Ramatua Yesus natudu ao-ina Na neu' Ria ana mana tuka dean lahenda hitu
21
Basa fai' hida boe ma Yesus natudu selu' Ria ao-ina Na nai dano Tiberias a suu na. Tutui na leo ia': 2 Fai ria, Yesus ana mana tuka dean lahenda hitu rabua ao nara. Sira nana si':Simon Petrus,
Tomas, fo ri' hule rae, ‘ana kadua'’,
Natanel, neme koro Kana nai propensi Galilea,
Sabadeus anan dua si,
ma Yesus ana mana tuka dea feken lahenda dua.
3 Simon Petrus nafada ria nonoo nara nae, “Au saka' uu puka.”
Ara rataa ni rae, “Hoo! Ami meu boe.” Boe ma ara leo dano a suu na reu. Ara sa'e ofa' fo reu saka ika'. Tehuu hatun ria ta rala hata esa boe'.a
4 Balahaa' balahaa anan, boe ma Yesus napadei nai dano a suu na. Tehuu ana mana tuka dea nara ta bubulu' rae Ria nana, Yesus. 5 Ana naloo si nae, “A'a kara! Emi mala ika', do?”
Ara rataa rae, “Ta'a maroroo'! Ami ta mala hata esa boe'.”
6 Ana nafada si nae, “Po'i soba puka' a neu' ofa' a poon esa bali. Neu' ko emi hapu.”
Boe ma ara tao tukan, de ara hapu ika' talalu dodou'. Huu ria naa, ara ta bisa hela rala puka' a leo ofa' dale' neu.b
7 Au nai naa boe. Au nana Yesus ana mana tuka dea susue Na. Boe ma au afada Petrus ae, “Ria nana, ita Ramatua na!”
Simon Petrus namanene, boe ma ana olu badu na neu, de ana boku' dano dale' neu fo ane leo mada' lain. 8 Ria nonoo nara resi' bui', sefe reni ofa' a fali leo mada' lain reu, ma hela puka' fo ri' henu' noo ika'. Huu fo ara ta doo' a roo mada' lain, bate meter natun esa.
9 Ara losa mada' lain, te ara rita ai-aa' a folo'a'an nai naa. Ika' nai ai-aa' lain. Ma roti mana sadia' nai naa boe. 10 Yesus nafada si nae, “Bisinaa' a emi besa' ko mala ika' ara a, meni bai' mai dei.”
11 Boe ma Simon Petrus ae leo ofa' neu, de ana hela puka' a leo mada' lain. Puka' ria henu' no ika bau-ina'. Dedesi na boa' natun esa lima hulu telu. Leo mae dedesi na ri naa', tehuu puka' ria ta sii henin boe'.
12 Yesus naloo si nae, “Mai, mia leo!”
Huu fo ara bubulu' rae, Ria nana sira Ramatua na, de ara ta raparani ratane rae, “A'a nana, bea?” 13 Boe ma Yesus hai na roti ma ika', de fee si.
14 Ria nana, Yesus natudu ao-ina Na kalai' telun neu' ana mana tuka dea nara, fai fo Ana nasoda selu' neme mamate Na mai.
Ramatua Yesus dedea no Petrus
15 Ara raa basa boe ma, Yesus natane Simon Petrus nae, “Simon, Yohanis anan. Leo' bea? O sue-lai Au lena heni nonoo mara sue-lai Au, do?”
Ana nataa Ni nae, “Tebe Ramatua'! Ramatua' bubulu', au sue-lai Ramatua' a.”
Yesus helu ni nae, “Kalu leo' naa, sona foo-lolo ma maboi-masamao matalolole Au bibi-lopo kara.”
16 Yesus natane selu' ana nae, “Simon, Yohanis anan. Leo' bea? O sue-lai Au, do?”
Ana nataa Ni nae, “Tebe Ramatua'! Ramatua' bubulu' au sue-lai Ramatua' a.”
Yesus helu ni nae, “Kalu leo' naa, sona maboi-masamao matalolole Au bibi-lopo Kara.”
17 Yesus natane selu' ana nae, “Simon, Yohanis anan. Leo' bea? O nana Au tia-lai Ki, do?”
Boe ma Petrus dale hedi, nana huu Yesus natane lai' telu nae, “O sue-lai Au, do?” De ana nataa Ni nae, “Ramatua' bubulu' basa hihii-nanau' ara. De Ramatua' bubulu', au nana Ramatua' a tia-laim.”
Yesus helu ni nae, “Kalu leo' naa, sona foo-lolo ma maboi-masamao matalolole Au bibi-lopo Kara. 18 O mala Au dedea Ka sosoa na, hete? Au saka' afada leo ia': maulu na fai fo o bei muri-ana', o pake aom badu ma, no tali-ee erem, boe ma sudi mae bea' muu a, tuka o hihii-nanaum. Tehuu fai bea ma mamalasi, neu' ko o moi maroo' lima mara de lahenda feke' heke si pake o tali-ee ma. Boe ma roo o leo mamana' fo ta mahii' muu.” 19 (Yesus dedea nae leo' naa, ela nafada Petrus la'e-neu' hata fo neu' ko dadi nai ria ao-ina na. Huu fo neu' ko Petrus mamate na, natudu Manetualain marela-masa'an.)c
Boe ma Yesus nafada Petrus nae, “Mai dadi muu' Au lahenda Ki leo!”
Ramatua Yesus ana mana tuka dea susue Na
20 Petrus lipe dea na, boe ma ana nita au tuka sira dua dean. Au nana Yesus ana mana tuka dea susue Na. Au ri' atuu' nai Yesus boboa Na, fai fo ami matuu' mia feta Paska. Au ri' atane Ni ae, “Ramatua'! Bea ri' neu' ko se'o heni Ramatua' a?”d 21 Petrus nita au, boe ma ana natane Yesus nae, “Ramatua'! Bisinaa' a Ramatua' a dedea la'e-neu' au. Tehuu ria sona leo' bea?”
22 Yesus nafada Petrus nae, “Kalu Au nau ana nahani nai ia losa' Au atafali mai, o urusan ma ta ria. Penting na, o muste mafarene hata fo bisinaa' a Au helu o a, ri': mai dadi muu' Au lahenda Ki leo.”
23 Huu no Yesus dedea nae leo' naa, de Ria ana mana tuka dea feke nara mulai ratui' rae, “Yohanis, ta mate ni fa.” Sekonaa te, Yesus ta dedea nae leo' naa. Ana dedea a, nana ri: “Kalu Au nau ana nahani nai ia losa' Au atafali mai, o urusan ma ta ria.”
Yohanis dui' nate'e ria susura na
24 Ana mana tuka dea fo ri' Yesus nafada a, nana ri' au, Yohanis. Au ri' tui emi basa hihii-nanau' ia ra. Au ri' ita mata'. Ma au ri' dui' basa-basan. Boe ma ita bubulu', hata fo au afadan neu' emi a, nana tebe.
25 Ma bei hapu hihii-nanau' feke' dodou' fo ri' Yesus noi-taos. Kalu lahenda soba nau dui' basa-basan, mulai neme Yesus nalala'o Ria nonoi-tataon losa' basa, sona au ae bate dae-bafo' esa katema' boe, ta bisa sipo na basa susura' sira.
Noi ri naa' so,
Yohanis