2 Tehuu bea maso' tuka lelesu a, sona bibi-lopo ra mana foo na ri naa'. 3 Manea lelesu a nalela' mana foo ria, de soi feen lelesu a. Bibi-lopo ra boe ralela' mana foo ria haraoe na. Boe ma ana naloo sira esa-esa naden, fo napipipi-nalala'o noo si leo dea' reu. 4 Kalu noo si kalua, sona ana naulu'. Bibi-lopo ra tuka-tuka dea, nana huu ara ralela' haraoe na. 5 Tehuu lahenda fo ri' bibi-lopo ra ta ralela' ana, sona ara ta tuka ni. Ralai heni ao nara, nana huu ara ta ralela' lahenda mana mai a haraoe na.”

6 Leo mae Yesus tui fee si dedea nasasama' ria, tehuu ara ta bubulu' Ria maksud Na.

7 Boe ma Yesus nafada tamba selu' asa nae, “Tebe-tebe Au afada emi. Au sama leo' lelesu nai bibi-lopo ra oka na. 8 Basa lahenda fo mai raulu' Au, sira sama leo' na'o. Leo mae lahenda sira raloo, tehuu bibi-lopo ra ta ramanene si. 9 Au sama leo' lelesu. Kalu bea maso' nesi' Au, Manetualain po'i-tata naan neme sala-sikon mai. Sama leo' Au dadi lelesu soa-neu' ana, de ria maso' nesi' Au fo leo Manetualain mamana Na neu. Ma lahenda bea maso' nesi' Au, sona sudi nae bea' neu, ma hapu nanaa-nininu matetu'.^a 10 Na'o ra mai ramana'o, raisa ma tao noi kaco fo ralutu lahenda masodan. Tehuu Au mai uni soda' malole, huu fo Au mai ela lahenda bisa rasoda noo tesatei-tamadale' ma roo-tetu'.

11 Au sama leo' mana foo malole esa. Mana foo malole a sadia fee heni ao-ina na losa' mate, ela bibi-lopo nara bisa rasoda. 12 Tehuu lahenda mana seba' fo ri' ta mana foo ma bibi-lopo ra ta ramatuan, kalu ana nita busa fui' esa mai, sona nalai ela bibi-lopo ra. Boe ma busa fui' ria aa na bibi-lopo ra, de bibi-lopo feke' ara ralai tapasara. 13 Ana nalai nana huu ria lahenda mana noi saka noi doi-tali. Ana ta nafaduli bibi-lopo sira fo nanea natalolole si.

14 Tebe! Au sama leo' mana foo malole. Au alela' bibi-lopo kara. Ma sira boe ralela' Au. 15 Sama leo' Au Papa Ka nai nusatetu-ikutema' a nalela' Au, ma Au alela' Ana. Au sadia fee heni ao-ina Ka losa mate, ela Au bibi-lopo kara bisa rasoda.^b 16 Au anuu bibi-lopo feke', fo bei ta rabua roo Au bibi-lopo Ki fo rai ia. Au muste uu abubua aa si boe. Kalu ara ramanene Au haraoe Ka, sona ara ralela' tuti' a. Boe ma ara mai rabua dadi reu' bubua' esa, ma ranuu mana foo esa.

17 Au Papa Ka nai nusatetu-ikutema' a sue-lai Au. Huu fo Au sadia fee heni ao-ina Ka losa' mate, ela Au bisa asoda selu'. 18 Ta hapu esa naseti Au fo mate, tehuu Au sadia fee heni ao-ina Ka losa' mate. Au anuu haak fee heni ao-ina Ka. Au anuu haak hai fali' ana. Pareta ia, Au sipon neme Papa Ka nai nusatetu-ikutema' a.”

19 Huu no lahenda Yahudi ra ramanene Yesus dedea nae leo' naa, boe ma ara rareresi' selu' bali. 20 Neme sira mai kadodou na rae, “Lahenda kamulu' ia! Ma Ria boe nitu heke'! Ubea' taon, de emi mamanene Ni?”

21 Tehuu ruma bali rae, “Lahenda kamulu' a dedea na ta leo ia', hete? Dedea-nafada leo naa' a, ta parnaa kalua neme nitu a bafa na mai! Ma nitu a boe ta bisa tao na lahenda poke' a nita dae, hete?”

22 Tepo' ria, lahenda Yahudi ra saka' tao sira agama na fai malolen esa. Fai malole ria la'e fai masufu'. Nai feta ria, lahenda Yahudi ra rafarene, sira bei-ba'i nara tao malalao-malalafu' Manetualain Uma Mamaso Yahudi Ina Na nai kota Yerusalem ma tabis selu' ana, ela ara maso' reu' naa. Uma Mamaso Yahudi Ina ria nakekeo-nakakanu nai Manetualain matan, nana huu lahenda dea a soko-taku sira hata sosoko nara rai naa.^c 23 Yesus la'o-la'o nai Uma Mamaso Yahudi Ina a kintal na dale', nai mamana' fo ri' hule rae, ‘Teras Mane' Soleman’. 24 Boe ma lahenda Yahudi ra malaka nara mai eo raa Ni, ara rae, “Ami muste mahani maroo losa fai hida', besa' ko ami bisa bubulu'? Kalu Papa nana Kristus, sona mafada neu' loa na dei.”

25 Yesus nataa si nae, “Au afada mema' so, tehuu emi ta mamahere. Sekonaa te basa hihii-nanau' fo Au tao a, basa-basan tuka noi Au Papa Ka pareta Na. Hihii-nanau' sira si' ratudu rae, Au nana bea. 26 Tehuu emi ta mamahere Au, nana huu Au bibi-lopo Ki ta emi. 27 Au bibi-lopo matetu kara, sona ralela' Au haraoe Ka. Ara tuka Au, ma Au alela' asa boe. 28 Au fee si soda' matetu' mana basa taa', ma sira ta bika-bati reme Manetualain mai. Ta hapu esa bisa nalea naa si reme Au mai boe'. 29 Au Papa Ka nai nusatetu-ikutema' a, ri' fee si leo Au mai. Ria kahere' lena neme basa-basan mai. Huu ria naa, ta hapu esa bisa nalea naa si reme Ria lima Na mai. 30 Huu fo Au Papa Ka no Au, nana esa' a.”

31 Lahenda Yahudi ra malaka nara ramanene leo' naa, boe ma ara here batu lai' esa selu' bali, fo nau pia ramate Yesus. 32 Boe ma Yesus nafada si nae, “Au atudu hihii-nanau' malole dodou' neme Papa Ka mai. Emi pake hihii-nanau' malole ubea', de nau pia maisa Au?”

33 Ara rataa rae, “Ami pia o nana, ta huu o tao hihii-nanau' malole a. Tehuu ami nau pia o, nana huu o mamumulu-mamamae' Manetualain! O noi lahenda dae-bafo', tehuu o so'u-fua aom sama leo' Manetualain! Talalu leon!”^d

34 Yesus nataa si nae, “Leo' bea? Nai Atoran Agama fo emi homu a mana dui' nae, Manetualain dedea no malaka ra nae, ‘Au afada mema' ae, emi nana ramatua'’.^e 35 Ita bubulu', basa-basan mana dui' nai Manetualain Susura Makamoi Na dale' nana la'e, ma ta moi-mosa. Manetualain hule lahenda sira nae, ‘ramatua'’. 36 Tao leo' bea, de emi bisa mae Au amumulu-amamae' Manetualain, nana huu Au ae, Manetualain Anan Au? Ria ta la'e! Ama' nai nusatetu-ikutema' a tudu na Au, ma Ria ri' nadenu Au leo dae-bafo' a mai. 37 Leo ia'. Kalu Au ta alala'o Papa Ka nonoi-tataon, sona emi boso' mamahere Au. 38 Tehuu Au alala'o aroo Ria nonoi-tataon. De leo mae emi ta nau mamahere Au, tehuu nau do ta nau, emi muste sipo' tanda heran fo Au tao a. No ria naa, emi boe bisa bubulu', Au Papa Ka nabua-naesa no Au. Ma Au abua-aesa oo Ni.”

39 Ara soba nau hopu Ni selu', tehuu Ana lui na aon.

40 Boe ma Yesus fali selu' leo lee Yarden seri' neu, nai mamana' fo maulu na Yohanis sarani masososa lahenda. Ana leo lalai neu' naa.^f 41 Lahenda dodou' mai saka Ni. Ara dedea rae, “Yohanis ta tao tanda heran esa boe'. Tehuu basa-basan fo ana dedea la'e-neu' Yesus, nana tebe!” 42 Boe ma lahenda dodou' rai naa, ramahere Ni.