Manetualain Dulan fee koasa neu ita, fo tao ues mata-matak
12
Tolanoo susue nggala ei! Au nau fo ei bubuluk la'e-neu koasa ndia, ma baba'e-babatik fo Manetualain Dulan fee ita, suek ita paken. 2 Ei bubuluk so mae, neu faik fo ei bei ta dadik Lamatuak hataholin nala, ei mambue masonggok bua hala taak kala. Ei tungga sala mboke-mboke. 3 Huu ndia de, au nau fo ei bubuluk mae, ta bisa hambu hataholi fo nana mba'ak no Manetualain Dula-dale Malalaon nae, “Sumba-sook neu Yesus ndia!” Ma ta bisa hambu hataholi fo ta nana mba'ak no Manetualain Dula-dale Malalaon nae, “Yesus ndia na, au Lamatuang fo naena haak palenda au!”4 Manetualain Dulan fee hataholi esa-esak no ndia baba'e-babatin, fo ala lakalala'ok sila ue fe'en nala. Tehuu basa baba'e-babatik kala leme Dulak esa mai. 5 Hataholi hambu baba'e-babatik mata-matak, fo ono-lau hataholi, tehuu basa sala lamanene leme kada Lamatuak esa mai. 6 Hataholi hambu ues mata-matak, fo lakalala'ok Lamatuak uen, tehuu kada Manetualain tulun sila, fo lakalala'ok basa ues ndia. 7 Manetualain natudu Dulan neu hataholi esa-esak sodan, no dala mana fe'ek kala, tehuu ndia maksut fo basa sala laua-lanale sama-sama. 8 Ana fee Dulan koasan neu hataholin nala. Luma hambu baba'e-babatik fo ala bisa dudu'a naluk, boe ma fee nanoli-nafadak no mandaan. Luma hambu baba'e-babatik fo lafada no manggaledok, hata fo ala bubuluk. 9 Luma bali, hambu baba'e-babatik fo lamahele tea-tea neu Manetualain, huu sila nana mba'ak neulalau lo Ndia Dulan. Luma bali, hambu baba'e-babatik fo tao lahai hataholi kamahedik. 10 Luma bali, hambu baba'e-babatik fo tao tanda heran mata-matak, fo latudu Manetualain ana selin. Luma bali, hambu baba'e-babatik fo lafada Lamatuak hehelun neu Ndia hataholin nala. Luma bali, hambu baba'e-babatik fo bisa bubuluk dulak bee ndia naoka nai Manetualain, ma bee ndia taa. Luma bali, hambu baba'e-babatik fo bisa kokolak nenik dede'ak mata-matak. Luma bali, hambu baba'e-babatik fo lafada dede'ak kala sila sosoan hata. 11 Tehuu kada Dulak esa fo tao basa sala bisa tao ues sala sila. Ana fee hataholi esa-esak fo ala labe'i tao ues tungga Dulak hihiin.a
Ao-inak esa, no baba'en mata-matak
12 Au sangga akasasama baba'e-babatik kala sila lo hataholi ao-inan. Ao-inak esa baba'en mata-matak. Tehuu baba'e mata-matak sila, nana mba'ak dadik kada ao-inak esak.b
Ndia sama leo Karistus hataholin nala. 13 Ita basa nggata nana mba'ak to Dulak esa. Huu ndia de, ledo-eik ita hambu salanik, ita dadik sama leo hataholi nusak esa. Mae ita hataholi Yahudi do ta Yahudi, ata do ta ata, Manetualain fee ita basa nggata kada Dulak esa. Ndia sama leo ita basa nggata tinu oe fo neni sodak neme oe matak esa mai.
14 Memak ao-inak ta kada baba'ek esa. Te ndia dadik neme baba'ek no'uk mai. 15 Leo o eim nae, “Au ia, ta limak. De au ta dadik baba'ek neme o ao-inam mai.” Mae ana kokolak leo ndiak, tehuu ndia bei baba'ek neme o ao-inam mai. Tetebes, hetu? 16 Ma mete ma o ndi'i doom nae, “Au ia, ta mata. De au ta dadik baba'ek neme o ao-inam mai.” Mae ana kokolak leo ndiak, tehuu ndia bei baba'ek neme o ao-inam mai. 17 Dudu'a dei! Mete ma o ao-inam dadik kada mata esa, na, talo bee fo o bisa mamanene? Ma mete ma o ao-inam dadik kada ndi'i dook esa, na, talo bee fo bisa hae mala book?
18 Tehuu ei bubuluk so, Manetualain tao ita dadik sama leo ao-inak esa, ma Ana heti ndia baba'en mata-matak, tungga Ndia mata-aon. 19 Mete ma ita ao-inan kada dadik baba'ek matak esa, na, naden ta ‘ao-inak’ so bali, hetu? 20 Tehuu ndia teteben, ita ao-inan naena baba'ek mata-matak. Ndia taon dadik ao-ina katemak esa.
21 Hataholi matan ta bisa nakadadaek hataholi liman nae, “Au ta paluu o!” Ma hataholi langgan ta bisa nafada hataholi ein nae, “Au ta paluu o!” 22 Ndia teteben, na ndia hambu ao-inak baba'en fo ita taok ta balakaik, ma ta penting, tehuu ita bei paluu sala. 23 Hambu baba'ek fo ita taok sosoan kada faak, tehuu ita bei takaboi neulalau sala. Ma hambu baba'ek fo ita mae tatudun ma ita mboti neulalau sala. 24 Tehuu mete ma baba'ek fo ta tao nakamamaek ita, na, ita ta tao hata-hata neu sala.
Tehuu Manetualain nakabubua basa baba'ek, fo taon dadik ao-inak esa. Boe ma Ana heti fo baba'ek fo ita taok ta penting, ita takaboi neulalau sala boe, 25 huu, Ana ta hii ita ao-inan nana baba'ek. Ana nau fo basa baba'ek, esa suli esa. 26 Mete ma baba'ek esa hambu toto'ak, na, basan namedan boe. Ma mete ma, esa hambu hada-holomata, na, basan lamahoko tungga boe.
27 Leo ndiak boe no ei. Huu, ei sama leo Karistus ao-ina kateman. Tungga-tungga hataholi kamahelek dadik sama leo baba'ek esa neme Karistus ao-inan mai. 28 Nai hataholi kamahelek kala laladan, Manetualain fee koasa fo tao ues mata-matak.
Kaesan, Ana nadenu hataholi luma leu lafada Ndia hehelun.
Kaduan, Ana pake hataholi luma dadik mana kokolan.
Katelun, Ana tao hataholi luma malelak fo lanoli hataholi la'e-neu Ndia.
Boe ma Ana fee koasa neu hataholi luma, fo bisa tao tanda heran mata-matak, fo latudu Ndia ana selin.
Luma bali, hambu koasa fo tao lahai hataholi kamahedik.
Luma bali, hambu baba'e-babatik fo tulu-fali hataholi.
Luma bali, hambu baba'e-babatik fo bisa lakaneni hataholi fo ala tao ues sama-sama lo malole.
Ma Ana fee koasa neu hataholi luma bali, fo ala bisa kokolak lenik dede'ak mata-matak.c
29 Ei dudu'am leo beek? Manetualain nadenu basa hataholi fo leu lafada Ndia hehelun, do? Taa. Ana tao basa hataholi dadik Ndia mana kokolan, do? Taa. Ana tao basa hataholi lanoli lalelak, do? Taa. Ana fee koasa neu basa hataholi fo bisa tao tanda heran, do? Taa. 30 Ana fee koasa neu basa hataholi fo tao lahai hataholi kamahedik, do? Taa. Ana tao basa hataholi bisa kokolak lenik dede'ak mata-matak, do? Taa. Ana tao basa hataholi bisa lafada dede'ak kala sila ndandaan, do? Taa.
31 Ei musi mahehele fo simbok ma pake baba'e-babatik fo sosoan lena soa-neu hataholi no'uk kala.
Mae leo ndiak, tehuu au bei nau atudu ei dalak fo malolen seli.