3 Simon Petrus nafada nonoon nala nae, “Au sangga uu dala.”

Boe ma ala lataa lae, “Hei! Ai tungga boe.” Basa de ala leni dano bifin leu. Boe ma ala hene ofak lain leu fo leu sangga i'ak. Tehuu le'odaen ndia, ala ta hambu i'ak esa boe.^a

4 Fo'a fafain, boe ma Yesus nambadeik nai dano bifin. Tehuu Ndia ana mana tunggan nala ta bubuluk Ndia ndia, Yesus. 5 Boe ma Ana nanggou, de natane sala nae, “Ka'a nggala ei! Hambu i'ak so, do?”

Ala lataa lae, “Louk, Ka'a! Ai ta hambu esa boe.”

6 Boe ma Ana nafada sala nae, “Hena nggali masafali dala neu ofak boboan seli. Dei fo ei hambu.”

Boe ma ala tao tunggan, de ala hambu i'ak. Tehuu i'ak makadotok, losa ala ta bisa hela falik dala leni ofak dale leu.^b

7 Au nai ndia boe. Au ia, ana mana tunggak fo Yesus suek. Boe ma au afada Petrus ae, “Awii! Ndia ndia, ita Lamatuan!”

Simon Petrus namanene au kokolang, boe ma ana odu falik badun, de ana palaboku dano dale neu, de ana ngga'e madak lain neu. 8 Huu ofak ndia meda kada meter 100 neme madak lain mai. Boe ma ndia nonoon nala sefe ofak madak lain leu, ma hela leni dala fo henuk no i'ak ndia neme ofak ikon mai.

9 Ledo-eik ala losa madak lain, te lita ha'i kaak mana mbilak nai ndia. Nai ha'i lain, hambu i'ak. Ma hambu loti boe. 10 Yesus nafada sala nae, “Mini i'ak luma neme bei fo ei dala malak kala isinaak ndia mai.”

11 Basa boe ma Simon Petrus hene fali ofak dale neu, de ana hela dala ndia neni madak lain neu. Dala ndia henuk no i'a ina-huuk. Dedesin, 153. Mae i'ak no'uk leo ndiak, tehuu dala ta sidan.

12 Boe ma Yesus noke sala nae, “Mai, fo mi'a dei!”

Ala bubuluk so lae, Ndia ndia, sila Lamatuan. Huu ndia de ala ta lambalani latane lae, “Ka'a ia, see?” 13 Boe ma Yesus ha'i loti ma i'ak, de fee sala.

14 Ndia, fo kala'i telun Yesus natudu Ndia aon neu Ndia ana mana tunggan nala, neu faik fo Ana nasoda fali neme Ndia mamaten mai so.

15 Ledo-eik la'a late'e, boe ma Yesus natane Simon Petrus nae, “Heeh, Simon, Yohanis anan. Leo bee? O sue Au lena heni o nonoom mala ia sue Au, do?”

Ana nataa nae, “Tetebes! Lamatuak bubuluk so, au sue Lamatuak.”

Boe ma Yesus helun nae, “Mete ma leo ndiak, na, hoo neulalau Au bi'i-lombo ana nggala fo ala hambu nana'ak fo la'a.”

16 Boe ma Yesus natane seluk ndia nae, “Simon, Yohanis anan. Leo bee? O sue Au, do?”

Ana nataa nae, “Tetebes, Lamatuak! Lamatuak bubuluk so, au sue Lamatuak.”

Boe ma Yesus helun nae, “Mete ma leo ndiak, na, makaboi neulalau Au bi'i-lombo nggala.”

17 Basa boe ma Yesus natane seluk ndia bali nae, “Simon, Yohanis anan. Leo bee? O ia Au nonoong, do?”

Boe ma Petrus dale hedi memak, huu Yesus natanen la'i telu so nae, “O sue Au, do?” Basa de nataa nae, “Lamatuak bubuluk basa dede'ak kala so. De Lamatuak bubuluk so mae, au ia, Lamatuak nonoon.”

Boe ma Yesus helun nae, “Mete ma leo ndiak, na, hoo neulalau Au bi'i-lombo nggala fo ala hambu nana'ak fo la'a. 18 O malelak Au maksut, do? Au boe oo nau afada leo iak: makahulun neu faik fo o bei ta'e anam, na o mateme pake aom badu, ma pake kalikee, boe ma o la'o sudi bee muu tungga o hihiim. Tehuu mete ma o mamalasi so, na, dei fo o look o limam fo hataholi fe'ek mba'a o pake o kalikee hehelim. Basa boe ma ala hela loo o muni mamanak esa fo o ta nau muu.” 19 (Yesus kokolak leo ndiak fo nafada Petrus la'e-neu hata fo dei fo ana dadi nai ndia aon. Huu dei fo Petrus mamaten ndia, natudu Manetualain koasa ina-huun.)^c

Basa ndia, boe ma Yesus nafada Petrus nae, “Mai dadik Au hataholing leo!”

20 Faik ndia, Petrus heok nasafali de ana suli dea neu. Boe ma nita au tungga sila dua sala dean. Au ia, fo ndia Yesus suek. Au boe oo anggatuuk nai Yesus boboan, neu faik fo ai mi'a feta Paska. Au ia, atane Ndia ae, “Lamatuak! See ndia se'o heni Lamatuak?”^d 21 Ledo-eik Petrus nita au, boe ma natane Yesus nae, “Lamatuak! Isinaak Lamatuak kokolak la'e-neu au so. Tehuu talo bee no ndia?”

22 Yesus nafada Petrus nae, “Ndia o dede'am ta ndia. Leo Au nau fo kada ana nahani ia, losa Au fali maing, na ndia dede'an hata? Penting ndia, o musi masaneda hata fo isinaak Au helu o ndia, fo ndia: mai fo dadik Au hataholing leo.”

23 Huu Yesus kokolak leo ndiak, de Ndia ana mana tungga fe'en nala mulai lakokola lae, “Yohanis ndia, neu ko tana mate.” Naa te Yesus ta kokolak leo ndiak. Ana kokolak ndia, na ndia: “O dede'am ta ndia. Leo Au nau, kada ana nahani ia, losa Au fali maing, na, ndia dede'an hata?”

24 Ana mana tunggak fo Yesus kokolak ndia, na ndia au, Yohanis. Au ndia tui ei basa dede'ak kala ia. Au ndia ita no au mata heheling. Boe ma au ndia sulak basan. De ita bubuluk so tae, hata fo au afada ei ndia, na tetebes.

25 Ma bei hambu dede'a fe'ek no'uk fo Yesus taon. Mete ma hataholi soba sulak lala basan, mulai neme Yesus nakalala'ok Ndia uen losa basan, na, no'un seli de mae dae-bafo katemak esa boe oo ta bisa fua basa susulak kala sila.