2 Neu Sosoda ina fafai anan, boe ma telu sala leni lates leu. 3-4 Ala losa dala laladak, boe ma telu sala lakokola lae, “Wei! Dei fo see ndia bisa fali ita, fo loli heni batu ina-huuk ndia neme lates lelesun mai? Ita telu nggata, neu ko ta tabe'i loli batu ndia, huu batu ndia ina-huun ana seli maa!”

Ala losa ndia, tehuu lita batu ndia nana loli henik so. 5 Boe ma ala lakandoo leni lates dale leu. Tehuu ala nggengge lalan seli, huu lita tou anak esa balo'an fula manggadilak nanggatuuk nai sila boboa konan. 6 Boe ma tou anak ndia kokolak no sala nae, “Wei! Ei boso bii! Au bubuluk ei mai sangga Yesus maneme Nasaret mai fo ala tao lisan nai ai ngganggek lain ndia. Tehuu Ndia ta nai ia so. Ana nasoda fali so. Mai fo mita aom mamanak fo lakambembeu Yesus mbombolan ndia louk so. 7 Ei fali lai-lai leo! Miu mafada Petrus asa mae, Yesus nasoda fali so. Ana la'o nakahuluk neni Galelea neu so. Dei fo ala latonggo lo Yesus nai ele, sama leo makahulun nafada basa sila so. Ei fali leo!”^a

8 Ledo-eik inak kala sila lita mamanak ndia louk tetebes so, boe ma ala nggengge. De lalai deak leu. Boe ma ala fali lai-lai. Ala ta lafada esa boe nai dala laladak, huu ala bii lalan seli.

9 Sosoda ina fafain, Yesus neu natudu aon makasososan neu Maria maneme Magdala mai, fo makahulun Yesus husi nitak nitu hitu leme inak ndia aon dale mai.^b 10 Ana nita basa Yesus, boe ma ana fali, de neu nafada basa hataholi la fo makahulun mana tungga Yesus. Ala bei lakabubua lo dale hedik, ma luun nala tuda huu lasaneda Yesus mamaten. 11 Basa boe ma Maria nafada sala nae, “Talo bee de ei bei dale hedi? Boso dale hedi bali, huu Yesus nasoda fali so. Isinaak bei fo au atonggo ua Ndia!”

Tehuu sila basa sala lataa lae, “Wei! O pepeko ndia!”

12 Basa boe ma Yesus ana mana tunggan dua leni nggolok esa leu. Ala losa dala laladak, boe ma Yesus natudu aon neu dua sala, tehuu Ana namata-ao fe'ek so. Tehuu ta dook boe ma lalelak kana. 13 De dua sala fali leu lafada nonoon nala lae, “Wei! mamanene dei! Isinaak bei fo ai matonggo mia Yesus neme dala laladak!”

Tehuu basa nonoon nala lataa lae, “Wei! Ei boso pepeko leo ndiak!”

14 Boe ma Yesus natonggo no ana mana tungga kasanahulu esan nala, neu faik fo bei la'a-linu. Nafada sala nae, “Wei! Ei langga batu malan seli! Hataholi la lafada ei lae, lita Au no sila mata de'e hehelin nala so, tehuu ei ta nau mamahele faa boe maa! Ei mafada mae, basa sala pepeko ndia! Hatematak ia Au mai matang so. Memak Au mate so, tehuu hatematak ia, Au asoda fali so! Ei mita matam leo.

15 De hatematak ia ei musi miu la'ok ndule dae-bafok ia, fo miu mafada basa hataholi la la'e-neu Au Tutui Maloleng ia.^c 16 Hataholi fo namahele neu Au, ma ana hambu salanik, na, dei fo Manetualain nasala'e nala ndia, fo ana leo losa dodoon neu no Manetualain nai nusa sodak. Tehuu hataholi fo ta namahele, na dei fo ana hambu huhukuk, ma Manetualain ta simbok kana nai nusa sodak, de ana leo nai deak losa dodoon neu. 17 Ma hataholi fo namahele neu Au, dei fo ala tao tanda heran mata-matak kala fo basa hataholi la lamahele lae sila koasan ndia memak neme Manetualain mai. Conto leo, dei fo ala husi nitu la pake Au nadeng. Dei fo Manetualain tao nala sala bisa lakokola pake dede'a fe'ek, fo ala ta bubuluk. 18 Boe ma mete ma ala to'u mengge kalasok do, linu la'e laso, na, ala ta hambu soe. Ma mete ma ala tao liman nala fo hule-haladoi fee hataholi kamahedik, na, dei fo hataholi ndia hai.”

19 Yesus kokolak basa no ana mana tunggan nala, boe ma Manetualain so'un neni nusa sodak neu. Nai ndia Ana dadik neu Manetualain lima konan, fo dua sala palenda leu esa.^d

20 Basa boe ma ana mana tunggan nala tungga Ndia palendan. Ala leni basa sudi bee leu, de ala tui-bengga Yesus Tutui Malolen neu basa hataholi la. Boe ma Manetualain fee sala koasa, fo ala tao tanda heran sama leo Yesus nafadak ndia so. Boe ma hataholi no'uk kala lamahele Yesus, huu ala bubuluk lae, Tutui Malole ndia, memak tetebes.

9 Ledo-eik ina kateluk kala sila losa Petrus no nonoon nala, boe ma ala tui sala la'e-neu basa dede'ak fo isinaak tou anak ndia kokolak no sala leme lates.^e 10 Basa boe ma Yesus mesak kana palenda ana mana tunggan nala, fo leu tui-bengga la'e-neu Tutui Malole ia nai basa mamanak lala'en, losa dae-bafok bu'un nala. Tutui Malole ia natudu dalak fo Manetualain nasala'e nala hataholi la leme sala-singgon nala mai, suek lasoda lakandoo lo Ndia.

Tutui Malole ia, memak tetebes. Huu ndia de nahele nakandoo, losa ta mana basak.]