2-3 Fai a ulu na, Manetualain ator mema', de mana nesi mata nara dui' la'e-neu' Tutui Malole nai Ria Susura Makamoi Na. Nai Susura' ria dale', Manetualain helu nau fee Ria Anan Yesus mai, fo dadi lahenda dae-bafo'. Ma besa' ia, Ria hehelu Na dadi, nana huu Yesus mai dadi lahenda dae-bafo', neme mane' Daud tititi-nonosin. 4 Tehuu Manetualain natudu buti nae, Yesus Kristus nana Ria Ana boki Na. Huu fo Yesus Dula-dale Na, tebe-tebe Malalao-malalafu' sama leo' Manetualain. Ma Manetualain pake kuasa Na, fo fee Yesus nasoda selu' neme mamate Na mai. Huu ria naa, ita bubulu' Manetualain Ana Na, ri' Yesus, ita Ramatuan fo ri' nanuu haak pareta ita.

5 Yesus natudu dale malole Na neu' au, huu fo Ana here na au dadi uu' Ria lahenda nadedenun, ela au tui-beka Ria hehelu na nai basa mamana' ain. Ana nau lahenda fo ta Yahudi boe ramahere Ni, ma rasoda tuka Ria hihii-nanaun. Au nau lahenda reme basa nusa' ara ramahere Kristus, ma rasoda tuka Ria hihii-nanaun.

6 Leo' naa boe neu' emi nai kota Roma. Emi meme lahenda nusa' dodou', nai mamana' dodou'. Yesus Kristus fo ri' teka-here emi a nae, “Mai leo! Maso' mai dadi meu' Au lahenda kara!” 7 Huu ria naa, au haitua susura' ia fee emi nai Roma, ma fee nafarerene' nae, Manetualain sue-lai emi. Ana hule emi ela dadi meu' Ria lahendan fo masoda lalao-lalafu'.

Au hule-haradoi fo Manetualain ita Aman, ma Yesus Kristus, ita Ramatuan, ratudu Sira dale malolen, ma fee emi masoda no tetu-tema', mole-dame, ma tesatei-tamadale'.

8 Nai au susurak ia, masososa na au hule makasi dodou' neu' Manetualain, nana huu Yesus Kristus noi-tao nai emi dale mara. Au hule makasi boe, nana huu lahenda fo leo rai mana pareta Roma a nusa na katema', ara beidea la'e-neu' emi mamahere Yesus.

9 Au hule-haradoi fee emi ta namaetun. Tebe! Manetualain ri' bubulu' hata fo au afadan ia, tebe. Ria boe bubulu' nae au oi-tao no ao masee', ela afada lahenda la'e-neu' Ana Na Tutui Malolen. 10 Au hule-haradoi, sona au hule leo ia': “Manetualain, au ta bubulu' eno na leo bea'. Tehuu kalu Manetualain nau, sona soi eno' fo au bisa uu dama tia-lai kara rai Roma.”

11 Au hule-haradoi leo' naa, huu fo au ahii' aan seli ita emi, fo au bisa bati fee emi kuasa neme Manetualain Dula-dale Na mai, ela emi dadi Manetualain lahendan fo ri' nanenete nahere. 12 Au maksud ka leo ia': kalu au dadi eti fo leo oo emi, au nau atetea emi dale mara, ela emi namahere ma bisa boe-boe nahere. Ma au nau emi matetea au dale ka boe.

13 Toranoo susue kara emin! Au ahii' emi bubulu' lai' dodou' au maksud ka nau uu dama emi nai Roma. Tehuu losa' besa' ia au bei ta dadi uu boe'. Kalu au dadi eti, au amahehena' lahenda dodou' bei ramahere tebe-tebe Kristus, sama leo' nai mamana feke' ara. No ria naa, au nonoi-tatao ki hapu buna-boa malole.^a

14-15 Leo mae leo' bea boe, ameda aan au muste tui-beka Manetualain Tutui Malole Na neu' basa lahenda ra. Leo mae ria lahenda fo pake dedea Yunani, lahenda dintiu' fo pake dedea feke', lahenda bau-ina', aana', lahenda mana sakola', do mana sakola taa'. Huu ria naa au sadia leo Roma uu dama emi.

16 Au ta mae' bai' boe' la'e-neu' Ramatua Yesus Tutui Malole na. Kalu lahenda namahere Manetualain, sona Tutui' ria nanuu kuasa, de po'i-tata na lahenda ria neme sala-sikon mai. Lahenda Yahudi ra bubulu' raulu' hihii-nanau' ia, besa' ko lahenda nusa feke' ara.^b 17 Tutui' ria boe natudu Manetualain enon, fo tao na lahenda masala' a dadi roo-tetu'. Basa sira bisa dadi, sadi lahenda ramahere Ni. Sama leo' mana dui' nai Manetualain Susura Makamoi Na nae,

18 Tehuu Manetualain nafada nae leo ia': Lahenda ruma ta tao dale' neu' Ana. Ma ruma tao hihii-nanau' tadalu rupa'. Tehuu Manetualain ta sipo' sira tataon ria. Nai lahenda ia ra dale nara, ara bubulu' bea ri' roo-tetu'. Leo mae leo' naa, tehuu ara tao raroo hihii-nanau' ta roo-tetu'. Ara fufudi-lele'o lahenda losa' lahenda sira boe ta bubulu' bea ri' matetu'. Huu ria naa, Manetualain naonda fee si huhuku' a neme lalai mai. 19-20 Lahenda ia ra ta hapu eno' ela rae sira ta bubulu' matetu', nana huu makaledo na ri' lahenda bisa bubulu' hihii-nananu' fo la'e-neu' Manetualain. Te Ria ri' natudu! Au maksud ka leo ia': mulai neme Ana adu na lalai no dae-ina' a losa' besa' ia, kalu lahenda nau bubulu' la'e-neu' Manetualain, ma Ria kuasa manaetu-manabasa taa Na, boe bisa! Leo mae ita ta tita Manetualain, tehuu ita lahenda dae-bafo' a bisa talela' Ana neme hata fo Ana adu a. Huu ria naa, au ae lahenda tadalu' sira ta hapu eno', fo bisa rasala'e ao nara rae, “Au ta bubulu' hata-hata esa la'e-neu' Manetualain boe'.”

21 De leo mae ara bubulu' la'e-neu' Manetualain, tehuu ara ta manaku Ni rae, “Ramatua' a nana, ita Manetualain!” Sira ta hule makasi neu' Ana boe'. Sira dudu'a-aafi nara kaco, losa' ara ta bubulu' roo-tetu' a ri' ubea'. Ara roi patararaa' a ma dodoo-tatai rupa' ara la'e-neu' Manetualain. Ma sira dale nara dadi maiu'.^d

22 Sira esa-esa' ko io aon nae, “Au, lahenda fo bubulu' hihii-nanau' dodou'!” Leo mae ara afi leo' naa, tehuu matetu na, sira pakanaa nara leo' apa. 23 Boe ma ara ta do'o-tabe Manetualain marela-masa'a, huu fo ara rae, “Ami ta parluu Manetualain rupa leo naa'!” Tehuu ara mulai do'o-tabe patung fo rupa-lolen leo' lahenda dae-bafo'. Ara do'o-tabe patung fo rupa-lolen leo' manupui', leo' banda feke', ma leo' meke ra. No ria naa, ara tipa heni Manetualain masoda', de katin neni' hata mana mate'!^e

24 Huu ria naa, Manetualain noi nataa' asa, ela ara tao tuka noi hihii-nanau mesa nara. Ana nataa' asa, ela ara tao tuka hihii-nanau' tadalu rupa', fo ri' raoka-rasamu rai sira dale nara. Losa' ara ta mae'. Boe ma ara tao makekeo-makakanu rupa' neu' ao-paa heheli nara, ma ara tao leo naa' neu' lahenda feke' a ao-paa na boe. 25 Nai sira dale na, bubulu' nanori-nafada matetu' la'e-neu' Manetualain, tehuu ara ta nau tao dale' neu. Sira dudu'a-aafi nara ralulutu', de ara afi rae, “Malole lena', ami tao rupa' ara losa tadadalu, huu fo ta hapu huhuku'!” Ara do'o-tabe neu' hata fo Manetualain adu-tao, tehuu ara ta nau do'o-tabe neu' Manetualain fo ri' adu-tao na basa hata-heto sira! Ara tao ao nara leo' lahenda malalao-malalafu', sekonaa te rou', isi' ta'a!

Matetu na ri', ita lahenda dae-bafo' a muste io-oa ma fee hada-horomata neu' Manetualain la'o naroo! Ria besa' ko naraa!

26 Huu no sira tadalun ria, de Manetualain foa ela si, fo ara tao makekeo-makakanu leo naa', tuka noi sira hihii-nanau mesan. Ara hohoke rupa' ara, ma ta mae' ralela'. Sao ina nara ta rahii' suku roo' sao nara, tehuu rahii' hata fo ta naraa. Huu fo ina' suku noo' ina'! 27 Tou' ara boe leo naa'! Ara ta rahii' suku roo' sao nara, tehuu suku roo' tou'! Ta mae' bai' boe'! Huu ria naa, naraa ara hapu huhuku'! Huu fo ara heo doo' a reme eno matetu' a mai.

28 Ara afi rae, “Malole lena', boso' tao dale' neu' Manetualain.” Huu ria naa, Manetualain foa ela si, fo ara tao tuka noi sira hihii-nanau mesan! De ara afi noi tadalu' ara! Boe ma ara tao hihii-nanau' ta malole!

29 Soda nara henu' no tadalu rupa' ara. Ara ta tao malole, tehuu tao noi tadalu'. Ara tendetuu lahenda hata-heton. Ara rapeda dale'. Sosoa nara si' namanasa' a. Ara raisa lahenda. Ara rahii' rareresi' kokosen. Ara rapuputa'. Ara tipu-dai. Ara ratui dedea. 30 Ara ramumulu-ramamae' lahenda feke' nade na. Ete' ao nara ro Manetualain. Manori taa'. Ara ta hika-hada' neu' lahenda. Ara io ao nara. Ara saka dudu'a-aafi tadalu rupa' ara. Ara ralena laka ina-ama ra. 31 Ara ta ralela' roo-tetu' a ri' ubea'. Ara ralena laka selu' neu' sira hehelu nara, losa' lahenda ta bisa ramahere si. Ara ta sue-lai lahenda. Ara ta ranuu dale kasian bai' boe' soa-neu' lahenda.

32 Ara bubulu' Manetualain atoran fo nae, lahenda fo tao tadalu rupa leo naa' ara, naraa hapu huhuku mamates. Leo mae ara bubulu' atoran ria, tehuu ara bei tao tadalu taohiro-taohari'. Ta noi leo naa' a, tehuu sira oda' duduku-papau' lahenda feke', ela ara tao tadalu leo naa' boe. Talalu ria so!