3 Yesus nataa nae, “Tetebes! Ma Au boe oo sangga afada leo iak: mete ma hataholi ta nana bonggi seluk, na, ndia ta bisa dadik neu Manetualain hataholin.”

4 Boe ma Nikodemus natane nae, “Tehuu talo bee fo hataholi bisa bonggin leo ndiak, mete ma ndia ina-huuk so!? Ana ta bisa maso falik neni inan ana manan neu kala'i duan, suek inan bonggi seluk ndia. Ta dadi, hetu!?”

5 Yesus nataa nae, “Tetebes! Tehuu Au afada leo iak: hataholi musi bonggin no oe fo dadik malalaok, ma bonggin no dulak fo dadik hataholi beuk. No leo ndiak, bei fo ana bisa maso dadik Manetualain hataholin. 6 Huu hataholi bonggin neme hataholi mai, tehuu hataholi dulan nana bonggi beuk neme Manetualain Dulan mai. 7 Boso heran, mete ma Au afada ae, ‘Ei musi nana bonggi beuk, fo hambu soda beuk.’ 8 Ita takasasaman no ani. Huu ani fumbu tungga ndia hihiin. Ita bisa tamanene liin, tehuu ta bubuluk neme bee mai, ma neni bee neu. Basa hataholi nana bonggi beuk neme Manetualain Dulan mai boe oo leo ndiak. Huu ita bisa tita Manetualain Dulan tao nala hataholi dadik beuk so, mae ita ta talelak talo bee de dede'ak ndia bisa ana dadi.”

9 Boe ma Nikodemus natane nae, “Talo bee de bisa dadi leo ndiak?”

10 Yesus nataa nae, “Wei, ka'a. Ka'a dadik neu hataholi Israel asa mese ina-huun. Hatina de ka'a ta malelak dede'ak kala sila? 11 Au afada teteben. Ai malelak dede'ak kala sila. Huu ai dadik sakasii la'e-neu dede'ak kala fo ai mita aom. Tehuu ei ta simbok no malole ai kokolan. 12 Ei ta nau mamahele neu faik fo Au afada la'e-neu dede'ak kala, fo mana dadik nai dae-bafok. Nakalenak bali mete ma Au afada la'e-neu dede'ak kala mana dadik nai lalai. Neu ko ei ta mamahele bali! 13 Ta hambu hataholi esa hene neu nasale Manetualain nai lalai. Kada Au, Hataholi Isi-isik ia, fo konda uma Ndia manai nusa sodak mai.

14 Makahulun ele nai mamana nees, ba'i Musa londa mengge liti esa neu ai lain, fo basa hataholi bisa litan, boe ma ala hambu nasalala'ek. Dede'a leo ndiak boe oo musi dadik leo ndiak neu Au, Hataholi Isi-isik ia. Neu ko ala londa Au neu ai,^a 15 fo basa hataholi mana lamahele neu Au, hambu sodak tetebes fo ta mana ketuk.

16 Huu Manetualain sue nalan seli neu basa hataholi malai dae-bafok ia. Huu ndia de Ana nadenu Au, fo Ndia Ana kisan ia, suek basa hataholi la lamahele leu Au fo boso ala dook leme Manetualain mai. No leo ndiak, ala hambu sodak tetebes fo ta mana ketuk. 17 Manetualain ta nadenu Au, fo Ndia Anan, neni dae-bafok ia mai, suek naketu hataholi huhukun. Tehuu Ana nadenu Au fo asala'e ala hataholi la leme sila sala-singgon nala mai. 18 Manetualain ta huku hataholi fo mana namahele neu Au. Tehuu naketu memak huhukuk neu hataholi fo ta mana namahele neu Au so, huu hataholi sila ta lamahele Au, fo Manetualain Ana kisan ia.

19 Matak leo iak: Manetualain haitua manggaledok mai fo nasa'a nai dae-bafok ia. Tehuu hataholi lahiik lena lasoda lai makiuk. Ala ta nau lasoda lai manggaledok, huu ala tao dede'a ta malole. Huu ndia de Manetualain nau huku sala. 20 Huu basa hataholi la tao tatao ta malole, ma ala binci manggaledok ndia. Tala hii manggaledok ndia nasa'a neu sala, fo suek manggaledok ndia boso buka nakaholak sila manggalaun. 21 Tehuu hataholi fo mana tao tungga ndoon, ala mai fo ela manggaledok ndia nasa'a neu sala. Huu manggaledok ndia natudu nae, ala tao tungga Manetualain hihiin.”

22 Basa boe ma Yesus no ana mana tunggan nala kalua leme Yerusalem mai, de ala leo tataak lai propensi Yudea. Ala salani hataholi lai ndia. 23-24 Faik ndia, Herodes asa bei ta landee Yohanis Mana Salanik neni bui dale neu. Boe ma Yohanis salani hataholi neme nggolo Ainon, dekak no nggolo Salim, huu oe no'uk nai ndia. Boe ma hataholi la lambue leni Yohanis leu fo ana salani sala.^b

25 Anggama Yahudi laena hadak esa fo tao nalalao aok, bei fo ala bole hule-haladoi. Nai ndia hambu hataholi Yahudi esa nadede'a no Yohanis ana mana tunggan nala la'e-neu dede'ak ndia. 26 Boe ma ala leni Yohanis leu, de lafadan lae, “Ama Mesen! Masaneda do taa, Hataholi ndia fo mana sangga ama neme lee Yarden selik ndia, fo ama mae, Ndia ndia, Karistus? Ndia boe oo salani hataholi! Ta hambu leni ai mai bali! Huu basa hataholi la lambue kada leni Ndia leu!”

27 Yohanis nataa nae, “Leo iak! Hataholi ta bisa tao hata esa boe, mete ma Manetualain nai nusa sodak ta soi dalak neu ndia. 28 Ei mesa nggei mamanene so, au afada manggaledok ae, ‘Au ia, ta ndia Karistus fo ita tahanin taa-taa. Tehuu Manetualain nadenu au akahuluk, fo soi dalak fee Karistus. Kada leo ndiak!’^c

29 Conto leo, mana kabin touk naena mana kabin inak. Tehuu touk ndia sakasiin fo nambadeik no ndia, dalen namahoko, mete ma namanene mana kabin touk nakokola. Yesus ndia, sama leo mana kabin touk esa. Ma au ia, sama leo Ndia sakasiin. Huu ndia de hatematak ia au daleng namahoko nalan seli. 30 Elan fo hataholi mana tungga Ndia boe lamano'u, ma hataholi mana tungga au lamaluma.”

31 Yohanis kokolak tuti bali nae, “Ana konda neme Manetualain manai lalai mai, huu ndia de Ndia ina-huun lena heni basa-basan. Tehuu au ia kada uma dae-bafok ia mai, de au sama leo basa hataholi malai dae-bafok ia. Au kokolak la'e-neu dede'ak basa faik nai dae-bafok ia. Tehuu mana konda neme Manetualain manai lalai ndia mai, neu ko Ana seli lena heni basa-basan. 32 Ana nafada la'e-neu Ndia mesak kana nitan ma namanenen so. Tehuu hataholi fo ta simbok no malole hata fo Ana nafadan so. 33 Mete ma hataholi simbok hata fo Hataholi maneme lain mai nafadak ndia so, ma ndia boe oo natudu buti nae, ndia namahele Manetualain kokolan ndia, tetebes. 34 Hataholi fo Manetualain nadenun mai ndia, nafada Manetualain dede'a-kokolan. Huu Manetualain fee Ndia Dulan neu Ndia, ma ta no too-lane. 35 Huu Amak manai nusa sodak sue Ndia Anan nalan seli. Ma Ana fee basa-basan neu Kakanak ndia liman.^d 36 De hataholi la fo lamahele leu Kakanak ndia, ala hambu sodak tetebes fo ta mana ketuk. Tehuu hataholi la fo ta lamahele leu Ndia, ma ta tao tungga Ndia dede'a-kokolan, ala ta hambu sodak ndia, huu Manetualain natudu nahele Ndia nasan fo huku sala.”