Ramatua Yesus nasoda selu'!
20
Fai fo ri' Mamaso' ria fai masososa na, bei maiuana', te Maria neme koro' Magdala leo Yesus rates Na neu. Losa naa, te ana nita batu bau-ina' fo ara tatanan neu' rates ria, nanaeso heni' neme mamana na mai so. 2 Boe ma ana nalai fali selu' leo Simon Petrus neu, ma au, Yesus ana mana tuka dea susue Na, ana nafada nae, “Ara o'o reni ita Ramatua na neme Ria rates na mai so! Ami ta bubulu' ara tao Ni nai bea!” 3 Boe ma au oo Petrus malai leo rates ria meu. 4 Ami malai sama-sama, tehuu au alai seli ni, de au losa aulu' rates a. 5 Tehuu au ta maso' dale' uu. Au oi titiro' a leo dale' uu. Au ita tema' balanau fo potin neu' Yesus popora Na a, nai naa.
6 Tehuu Petrus losa, boe ma ana maso' naroo leo rates dale' neu. Ana nita tema' balanau' ria nai naa boe. 7 Ana nita tema' esa sama leo' lesu ri' potin neu' Yesus laka Na. Tehuu tema' ria mana di'u', ma doo' a bai' neme tema' balanau' ria. 8 Basa besa' ko au fo ri' losa aulu' rates a, maso' leo dale' uu. Au ita basa-basan, boe ma amahere maulu na Yesus dedea nae, neu' ko Ana nasoda selu' neme mamate Na mai. 9 Nana huu ami, Ria ana mana tuka dean, bei ta bubulu' Manetualain Susura Makamoi Na isi-liin fo ri' mana dui' nae, Kristus muste nasoda selu' neme mamate Na mai. 10 Boe ma ami dua fali.
Ramatua Yesus natudu ao-ina Na neu' Maria neme koro' Magdala
11 Tehuu Maria bei napadei nanenea' rates ria. Ana dola naroo. Ana dola ma titiro leo rates ria dale' neu. 12 Ana nita Manetualain eila'o-limalopen dua rai naa. Ara pake papake fula'. Dua si ratuu' rai mamana' fo ri' usele' a rapeu' Yesus popora Na. Esa natuu' nai mamana laka' a. Esa bali natuu' nai mamana ei' a. 13 Ara ratane ni rae, “Ubea' taon, de susi dola?”
Ana nataa si nae, “Au dola nana huu ara o'o reni au Ramatua ka popora Na so. Ma au ta bubulu' ara peda Ni nai bea?” 14 Ana dedea basa nae leo' naa, boe ma ana lipe dea na. Ana nita lahenda esa napadei nai naa, tehuu ta bubulu' Lahenda ria nana Yesus.
15 Yesus natane ni nae, “Ubea' taon, de susi dola? Susi saka bea?”
Maria naendobuko lahenda manea oka' a ria. Boe ma ana lele'o Ni nae, “Papa. Kalu papa ri' o'o muni Ria popora Na de pedan nai bea, sona tolong mafada au dei. Ela au o'o uni Ni leo mamana feke' neu, fo atoi atalololen!”
16 Yesus naloo ni nae, “Maria.”
Ana lipe aon nasare na Yesus, boe ma nae, “Raboni!” (Nai dedea Aram, sosoa na nae, “Au Mesen ka!”)
17 Yesus nafada ni nae, “Boso' tai la'e Au dei, huu fo Au bei ta hene-ae leo Papa Ka nai nusatetu-ikutema' a uu. Tehuu susi muu fo mafada Au toranoo kara mae, ‘Au saka' hene-ae leo Papa Ka uu. Ria boe, emi Papa ma. Ria nana Au Manetualain Ka. De Ria boe emi Manetualain ma.’”
18 Maria neme Magdala neu tui Yesus ana mana tuka dea nara nae, “Au aneta oo ita Ramatuan Yesus so!” Boe ma ana nafada si Yesus hehelu Na.
Ramatua Yesus natudu ao-ina Na neu' ana mana tuka dea nara
19 Fai fo ri' la'e Mamaso' ria, fai masososa na. Ledo a besa' ko tena. Yesus ana mana tuka dea nara rabua ao nara. Ara koe raisa' uma a lelesu nara, nana huu ara bii' lahenda Yahudi ra malaka nara. Kekeneu te, Yesus napadei nai sira talada ma nae, “Soda-mole'!” 20 Yesus dedea basa nae leo' naa, boe ma Ana natudu hina' fo rai Ria lima nara, ma poo dui Na. Ana mana tuka dea ra rita sira Ramatua na, de ramaho'o raan seli. 21 Yesus nafada si nae, “Ela emi tetu-tema' ma mole-dame. Mafarerene', Au Papa Ka nadenu Au leo bea', sona Au adenu emi leo naa' boe.” 22 Ana dedea basa nae leo' naa, boe ma Ana nanenea' no si, de fuu Ria ani hahae Na neu' sira esa-esa. Ma nafada nae, “Au fee emi Manetualain Dula-dale Malalao-malalafu Na. Sipo maan leo. 23 Kalu emi fee ampon neu' lahenda sala-sikon, sona lahenda ria hapu ampon, huu fo Manetualain sae-safe heni sala-siko' sira. Tehuu kalu emi ta fee ampon neu' lahenda sala-sikon, sona Manetualain boe ta sae-safe heni sala-siko' ria.”a
Ramatua Yesus no Tomas
24 Yesus ana mana tuka dea kasanahulu dua nara esa, nade Tomas fo ri' ara hule rae, ‘ana kadua'’. Fai fo Yesus mai natudu ao-ina Na neu' asa, Tomas ta sama-sama no ana mana tuka dea feke' ara. 25 Huu ria naa, nonoo nara tui ni rae, “Ami maneta moo ita Ramatua na so,” tehuu ana nataa si nae, “Leo ia'. Au muste ita ma duku lima u'u ka neu' hina paku a nai Ria lima nara, ma neu' hina' a nai poo dui Na dei. Huu fo kalu au bei ta tao leo naa', sona au ta amahere ae, Ana nasoda selu'.”
26 Basa mamaso' esa selu', boe ma Yesus ana mana tuka dea nara sama-sama ro Tomas rai uma esa dale'. Leo mae lelesu ra mana koe', tehuu Yesus maso' neu napadei nai sira basa talada. Ana nafada si nae, “Soda-mole'!” 27 Boe ma Ana dedea no Tomas nae, “Loo' lima ma mai fo mita ma duku lima u'u ma neu' hina paku a nai Au lima Kara, ma neu' hina' nai Au poo dui Ka. Ela mamahere mae, Au asoda selu'! Tu'u heni o namahere taam ria.”
28 Tomas nataa Ni nae, “Papa! Besa' ia au amahere tebe-tebe! Papa nana, au Ramatua ka, ma au Manetualain ka!”
29 Yesus nafada ni nae, “Tomas! O mamahere Au asoda selu', nana huu o mita mata' Au. Maua-manale' neu' lahenda fo ta rita Au, tehuu ara ramahere.”
Susura' ia maksud na
30 Yesus tao tanda heran feke' ara, fo ri' au ta dui' nai susura' ia dale'. Ria ana mana tuka dea nara rita mata' tanda heran sira. 31 Tehuu hihii-nanau' fo au dui' nai susura' ia dale', au dui' ela emi mamahere,
Yesus nana Kristus fo ri' Manetualain helu mema' nau fee Ni mai.
Yesus boe, Manetualain Ana Na.
Huu no emi mamahere Ni, ma dadi meu' Ria lahendan, de emi hapu soda' matetu' mana basa taa'.