neu' ami, huu fo Manetualain sipo' emi huhule-haradoim ma natudu dale malole Na neu' ami. Ana tao leo naa', nana huu lahenda dodou' hule-haradoi fee ami. Boe ma fai fo lahenda dodou' rafarene hata fo Manetualain taon soa-neu' ami, neu' ko sira boe hule makasi dodou' neu' Ana.

12 Ami bisa dedea bau-ina', nana huu ami bubulu' nai ami dale ana boboko mara mae, ami tao hata ubea' nai dae-bafo' ia, tuka Manetualain hihii-nanaun soa-neu' ami. Ami ta heo' meme nonoi-laka' ria mai, ela basa lahenda bisa rita ami moi-tao no dale lalao-lalafu'. Ami malala'o nonoi-tatao mara, meni' dudu'a-aafi tande'^c neme Manetualain mai, ta pake dudu'a-aafi tande' fo ri' naoka-nasamu nai dae-bafo'. Huu fo Manetualain natudu dale malole Na neu' ami. De tepo' fo ami sama-sama mo emi a, tebe-tebe ami saka eno' fo moi-tao no dale lalao-lalafu'. 13 Au dui' fee emi la'e-neu' noi basa hihii-nanau' fo emi bisa lees ma bubulu'. Besa' ia emi bubulu' au maksud ki ruma. Tehuu au amahehena', neu' ko emi bubulu' dodou ina' bali. 14 Besa' ia, emi bubulu' noi baiana' la'e-neu' ami. Tehuu kalu ita Ramatuan Yesus Kristus natafali mai, neu' ko au amahere ae emi bubulu' dodou'. No ria naa, emi bisa dedea bau-ina' la'e-neu' ami, sama leo' ami boe dedea bau-ina' la'e-neu' emi.

15 Huu no au amahere ae emi bubulu' hihii-nanau' ia ra, de maulu na au parnaa aetu' aan nau uu tiro-dama selu' emi, ela emi bisa hapu ua-nale' lai' dua. 16 De maulu na au afi ae, kalu au dadi leo propensi Makedonia uu, sona au bisa tuli emi. Fai bea ma au fali eme Makedonia mai, au bisa tuli selu' emi bali. No ria naa, emi bisa tulu-fali au, fo bisa la'o aroo leo propensi Yudea uu.^d

17 Au aetu' ae uu dama emi a, ta dadi fa, de leo bea' ia so? Fai bea ma afada ae, au ahii' uu dama emi, bate emi mae au bei aeeso', do? Do, emi bate mae au aetu' hihii-nanau' tuka noi au hihii-nanau mesa ka, sama leo' lahenda feke' nai dae-bafo' ia, do? Do, emi mae au lahenda masarole-masarali', fo ahii' ae, “Ia.” Sekonaa te, au du'a-afi nai dale ka ae, “Ta bisa!” Bate emi afi mae au rupa ka leo naa', do? 18 Ita tamahere Manetualain, huu fo kalu Ana dedea hihii-nanau' esa, sona tantu Ana tao tukan. Huu ria naa, ami boe leo naa'. Kalu ami dedea mae, “Ia,” sona ami ta afi mae, “Ta'a.”

19 Au, Silas, ma Timotius tui-beka fee emi la'e-neu' Yesus Kristus Manetualain Ana Na, fo ri' ta lahenda masarole-masarali', fo Ana dedea nae, “ia”, tehuu maksud na nae “ta'a”. Ria ta keke-boi', huu fo kalu Ana dedea nae “ia”, sona tebe-tebe maksud na nae “ia”.^e 20 Manetualain tantu tao natetu' hihii-nanau' fo ri' Ana helu. Huu ria naa, kalu Yesus helu hihii-nanau' esa nae, “ia”, ita bisa sipo' tae, “Amin!” Nana huu ami bubulu' mema' Yesus tao natetu' basa hihii-nanau' sira. Ami mafada hihii-nanau' ia ra, ela natudu Manetualain marela-masa'an. 21 Manetualain ri' teka-here emi mo ami. Ana so'u na ita dadi teu' Ria lahendan, Ria ri' tao na ita tanenete taroo. 22 Ana fee Dula-dale Na ela ator ita, ma natudu basa hihii-nanau' fo neu' ko Ana fee ita. Ana fee Dula-dale Na leo' naa, sama leo' lahenda tao ria e'e-dededen neu' hata esa ela nafada nae, ria nuun.

23 Au hule fo Manetualain ri' sakasii au dedea ka. Huu fo Ana bubulu' au dale ka. Ana bubulu' ubea' taon, de au bei ta dadi leo kota Korintus uu. Huu no au ta nau tao amamae' emi, de au bei ta leo naa' uu. 24 Ami ta so'u-fua ao mara dadi malaka fo madenu emi mae, emi muste mamahere bea. Tehuu ami moi-tao sama-sama mo emi, ela emi mamaho'o-matadale. Emi bisa mapadei mahere, nana huu emi mamahere Manetualain.