Lamatuak Yesus nasoda fali!
20
Sosoda ina, fo ndia sosoda beuk fai kaesan, Maria neme nggolo Magdala mai fafai anan neni Yesus laten neu. Losa ele, de nita batu ina-huuk fo ala kenan neu lates ndia, nana loli henik neme mamanan mai so. 2 Boe ana nalai neni Simon Petrus, ma au, fo ndia Yesus ana mana tunggan fo Ana suek ndia, de nafada nae, “Ala lamana'o leni ita Lamatuan neme Ndia laten dale mai so! Ai ta bubuluk ala tao Ndia nai bee!” 3 Boe ma au ua Petrus malai mini lates ndia miu. 4 Ai malai no'u, tehuu au alaik lai-lai lena heni ndia. De au losa akahuluk nai lates ndia. 5 Tehuu au ta maso uni lates dale uu. Kada au titilo dalek uu. Nai ndia, au ita tema banggana'uk fo ala paken mboti-fefeo neu Yesus mbombolan.
6 Tehuu ledo-eik Petrus losa, boe ma ana maso lates dale neu. Ndia boe oo nita tema banggana'uk manai ndia. 7 Ndia boe oo nita lesu esa fo ala paken mboti neu Yesus langgan. Tehuu lesu ndia, nana dikuk, ma ana kofe'e no tema banggana'uk ndia. 8 Boe ma au, fo mana losa akahuluk lates ndia, uni lates dale uu boe. Ledo-eik au ita basa sila, boe ma au amahele Yesus kokola makahulun nae, dei fo Ana nasoda fali neme Ndia mamaten mai. 9 Huu faik ndia, ai mana dadik Ndia ana mana tunggan nala bei ta bubuluk Manetualain Susula Malalaon nana sulak memak so nae, Karistus musi nasoda fali neme Ndia mamaten mai. 10 Basa boe ma ai dua nggai fali.
Lamatuak Yesus natudu aon neu Maria maneme nggolo Magdala mai
11 Tehuu Maria bei nambadeik nai lates ndia deak. Ana namatani nakandoo. Ledo-eik ana bei namatani, boe ma ana titilo neni lates dale neu. 12 Ana nita Manetualain ata nusa sodan dua. Ala pake balo'a fulak. Dua sala langgatuuk lai mamanak fo afik hataholi la mbeda Yesus mbombolan. Esa nanggatuuk nai Yesus langgan mamanan. Esa bali nanggatuuk nai Yesus ein mamanan. 13 Dua sala latanen lae, “Hatina de ka'a inak mamatani?”
Boe ma ana nataa nae, “Au amatani, huu ala ko'o leni au Lamatuang mbombolan. Tehuu au ta bubuluk ala tao Ndia nai bee.” 14 Ana kokolak nate'e leo ndiak, boe ma ana suli dea neu. Ana nita hataholi esa nambadeik nai ndia, tehuu ana ta nalelak, Hataholi ndia, na Yesus.
15 Boe ma Yesus natanen nae, “Hatina de ka'a inak mamatani? Ka'a inak sangga see?”
Maria nae hetuk hataholi ndia kada mana manea nai mamana malole ndia. Boe ma ana kokoen nae, “Ama. Mete ma ama ndia ko'o muni Ndia mbombolan, na, mafada dei, te ama mbedan nai bee. Ela au unin neni mamana fe'ek uu fo atoi neulalaun. Tulun dei!”
16 Boe ma Yesus noke nalan, de nae, “Maria.”
Boe ma ana nasale Yesus, de nae, “Raboni!” (Nai dede'a Aram, ndandaan nae, “Au Meseng!”)
17 Yesus nafadan nae, “Boso daba Au dei, huu Au bei ta hene uni Au Amang nai nusa sodak uu. Tehuu ka'a inak muu leo, fo mafada Au tolanoo nggala mae, ‘Au sangga hene uni Au Amang uu. Ndia boe oo ei Amam. Ndia ndia, Au Manetualain boe. De Ndia ndia, ei Manetualain boe.”’
18 Basa boe ma Maria maneme Magdala mai, neu tui Yesus ana mana tunggan nala nae, “Au atonggo ua ita Lamatuan Yesus so!” Boe ma ana nafada Yesus hehelun neu sala.
Lamatuak Yesus natudu aon neu ana mana tunggan nala
19 Faik ndia la'e-neu Sosoda ina, fo ndia sosoda beuk fai kaesan. Ledo bei fo tesa. Boe ma Yesus ana mana tunggan nala lakabubua. Ala nggoe lisa uma lelesun nala, huu ala bii hataholi Yahudi malanggan nala. Boe ma Yesus mai nambadeik neu sila laladan nala, de nae, “Soda-molek!” 20 Ledo-eik Yesus kokolak nae leo ndiak, boe ma Ana natudu mbiik kala manai Ndia liman ma Ndia tenden. Ndia ana mana tunggan nala lamahoko lalan seli lita sila Lamatuan. 21 Boe ma Yesus nafada sala nae, “Ela ei sodak ma dalek ndoo-ndoo. Masaneda, Au Amang nadenu Au talo bee, na Au boe oo adenu ei leo ndiak.” 22 Ana kokolak nate'e leo ndiak, boe ma Ana deka-deka no sala, de Ana fuu Ndia ani hahaen neu sila esa-esak. Boe ma Ana nae, “Au fee Manetualain Dula-dale Malalaon neu ei. Simbo mala Ndia. 23 Mete ma ei mae hataholi salan mopo henin, na, Manetualain boe oo koka heni salak kala sila so. Tehuu mete ma ei mae, hataholi ndia salan bei nahele, na, Manetualain boe oo ta koka heni salak kala sila.”a
Lamatuak Yesus no Tomas
24 Esa neme Yesus ana mana tungga kasanahulu duan nala mai. Naden Tomas, fo lateme lae, ‘kakana kaduak’. Ledo-eik Yesus mai natudu aon neu sala, te Tomas ta sama-sama no ana mana tungga fe'ek kala. 25 Huu ndia de ledo-eik ndia nonoon nala lae, “Ai matonggo mia ita Lamatuan so,” boe ma nataa nae, “Leo iak. Au musi ita mbii nana mbakuk nai Ndia liman dei. Ma au musi dombe au lima ku'ung neu hinak manai tenden. Huu mete ma au bei ta tao leo ndiak, na, au bei ta nau amahele ae, Ana nasoda fali so.”
26 Basa sosoda ina esa bali, boe ma Yesus ana mana tunggan nala sama-sama lo Tomas lai uma esa. Mae lelesu la nana nggoek, tehuu Yesus maso de nambadeik nai sila laladan nala. Ana nahala no sala nae, “Soda-molek!” 27 Boe ma Ana kokolak neu Tomas nae, “Look o lima ku'um mai, fo palisak Au limang dei. Basa na mai mafaloe hinak manai au tendeng. De mamahele leo mae, Au asoda fali so! Nggali heni o namemeda ta kamahelem ndia.”
28 Tomas nataa nae, “Awii, Ama! Hatematak ia au amahele tetebes! Ama ia, na ndia au Lamatuang fo naena haak palenda au, ma au Manetualain boe!”
29 Boe ma Yesus nafadan nae, “Tomas! O mamahele au asoda fali, huu o mita Au munik o mata hehelim. Tehuu maua-manalek bali, neu hataholi la fo ta mana lita Au, tehuu ala lamahele.”
Susulak ia maksut
30 Yesus boe tao tanda heran fe'ek, fo au ta sulak kana nai susulak ia. Ndia ana mana tunggan nala lita tanda heran nala no mata hehelin nala. 31 Tehuu dede'ak fo au sulak kana nai susulak ia so, au sulak kana fo suek ei mamahele mae,
Yesus ndia, na ndia Karistus fo Manetualain helu memak kana fo sangga nadenun mai so.
Yesus boe oo, Manetualain Anan.
Ma ledo-eik ei mamahele neu Ndia, ei hambu sodak tetebes fo ta mana ketuk, huu ei dadik Ndia hataholin nala so.