Ramatua Yesus no fadi nara
7
Boe ma, Yesus asa la'o rule-feo propensi Galilea. Ana ta nau neu la'o rule-feo propensi Yudea, nana huu lahenda Yahudi ra malaka nara nau raisa Ni. 2 Tepo' ria, lahenda Yahudi ra fai malolen fo ri' hule rae, “Feta Laa'” nananea' so.a 3 Boe ma Yesus fadi nara laku Ni rae, “Malole lena' A'a leo Yudea muu. Ela lahenda fo tuka A'a nai naa boe, bisa rita basa hihii-nanau' fo A'a tao a. 4 Kalu lahenda esa nau lahenda dodou' rita ria kahere na, sona ana ta bole tao nafufuni'. Huu no A'a tao tanda heran rupa', de kalu basa lahenda bisa rita hata fo A'a tao a, sona malole lena bali!” 5 Ria fadi nara dedea rae leo' naa, nana huu sira boe ta ramahere Ni fa.6 Boe ma Yesus nataa si nae, “Leo ia'. Besa' ia, bei ta losa Au ledo-fai Ki. Tehuu kalu emi nau meu, sona ledo-fai' bea boe bisa. 7 Lahenda nai dae-bafo' ia, ta ete' ao nara ro emi. Tehuu ara ete' ao nara raan seli ro Au, nana huu Au afada sira nonoi-tatao tadalu nara neu' loan. Huu fo sira dale nara tadalu'. 8 Ita fai malole agama na nananea' so. Ela noi emi ri' leo Yerusalem meu. Au bei ta nau uu, huu fo bei ta naraa la'e ledo-fain.” 9 Ana dedea basa nae leo' naa, boe ma Ana leo nahani' propensi Galilea.
Ramatua Yesus tuka fai malole agama Yahudi
10 Yesus fadi nara raulu' leo Yerusalem reu, ela tuka lahenda Yahudi ra fai malolen nai naa. Basa besa' ko Ana neu nesi' bui', tehuu la'o nafufuni', ela lahenda boso' bubulu'. 11 Feta fai malole ria, nai Yerusalem a, lahenda Yahudi ra malaka nara rasaka' Ana. Ara ratane rae, “Lahenda ria nai bea?”
12 Lahenda dodou' beiboto la'e-neu' Ana. Ruma rae, “Ria, lahenda malole.”
Ruma bali rae, “Ta'a! Ria manaedi-manafule', nahii' tipu nala' lahenda dodou'.” 13 Tehuu ta hapu esa naparani dedea neu' loan la'e-neu' Yesus, huu fo ara bii' malaka ra.
14 Naraa la'e fai malole ria bei feta losa talada, boe ma Yesus maso' leo Uma Mamaso Yahudi Ina dale' neu, de Ana mulai nanori-nafada nai naa. 15 Lahenda Yahudi ra malaka nara heran rae, “Lahenda ia ta parnaa nanori dodou' sama leo' ita. Tehuu ubea' taon, de Ria nalela' hihii-nanau' dodou' leo' ia?”
16 Yesus nafada si nae, “Nenene! Basa hihii-nanau' fo Au anori-afada a, ta neme Au mai fa, tehuu neme Ria fo ri' nadenu Au. 17 Lahenda bea tebe-tebe nau tao tuka Manetualain hihii-nanaun, neu' ko ana bubulu' Au nanori-nafada Ki, nana tebe-tebe neme Manetualain mai, do neme noi Au mai. 18 Lahenda bea dedea pake noi ria kuasa mesa na, sona ana saka noi nade' a. Tehuu lahenda bea so'u-fua nade malole neme lahenda fo nadenu ni, tantu ana tui roos. Ma ta napuputa'. 19 Ba'i Musa fee emi Manetualain Atoran nara. Tehuu emi ta nau tao tuka si. Ubea' taon, de emi saka eno' fo nau maisa Au?”
20 Lahenda kakabaina' sira ratane rae, “O dedea mae ubea' ia? Bate nitu ra heke ra O ia, do? Bea ri' saka eno' fo naisa O?”
21 Yesus nataa si nae, “Leo ia'. Au besa' ko tao tanda heran esa nai fai mamaso lahenda Yahudi, tehuu emi bolii mara puru'. 22 Tehuu lai'esa-lai'esa nai ria, emi moi nonoi' nai fai mamaso lahenda Yahudi boe, leo-leo': ba'i Musa naonda fee atoran sunat nae, kalu lahenda boki na ana tou', sona fai' falu te emi muste sunat ana' ria. Leo mae fai ria naraa la'e fai mamaso lahenda Yahudi boe, emi muste sunat ana. (Tehuu tuka matetu na atoran ria naulu' ba'i Musa. Huu fo Manetualain fee naulu' ba'i Abraham atoran ria.)b 23 De kalu sunat ana' esa naraa la'e fai mamaso lahenda Yahudi, sona ta nalena-laka Musa atoran na, boe ma ubea' taon de emi mamanasa moo Au, nana huu Au puli a lahenda luku' naraa la'e fai mamaso lahenda Yahudi? Ria ta la'e, hete?c 24 Boso' uku-sudi lahenda noi hihii-nanau' fo emi bisa mita mata'. Dodoo-tatai matalolole dei, besa' ko emi maetu' no matetu'.”
Ramatua Yesus nana Kristus, do?
25 Boe ma lahenda hida reme kota Yerusalem mai ratane rae, “Lahenda ia ri' ara saka Ni fo raisan, do? 26 Kahere' oo! Huu fo Ana dedea ledo-ledo nai lahenda dodou' matan. Tehuu ta hapu esa nasa'ai Ni, fo hahae dedea' a. Tuka emi, sona leo' bea? Dodoo maan, mana homu kuasa ra bubulu' do ta'a, rae, Lahenda ia nana Kristus, fo ri' Manetualain helu mema' nau feen mai a, do? 27 Tehuu masala na leo ia': kalu Manetualain fee Kristus mai, ta hapu lahenda bubulu' Ria neme bea' mai. Tehuu ita bubulu' Lahenda ia neme bea' mai.”
28 Fai ria, Yesus bei nanori-nafada nai Uma Mamaso Yahudi Ina a kintal na. Ana namanene lahenda sira dedea rae leo' naa, boe ma Ana natane nambera nae, “Emi afi mae malela' Au, ma bubulu' matetu' Au eme bea' mai, hete? Au ta leo ia' mai tuka Au hihii-nanau mesa Ka. Huu fo mana madenu Au a, nana tebe-tebe hapun mema'. Ma emi ta malela' Ana. 29 Tehuu Au alela' Ana, huu fo Au eme naa' mai, ma Ria ri' nadenu Au.”
30 Boe ma ara soba hopu Ni. Tehuu ta hapu esa bisa dapa la'e Ni boe', huu fo bei ta naraa la'e Ria ledo-fain. 31 Neme lahenda makadoto' fo rai naa, dodou' ramahere Ni. Ara dedea rae, “Lahenda ia tao tanda heran dodou'. Kalu Kristus mai, neu' ko Ana ta tao lena neme Lahenda ia mai fa, hete?”
Ara radenu lahenda reu hopu Ramatua Yesus
32 Nai lahenda makadoto' sira talada, lahenda partei agama Farisi hida boe. Ara ramanene lahenda dodou' beiboto la'e-neu' Yesus. Boe ma sira, ma malaka agama Yahudi a malaka nara, radenu Uma Mamaso Yahudi Ina a lahenda manean hida, fo hopu ra Yesus.
33 Boe ma Yesus nafada nae, “Au ledo-fai Ki fo sama-sama oo emi a, ta namanoso so'. Ta doo' a so', te Au fali leo Ria fo ri' nadenu Au a. 34 Neu' ko emi saka Au, tehuu ta maneta moo Au. Nana huu Au leo mamana', fo emi ta bisa tuka naa' meu.”
35 Lahenda Yahudi ra malaka nara esa natane esa rae, “Dodoo maan Lahenda ia saka' leo bea' neu? Ana leo mamana' bea neu, de ita ta bisa taneta too Ni fa? Ana neu funi' nai lahenda Yahudi fo leo-raparasa rai nusa dea a, do? Ana neu nanori-nafada lahenda rai naa, fo ri' pake dedea Yunani a, do? Do, leo bea'? 36 Ria maksud na leo bea' naa', de Ana dedea nae, ‘Emi saka Au, tehuu ta maneta moo Au fa.’ Ma, ‘Au leo mamana' fo emi ta bisa tuka naa' meu’?”
Oe mana neni soda'
37 Fai mate'e neme feta fai malole ria nana feta bau-ina', naraa la'e fai ria Yesus napadei ma dedea nambera nae, “Nenene! Bea maamada-metihedu, sona ana leo Au mai fo ninu!d 38 Kalu bea namahere Au, sona mai ninu! Huu fo mana dui' nai Manetualain Susura Makamoi Na nae, ‘Neu' ko oe mana neni soda' a, faa neme lahenda kamahere' ara dalen dale' mai.’ De ara hapu soda matetu' a. No ria naa, sira tulu-fali lahenda feke' ela hapu soda matetu' ria.”e
39 Yesus dedea la'e-neu' Manetualain Dula-dale Na, nana huu basa lahenda fo ramahere Yesus, neu' ko sipo Dula-dale' ria. Tehuu fai fo Yesus dedea nae leo' naa, ara bei ta sipo Dula-dale' ria, nana huu Manetualain bei ta fee. Tebe Manetualain bei ta fee, huu fo Ana bei ta so'u-fua nadedema Yesus fa.
Lahenda ra mulai rabika-rabati' nana huu Ramatua Yesus
40 Lahenda makadoto' fo rai naa ramanene Yesus dedea nae leo' naa. Boe ma ruma dedea rae, “Tantu Lahenda ia nana Manetualain Mana Nesi Matan, fo ri' Ana helu mema' neme ulu' mai a!”f
41 Ruma bali rae, “Ta'a! Ria nana Kristus, fo ri' Manetualain helu mema' neme ulu' mai a!”
Tehuu ruma bali radedea laka rae, “Ta bisa fa! Lahenda ia lahenda Galilea. Ma Kristus ta lahenda Galilea. 42 Huu fo mana dui' nai Manetualain Susura Makamoi Na nae, Kristus nana mane' Daud tititi-nonosin. Nai babati-lalane feke' boe mana dui' nae, Ria lahenda Betlehem, fo ri' mane' Daud koro-tadun. Leo' naa, hete?”g 43 De lahenda ra mulai rabika-rabati', nana huu Yesus. 44 Lahenda hida nau hopu Ni. Tehuu ta hapu esa dapa la'e Ni boe'.
Lahenda Yahudi ra malaka nara ta ramahere Ramatua Yesus
45 Uma Mamaso Yahudi Ina manean fo ri' saka' reu hopu Yesus a, ara fali leo malaka agama Yahudi ra malaka nara, ma lahenda Farisi ra. Boe ma lahenda bau-ina' ara ratane si rae, “Ubea' taon de emi ta moo Ni mai fa?”
46 Ara rataa rae, “Ta parnaa lahenda esa dedea sama leo' Ria boe!”
47 Lahenda Farisi ra ratane si rae, “Ana tipu nala' emi so, hete? 48 Mafarerene'! Ta hapu esa neme ami lahenda Farisi do, neme malaka ra ramahere Ni, hete? Kalu lahenda bau-ina' ara ta ramahere, sona ubea' taon de emi mamahere Ni? 49 Lahenda kamahere' makadoto' ia ra, ta bubulu' Manetualain Atoran Na. Neu' ko Manetualain kutuk asa!”
50 Tehuu lahenda Farisi esa nai naa, nade Nikodemus. Ana parnaa mai hatu na dedea no Yesus. Ana natane si nae,h 51 “Leo' bea? Tuka ita atoran agama na, ita taetu' taulu' lahenda dedean? Do, ita muste tamanene ni dei, ela bubulu' ana tao ubea', besa' ko bisa taetu' ria dedea na?”
52 Boe ma ara rasapaa ni rae, “O lahenda Galilea sama leo' Ria, hete? Soba parisa' lutu-lutu Manetualain Susura Makamoi Na dei! Lees matalololen ela o bubulu', ta hapu Manetualain mana nesi matan esa neme Galilea mai boe'!”
Ina mana hohoke esa
53 [Boe ma ara rasida', de basa si fali reus.i