Mata neuk neu bua sosonggok kala!
10
Tolanoo susue nggala ei! Ei boso mafalende heni tutui lele uluk, neu faik fo ita bei-ba'in nala lai mamana nees. Manetualain natudu dalak neu basa sala, nenik ko'as fo mana la'ok nakahuluk nai sila matan. Basa de Ana tao naba'e tasi oe, de noo sala kalua lesik ndia losa tasi selik lo sodak.a 2 Ko'as ma tasi ndia, dadik nakandandaak esa. Huu ita bei-ba'in nala lamahele ba'i Musa fo nalangga sala, de ala tungga ko'as ndia, ma maso leni tasi dale leu lo ndia. Ndia sama leo ita tamahele Karistus, boe ma hambu salanik, fo natudu nae, ita dadik Ndia hataholin, ma ita tamanene Ndia. 3 Basa ita bei-ba'in nala la'a nana'ak fo Manetualain Dulan sadia fee sala.b 4 Ma basa sala linu oe fo Manetualain Dulan sadia fee sala linu. Ala linuk ndia, kalua neme batu ina-huuk fo Manetualain Dulan natudu neu sala. Kada ala bee leu, na batu nai ndia so. Batu ndia, na ndia Karistus.c 5 Tehuu Manetualain ta hii hataholi no'uk tatao-nono'in. Basa de ledo-eik ala la'ok lafeok mamana nees maloa ndia, na hambu no'uk mate lai ndia. De ala latoi hataholin nala lai mamanak no'uk.d6 Basa sila dadi fo latudu conto, suek boso ita tahiik tao manggalauk sama leo sila.e 7 Boso mambue songgo, sama leo sila luma. Nai Manetualain Susula Malalaon nana sulak nae, “Hataholi Israel asa ia, langgatuuk la'a-linu no'u, nai bua dodoki sapi ana matan. Basa boe ma ala mulai songgo.”f 8 Ita boso tao eok to hataholi fo ta ita saon. Huu fai maneuk, ala hohongge leo ndiak, boe ma hambu hataholi 23.000 mate nai kada faik esa dalen.g 9 Ita boso soba-soba tao manggalauk mata-matak dei, fo sangga bubuluk Karistus nau huku ita, do taa. Huu hataholi Israel asa luma sangga soba Manetualain leo ndiak, boe ma Ana haitua mengge kalasok makadotok fo kiki lisa sala.h 10 Ita boe oo, boso tamboka. Huu sila luma lambue lamboka lakandoo, boe ma Manetualain nadenu ata nusa sodan esa mai, fo tao nisa sala.i
11 Dede'ak ndia la'e hataholi Israel asa, fo dadik conto neu ita. Ala sulak basan so, fo ita bisa tanoli ma boso tao tungga sila salan. Huu dae-bafok fai babasan deka-deka mai so.
12 Masanenedak baa! Hatematak ia o dudu'a mae, o bisa mahele teas so. Tehuu o musi mata neuk, fo boso tuda. 13 La'i-la'ik o mahiik tao manggalauk, na masaneda te, hataholi fe'ek nameda nitak soba-douk leo ndiak so boe. Tehuu o bisa mamahele neu Manetualain huu Ana tao tungga hata fo Ana kokolak. Ana ta mbo'i o hambu soba-douk, lena heni hata fo o bisa makatataka. La'i-la'ik o hambu soba-douk leo ndiak, na, Ana fee o dala kaluan. Ana nau tao nala o mahele teas, suek o boso tuda.
14 De tolanoo susue nggala ei! Mete ma hataholi sangga soba nakaseti ei, fo do'o sosonggok kala, na, malai kalua mima ndia mai leo! Boso makae'esok bali!
15 Au kokolak neu ei fo mana dudu'a naluk. Ela ei timba-tai aom fo bubuluk hata fo au sangga kokolak ndia, tetebes. 16 Dudu'a soba dede'ak ia: mete ma ita takabubua fo ta'a nai Lamatuak mein, boe ma ha'i tala nggalaas ndia, fo toke makasi neu Ndia, de ita tinu neme nggalaas ndia mai, na ndia ndandaan nae, ita nana mba'ak to Karistus. Neu faik fo Ndia daan faa fo maten, ndia nonook leo bali ita mate tungga boe. Mete ma ita bibi'i loti, boe ma ita ta'a, na, ndia ndandaan sama, fo ndia ita nana mba'ak to Karistus. De neu faik fo Ana mate, na ndia nonook leo bali ita mate tungga boe.j 17 Ita basa nggata ha'i baba'ek neme loti balok esa ndia mai. De basa mana ha'i baba'ek neme loti esa ndia mai, sama leo ita nana mba'ak dadik ao-inak esa, mae ita hataholi no'uk. 18 Dudu'a soba hataholi nusa Israel makahuluk kala. Neu faik fo ala hala banda nai mei tunu-hotuk lain, fo lakaluku-lakatele neu Manetualain, na malangga anggama mana halak ndia, na'a mbaa ndia. Ndia ndandaan nae, sila nana mba'ak lo Manetualain, ma sila boe oo nana mba'ak lo hataholi mana neni banda fo tao tunu-hotuk.k
19-20 Au maksut leo beek? Neu faik fo hataholi ta mana malelak Manetualain, sangga fee fefeek sila bua sosonggon, na ndia sosoan ta hata-hata, do? Huu bua sosonggok ndia, kada bua dodoki kamates! Taa! Au maksut leo iak: neu faik fo hataholi hala banda dadik tunu-hotuk soa-neu bua sosonggok, ala songgo dula manggalauk kala. Tehuu ala ta lakaluku-lakatele Manetualain fo tetebes. De au ta nau ei nana mba'ak mia dula manggalauk leo ndiak kala.l 21 Mete ma ei nana mba'ak mia Lamatuak, boe ma minu neme nggalaas manai Lamatuak mein ndia, na, ei ta bole miu seseok mia dula manggalauk kala, ma minu neme sila nggalaan mai, neu faik fo hataholi songgo sala. Huu ndia ndandaan nae, ei nana mba'ak mia dula manggalauk kala. Leo ndiak boe, mete ma ei mi'a nai Lamatuak mein, na, ei ta bole mi'a tungga nai sila mein. Huu ndia ndandaan nae, ei nana mba'ak mia dula manggalauk kala! Nggoak! 22 Ei dudu'a leo beek? Sangga tao ita Lamatuan holo, do? Mamates ndia! Fama ei dudu'a mae, ei balakaim lena heni Ndia, do?m
Tao mala basa-basan fo so'u dema-demak Manetualain naden
23 Fama ei mae, “Au nau tao sudi hata, na bole. Huu au haak ndia.” Tetebes. Tehuu masaneda, te ta basa dede'ak malole soa-neu o. Ma ta basa dede'ak, bisa tulun tao latea o dalem.n 24 Boso kada sangga nanalak neu o ao hehelim. Malolenak, sangga nanalak fee hataholi fe'ek boe.
25 De au fee dudu'ak leo iak: mete ma hasa mbaa nai pasak, na, mu'a leo. Ta paluu matane bali, “Mbaa sosonggok ia, do?” Do, dudu'a mae, “Au bole u'a mbaa ia, do taa?” 26 Huu nai Manetualain Susula Malalaon nana sulak nae, “Dae-bafok no basa isin nala, ita Lamatuan enan.”o
27 Mete ma hambu hataholi bei ta namahele neu Manetualain nae, “Mai mu'a nai uma!” Mete ma ei nau miu, na, miu leo, ma mi'a basa hata fo ala fee ei. Boso matane mae, “Au bole u'a ia, do taa?” 28 (Tehuu hambu hataholi mai nakukutuk nae, “Boso mu'a ia, huu ia mbaa sosonggok,” na malolenak o boso mu'an. O musi tao matak neu hataholi fo mana mai nafada ndia, ana nau, do taa. 29 Au maksut, dudu'a neulalau, tungga hataholi ndia dudu'an, na bole mu'a, do taa. Boso kada dudu'a neulauk tungga o ao hehelim.)
Naa te au bole tao tungga au hihiing. Tehuu mete ma hataholi fe'ek dudu'a ta malole, ana tao dede'ak esa, na, hatina de au boe oo, ta bole tao tungga au hihiing, huu kada dede'ak ndia ta malole soa-neu hataholi ndia? 30 Mete ma au oke makasi neu Manetualain, boe ma au u'a, na, hatina de hataholi kokolak natuda au?
31 De ei nau mi'a do, minu do, kada tao hata, na, tao basa-basan fo ei matudu Manetualain nade malolen. 32 Boso tao makatoto'ak hataholi Yahudi, do, hataholi ta Yahudi, do, Manetualain hataholi kamahelen nala. 33 Tao sama leo au ia. Huu au soba-soba fo tao amahoko basa sala nai basa dede'ak lala'en. Au ta kada soba tao malole soa-neu au. Tehuu au soba tao malole soa-neu basa sala, fo sila boe oo hambu nasalala'ek.