2 Onaim In nanoni' sin anmatoom nok rasin mfaun, neik reta' mnak,

3 “Hi mneen mirek-reko'! Anmui' naan akani' fini tuaf es annao ma nkani' fini nbi in rene. 4 Oras in nkani' fini te, bian anmoufun anbin ranan. Es naan ate, koorn ein neman ma nteo-nsiun nain finin naan. 5 Ma fini bian anmoufun anbin auf mafatu' re' in auf gwe mainihas. Finin naan natoron rabah. Mes natuin afu naan mainihas, 6 es naan ate, oras maans ee nsae, fiin atoors ein naan namnenen ma nmaten, natuin sin a'baa'k ein ka ntaman ntean fa auf gwe in a'pinan.

7 Fini bian anteni' nmoufun anbin huu ma'aika'. Rarit huu ma'aika' naan anneo ma nakiin niis finin naan, tar antea ka bisa napunin fa. 8 Ma fini bian anmoufun nbin auf afa'. Finin naan natoron, ma na'naen tar napunin. Fini bian nasuuf no bo' teun, bian no bo' nee, ma bian no nautn es.

9 Onaim sekau nneen ma nheek naan reta' ia in a'moufun, maut he in nateenb ee nnao nkoon.”

10 Rarit oras Nai' Yesus anmes-mees, In atoup noin' ein tuaf bo'es am nua, nok atoni' bian antein re' anneen niit In reta' naan, neman he natefan nok Ne. Sin antotin henati' In natoon neu sin reta' naan in a'moufun. 11 Nai' Yesus nataah sin am nak, “Natuin hi mroim he mihiin Uisneno In Aprenat batuur-batuur, es naan ate, Au utoon ki reta' naan in a'moufun. Mes neu tuaf bian, Au unoni' sin 'eik reta'. 12 Atoni' bian sin nahuum on re' saa' re' Uisneno In mafefa kninu' antui niit am nak,

13 Rarit Nai' Yesus anfei oten na'ko reta' naan am nak, “Karu hi ka mheek fa reta' ia in a'moufun, nok ranan mee, he hi bisa mheek reta' bian sin a'moufk ein? 14 Onaim reta' ia in a'moufn ii on nai: akani' fini naan, es re' tuaf re' nsaksii ma natoon Uisneno In Kabin ma Prenat. 15 Finin re' anmoufun anbin ranan, tar antea koorn ein anteo-nsiun nain sin naan, esan re' tuaf-tuaf re' anneen Uisneno In Kabin ma Prenat. Mes ka 'roo fa te, niut reu'f ein sin a'naak kou' gwe neem ma nasiik naan Kabin ma Prenat naan na'ko sin neek ein. 16 Finin re' anmoufun nbin auf mafatu', esan re' tuaf-tuaf re' anneen ma antoup Kabin ma Prenat naan nok neek marinet. 17 Mes Kabin ma Prenat naan ka na'baa' fa. Es naan ate, in ka ntahan fa 'roo anbi sin neek ein. Ma oras atoni' bian nasusab sin, natuin sin antoup Kabin ma Prenat naan, sin nporin nain Kabin ma Prenat re' naan. 18 Finin re' anmoufun nbin huu ma'aika' in a'tnanan, esan re' tuaf ein re' anneen anrair Kabin ma Prenat naan. 19 Mes sin ntaisibun mainenu' nok rasi huma'-huma', he sin nharineb sin tuak ein. Es naan ate, taisibu huma'-huma' naan, es re' ansiu' napoitan Kabin ma Prenat naan na'ko sin neek ein, onaim Kabin ma Prenat naan ka nafua fa saa'-saa'. 20 Ma finin re' anmoufun neu auf afa', esan re' sin re' anneen ma antoup Kabin ma Prenat naan, rarit natuin Uisneno In a'romin. Rarit sin nmoe' 'moe' areokt ein, on re' finin re' nafuan. Mo'et bian nasuuf no bo' teun, bian no bo' nee, ma bian no nautn es.”

21 Nai' Yesus na'uab piut na'ko koof' ee in tunan. In nfee reta' es anteni' mnak, “On mee! Hi miit miit, ai' kaah, karu atoni' nout pauk ana', rarit antoeb je npaek a'kora'? Ai' natuun ee nbi haark ee in nupun. Ka tiit fa fe', ai'? Karu natuun ee nbi naan, in ka npiin fa gwen. Atoni' ro he natunu' paku nbi bare 'ratan he npiin.^c

22 Nok ranan naan, rasi re' nahunu te ma'koro', of mamnita'. Ma saa' re' oras ia ka mahini' fa, of mahini'.^d 23 Sekau es re' anneen ma anheek naan reta' ia in a'moufun, maut he nateenb ee nnao nkoon.

24 Mitenab mirek-reko'! Karu hi mnilei atoni' in a'mo'en, atoni' bian of annilei ki on naan msa'. Uisneno of annilei ki nneis na'ko naan amsa'.^e

25 Karu sekau he naim Uisneno In romin batuur-batuur ate, in mahiin ee of nafaof gon piut. Mes tuaf re' ka nrae natuin fa Uisneno In romin, in moon gwe of nafaof gon piut amsa'.”

26 Rarit Nai' Yesus na'uab antein am nak, “Uisneno In Apreent ii na'nae ma nsaotg on piut, on re' finin re' mapone' anbi atoni' in rene. 27 Maski atoni' naan anfain neu in umi, ma fai-manas in ntuup ma nfeen, in nnikan nain finin naan. Mes finin naan natoor ma na'naen piut. 28 Finin naan anmonin kuuk anbin afu, anmurai natoor, nasufan, ma napunin. 29 Karu maak ee namnatu te, in tuan ee suma neem he noun gwah. Uisneno In Apreent ii on naan amsa'. Are' saa'-saa' ii, Uisneno es re' anmeup sin.”^f

30 Rarit Nai' Yesus na'uab antein am nak, “Au 'fee 'teni' ki reet es on nai. Uisneno Iin na, un-unu' te sin fauk aah, mes na'ko neno neu neno, sin nma'baab ok piut ma amfau reu'f ein. 31 Naan namnees on re' fini re' ana krisi' nbi po'on. 32 Karu hit tseen fua ana krisi' naan, in na'nae njair hau kou' re'uf nbi po'on naan. Tar antea koorn ein neman ma namin mafo' anbin naan, ma nakuun ein.”

33 Nai' Yesus nanoni' sin anpake cara on re' naan, natai nok sin hinit. 34 In biasa npaek reta' karu In nanoni' tuaf bian sin. Mes karu In nok In atoup noin' ein, In natoon are' reta' naan sin a'moufk ein.

35 Maans ii nmaeb jen, mes Nai' Yesus anbi koof' ee tuun ee fe'. Ma In nreun In atoup noin' ein am nak, “Iim aar kit atraak teu neof gwe panin.”

36 Rarit sin nsaen kofa' bu'-bua' nok Nai' Yesus. Ma sin nnao nasaitan too mfaun ein anbin naan. Mes bian ansaen nbin kofa' bian sin. 37-38 Oras naan Nai' Yesus antao In a'nakan anbi aka'nunu' ma ntuup anfiin anbi koof' ee in kotin nanan. Sin annaon ka 'roo fa te, ain kou' gwe neem. Ma oikn ein anpesan sin, ma oe je ntaam anbi Nai' Yesus sin kofa', tar antea aar akre'o te naheun. Onaim atoup noin' ein namtau nmaten. Ma sin neem anpoo' nafeen Ee mnak, “Aam! Amfeen fe'! Hit he treem atmaet jen! Mes Ho ka mfairoir kit fa!”

39 Anneen on naan ate, Nai' Yesus anfeen ma ntaar anin am nak, “Musnaas nai!” Rarit In naprenat oikn ein naan am nak, “Mi'tena' nai!” Oras naan, anin naan nasnaas nain, ma oikn ein naan na'teen ein nanin. 40 Rarit Nai' Yesus nakain In atoup noin' ein am nak, “Nansaa' am es hi mimtau baiseke' on naan? Hi ka mmui' fa rasi fnekat meu Kau, oo?”

41 Sin aar sin namtaun ma nsanmakan. Ma sin na'uab ein am nak, “In re' ia, sekau? Tar antea anin ma oikn ein sin natuin In aprenat!”