Ramatua Yesus puli na lahenda luku' esa nai kolam Batesda
5
Boe ma agama Yahudi a fai malolen esa. Huu ria naa, Yesus asa leo kota Yerusalem reu. 2 Nai naa kolam esa nanuu teras lima. Kolam ria nanenea' lelesu bafa' esa, nade Lelesu Bafa' Bibi-lopo. Nai sira dedea Aram, kolam ria nade ‘Batesda’.a 3 Lahenda kamahedis dodou' biasa rahani rai teras sira. Conto leo-leo': lahenda poke', lahenda luku', ma lahenda ei-lima mates ara. [Ara rahani fai hida' oe ria mulai kokoka. 4 Huu fo Manetualain eila'o-limalopen lai'esa-lai'esa leo kolam ria dale' reu, fo dopo oe a. Boe ma bea ri' maso' naulu' leo oe ria dale' neu, sona te'e na aon neme hedi-raun mai.]b5 Nai naa, lahenda esa namahedi teu' telu hulu falu so. 6 Yesus nita lahenda ria napeu' nai naa. Ana bubulu' lahenda ria namahedi doo' a so, boe ma Ana natane ni nae, “A'a! Mahii' te'e ma aom, do?”
7 Ana nataa Ni nae, “Ahii', Papa. Tehuu masala na ri': kalu oe a mulai kokoka, ta hapu lahenda o'o au leo oe dale' uu. Kalu au soba sudin mesa' ka, sona lahenda feke' maso' naulu' au.”
8 Boe ma Yesus nadenu ni nae, “Foa leo! Lulu ma nea ma, fo fali leo.” 9 Yesus dedea basa nae leo' naa, boe ma lahenda ria te'e tuti' a. Ana foa boe ma, o'o neni nea na de fali neun.
Hihii-nanau' mana dadi' ria naraa la'e lahenda Yahudi ra fai huhule-haradoin. 10 Boe ma lahenda Yahudi ra malaka nara rafada lahenda fo besa' ko te'e a rae, “O bubulu' do, ta'a? Fai ia, fai hahae ao'. Tuka ita atoran agama na, ta bole lahenda o'o neni nea', huu fo ria nade na, noi nonoi' ria so!”c
11 Ana nataa si nae, “Adoo! Papa kasa boso' mamanasa. Lahenda fo puli na au a, pareta au nae, ‘Lulu ma nea ma, fo fali leo.’”
12 Boe ma ara ratane ni rae, “Lahenda bea ri' nadenu o, fo o'o nea'?”
13 Tehuu lahenda fo besa' ko te'e na aon a, ta nalela' Yesus nana, bea. Huu fo lahenda dodou' rai naa, de Yesus loi heni aon so.
14 Ta doo bea boe', te Yesus naneta no lahenda ria nai Uma Mamaso Yahudi Ina a kintal na. Boe ma Yesus nafada ni nae, “Nenene! Besa' ia o te'e ma aom so. Boso' boe tao sala-siko', ela o boso' hapu soe lena heni bali.”
15 Lahenda ria neu saka lahenda Yahudi ra malaka nara, de tui si nae, “Mana puli au a, nade Yesus.” 16 Huu ria naa, ara mulai tao doidoso Yesus, nana huu Ana puli lahenda la'e fai huhule-haradoi'.
17 Tehuu Yesus nafada si nae, “Leo ia'. Au Papa Ka ta hahae nonoi-tatao' a. De Au boe oi-tao la'o naroo.”
Ramatua Yesus nafada aon nae, Ria nana Manetualain Ana Na
18 Huu no lahenda Yahudi ra malaka nara raetu' rae, Yesus nalena-laka neu' sira atoran fai hahae ao', de ara boe-boe saka eno' fo nau raisa Ni. Lena-lena' bali Ana nafada nae, Manetualain nana, Ria Papa Na. No dedea leo naa', Ria tao aon sama leo' Manetualain.
19 Boe ma Yesus nafada si nae, “Tebe! Au afada mema' ae, Au ta bisa tao hata-hata esa neme Au ao-ina heheli Ka. Au nana Manetualain Anan. Huu ria naa, Au tao tuka noi hata fo Au Papa Ka tao a. Au ita Papa Ka tao ubea', sona Au tao leo naa' boe. 20 Au Papa Ka nai nusatetu-ikutema' a Ana Na ri' Au, de sue na Au seli. Ana natudu Au basa-basan fo Ana tao a. Ria boe natudu Au hihii-nanau' kahere' lena bali. Kalu emi mita leo' naa, sona emi heran. 21 Au Papa Ka fee lahenda mana mate' a rasoda selu'. Leo' naa boe, Au fee soda' matetu' neu' sudi bea a, tuka Au hihii-nanau Ki. 22 Matetu na leo ia': Ama' a ta naetu' huhuku' soa-neu' lahenda. Tehuu Ana fee basa-basan neu' Au, huu fo Au nana Ria Anan. Au ri' aetu' ae, lahenda tao roo-tetu' do, ta'a. 23 Au Papa Ka nahii' basa lahenda ra hada-horomata Au, sama leo' ara hada-horomata neu' Ana. Huu fo lahenda bea ta hada-horomata neu' Au, Ama' a Anan, sona ria boe ta hada-horomata Ama' fo ri' nadenu Au a.
24 Tebe-tebe! Au afada mema'. Lahenda bea namanene Au dedea-nafada Ki, ma namahere Manetualain fo ri' nadenu Au a, sona ana hapu soda matetu' mana basa taa'. Manetualain ta huku ni so'. Lahenda ria ta hapu huhuku mamates, tehuu ana nasoda naroo noo Manetualain. 25 Tebe-tebe! Au afada mema'. Ledo-fain nanenea' so, ri' mulai besa' ia, lahenda mana mate' a ramanene Manetualain Ana Na haraoen. Huu fo lahenda bea namanene, ma sipo' Au dedea Ka, sona ana hapu soda' matetu'. 26 Basa soda' a raoka-rasamu rai Au Papa Ka. Ana fee Au soda' matetu' a, huu fo Au nana Ria Anan. 27 Au Papa Ka fee Au haak ma kuasa, fo aetu' basa lahenda ra huhukun, nana huu Au, Lahenda Dae-bafo' Tetea'. 28 Emi boso' heran, selu' baiana', te neu' ko basa lahenda mana mate' ara ramanene Au haraoe Ka. 29 Neu' ko ara rasoda selu'. Boe ma ara kalua reme rates ara mai. Lahenda fo maulu na tao malole, hapu soda' matetu' mana basa taa'. Tehuu lahenda fo maulu na tao tadalu', hapu huhuku' la'o naroo.”d
Mana sakasii dodou' tui la'e-neu' Ramatua Yesus
30 Yesus dedea tamba nae, “Au ta bisa tao hata esa boe', kalu Au bei ta amanene neme Papa Ka mai. Kalu Au amanene basa, besa' ko aetu' lahenda dedean. Huu ria naa, Au aetu' ubea' sona la'e. Au ta tao tuka hihii-nanau mesa Ka, tehuu tuka Papa Ka hihii-nanaun. Huu fo Ria nadenu Au!
31 Kalu Au afada la'e-neu' noi ao-ina heheli Ka, sona Au dedea Ka ta la'e. 32 Tehuu lahenda feke' sakasii la'e-neu' Au. Ma Au bubulu' ara dedea matetu' la'e-neu' Au. 33 Emi parnaa madenu lahenda reu ratane Yohanis Mana Sarani' a. Boe ma ana dedea matetu' la'e-neu' Au.e 34 Sekonaa te Au ta parluu lahenda dae-bafo' a sakasii la'e-neu' Au. Tehuu Au afarerene' fee emi hihii-nanau' ia ra, ela emi bisa hapu popo'i-tatata' meme sala-siko mara mai. 35 Yohanis dedea na, sama leo' dedede' esa pila na nahaa. Fai fo pila na bei nahaa, emi mamaho'o.
36 Au Papa Ka nai nusatetu-ikutema' a boe dedea matetu' la'e-neu' Au. Ria marela-masa'a lena Yohanis. Manetualain fee Au nonoi-laka' dodou', ela alala'o losa babasan. Nonoi-laka' ia ra ratudu buti rae, Ama' a ri' nadenu Au. 37 Ma Ria fo nadenu Au a, Ana dedea matetu' la'e-neu' Au. Emi bei ta parnaa mamanene Ria haraoe Na, do mita mata' Ria rupa-lolen.f 38 Manetualain Hara-dasin ta nahere nai emi dale mara, nana huu emi ta mamahere Au, fo ri' Ana nadenu a. 39 Emi parisa' lutu-lutu Manetualain Susura Makamoi Na, nana huu afi mae no eno' ria emi hapu soda' matetu' mana basa taa'. Sekonaa te Susura Makamoi' a, nafada la'e-neu' Au. 40 Tehuu emi ta nau leo Au mai fo dadi lahenda Ki, ela emi bisa hapu soda' matetu' mana basa taa'.
41 Au ta parluu lahenda io Au. 42 Tehuu Au bubulu' matetu' emi dale mara. Huu ria naa, Au bubulu' emi ta manuu susue-lalai' neu' Manetualain. 43 Au mai nai dae-bafo' ia, nana huu Au Papa Ka mana homu kuasa a, ri' nadenu Au. Tehuu emi ta sipo' Au. Sekonaa te kalu lahenda feke' mai pake ria kuasa heheli na, sona emi sipo' ana. 44 Emi mahii' hapu i'io esa no esa. Tehuu kalu Manetualain io emi do ta'a, emi ta tao dale' neu. Sekonaa te Ria nana Manetualain! Ta hapu feke' so'. De kalu emi ta tao dale' neu' Ana, tao leo' bea fo emi bisa mamahere Ni?
45 Boso' afi mae, Au sale emi nai Papa Ka matan. Ta'a. Mana sale emi a, nana ba'i Musa. Sekonaa te emi mamahena neu' ana, nana huu ria ri' fee emi Manetualain Atoran. 46 Kalu emi mamahere Musa, tantu emi mamahere Au boe. Huu fo ana dui' la'e-neu' Au. 47 Tehuu kalu emi ta mamahere hata fo ana dui' a, tao leo' bea fo emi mamahere hata fo Au dedea a? Ta bisa, hete!”