Lamatuak Yesus no fadin nala
7
Basa boe ma Yesus asa la'ok ndule propensi Galelea. Ana ta nau neu la'ok ndule propensi Yudea, huu nai ele hambu hataholi Yahudi malanggan nala sangga tao lisa Ndia. 2 Faik ndia, hataholi Yahudi la feta ketu-kolun, fo ala lae, “Feta Teng”, deka-deka so.a 3 Boe ma Yesus fadin nala ladenu Ndia lae, “Mete ma Ka'a ia, hataholi ina-huuk leo ndiak, na, malolenak Ka'a muni Yudea muu, fo matudu aok no ta mafufunik! Fo suek hataholi mana tungga Ka'a lai ele boe oo, bisa lita dede'ak kala fo Ka'a taok kala. 4 Mete ma hataholi esa nahiik fo hataholi no'uk kala lita ndia ana selin, na, boso ana tao nafufunik. Huu Ka'a tao tanda heran mata-matak, na malolenak basa hataholi la bisa lita hata fo Ka'a taok ndia!” 5 Ndia fadin nala kokolak leo ndiak, huu sila mesak kasa ta lamahele lalan seli neu Ndia.6 Boe ma Yesus nataa nae, “Leo iak. Hatematak ia Au faing bei ta losa. Tehuu mete ma ei nau miu, na, faik bee boe oo bisa. 7 Hataholi malai dae-bafok ia, ta binci ei. Tehuu ala binci lalan seli neu Au, huu Au buka atudu basa sila tatao-nono'in nala. Huu sila dalen nala manggalauk. 8 Ita fai malole anggaman ndia, deka-deka mai so. Ela kada ei mesa nggei hene mini Yerusalem miu dei. Au bei ta uu, huu fain bei ta nandaa.” 9 Ana kokolak nate'e leo ndiak, boe ma kada Ana leo nai propensi Galelea.
Lamatuak Yesus tungga fai malole anggama Yahudi
10 Tehuu neu faik fo Ndia fadin nala la'o fo leu tungga hataholi Yahudi la fai malolen nai Yerusalem, Yesus boe oo tungga neu. Tehuu Ana neu nafufunik, suek hataholi ta bubuluk. 11 Ledo-eik fai malole nai Yerusalem, hataholi Yahudi malanggan nala lasanggak Ndia. Ala latatanek lae, “Hataholi ndia nai bee bae?”
12 Hataholi no'uk kala lakukutuk la'e-neu Ndia. Luma lae, “Ndia ndia hataholi neulauk.”
Luma bali lae, “Taa! Ndia ndia masapepekok fo nateme kedi nala hataholi no'uk.” 13 Tehuu ta hambu hataholi nambalani kokolak manggaledok la'e-neu Yesus, huu ala bii malanggan nala sila.
14 Nandaa no fai malole ndia ba'e duak, boe ma Yesus maso neni Uma Ina Hule-haladoik dalek neu. De mulai fee nanonolik nai ndia. 15 Boe ma hataholi Yahudi malanggan nala heran, de lae, “Hataholi ia ta nanoli nitak dede'a no'uk leo ita. Tehuu hatina de Ana bubuluk no'uk leo iak?”
16 Boe ma Yesus nafada sala nae, “Mamanene baa. Dede'ak kala fo Au anolik kala, ta neme Au mesa nggau mai, tehuu neme Ndia mai fo mana nadenu Au. 17 Hataholi fo tebe-tebe nau tao tungga Manetualain hihiin, na neu ko ana bubuluk, Au nanonoling huun ndia, tebe-tebe neme Manetualain mai do, kada neme Au mesa nggau mai. 18 Huu hataholi fo kada pake ndia koasa hehelin, na kada ndia sangga nadek. Tehuu hataholi fo kokolak ndoos. Ana so'u botik nadek neme hataholi fo mana nadenu ndia mai. 19 Ba'i Musa fee Manetualain Heti-heun nala neu ei. Tehuu ei ta tao tunggan. De hatina de ei masanggak dalak fo tao misa Au?”
20 Boe ma hataholi no'uk kala latane lae, “O kokolak hata ia? Fama o kamuluk ia. See sangga dalak fo sangga tao nisa O?”
21 Boe ma Yesus nataa nae, “Leo iak. Au bei fo kada tao tanda heran esa neu fai huhule-haladoik, tehuu ei basa nggei lesuha'im mala lakase'e. 22 Tehuu la'i-la'i esa, na ei tao ues neu fai huhule-haladoik, leo iak: ba'i Musa nakonda sunat heti-heun nae, mete ma hataholi bonggi ana tou anak, na, neu fai kafalun ei musi sunat kakanak ndia. Mae faik ndia nandaa no fai huhule-haladoik boe oo, ei musi sunat ndia. (Tehuu tungga teteben, na heti-heuk ndia dook lena neme ba'i Musa mai. Huu Manetualain fee heti-heuk ndia nakahuluk fee ba'i Abraham.)b 23 De mete ma sunat kakanak esa nandaa no fai huhule-haladoik, fo ta la'o lena Musa heti-heun, na, hatina de ei manggalau Au huu Au tao ahai hataholi lu'uk ndia nandaa neu fai huhule-haladoik? Ta maso neni langga utek neu, hetu!?c 24 Boso timba-tai hataholi huu dede'ak kala fo ei mita no ei matam mala. Dudu'a naluk fo timba-tai basan no malole dei, bei fo ei maketun no teteben.”
Lamatuak Yesus ndia, na ndia Karistus, do?
25 Basa boe ma hataholi hida leme Yerusalem mai latane lae, “Hataholi ia fo ita malanggan nala lasanggak kana fo sangga tao lisan, do? 26 Wei, ia ana seli maa! Huu Ana kokolak manggaledok nai hataholi no'uk matan. Tehuu ta hambu malanggan esa fo nakatema bafan. Tungga ei, na leo bee? Fama mana to'u koasa la dudu'a lae, Hataholi ia, na ndia Karistus fo Manetualain helu memak so, fo sangga nadenun mai! 27 Tehuu ndia dede'an, leo iak: mete ma Manetualain nadenu Karistus mai, na, dei fo ta hambu hataholi esa boe bubuluk Ndia neme bee mai. Tehuu ita bubuluk so Hataholi ia neme bee mai.”
28 Faik ndia, Yesus bei fee nanonolik nai Uma Ina Huhule-haladoik pasan. Ledo-eik namanene hataholi la sila kokolan leo ndiak, boe ma Ana natane sala nenik hala malii nae, “Ei dudu'a mae, ei malelak Au, ma bubuluk no teteben Au uma bee mai, do? Tehuu Au ia mai ta tungga Au hihii heheling. Huu mana madenu Au ia, tebe-tebe nai ia. Ma ei ta malelak Ndia. 29 Tehuu Au alelak Ndia, huu Au uma Ndia mai, ma Ndia ndia nadenu Au.”
30 Basa boe ma ala soba humu Ndia. Tehuu ta hambu esa bisa to'u nala Ndia, huu Ndia fain bei ta nandaa. 31 Neme hataholi no'uk malai ndia mai, hambu no'uk boe oo lamahele leu Ndia. Ala lakokola lae, “Hataholi ia Karistus, huu Ana tao tanda heran no'uk so.”
Ala ladenu hataholi leu humu Lamatuak Yesus
32 Nai hataholi makadotok kala sila laladan, hambu hataholi hida leme paltei anggama Farisi mai boe. Ala lamanene hataholi no'uk lakukutuk dede'ak kala sila la'e-neu Yesus. Boe ma lo sila malangga anggama Yahudi malanggan nala ladenu mana manea Uma Ina Huhule-haladoik hida, fo leu humu Yesus.
33 Boe ma Yesus nafada nae, “Au faing fo sama-sama ua ei ela kada faak so. Huu ta dook bali, te Au fali uni Ndia uu fo mana nadenu Au. 34 Basa dei fo ei sangga Au, tehuu ei ta matonggo. Huu Au sangga uni mamanak esa uu fo ei ta bisa tungga.”
35 Basa boe ma hataholi Yahudi malanggan nala latatanek esa no esa lae, “Meda Hataholi ia sangga bee neu? Ana neni mamanak bee neu fo ai ta bisa matonggo mia Ndia? Ana nau neu kekek nai hataholi Yahudi la fo mana leo lai nusa dea, do? Ana nau neu nanoli hataholi la fo mana pake dede'a Yunani nai ele, do? Do leo bee? 36 Ndia maksut hata fo Ana kokolak nae, ‘Ei nau sangga Au, tehuu ei ta matonggo mia Au.’ Ma ‘Au nau uni mamanak esa uu fo ei ta bisa tungga’?”
Oe maneni sodak
37 Nandaa no feta fai babasan, fo dadik fai ina-huuk nalan seli ndia, boe ma Yesus nambadeik, de nanggou nae, “Mamanene bou! See maa mada, na ela ana neni Au mai fo ninu!d 38 Mete ma hambu hataholi namahele neu Au, na, kada mai minu leo! Huu Manetualain Susula Malalaon nana sulak so nae, ‘Oe fo maneni sodak dei fo nasambumbulak kalua neme hataholi kamahelek kala dalen mai.’ Boe ma ala hambu sodak tetebes. No leo ndiak, sila boe oo fali hataholi fe'ek fo ala hambu sodak tetebes ndia.”e
39 Yesus kokolak la'e-neu Manetualain Dulan, huu basa hataholi fo mana lamahele neu Yesus, neu ko simbo Dulak ndia. Tehuu neu faik fo Yesus kokolak leo ndiak, ala bei ta simbo Dulak ndia, huu Manetualain bei ta fee. Manetualain musi so'u dema-demak Yesus, bei fo Ana fee Dulak ndia.
Hataholi la mulai lasidak huu Lamatuak Yesus
40 Hataholi no'uk lai ndia lamanene Yesus kokolak leo ndiak. Boe ma hambu luma kokolak lae, “Neu ko Hataholi ia, Manetualain Mana Kokolan fo Ana helu memak neme makahulun mai so!”f
41 Hambu luma bali lae, “Taa! Ndia ia, fo ndia Karistus, fo Manetualain tudu memak neme makahulun mai so!”
Tehuu luma bali, na ala sapa lae, “Taa bisa! Karistus ndia ta hataholi Galelea. Tetebes, hetu? 42 Huu Manetualain Susula Malalaon nana sulak nae, Karistus ndia, na mane Dauk tititi-nonosin. Nai mamana fe'ek sulak nae, Ndia ndia hataholi Betlehem, fo ndia mane Dauk nggolon. Leo ndiak, hetu?”g 43 De hataholi la mulai lasidak huu Yesus. 44 Hambu hataholi hida fo sangga humu Ndia. Tehuu ta hambu esa boe fo to'u nala Ndia.
Hataholi Yahudi malanggan nala ta lamahele neu Lamatuak Yesus
45 Basa boe ma hataholi mana manea Uma Ina Huhule-haladoik kala fo mana sangga mai humu Yesus, fali leni malangga anggama Yahudi malanggan nala ma hataholi Farisi la leu. De hataholi ina-huuk kala sila latane lae, “Wei! Hatina de ei ta mia Ndia mai?”
46 Ala lataa lae, “Awii! Ta hambu hataholi kokolak nitak sama leo Ndia!”
47 Hataholi Farisi la lae, “Heeh! Ei nana kedi nalak so. 48 Masanenedak baa! Huu ta hambu neme ita hataholi Farisi mai do, neme malanggan nala mai fo lamahele neu Ndia. Hei, hetu? Mete ma hataholi ina-huun ta namahele, na, hatina de ei nau mamahele neu Ndia? 49 Hataholi no'uk kala ia nau lamahele neu Ndia, tehuu ta bubuluk Manetualain Heti-heun. Dei fo Manetualain huku belak neu sala!”
50 Tehuu nai ndia boe hambu hataholi Farisi esa, nade Nikodemus. Ndia ndia, mai nitak neu le'odaek, fo nakokola no Yesus. Ana natane sala nae,h 51 “Talo bee? Tungga ita anggaman heti-heun, na ita taketu memak hataholi dede'an dei, do? Do, ita musi tamanene neu ndia, fo sangga bubuluk ana tao hata, bei fo bisa taketu ndia dede'an?”
52 Boe ma ala lasapalak ndia lae, “Wei! O ia hataholi Galelea sama leo Ndia, do? Hena palisak lutu-lutuk Manetualain Susula Malalaon dei! Lees neulalau fo o bubuluk mae, ta hambu Manetualain mana kokolan esa fo neme Galelea mai!”
Inak mana hohongge esa
53 [Boe ma ala latanggelak, fo basa sala fali.i