Ta hapu eno feke' fo malole moo Ama' a; nesi' noi Yesus
14
Yesus dedea nae, “Emi boso' teisusa-dalehedi. Mamahere Manetualain. Ma mamahere Au boe. 2 Nai Au Papa Ka mamana leleo-naparasan, hapu kama dodou'. Kalu mamana' ta dai, sona tantu Au afada mema' emi. Besa' ia, Au saka' uu sadia fee emi mamana' nai naa. 3 Kalu Au uu, fo sadia basa emi mamana ma, neu' ko Au atafali mai ela emi tuka moo Au. No ria naa, Au nai bea, sona emi nai naa boe. 4 Nana huu emi bubulu' eno' leo mamana' fo Au uu a.”5 Tehuu Tomas natane Ni nae, “Ramatua'! Ami ta bubulu' Ramatua' a saka' leo bea' muu. Tao leo' bea, de ami bisa bubulu' eno' leo naa' neu?”
6 Yesus nataa ni nae, “Au nana eno' leo Manetualain neu, Au roo-tetu' ma Au ri' fee lahenda soda matetu' a. Ta hapu eno feke' fo lahenda nesi' ana leo Papa Ka neu nai nusatetu-ikutema' a, nesi' noi Au mesa' Ka. 7 Uni' ko leo emi malela' matetu' Au, sona emi malela' Au Papa Ka boe. De mulai neme besa' ia, emi malela' Ana, ma mita Ni boe.”
8 Filipus hule Ni nae, “Ramatua'! Matudu fee ami Papa Ma dei! Noi ria boe dai so.”
9 Yesus nafada ni nae, “Filipus. Au sama-sama oo emi doo-naru basa ia, tehuu emi bei ta malela' matetu' Au, do? Lahenda bea nita Au, sama leo' ana nita Au Papa Ka ria so boe. Boe ma ubea' taon, de bisinaa' a o hule mae, ‘Matudu fee ami Papa Ma’ bali? 10 Leo' bea? Au ae, Au abua-aesa oo Ama' a, ma Ama' a boe nabua-naesa no Au, sona o mamahere do, ta'a? Dedea-nafada' fo Au dedean soa-neu' emi a, ta raoka-rasamu reme Au mai, tehuu raoka-rasamu reme Au Papa Ka mai. Ma Ana pake Au fo oi-tao aroo Ria nonoi-tataon. 11 Mamahere Au, fai fo Au ae, Au abua-aesa ahere oo Papa Ka, ma Ria boe nabua-naesa nahere no Au. Ma kalu emi bei ta bubulu' Au nanori-nafada Ki, sona mamahere Au leo, huu fo emi mita basa hihii-nanau' fo Au tao a. 12 Tebe-tebe, Au afada! Lahenda bea namahere Au, neu' ko ria boe tao hihii-nanau' sama leo' Au tao a. Tehuu no Au leo Papa Ka uu, de basa hata fo lahenda ria tao a, neu' ko kahere' lena neme Au tao. 13 Emi fo ri' mabua-maesa moo Au, manuu haak meni Au nade Ka. De kalu emi hule-haradoi fo hule sudi ubea' a, meni Au nade Ka,a neu' ko Au taon soa-neu' emi. No ria naa, Au io-oa Papa Ka, ela basa lahenda ra bubulu'. 14 Au afada selu' bali: emi hule-haradoi, hule sudi ubea', meni Au nade Ka, neu' ko Au taon soa-neu' emi.”
Ramatua Yesus helu saka' fee Manetualain Dula-dale Na mai
15 Yesus dedea tamba nae, “Kalu emi sue-lai Au, sona emi tao tuka Au pareta kara. 16-17 Kalu Au ta sama-sama oo emi, sona neu' ko Au hule Papa Ka, fo Ana fee emi Manalea-mananore esa, ela natudu emi eno'. Ria nana Manetualain Dula-dalen fo ri' nanori-nafada emi hata roo-tetu'. Lahenda ruma rai dae-bafo' ia ta sipo' Ana, nana huu ara ta rita Ni, ma ta ralela' Ana. Tehuu emi malela' Ana, nana huu Ria nabua-naesa no emi. Neu' ko Ana leo-naparasa nai emi dale mara. Ma Ana sama-sama no emi losa doo na neu.
18 No ria naa, Au ta foa ela emi sama leo' ise-ana maa'. Tehuu mafarerene', te neu' ko Au abua selu' oo emi. 19 Noi hatemata', fo lahenda feke' nai dae-bafo' ia ta rita Au so'. Tehuu neu' ko emi mita Au. Nana huu Au asoda selu', ma emi boe hapu soda' matetu' mana basa taa'. 20 Ma kalu Au asoda selu', sona neu' ko emi bubulu' mae, Au abua-aesa oo Papa Ka; emi mabua-maesa moo Au; ma Au boe abua-aesa oo emi.
21 Lahenda bea siplo', ma tao tuka Au pareta kara, sona ria ri' sue-lai Au. Ma Au Papa Ka boe sue-lai lahenda fo sue-lai Au. Au boe sue-lai ni, ma atudu ao-ina Ka neu' ana.”
22 Nai naa lahenda esa, nade Yudas. Ria ta Yudas Iskariot. Ana namanene Yesus dedea Na, boe ma natane Ni nae, “Ramatual a nau matudu ao-ina Ma neu' ami. Tehuu ubea' taon, de Ramatua' a ta matudu ao-ina Ma neu' lahenda feke' rai dae-bafo' ia?”
23 Yesus nataa nae, “Leo ia'. Lahenda fo sue-lai Au, neu' ko ana tao tuka Au Hara-dasi Ki. Au Papa Ka boe sue-lai ni. Boe ma Au oo Papa Ka masoda dale' esa moo ni. 24 Tehuu lahenda bea ta sue-lai Au, ana ta tao tuka Au Hara-dasi Ki. Basa hihii-nanau' fo emi mamanene neme Au mai a, ta raoka-rasamu reme Au mai, tehuu raoka-rasamu reme Au Papa Ka mai fo ri' nadenu Au.
25 Besa' ia Au bei sama-sama oo emi. Huu ria naa, Au afada mema' hihii-nanau' ia ra. 26 Tehuu Au Papa Ka saka' fee Manalea-mananore esa mai, ri' Ria Dula-dale Malalao-malalafu Na. Dula-dale' ria, kati Au nai dae-bafo' ia. Ria nonoi-laka na ri': nanori-nafada emi basa hihii-nanau' ara, ma nafarerene' fee emi basa hihii-nanau', fo ri' Au parnaa afadan neu' emi.
27 Kalu Au uu, sona neu' ko Au tao a emi bisa masoda mole-dame, ma tesatei-tamadale'. Noi Au ri' bisa fee tesatei-tamadale' rupa leo naa'. Basa-basan rai dae-bafo' ia, ta bisa fee emi tesatei-tamadale' leo' naa. De boso' emi teisusa-dalehedi, ma bii-mamata'u. 28 Emi parnaa mamanene Au afada emi ae, ‘Au foa ela emi, boe ma neu' ko Au atafali mai.’ Boso' dale hedi. Kalu emi sue-lai Au, sona emi mamaho'o, nana huu Au leo Papa Ka uu. Au Papa Ka kahere' lena neme Au mai. 29 Mafarerene', te Au afada mema' emi. No ria naa, kalu hihii-nanau' ia ra dadi, sona neu' ko emi bisa mamahere Au. 30 Bei noi hatemata', te Au ta dedea oo emi so'. Huu fo nitu ra malaka na mai. Ana homu pareta nai dae-bafo' ia, tehuu ana ta kuasa Au. 31 Leo mae ana mai, tehuu Au tao tuka Papa Ka pareta Na la'o naroo. Ria nana natudu neu' basa lahenda nai dae-bafo' ia nae, Au sue-lai Papa Ka.
Mai teu leo!”