3 Yesus nataa nae, “Tebe! Ma Au boe nau afada ae leo' ia: kalu lahenda a ta nana boki natafali', sona ana ta dadi Manetualain lahendan.”

4 Tehuu Nikodemus natane Ni nae, “Tao leo' bea fo bisa boki natafali' lahenda leo' naa, kalu bau-ina' ana so!? Ana ta bisa maso' selu' leo mama na tein dale' neu, fo mama na boki natafali' ana. Ta bisa fa, hete!?”

5 Yesus nataa nae, “Tebe! Tehuu Au afada leo ia': lahenda a muste bokin neni' oe ela makamoi', ma bokin neni' dula-dale' ela dadi lahenda bebeu'. No ria naa, besa' ko ana dadi Manetualain lahendan. 6 Lahenda dae-bafo' a bokin neme lahenda dae-bafo' a, tehuu lahenda a dula-dale na nana boki natafali' neme Manetualain Dula-dale Na. 7 Boso' heran kalu Au afada ae, ‘Emi muste nana boki natafali', ela hapu soda' bebeu'.’ 8 Ita tadeta-tasama' ana no ani. Ani a fufuu tuka ria hihii-nanaun. Ita bisa tamanene hoo na, tehuu ta bubulu' ana neme bea' mai, ma saka' leo bea' neu. Leo' naa boe soa-neu' basa lahenda fo nana boki natafali' reme Manetualain Dula-dale Na mai. Ita bisa tita Manetualain Dula-dale Na tao na lahenda ra dadi bebeu', leo mae ita ta bubulu' tao leo' bea, de hihii-nanau' ria bisa dadi.”

9 Nikodemus natane nae, “Tao leo' bea, de bisa dadi leo naa'?”

10 Yesus nataa nae, “A'a nana lahenda Israel ara mesen bau-inan. Ubea' taon, de a'a ta bubulu' hihii-nanau' ia ra? 11 Tetebes ara, Au afada. Ami bubulu' hihii-nanau' ia ra. Ami tui la'e-neu' basa hihii-nanau' fo ami mita mata'. Tehuu emi ta sipo' ami dedea-nafadam no malole. 12 Tepo' fo Au afada la'e-neu' basa hihii-nanau' fo dadi rai dae-ina' a, emi ta nau mamahere. Lena-lena' bali kalu Au afada hihii-nanau' fo dadi rai lalai. Emi ta mamahere boe'! 13 Ta hapu lahenda esa hene-ae neu nataa Manetualain nai lalai boe'. Noi Au, Lahenda Dae-bafo' Tetea', fo ri' onda eme' Ria mai a.

14 Fai a ulu na nai mamana lino-nees, ba'i Musa londa meke riti esa neu' ai lain, fo basa lahenda ra rita ni, ela ara hapu soda'. Hihii-nanau' leo naa' a boe muste dadi soa-neu' Au Lahenda Dae-bafo' Tetea' ia. Neu' ko ara londa Au nai ai lain,^a 15 ela basa lahenda fo ramahere Au, hapu soda matetu' mana basa taa'.

16 Huu fo Manetualain sue na lahenda dae-bafo' a seli. De Ana nadenu Au, Ana Mane Ise Na, ela lahenda fo ramahere Au ta bika-bati reme Manetualain mai. No ria naa, ara hapu soda' matetu' mana basa taa'. 17 Manetualain ta nadenu Au, Ria Ana Na, leo dae-bafo' a mai fo aetu' lahenda ra huhukun. Tehuu Ana nadenu Au ela po'i-tata a lahenda ra reme sala-siko nara mai. 18 Manetualain ta huku lahenda fo ri' ramahere Au. Tehuu Ana naetu' mema', huku lahenda kamahere taa' a. Nana huu lahenda ria ta namahere Au, Manetualain Ana Mane Ise Na.

19 Leo-leo': Manetualain fee makaledo' a mai, ela nahaa nai dae-bafo' ia. Tehuu lahenda dae-bafo' a rahii' rasoda nai maiu' a. Ara ta nau rasoda nai makaledo' a, nana huu sira nonoi-tataon tadalu' a. Huu ria naa, Manetualain huku si. 20 Huu fo basa lahenda mana tao tadalu' a, ete' ao nara roo makaledo'. Ara ta rahii' makaledo' nahaa nai sira, fo ela tadalu nara boso' nana nita'. 21 Tehuu lahenda bea tao tuka roo na, ara leo makaledo' a mai, fo ela makaledo' a haa na natudu nae, ara tao tuka Manetualain hihii-nanaun.”

22 Boe ma Yesus no ana mana tuka dea nara kalua reme kota Yerusalem mai, de ara ofu rai nusa Yudea, ma ara sarani lahenda rai naa. 23-24 Tepo' ria, Herodes asa bei ta ena Yohanis Mana Sarani' a nai bui dale'. Yohanis boe sarani lahenda nai koro Ainon, nanenea' koro Salim, nana huu oe dodou' nai naa. Boe ma lahenda roi faa-faa' a leo Yohanis mai, ela ana sarani si.^b

25 Nai naa lahenda Yahudi esa nalelena ao' no Yohanis ana mana tuka dea nara nae, “Tuka ita agama Yahudi a hadan esa, sona ita muste tao lalao-lalafu ao-ina' ara, besa' ko bole hule-haradoi.” 26 Boe ma ara leo Yohanis mai, de rafadan rae, “Papa Mesen! Mafarene do ta'a, Lahenda fo saka papa nai lee Yarden seri', fo ri' papa mae, Ria nana Kristus? Ana sarani lahenda boe! Ta hapu lahenda leo ita mai so'! Huu fo basa lahenda ra roi faa-faa' a leo Ria reu!”

27 Yohanis nataa nae, “Ta hata-hata fa! Kalu Manetualain nai nusatetu-ikutema' a soi fee lahenda eno', sona ana bisa tao sudi la'e ubea' a. 28 Emi mamanene ao mara, au afada neu' matetu na ae, ‘Kristus fo ri' ita tahani a, ta ri' au fa. Tehuu Manetualain nadenu au aulu', ela soi eno' soa-neu' Kristus. Noi ri naa' so!’^c

29 Uni' ko leo mana kabi tou' a nanuu mana kabi ina'. Tehuu kalu ria mana sakasii na napadei noo ni, ma namanene mana kabi tou' a dedea, sona ana namaho'o. Yesus sama leo' mana kabi tou'. Ma au sama leo' Ria mana sakasii Na. Huu ria naa, besa' ia au amaho'o-atadale aan seli. 30 Penting na, ri' Ria muste dadi lahenda bau-ina, ma ela au dadi lahenda aana'.”

31 Yohanis dedea naroo nae, “Ana neme Manetualain fo nai lalai, huu ria naa Ana bau lena basa-basan. Tehuu au eme dae-bafo' a mai, de au sama leo' basa lahenda rai dae-bafo' ia. Au dedea la'e-neu' hihii-nanau' bale fai' nai dae-bafo' ia. Tehuu Ria fo ri' neme Manetualain fo nai lalai a, tantu Ana kahere' lena heni basa-basan. 32 Ana nafada la'e-neu' hata fo nita ma namanene nai nusatetu-ikutema' a. Tehuu lahenda ta sipo' hata fo Ana nafada. 33 Kalu lahenda sipo hata fo ri' Lahenda ria neme' lain mai nafada a, sona ria boe natudu buti nae, ana namahere hata fo ri' Manetualain dedea Na, tebe. 34 Lahenda fo Manetualain nadenu Ni a, Ria ri' tui-beka Manetualain hara-dasin. Huu fo Manetualain fee Ria Dula-dale Na neu' Ana, ta nanuu too-lane. 35 Ama' a nai nusatetu-ikutema' a sue na Ana Na seli. Ma Ana fee basa-basan reu' Ana' ria lima Na.^d 36 Lahenda bea ramahere Ana' ria, ara hapu soda matetu' mana basa taa' a. Tehuu lahenda bea ta ramahere Ni, ma ta tao tuka Ria hehelu-barataan, ara ta hapu soda', huu fo Manetualain namanasa nahere de huku si.”