2 Tehuu mana maso nesik lelesu ndia, na ndia bi'i-lombo la mana hoon fo nakaboi sala. 3 Mana manea lelesu nalelak mana hoo ndia, de ana soi lelesu fee ndia. Bi'i-lombo la lalelak mana hoo ndia halan. De mete ma ana noke sala esa-esak naden, na, ala tungga ndia deak leu. 4 Ledo-eik ana noo sala deak leu, ana la'ok nakahuluk nai mata. Bi'i-lombo la tungga dea, huu lalelak ndia halan. 5 Mete ma hambu hataholi fo bi'i-lombo ta lalelak kana, na, ala ta tunggan. Tehuu ala lalai, huu ala ta lalelak hataholi fe'ek ndia halan.”

6 Mae Yesus tui nakandandaak ndia neu sala, tehuu ala ta bubuluk ndia maksut boe.

7 Basa de Yesus nafada nakadaik neu sala nae, “Au afada ei ia, tetebes. Au sama leo lelesu nai bi'i-lombo la lalaen. 8 Basa hataholi mana makahuluk neme Au mai, ala sama leo na'o. Mae ala loke mbea-mbea, tehuu bi'i-lombo la ta lamanene sala. 9 Boe ma Au sama leo lelesu ndia. De mete ma hambu mana nau nesik Au, na, Manetualain nau nasala'e nalan neme ndia sala-singgon nala mai. Ndia sama leo ana maso neni Manetualain mamanan neu nesik Au fo mana dadik neu lelesu. Ma hataholi fo mana maso nesik Au, na ana la'ok sudi bee neu, ma ana hambu nana'a-nininuk no teteben.^a 10 Na'o la kada tao naodek, huu ala mai fo lamana'o, lakanisa, ma lakalulutu hataholi sodan. Tehuu Au uni sodak fo malolen nalan seli, huu Au mai fo suek hataholi bisa nasoda ndoo-ndoo, ma nasoda tetebes.

11 Au boe oo sama leo mana hoo malole esa. Huu mana hoo malole sadia fee ndia ao-inan losa maten, fo suek ndia bi'i-lombon nala bisa lasoda. 12 Tehuu hataholi mana manea fo nana nanggadik, mete ma ana nita busa fui esa mai, na, ana nalai, de ela bi'i-lombo la sila leme ndia. Basa de busa fui ndia kiki nala bi'i-lombo esa, boe ma bi'i-lombo fe'ek kala lalai latanggelak. 13 Hataholi mana manea ndia nalai, huu kada ana sangga doik. Ana ta mbali fo nanea neulalau bi'i-lombo la sila.

14 Tetebes! Au sama leo mana hoo malole. Au alelak Au bi'i-lombo nggala. Ma sila boe oo lalelak Au. 15 Ndia sama leo Amak nai nusa sodak nalelak Au, ma Au boe oo alelak Ndia. Au boe oo sadia fee Au ao-inang losa mate, fo suek Au bi'i-lombo nggala bisa lasoda.^b 16 Hambu Au bi'i-lombo fe'e nggala, fo bei ta lakabubua lo Au bi'i-lombo nggala lai ia. Au musi akabubua ala sala boe. Mete ma ala lamanene Au halang so, na, dei fo ala lalelak memak. Boe ma ala mai lakabubua dadik leu bubuak esa fo mana hoo esa.

17 Huu Au sadia fee Au ao-inang losa mate so, fo Au bisa asoda fali. Huu ndia de Au Amang nai nusa sodak sue Au. 18 Ta hambu hataholi esa nakaseti Au fo mate, tehuu Au mesa nggau sadia fee Au ao-inang losa mate. Au aena haak fo fee Au ao-inang. Au boe oo aena haak fo ha'i falik kana. Palenda ia, Au simbon neme Au Amang manai nusa sodak mai so.”

19 Huu ala lamanene Yesus kokolak leo ndiak, boe ma hataholi Yahudi la lasisimbo bafak bali. 20 Hambu no'uk leme sila mai lae, “Wei! Hataholi ia kamuluk! Ma Ndia boe oo nitu nalak! Hatina de ei nau mamanene neu Ndia?”

21 Tehuu hambu luma bali lae, “Ia hataholi kamuluk kokolan ta ia, hetu? Kokola leo ndiak, ta kalua nitak neme nitu la bafan mai! Ma nitu la boe oo ta tao lala hataholi mbokek bisa nita bali, hetu?”

22 Faik ndia, hataholi Yahudi la nau tao sila anggaman fai malolen esa. Fai malole ndia, nandaa no fai makasufuk. Nai feta ndia, hataholi Yahudi la lasaneda faik fo hataholi fe'ek tao langgenggeo Manetualain Uma Ina Huhule-haladoin nai kota Yerusalem, boe ma ala tao lalalaon de ala tabis seluk kana.^c 23 Yesus la'ok ndule nai Uma Ina Huhule-haladoik pasan, nai mamanak fo makahulun ala lae, ‘Mane Soleman Uma Teras’. 24 Boe ma hataholi Yahudi malanggan nala mai lakalilimbu lala Ndia lae, ‘Wei! Ita musi tahani losa faik bee, bei fo ita bisa bubuluk? Mete ma Ama ia, Karistus, na, tulun mafada manggaleledon dei.”

25 Yesus nataa nae, “Au afada memak neu ei so, tehuu ei ta nau mamahele. Naa te dede'ak kala fo Au taok kala, basan kada tungga Au Amang palendan. Dede'ak kala sila latudu lae, Au ia, see. 26 Tehuu ei ta mamahele Au, huu ei ta Au bi'i-lombo nggala. 27 Huu Au bi'i-lombo tetebeng ndia, lalelak Au halang. Sila boe oo tungga Au. Au boe oo alelak sila. 28 Au fee sala sodak tetebes fo ta mana ketuk, ma sila boe oo ta laelak lo Manetualain. Ta hambu hataholi esa boe fo bisa namoa nala sila leme Au mai. 29 Au Amang nai nusa sodak ndia fee sala neu Au. Ndia ana seli lena heni basan. Huu ndia de ta hambu hataholi esa boe fo ana bisa namoa nala sala leme Ndia liman mai. 30 Huu Au Amang ma Au ia, esak.”

31 Hataholi Yahudi malanggan nala lamanene leo ndiak, boe ma ala ha'i batu la'i esa bali, fo sangga mbia lisa Yesus. 32 Boe ma Yesus nafada sala nae, “Heeh! Au atudu dede'a malole no'uk neme Au Amang mai so. Neme dede'a malole fo Au atuduk sila, esa dadi to'ok fo ei sangga mbia misa Au, do?”

33 Ala lataa lae, “Ai ta mbia o, huu o tao dede'a malole. Tehuu ai huku mbia o, huu o kokolak makadadaek malan seli so! O kada hataholi basa faik, tehuu o so'u aok sama leo Manetualain! Ana seli ndia so bali maa!”^d

34 Boe ma Yesus nataa nae, “Talo bee? Nai Anggama Heti-heun fo ei to'uk ndia, nana sulak nae, ‘Au afada memak ae, ei malanggam mala ia, sama leo lamatuak.’^e 35 Ita bubuluk so tae, basa nana sulak nai Manetualain Susula Malalaon ndia, tetebes, ma ta bisa koka henin. Mete ma Manetualain seseik nae, malangga dae-bafok ia sama leo ‘lamatuak’, na, nakalenak neu Au bali. 36 Ama nai nusa sodak hele nala Au, ma nadenu Au uni dae-bafok ia mai. De nandaa nalan seli mete ma Au ae, Au dadik Manetualain Anan! Ta maso langga utek, mete ma ei mae, Au kokolang ndia nakadadaek nalan seli. 37 Leo iak. Mete ma Au ta akalala'ok Au Amang uen, na, ei boso mamahele Au. 38 Tehuu Au akalala'ok Ndia uen akandoo. De mae ei ta nau mamahele Au, tehuu mae kada faak boe ei musi simbok tanda heran fo Au taok ndia. No leo ndiak, na ei boe oo bisa bubuluk mae, Au Amang nana mba'ak no Au. Ma Au boe oo nana mba'ak ua Ndia.”

39 Basa boe ma ala soba seluk fo sangga humu Ndia, tehuu mbo'i heni Ndia.

40 Boe ma Yesus neni seluk lee Yarden selik neu, nai mamanak makasososan fo makahulun Yohanis mana salanik, salani hataholi. De Ana leo tataak neme ele.^f 41 Hataholi no'uk mai sangga Ndia. Boe ma ala lakokola lae, “Yohanis ta bisa tao tanda heran esa boe. Tehuu basa hata fo ana kokolak la'e-neu Yesus ia, tetebes bae maa!” 42 Boe ma hataholi no'uk lai ele lamahele neu Ndia.