Ta hambu dala fe'ek bali fo mole no Amak; kada nesik Yesus mesak kana
14
Yesus kokolak nakadaik nae, “Boso dale hedi. Mamahele neu Manetualain. Ma mamahele neu Au boe. 2 Nai Au Amang mamana leleon, hambu kama makadotok. Mete ma mamanak dai, na, neu ko Au afada memak ei so. Hatematak ia Au sangga uu sadia mamanak soa-neu ei nai ele. 3 Mete ma Au uu so, ma sadia basa ei mamanam mala ndia, na, dei fo Au fali maing, fo ei tungga no'u mia Au. No leo ndiak, na Au nai bee, neu ko ei nai ndia boe. 4 Huu ei bubuluk dalak so, fo neni mamanak fo Au sangga uni ndia uu.”5 Tehuu Tomas natane Ndia nae, “Lamatuak! Ai ta bubuluk Lamatuak sangga bee muu. De talo bee fo ai bisa bubuluk dalan neni ele neu?”
6 Boe ma Yesus nafada nae, “Ta hambu dala fe'ek fo noo hataholi neni Amak neu nai nusa sodak. Kada nesik Au mesa nggau. Huu Au ia dalak neni Manetualain neu. Au ia, fo to'u hata fo tetebes. Ma Au ia, fo mana fee sodak tetebes. Ta hambu dala fe'ek bali. 7 Leo ei malelak tebe-tebe Au, na ei boe oo malelak Au Amang. De mulai neme hatematak ia mai, ei malelak Ndia so, ma mita Ndia so boe.”
8 Filipus noke nae, “Lamatuak! Tulun matudu Lamatuak Aman neu ai dei. Huu kada ndia, na dai so.”
9 Boe ma Yesus nafadan nae, “Filipus. Au sama-sama ua ei doo basa ia so, tehuu ei bei ta malelak tebe-tebe Au, do? Huu hataholi fo nita Au so, na ndia sama leo ndia boe oo nita Au Amang so. Boe ma hatina de ei moke Au atudu Amak neu ei bali? 10 Talo bee? Ledo-eik Au ae Au nana mba'ak ua Amak, ma Amak boe oo nana mba'ak no Au, na o mamahele muu Au do, taa? Dede'a-kokolak fo Au kokolak neu ei ndia, ta naoka nai Au mesa nggau, tehuu naoka nai Au Amang. Ma Ana pake Au fo tao akandoo Ndia uen. 11 Mamahele Au neu faik fo Au ae, Au nana mba'ak neulalau ua Au Amang, ma Ndia boe nana mba'a neulalau no Au. Tehuu mete ma ei ta bisa mamahele leo ndiak, na, kada mamahele neu Au, huu ei mita dede'ak kala fo Au taok kala sila so. 12 Au kokolang ndia, tetebes! Huu hataholi fo mana namahele neu Au, dei fo ana tao dede'ak fo sama leo Au taok ndia so boe. Huu Au uni Au Amang uu, de hata fo hataholi la taon, dei fo lena heni Au tataong. 13 Ei fo nana mba'ak mia Au, maena haak fo mini Au nadeng. De mete ma ei hule-haladoi fo moke sudi hata minik Au nadeng,a dei fo Au tao fee ei. No leo ndiak, na Au so'u dema-demak Au Amang, fo ela basa hataholi la bubuluk. 14 Au afada seluk bali: ei hule-haladoi fo moke sudi hata minik Au nadeng, na dei fo Au tao fee ei.”
Lamatuak Yesus helu sangga nadenu Manetualain Dulan mai
15 Yesus kokolak nakadaik nae, “Mete ma ei sue Au, na, ei tao tungga Au palenda nggala. 16-17 Au oke Au Amang, fo dei fo mete ma Au ta sama-sama ua ei so bali, na, Ana fee ei Mana Makalala'ok esa fo natudu ei dalak. Ndia ndia, Manetualain Dulan fo nanoli ei hata fo tetebes. Hataholi luma lai dae-bafok ia, ta nau simbok Ndia, huu ala ta bisa lita Ndia, ma ta lalelak Ndia. Tehuu ei malelak Ndia, huu Ndia nana mba'ak no ei. Dei fo Ndia nasoda nai ei dalem mala. Ma Ndia boe oo sama-sama no ei nakandondoo henin.
18 No leo ndiak, Au ta ela ei mesa nggei, sama leo kakanak fo ina-aman taa. Tehuu masaneda, huu dei fo Au fali uni ei mai. 19 Ta dook bali, te hataholi fe'ek kala malai dae-bafok ia, ta lita Au so bali. Tehuu neu ko ei mita Au. Huu Au asoda fali, de ei boe oo hambu sodak tetebes. 20 Ma mete ma Au asoda fali, na, dei fo ei bubuluk no teteben mae, Au nana mba'ak ua Au Amang; ei nana mba'ak mia Au; ma Au nana mba'ak ua ei boe.
21 Hataholi fo simbo ma tao tungga Au palenda nggala, na ndia ndia mana sue Au. Ma Au Amang boe oo sue hataholi fo mana sue Au leo ndiak. Au boe oo sue ndia, ma Au atudu Au aong neun.”
22 Hataholi esa nai ndia, nade Yudas. Ndia ndia, ta Yudas Iskariot. Ledo-eik ana namanene Yesus kokolan ndia, boe ma natane nae, “Lamatuak sangga matudu aom neu ai. Tehuu hatina de Lamatuak ta nau matudu aom neu hataholi fe'ek kala malai dae-bafok ia?”
23 Yesus nataa nae, “Leo iak. Hataholi fo mana sue Au, dei fo ana tao tungga Au Dede'a-kokolang. Au Amang boe oo sue ndia. De Au ma Au Amang masoda dalek esa mia ndia. 24 Tehuu hataholi fo ta mana sue Au, na ndia boe oo ta tao tungga Au Dede'a-kokolang. De basa hata fo ei mamanenen neme Au ia mai, ta naoka nai Au, tehuu naoka nai Au Amang fo mana nadenu Au.
25 Hatematak ia Au bei ua ei no'u. Huu ndia de Au afada memak ei dede'ak kala ia. 26 Tehuu ta dook bali, te Au Amang sangga nadenu Mana Makalala'ok esa mai, fo ndia Ndia Dula-dale Malalaon. Dulak ndia, neu ko nggati Au nai dae-bafok ia. Ndia uen, ndia: nanoli ei basa dede'ak kala, ma tao nasanenedak ei basa dede'ak kala fo Au afada itak ei so.
27 Neu faik fo Au la'o so, na Au tao ei bisa masoda no mole ma dale ndoo-ndook. Kada Au mesa nggau bisa fee dale ndoo-ndoo mata leo ndiak. Basa hata malai dae-bafok ia ta bisa tao ei dalem mala ndoo-ndoo leo ndiak. De boso makandaa ma bii. 28 Ei mamanene mitak Au afada ei ae, ‘Au la'o ela ei, basa dei fo Au fali maing.’ Boso dale hedi. Mete ma ei sue Au, na, ei dalem mala lamahoko, huu Au uni Au Amang uu. Au Amang ndia, lena heni Au. 29 Masaneda, huu Au afada memak ei so. No leo ndiak, mete ma dede'ak kala ia dadi, na, ei bisa mamahele Au. 30 Ta dook te Au ta akokola ua ei so bali. Huu nitu la malanggan mai. Ana to'u palenda nai dae-bafok ia, tehuu ndia koasan ta la'e Au. 31 Mae ana mai, tehuu Au la'ok akandoo fo tao tungga Au Amang palendan. Ndia natudu neu hataholi malai dae-bafok ia nae, Au sue Au Amang alan seli.
De, mai fo ita teu leo!”