Lamatuak Yesus tao nahai hataholi lu'uk esa nai kolam Batesda
5
Basa boe ma hambu fai malole anggama Yahudi esa. Huu ndia de Yesus asa la'o leni kota Yerusalem leu. 2 Nai ndia hambu kolam esa fo teras lima deka-deka no lelesu esa, fo naden Lelesu Bi'i-lombo. Nai sila dede'a Aram, na, kolam ndia nade ‘Batesda’.a 3 Hambu hataholi kamahedik no'uk kala fo lateme lahani lai teras sila. Conto leo: hataholi mbokek, hataholi lu'uk, ma hataholi fo ta bisa lakababalek. [Ala lahahanik ledo-eik oe ndia mulai nakababalek. 4 Huu la'i-la'i esa, Manetualain ata nusa-sodan nala leni oe dale leu, fo tao oe nakababalek. Basa ndia, na see maso nakahuluk neni oe ndia dalek neu, na, ndia ndia hai neme ndia hedin mai.]b5 Nai ndia hambu hataholi esa, namahedi teuk 38 so. 6 Boe ma Yesus nita ana sunggu nai ndia. Yesus bubuluk hataholi ndia namahedi dook ia so, de Ana natanen nae, “Ka'a! O hii hai, do?”
7 Ana nataa nae, “Au nau Lamatuak. Tehuu ndia dede'an, na ndia: mete ma oe mulai nakababalek, na, ta hambu hataholi fo ko'o au uni oe dale uu. Mete ma au mesa nggau soba, naa te hataholi fe'ek maso nakahuluk neme au mai so.”
8 Boe ma Yesus nadenun nae, “Mambadeik leo! Lulu mala o nene'im, fo fali leo.” 9 Yesus kokolak nate'e, boe ma hataholi ndia hai memak. Basa boe ma ana fo'a, ha'i nala nene'in, de la'o fali.
Dede'ak ndia nandaa no hataholi Yahudi la fai huhule-haladoin. 10 Boe ma hataholi Yahudi malanggan nala lafada hataholi fo bei fo ana hai ndia lae, “Wei! O bubuluk, do taa? Leledon ia, fai hahae tao ues. Tungga ita anggaman heti-heun, na ta bole hataholi lu'a neni nene'in, huu ndia naden tao ues!”c
11 Ana nataa nae, “Awii, ama nggala ei! Boso mamanasa. Huu Hataholi mana tao nahai au ndia, palenda au nae, ‘Lulu mala o nene'im, fo fali leo.”’
12 Basa de latanen lae, “Heeh! Mana madenu o fo ha'i mala o nene'im ndia, na see?”
13 Tehuu hataholi fo bei fo hai ndia, ta nalelak Yesus ndia, na see. Yesus kalua no nee-neek, huu hataholi no'uk kala lai ndia.
14 Ta dook boe ma Yesus natonggo no hataholi ndia neme Uma Ina Huhule-haladoik pasan. Boe ma Yesus nafadan nae, “Mamanene baa! Hatematak ia o hai so. Boso tao salak bali, fo suek o boso hambu huhuku mabela lena ia bali.”
15 Boe ma hataholi ndia neu sangga hataholi Yahudi malanggan nala, suek nafada sala nae, “Mana tao nahai au ndia, nade Yesus.” 16 Huu ndia de ala mulai tao doidoso Yesus, huu Ana tao nahai hataholi, nandaa no fai huhule-haladoik.
17 Tehuu Yesus nafada sala nae, “Leo iak. Au Amang ta hahae nalelak tao ues. De Au boe oo tao ues akandoo.”
Lamatuak Yesus manaku aon nae, Ndia ndia, Manetualain Anan
18 Huu hataholi Yahudi malanggan nala cap so lae, Yesus la'o lena sila heti-heun fai hahae tao ues, de ala lambue sangga dala manggalauk nalan seli, fo nau tao lisa Ndia. Nakalenak bali, Ndia boe oo nafada nae, Manetualain ndia, na Ndia Aman. No kokolak leo ndiak, na Ana so'uk Ndia aon sama leo Manetualain.
19 Basa de Yesus nafada sala nae, “Tetebes! Au afada memak ae, Au ta bisa tao hata esa boe neme Au ao-ina heheling mai. Huu Au ia, Manetualain Anan. Huu ndia de kada Au bisa tao tungga hata fo Au ita Amak taon. Au ita Au Amang tao hata, na, Au boe oo tao tungga leo ndiak. 20 Au Amang nai nusa sodak sue Au nalan seli, fo Ndia Anan. Ndia boe oo natudu Au basa hata fo Ana taok kala. Dei fo Ana nau natudu Au dede'ak kala ia fo ina-huuk nalan seli bali, fo suek ei mita, ma ei heran malan seli! Leo iak: 21 Au Amang tao nasoda falik hataholi mana matek. Leo ndiak boe, dei fo Au fee sodak tetebes neu sudi see, tungga Au hihiing. 22 Teteben, leo iak: Amak mesak kana ta naketu huhukuk neu hataholi. Tehuu Ana fee basan neu Au, huu Au ia, Ndia Anan. Boe ma Au ndia aketu ae, hataholi tao ndoos, do taa. 23 Au Amang nahiik fo basa hataholi la fee hada-holomata leu Au, sama leo basa hataholi la fee hada-holomata leu Ndia. Huu hataholi fo ta mana fee hada-holomata neu Au, fo Ndia Anan ia, na, ndia boe oo ta fee hada-holomata neu Amak fo mana madenu Au so.
24 Tetebes! Au afada memak. Hataholi fo mana namanene Au kokolang, ma namahele neu Manetualain fo mana nadenu Au, na, ana hambu sodak tetebes fo ta mana ketuk. Manetualain ta huku ndia bali. Huu hataholi ndia, ta hambu huhuku mate bali, tehuu ana maso dadik hataholi fo mana nasoda nakandoo no Manetualain. 25 Tetebes! Au afada memak. Ndia fain deka-deka mai so, mulai hatematak ia so, fo hataholi mana matek kala lamanene Au halang. Au fo ndia Manetualain Anan. Huu hataholi fo mana namanene ma simbok no malole Au kokolang ia, dei fo ana hambu sodak tetebes. 26 Basa kasodak kala laoka lai Au Amang. Ndia boe oo fee Au sodak tetebes. Huu Au ia, Ndia Anan. 27 Au Amang boe oo fee Au haak ma koasa, fo aketu basa hataholi la huhukun, huu Au ia, Hataholi Isi-isik. 28 Ei boso heran, huu doo-doo ana, basa hataholi mana matek kala lamanene Au halang. 29 Boe ma dei fo ala lasoda fali. De ala kalua leme lates sala mai. Hataholi fo makahulun tao dede'a malole, hambu sodak tetebes fo ta mana ketuk. Tehuu hataholi fo makahulun ana tao manggalauk, na, nana hukuk nakandoo.”d
Hambu sakasii no'uk lafada la'e-neu Lamatuak Yesus
30 Yesus kokolak nakadaik nae, “Au ta bisa tao hata esa boe, mete ma Au bei ta amanenen neme Au Amang mai. Mete ma Au amanene basa so, bei fo Au aketu hataholi dede'an. Huu ndia de hata fo Au aketun ndia, tetebes. Au ta kada soba tungga Au hihii heheling, tehuu tungga Au Amang hihiin. Huu Ndia ndia nadenu Au!
31 Mete ma Au mesa nggau afada la'e-neu Au ao-ina heheling, na, Au kokolang ndia, ta tetebes. 32 Tehuu hambu hataholi fe'ek dadik sakasii la'e-neu Au. Ma Au bubuluk sila kokolan nala ndia tetebes la'e-neu Au. 33 Ei madenu mitak hataholi, fo neu natane Yohanis Mana Salanik. Boe ma ana kokolak tetebes la'e-neu Au.e 34 Au mesa nggau ta paluu hataholi leo ndiak fo sakasii la'e-neu Au. Tehuu Au tao asanenedak dede'ak kala ia, fo suek ei bisa hambu nasalala'ek mima ei sala-singgom mala mai. 35 Yohanis kokolan ndia, leo bali banduk mana mbila manggaledok. Neu faik fo mbilan bei manggaledok, na, ei dalem mala lamahoko.
36 Naa te hambu Hataholi fo ana selin lena heni Yohanis fo Ana kokolak tetebes la'e-neu Au. Na ndia Au Amang nai nusa sodak fo fee Au ues no'uk, suek Au akalala'ok losa basan. Ues sala ia latudu buti lae, Amak nadenu Au. 37 Ma Ndia ndia nadenu Au, fo kokolak tetebes la'e-neu Au. Ei mesa nggei bei ta mamanene makandoon mitak Ndia halan do, mita makandoon Ndia mata-aon.f 38 Manetualain Dede'a-kokolan ta nasoda nai ei dalem mala, huu ei ta mamahele miu Au, fo Ana nadenu Au. 39 Ei mateme palisak lutu-lutuk Manetualain Susula Malalaon, huu ei dudu'a mae, nai ndia dei fo ei matonggo mia dalan, suek hambu sodak tetebes fo ta mana ketuk. Naa te Susulak sila lafada la'e-neu Au. 40 Tehuu ei ta nau mini Au mai fo maso dadik Au hataholing, suek ei hambu sodak tetebes fo ta mana ketuk.
41 Au ta paluu fo hataholi soso'uk Au. 42 Tehuu Au bubuluk tebe-tebe ei dalem mala. Huu ndia de Au bubuluk ae, ei ta maena dale susuek neu Manetualain. 43 Au uni dae-bafok ia mai, huu Au Amang to'u koasa, de nadenu Au mai. Tehuu ei ta simbok Au. Naa te mete ma hataholi fe'ek mai fo pake ndia koasa hehelin, na, ei simbok kana no malole. 44 Ei esa-esak hii nana koak. Tehuu ei ta mbali, mete ma Manetualain koa ei, do taa. Naa te Ndia ndia, Manetualain! Ta hambu seluk so bali. De mete ma ei ta mbali Ndia, na talo bee fo ei bisa mamahele miu Ndia?
45 Boso dudu'a mae, Au ndia soli salak neu ei nai Au Amang matan. Taa. Mana soli salak neu ei ndia, na ndia ba'i Musa. Naa te ei mamahehenak miu ndia, huu ndia ndia fee Manetualain Heti-heun neu ei. 46 Mete ma ei mamahele tebe-tebe miu Musa, na, neu ko ei mamahele miu Au. Huu ndia sulak la'e-neu Au. 47 Tehuu no ei ta mamahele tebe-tebe la'e-neu hata fo ana sulak, de talo bee fo ei nau mamahele hata fo Au kokolang ia? Ta dadi, hetu!”