Au sulak susulak ia, fee basa hataholi kamahelek mana lateme lakabubua lai kota Korintus ma propensi Akaya.^a 2 Au hule-haladoi neu Manetualain, fo ita Aman, ma Yesus Karistus, fo ita Lamatuan. Au oke fo latudu Sila dale malolen neu ei, fo suek ei bisa masoda mia sodak, mole ma ndoo-ndoo.

3 Ai mahiik fo basa hataholi so'u dema-demak Manetualain naden. Huu Ndia ndia, ita Lamatuan Yesus Karistus Aman. Basa namemeda kasian laoka neme Ndia mai, ma Ndia nahiik tao natetea ita dalen. 4 Ana kokoe ita, mete ma ita hambu toto'ak. Huu ndia de ita boe oo bisa kokoe hataholi fe'ek mana hambu toto'ak. Huu ita bisa tao tatetea sila dalen, sama leo Manetualain tao natetea ita dalen so boe. 5 Karistus hambu toto'ak no'uk soa-neu ita so. De, huu Karistus nameda toto'ak mata leo ndiak so, de Aman tao natetea ita dalen nala, mete ma ita hambu toto'ak. 6 Mete ma ai nai ia hambu toto'ak, na, Manetualain tao natetea ai dalen. Ma mete ma ai hambu toto'ak, boe ma makatataka no dale loak, na, ei boe oo musi bubuluk mae, Lamatuak boe oo pake dala leo ndiak fo tao natetea ei dalem, ma nakambo'ik heni ei mima manggalauk mai. Huu mete ma ei hambu toto'ak sama leo ai, na, Lamatuak tao natetea ei dalem, suek ei boe oo bisa makatataka mia dale loak. 7 Huu ndia de ai mamahele tebe-tebe mae, ei bisa mahele tea-tea ma ta mangge'o. Huu ai bubuluk mae, mete ma ei hambu toto'ak leo ai, na, Manetualain tao natetea ei dalem ma Ndia boe oo tao natetea ai dalen.

8 Tolanoo nggala ei! Ai hihiin fo ei bubuluk tetebes, la'e-neu toto'ak fo ai hambu mitak neme propensi Asia. Ai mameda mabela, lena heni ai bisa lembak. Losak ai manggaten mopo, huu ai dudu'a mae, ai sangga mate so.^b 9 Ai mesa nggai mameda belak, sama leo hataholi esa bei fo namanene mana maketu dede'ak, naketu huku mate soa-neu ndia. Tehuu basa sila dadi, fo suek ai mamahele neu Manetualain, ma ta mamahele neu ai aon. Huu Manetualain ndia naena koasa fo tao nasoda falik hataholi mana matek. 10 Ndia ndia nakambo'ik heni ai mima manggalauk mai so, neu faik fo elaba'ik ai mate. Dei fo Ndia boe oo, nau nakambo'ik heni ai mima manggalauk mai. Ai mamahena mahele mae, dei fo Ana mai nakambo'ik heni ai mima hata fo manggalauk mai nakandondoo henin. 11 Mete ma ei hule-haladoi makandoo fee ai, na, ndia tulun ai boe, huu Manetualain nau tao dede'a malole no'uk fee ai. Ana nau tao leo ndiak, huu hataholi no'uk hule-haladoi fee ai. De neu faik fo hataholi no'uk lasaneda ai, dei fo sila boe loke makasi no'uk neu Ndia.

12 Ai bisa kokolak koaok, huu ai bubuluk nai ai dalen mae, hata fo ai taon nai dae-bafok ia, tungga Manetualain hihiin neu ai. Ai ta heok mima ues ndia mai, fo suek basa hataholi lita ai tao ues mia dale malalaok. Ai boe oo makalala'ok ai uen, minik malelak^c fo mana konda neme Manetualain mai, ta minik malelak fo mana naoka nai dae-bafok ia. Huu Manetualain natudu dale malolen neu ai. De ai bisa tao ues tingga-tingga lena bali, neu faik fo ai sama-sama mia ei. 13 Kada au sulak fee ei, la'e-neu dede'ak fo ei bisa lees ma malelak. Hatematak ia ei malelak au maksut luma so. Tehuu au amahena, dei fo ei bisa malelak matetuk lena bali. 14 Hatematak ia, bei fo ei malelak kada faak la'e-neu ai. Tehuu mete ma ita Lamatuan Yesus Karistus fali main so, dei fo au amahele tebe-tebe ei malelak no'uk so. No leo ndiak, ei bisa kokolak koaok la'e-neu ai, sama leo ai kokolak koaok la'e-neu ei boe.

15 Au amahele tebe-tebe ei malelak dede'ak kala ia, huu ndia de makahulun, au aketu itak fo nau uu tilo seluk ei bali, fo suek ei bisa hambu baba'e-babatik la'i dua. 16 De makahulun au dudu'a, mete ma au dadi uni propensi Makedonia uu, na, au bisa singgo tilo ei. Boe ma mete ma au fali uma Makedonia mai, na, au bisa singgo seluk ei bali. No leo ndiak, ei bisa tulun au, fo au bisa la'o akandoo uni propensi Yudea uu.^d

17 Tehuu talo bee bali? La'i-la'ik au afada ae, au ahiik mai tilo ei, fama ei mae hetuk au akae'esok akandoo, do? Do, ei mae hetuk kada au aketu dede'ak tungga kada au hihii heheling, sama leo hataholi fe'ek nai dae-bafok ia, do? Do, ei mae hetuk au ia hataholi mana dea-dalek, fo nahiik nae, “Hei.” Naa te nai au daleng, au dudu'a ae, “Taa dadi!” Fama ei dudu'a mae, au ia matak leo ndiak, hetu? 18 Ita bisa tamahele neu Manetualain, mete ma Ana kokolak dede'ak esa, na, neu ko Ana tao natetun. Huu ndia de ai boe oo, leo ndiak. Mete ma ai kokolak mae, “Hei,” na, ai ta dudu'a mae, “Taa.”

19 Au, Silas, ma Timotius manoli ei la'e-neu Yesus Karistus, Manetualain Anan so. Ndia, ta hataholi mana dea-dalek, fo kokolak “hei”, tehuu maksut nae, “taa”. Ana boe oo ta nangge'o, mete ma Ana kokolak “hei”, na, Ndia maksut tebe-tebe “hei”.^e 20 Basa dede'ak fo Manetualain heluk ndia so, dei fo Ana taon dadi. Huu ndia de, mete ma Yesus helu dede'ak esa nae, “hei”, na, ita bisa tataa tae, “Tetebes ndia! Amin!” Huu ai bubuluk memak hata fo Yesus sangga taon so. Ai mafada dede'ak ia fo matudu Manetualain koasan. 21 Manetualain ndia hele nala ei ma ai so. Ana so'u nala ita, fo dadik Ndia hataholin. Ndia boe oo, tao ita takatataka takandoo. 22 Ana fee Dulan fo heti ita, ma natudu Ndia rencanan neu ita. Ndia sama leo hataholi esa tao tandan neu buas esa, fo nafada nae, buas ndia, ndia enan.

23 Au oke fo Manetualain mesak kana dadik sakasii neu au kokolang ia. Huu Ana bubuluk au daleng. Ana bubuluk hatina de au bei ta dadi uni kota Korintus uu. Au ta nau akamamaek ei, huu ndia de au bei ta neti. 24 Ai ta soso'uk aok dadik malanggan fo madenu ei mae, ei musi mamahele neu see. Tehuu ai tao ues sama-sama mia ei, fo suek ei dalem bisa lamahoko. Ei bisa mahele tea-tea, huu ei mamahele neu Manetualain.