Manetualain Dula-dale Na fee ita kuasa fo tao nonoi-laka rupa' ara
12
Toranoo susue kara! Au nau emi bubulu' la'e-neu' kuasa ria, ma babati-papala' fo Manetualain Dula-dale Na fee ita ela pake. 2 Emi bubulu' tepo' fo bei ta dadi meu' Manetualain lahenda nara, emi soko-taku hata hara' taa'. Emi moi tuka-tuka' sira. 3 Huu ria naa, au nau emi bubulu' mae, tantu lahenda fo nabua-naesa no Manetualain Dula-dale Malalao-malalafu Na, ta bisa nae, “Kutuk neu' Yesus!” Ma, tantu lahenda fo ta nabua-naesa no Manetualain Dula-dale Malalao-malalafu Na, ta bisa nae, “Yesus nana, au Ramatua ka!”4 Manetualain Dula-dale Na fee lahenda ra esa' ko no' ria babati-papalan, ela ralala'o sira nonoi-laka feke nara. Tehuu basa babati-papala' sira reme Dula-dale' esa' a. 5 Lahenda hapu babati-papala' rupa' fo ralalau' lahenda, tehuu sira basa ramanene neme noi Ramatua' esa' a. 6 Lahenda hapu nonoi-laka rupa' fo ralala'o Manetualain nonoi-tataon, tehuu noi Manetualain ri' tulu-fali si ela ralala'o basa nonoi-laka' ara. 7 Manetualain natudu Ria Dula-dale Na nai lahenda ra soda na neni' esa' ko enon, tehuu maksud na nau basa si onto bela'. 8 Ana fee Dula-dale Na kuasa na nai Ria lahenda Nara. Ruma sipo kuasa de bisa ranuu dudu'a-aafi tande', ela fee lelea-nonore' no matetu'. Ma ruma sipo kuasa ela rafada ledo-ledo, hata fo ara bubulu' ana. 9 Ruma bali, sipo kuasa ela ramahere tebe-tebe Manetualain, nana huu sira rabua-raesa ratalolole ro Ria Dula-dale Na. Ruma bali, sipo kuasa ela puli lahenda kamahedis. 10 Ruma bali, sipo kuasa ela tao tanda heran rupa' fo natudu Manetualain marela-masa'a Na. Ruma bali, sipo kuasa ela tui-beka Manetualain hehelu-barataan neu' Ria lahenda Nara. Ruma bali, sipo kuasa ela bubulu' dula-dale' ria neme Manetualain mai do, ta'a. Ruma bali, sipo kuasa ela bisa dedea pake dedea rupa'. Ruma bali, sipo kuasa ela rafada dedea' sira sosoa-raraan ubea'. 11 Tehuu noi Dula-dale' esa ri' tataon, de sira basa bisa roi-tao nonoi-laka' sira. Ana fee babati-papala' neu' lahenda ra esa-esa' ko tuka Ria hihii-nanaun.a
Ao-ina' esa, nanuu babati' rupa'
12 Au nau araraa' babati-papala' sira ro lahenda ao-ina na. Ao-ina' esa nanuu babati' rupa'. Tehuu babati' sira dadi reu' ao-ina' esa.b
Ria sama leo' Kristus lahenda Nara. 13 Ita basa tabua-taesa nai Dula-dale' esa. Huu ria naa, tepo' fo ita sarani, ita dadi sama leo' lahenda nusa' esa. Leo mae ita lahenda Yahudi, do lahenda ta Yahudi, ata, do ta ata, Manetualain fee ita basa Dula-dale' noi esa' a. Ria sama leo' ita basa tinu oe mana neni soda' neme oe mata' esa' a.
14 Tebe, ao-ina' a, ta nanuu noi babati' esa' a. Huu fo ria dadi neme babati' dodou' mai. 15 Uni' ko leo ei ma nae, “Lima' ta au fa. De au ta dadi babati' neme ao-ina ma.” Leo mae dedea nae leo' naa, tehuu ria bei babati' neme ao-ina ma. Tebe, hete? 16 Ma kalu ridoo ma nae, “Mata' ta au fa. De au ta dadi babati' neme ao-ina ma.” Leo mae dedea nae leo' naa, tehuu ria bei babati' neme ao-ina ma. 17 Dodoo masudin! Kalu ao-ina ma dadi noi mata', sona bisa mamanene tao leo' bea? Ma kalu ao-ina ma dadi noi ridoo', sona bisa hae tao boo' a leo bea'?
18 Tehuu emi bubulu', Manetualain tao na ita dadi sama leo' ao-ina' esa, ma Ana ator babati' rupa nara tuka Ria hihii-nanaun. 19 Kalu ita ao-ina na dadi noi babati' esa, sona ria ta nade ‘ao-ina'’ so', hete? 20 Tehuu matetu na ri', ita ao-ina na nanuu babati' rupa'. Ria ri' dadi neu' ao-ina katema' esa.
21 Lahenda mata na ta bisa nae ta hika-hada' lima na nae, “Au ta parluu o!” Ma lahenda laka na ta bisa nafada ei na nae, “Au ta parluu o!” 22 Matetu na ri', ao-ina' a babatin fo ita tae ta baraai', ma ta penting, tehuu ita parluu si. 23 Babati' fo ita tae sira sosoa-raraan noi baiana', tehuu ita taboi tatalolole si. Ma babati' fo ita mae' asa, ita tapoti tatalolole si. 24 Tehuu babati' fo ita ta mae' asa, ita ta tao si leo' bea boe'.
Tehuu Manetualain nabubua na basa babati' ara fo dadi reu' ao-ina' esa. Ana ator de babati' fo ita tae ta penting boe, ita taboi tatalolole si, 25 huu fo Ana ta nahii' ita ao-ina na fifika-fafae. Ana nau basa babati' ara, esa mete-relu esa. 26 Kalu babati' esa hapu susa, sona basa babati' ara rameda bela' a. Ma kalu esa sipo hada-horomata, sona basa si ramaho'o.
27 Leo' naa boe neu' emi. Emi sama leo' Kristus ao-ina katematua Na. Lahenda kamahere' ara esa' ko no' babatin neme Kristus ao-ina Na. 28 Huu fo nai lahenda kamahere' ara talada, Manetualain fee kuasa, ela tao nonoi-laka rupa'.
Masososan, Ana nadenu lahenda ruma reu ralala'o Ria hehelu-barataan.
Kaduan, Ana pake lahenda ruma dadi Ria mana nesi matan.
Katelun, Ana tao na lahenda ruma ranori-rafada ralela' la'e-neu' Ana.
Ana fee kuasa neu' lahenda ruma fo bisa tao tanda heran rupa', ela ratudu Ria marela-masa'an.
Ruma bali hapu kuasa ela puli lahenda kamahedis.
Ruma bali hapu babati-papala' ela tulu-fali lahenda.
Ruma bali hapu babati-papala' ela bisa urus lahenda ra fo roi-tao sama-sama no malole.
Ma Ana fee kuasa neu' lahenda ruma bali, ela ara bisa dedea pake dedea rupa'.c
29 Emi dudu'a-aafim leo bea'? Manetualain nadenu basa lahenda ra, fo reu tui-beka Ria hehelu Na, do? Ta'a. Ana tao na basa lahenda ra dadi Ria mana nesi matan, do? Ta'a. Ana tao na basa lahenda ra, ranori-rafada ralela', do? Ta'a. Ana fee kuasa neu' basa lahenda ra fo bisa tao tanda heran, do? Ta'a. 30 Ana fee kuasa neu' basa lahenda ra fo puli lahenda kamahedis, do? Ta'a. Ana tao na basa lahenda ra bisa dedea pake dedea rupa', do? Ta'a. Ana tao na basa lahenda bisa rafada dedea' sira sosoa-raraan, do? Ta'a.
31 Emi muste sadia fo sipo' ma pake babati-papala', manuu sosoa-raraa' bau-ina' soa-neu' lahenda dodou'.
Leo mae leo' naa, tehuu au nau atudu emi eno-dala malole ina' a.