2-3 Makahulun ele, Manetualain heti memak fo Ndia mana kokolan nala sulak la'e-neu Hala Malole ndia neu Ndia Susula Malalaon. Te nai Susulak ndia, Manetualain helu fo sangga nadenu Anan Yesus mai fo dadik hataholi. Hatematak ia Ndia hehelun dadi so, huu Yesus mai so fo Ana dadik hataholi neme mane Dauk numbu-sadun mai. 4 Tehuu nai dede'ak esa bali, na, Manetualain natudu buti nae, Yesus Karistus boe dadik Ndia Ana hehelin. Yesus Dula-dale Malalaon ndia, tebe-tebe malalaok, sama leo Manetualain. Ma Manetualain pake Ndia koasan fo tao nasoda falik Yesus neme Ndia mamaten mai. Huu ndia de ita bubuluk Manetualain Anan, na ndia Yesus, fo ita Lamatuan fo naena haak palenda ita.

5 Yesus natudu dale malolen neu au, huu Ana hele nala au dadik Ndia nadedenun, fo au uu tui-bengga Ndia hehelun sudi nai bee. Te Ana nahiik fo hataholi ta Yahudi la boe oo lamahele leu Ndia, ma ala lasoda tungga Ndia hihiin. Au boe oo ahiik fo hataholi mana neme basa nusak kala lamahele neu Karistus, ma lasoda tungga Ndia hihiin.

6 Leo ndiak boe oo, ei malai kota Roma. Ei mai mima hataholi nusak no'uk, neme mamana no'uk mai. Yesus Karistus hele nala ei so nae, “Mai leo! Mai fo dadik miu Au hataholi nggala!” 7 Huu ndia de au haitua susulak ia neu ei malai kota Roma, ma tao asanenedak ae, Manetualain sue ei. Ndia boe oo noke ei dadik miu Ndia hataholin fo mana masoda malalaok.

Au hule-haladoi fo Manetualain, ita Aman, ma Yesus Karistus, ita Lamatuan, latudu Sila dale malolen neu ei, ma fee ei masoda mia sodak, mole, ma ndoo-ndoo.

8 Au mulai au susulang ia, ma au oke makasi no'uk uu Manetualain, huu Yesus Karistus naue-naosa nai ei dalem mala. Au boe oo oke makasi, huu hataholi mana leo nai basa mana palenda Roma dae baba'en nala lamanene ei namahehelem neu Yesus so.

9 Lamatuak mesak kana bubuluk tetebes nae, au hule-haladoi ta mana ketuk soa-neu ei. Ndia boe oo bubuluk au ue-osang henuk no samane nana boi-boik, fo tui-bengga hataholi la'e-neu Ndia Anan Tutui Malolen. 10 Neu faik fo au hule-haladoi, na au oke leo iak: “Lamatuak, au mesa nggau ta bubuluk ndia dalan leo beek. Tehuu mete ma tungga Lamatuak hihiin, na, soi dalak fo au bisa uu tilo au nonoo nggala lai Roma.”

11 Au hule-haladoi leo ndiak, te au ahiik ana seli uu tilo ei, suek au bisa ba'e fee ei koasa neme Manetualain Dula-dale Malalaon mai, suek ei namahehelem boe natea. 12 Au maksut leo iak: mete ma au dadi mai fo leo ua ei, na, au sangga tao atetea ei dalem mala, suek ei namahehelem bisa boe natea. Ma au ahiik fo ei boe tao matetea au daleng.

13 Tolanoo susue nggala ei! Au ahiik ei bubuluk mae, la'i no'uk au sangga uu tilo ei nai Roma ele. Tehuu losa hatematak ia bei ta dadi boe. Naa, mete ma au dadi mai, na, au amahena hataholi no'uk bei lamahele latea leu Karistus, sama leo nai mamana fe'ek kala. No leo ndiak, na au ueng buna-boan malole.^a

14-15 Mae talo bee boe oo, au ameda musi tui-bengga Lamatuak Hala Malolen neu basa hataholi la. Mae hataholi mana pake dede'a Yunani do, hataholi dinitiu fo ala pake dede'a fe'ek do, hataholi ina-huuk do, hataholi kadi'i taidaek do, hataholi mana sakolak do, hataholi ta mana sakolak boe. Huu ndia de au ahehele sangga uni Roma ele uu fo tilo ei.

16 Au ta mae faa boe la'e-neu Lamatuak Yesus Hala Malolen. Mete ma hataholi namahele neu Manetualain, na, Halak ndia naena koasa neme Ndia mai fo nasala'e nala hataholi ndia neme ndia sala-singgon mai. Naa, hataholi Yahudi la bubuluk lakahuluk dede'ak ia, basa bei fo hataholi nusa fe'ek kala.^b 17 Halak ndia boe oo natudu Manetualain dalan fo tao namandoo hataholi sala-singgon. Basa sila bisa dadi, sadi hataholi namahele neu Ndia. Sama leo nana sulak nai Manetualain Susula Malalaon nae,

18 Tehuu Manetualain nafada so leo iak: hambu hataholi tana mbali Ndia. Ma hambu hataholi tao dede'a manggalauk mata-matak. De Manetualain ta simbok sila tatao-nono'in ndia. Te nai sila dalen dale, na hataholi la ia bubuluk bee ndia tetebes. Mae leo ndiak boe oo, tehuu sila lambue tao lakandoo dede'a kasalak kala. Ala kokoe hataholi, losa hataholi la ta bubuluk bee ndia tetebes so bali. Huu ndia de Manetualain sangga nakonda huhukuk neu sala neme lalai mai. 19-20 Hataholi la ia ta laena to'ok fo lasala'e aon nala, huu Manetualain natudu aon nenik Ndia tatao-nono'in neu basa hataholi la so, losa ala lalelak Ndia. Au maksut leo iak: mae Manetualain mesak kana ta nana nitak, tehuu ita hataholi bei bisa talelak Ndia neme hata fo Ana taok. Mulai neme Ana nakadadadik lalai no dae-bafok losa hatematak ia, hataholi bisa bubuluk la'e-neu Manetualain aon ma Ndia koasan fo ta mana ketuk. Huu ndia de au ae, hataholi manggalauk kala sila ta laena to'ok, fo bisa ala lasala'e aon nala bali lae, “Au ta bubuluk hata esa boe la'e-neu Manetualain.”

21 De mae ala bubuluk Manetualain, tehuu ta nau manaku Ndia lae, “Lamatuak ndia, na ita Manetualain!” Sila boe tala nau loke makasi neu Ndia. Boe ma sila dudu'an nala labali ao, losa ta bubuluk hata-hata fo tetebes bali. Ala lamanggonggoak, de ala dudu'a mata-matak la'e-neu Manetualain ao-ina hehelin. Ma sila dalen nala dadik makiuk.^d

22 Ala soso'uk aok lae, “Au ia, hataholi mana bubuluk dede'ak no'uk!” Mae ala dudu'a leo ndiak, tehuu tungga teteben, na sila ndia nggoan leo kamba. 23 Boe ma ala ta lakaluku-lakatele neu Manetualain fo ana seli ndia, te lae, “Ai ta paluu Manetualain mata leo ndiak!” Tehuu ala mulai lakaluku-lakatele leu bua nana dokik namata-ao leo hataholi. Basa ndia, de ala lakaluku-lakatele leu bua nana dokik namata-ao leo mbuik, leo banda fe'ek, ma hambu leo mengge la boe. No leo ndiak, na ala timba heni Manetualain fo ta mana matek, de nggati no buas fo bisa maten!^e

24 Huu ndia de Manetualain ela sala, fo suek ala tao tungga kada sila hihiin. Ana ela sala fo tao dede'a manggalauk mata-matak kala fo naoka nai sila dalen nala. Losak ala ta mae lalelak so. Boe ma ala tao dede'a manggenggeok mata-matak kala leu sila ao-ina hehelin nala, ma ala tao leo ndiak neu hataholi fe'ek ao-inan boe. 25 Nai sila dalen nala, ala bubuluk nanonoli tetebes la'e-neu Manetualain so, tehuu tala nau mbali. Sila dudu'an nala lakalulutuk so, de ala dudu'a lae, “Malolenak, mae ita tao dede'a mata-matak losa lakalulutuk, te nenenin ta hata-hata!” De ala lakaluku-lakatele leu buas fo Manetualain taon so, tehuu tala nau lakaluku-lakatele neu Manetualain! Ala tao aon leo hataholi malalaok, naa te sila tatao-nono'in manggalauk!

Teteben, ita hataholi musi koa-kio ma fee hada-holomata neu Manetualain nakandondoo henin! Naa, ndia bei fo nandaa!

26 Huu sila manggalaun ndia, de Manetualain ela sala fo ala tao langgenggeo leo ndiak, tungga kada sila hihiin. Boe ma ala lambue hohongge mata-matak, ma tala mae lalelak. Sila sao inan nala ta lahiik sunggu lo sila sao toun nala, tehuu lahiik kada ta malole la. Inak nahiik sunggu no inak! 27 Touk kala leo ndiak boe! Ala ta lahiik sunggu lo sila sao inan nala so, tehuu ala lahiik sunggu lo kada touk! Tala mae faa boe! Huu ndia de ala hambu huhukuk no mandaan! Ala heok dook leme dala ndoos mai so.

28 Ala dudu'a lae, “Malolenak ita ta nana mba'ak to Manetualain.” Huu ndia de Manetualain ela sala leme naa, fo ala tao tungga kada sila hihiin! De ala dudu'a lalelak kada manggalauk! Boe ma ala tao kada dede'a ta malole!

29 Sila sodan nala henuk no kada dede'a manggalauk mata-matak. Ala ta tao lalelak dede'a malole, tehuu lalelak kada tao dede'a manggalauk. Ala balena'o. Ala lambeda dalek. Sila mana holok. Ala tao lisa hataholi. Ala lambue lasisimbo bafak. Ala lasapepeko. Sila masapepekok. Ala lakamuti hataholi. 30 Ala lateme kokolak laboboo hataholi fe'ek naden. Ala binci Manetualain. Ta kalela hadak. Ala lateme lakadadaek hataholi. Ala lateme soso'uk aok. Ala lateme sangga dala manggalauk mata-matak. Ala lateme laban ina-aman nala. 31 Ala ta nau bubuluk hata fo tetebes. Ala la'o lena sila hehelu hehelin nala, losa hataholi ta bisa lamahele sala bali. Ala ta nau sue hataholi. Ala ta lameda kasian faa boe neu hataholi.

32 Ala bubuluk Manetualain heti-heun so, fo nae, hataholi manggalauk mata leo ndiak kala nandaa nana huku matek. Mae ala bubuluk heti-heuk ndia so, tehuu ala bei tao manggalauk mata-matak kala. Ta kada leo ndiak, tehuu ala lambue mbau-edo hataholi fe'ek, fo sila boe tao tungga manggalauk leo ndiak. Ana seli ndia maa!